Yọọn 16
16
1 “Ami idọkkọ afịd ami, mbaak ndufo idiwuọ ikpọñ usʌñ. 2Eyaebịn ndufo esio ke sinakọk, ke akpanikọ ini ayaadi awo ake adodo adiwot ndufo adikere ke inam utom Abasi. 3Ammọ adinam mme uto ñkpọ ami sia ammọ idiọọñọke Ete me ami. 4Ami mmidọkkọ ndufo mme ñkpọ ami, mbaak ini amaakem ndufo etoiyo ke mmaidʌt utọñ. Ñkebakka idọkkọ ke akpa sia mmọdo ñkeba mme ndufo. 5Idahami, ami ñyaanyọñ mbịne anye a-akendọññọ miin, ado ndufo ndomokeed imbịppe ibo ‘Abiika uke?’ 6Utu ke ado, esịd ndufo ayọhọ mme mfʌhọ sia mmetañ mme ikọ ami inọ. 7Ado ke ataa akpanikọ ami ntañ inọ ndufo, ami ñka ke ufọn ndufo. Ami mmiikpọññọ ndufo, Anọitem idiidieghe ibịne ndufo; ado mmaaka, ami ñyaanọ anye isọk ndufo. 8Anye amaadi, anye ayaabiom mbon ederimbod ikpe ke idiọọkñkpọ ye unenido ye ubiireikpe: 9ke ntak idiọọkñkpọ, sia mme awo innịmme miin ke akpanikọ; 10ke ntak unenido sia ami ñyaanyọñ mbịne Ete, ndin ndufo idiiñkịtte miin aba, 11ñko ke ntak ubiireikpe sia ayịn abọọñ isọñ ami aba ke ubiomikpe.
12 “Nsʌk nnenie umiañ ñkpọ adineme inọọ ndufo, a-awakka akan se ndufo ediikan iyọ idahami. 13Ado anye, Sịbidịd akpanikọ amaadi, anye ayaidat ndufo iwọt usʌñ afịd akpanikọ. Anye idiitañña ikọ idem amọ, aditañ se anye akop kpọd, anye ayaidọkkọ ndufo se idiidi ke ini iso. 14Anye ayaannọ miin ubọọñ sia anye ayaadat se into miin aben iwọt ndufo. 15Afịd se inie Ete annie miin. Ntak ado anam ami mbo ke Sịbidịd ayaaben afịd se into miin iwọt ndufo.”
Mfʌhọ mme mbed ayaakappa idaara
16Akema, Yisọs amaabo ammọ ate “Ke etək-etək ini ndufo idiñkịtte miin aba, ke etək-etək ini ñko eyaemaana eñkịt.”
17Usʌk mme mbed emaebo keed aken, “Awuọñọ die anye adibo, ‘Ke etək-etək ini ndufo idiñkịtte miin aba, ke etək-etək ini ñko eyaemaana eñkịt,’ mme adibo, ‘Sia ñka mbịne Ete?’ ” 18Ammọ esʌk ekọbọ adibịp, “Nso-o ke anye atañ abaña ke adibo ‘ke etək-etək ini’? Iñwañake ñnyịn se anye atañ abaña.”
19Yisọs amaadiọọñọ ke ammọ eyem adimaana ibịp imọ ibaña mme ñkpọ ami, ndin anye abo ammọ ate, “Ndufo ebịp emọ-emọ aken se ‘ke etək-etək ini ndufo idiñkịtte miin aba, ke etək-etək ini ñko ndufo eyaemaana eñkịt awuọñọ?’ 20Ke ata akpanikọ ami ntañ inọ ndufo, ndufo eyaetuaha enyʌñ efʌhọ ke ini mbon ederimbod ediidaara. Ndufo eyaefʌhọ ado mfʌhọ ndufo ayaakappa ado idaara. 21Awonwaan uman akop ubiak sia ini uman amọ akem, ado ayịn amaamamana anye afre abaña ubiak ado, ataa ntak idaara ke ayịn amana adʌk ederimbod. 22Ukem-ukem ami ke ado mme ndufo, idahami ado ini mfʌhọ ndufo, ado ñyaamaana ikịt ndufo ndin ndufo eyaedaara, idiibaaha awo ake adikan iben idaara ndufo ifep. 23Ini ado amaakem, ndufo idimbịppe ñkpọ ba keed. Ke ata akpanikọ ami ntañ inọ ndufo, Ete mmi ayaainọ ndufo ñkpọ ake adodo e-ediibịp ke anyịñ mmi. 24Tutu ami, kpaanam ndufo imbịppe ñkpọ ndomokeed ke anyịñ mmi. Ibịp ke eyaebọ, ndin idaara ndufo ayaayọhọ.
25 “Akpesʌk ado ami ntañña ikọ inọ ndufo ke ñke, ado ini ayaadi a-ami ndiitoppo ñke aba ado ndiitañ anwa-anwa mbaña Ete mmi inọ ndufo. 26Ini ado amaakem, ndufo ediibịp ñkpọ ke anyịñ mmi. Mbooho ke ami ndiibịp Ete inọ ndufo. 27Iyoo, Ete ke idem-idem amọ ima ndufo, sia ndufo ememma miin enyʌñ enịm ke ami ñketo Abasi ndi. 28Ñketo Ete ndidʌk ederimbod; idahami ami ñyaakpọñ ederimbod ntịmme mbịne Ete mmi.”
29Mme mbed amọ emaebo anye ete, “Idahami, afo atañ ikọ anwa-anwa, utoppo ñke aba. 30Idahami ñnyịn imikịt ke afo amediọọñọ afịd ñkpọ, ke ufọn ibaaha awo adubịp fiin mbịme. Ami anam ñnyịn inịm ke afo ato Abasi adi.”
31Yisọs amaabọọrọ, “Ndufo emenịm ndin! 32Ado ini ayaadi, anyʌñ adidi ama, a-ndufo ediisuana, anie afañ awaak adʌk. Eyaefeeñe eñkpọñ miin ikpọọñ. Ado ami mbaaha ikpọọñ, sia Ete mmi mmọdo mme ami.
33 “Ami idọkkọ ndufo mme ñkpọ ami, ma ndufo enie emem ke ami. Ke ederimbod ami ndufo eyaekịt mfịna. Ado isọñ esịd! Ami mmekan ederimbod.”
Избрани в момента:
Yọọn 16: NAAM
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.