Utom 3
3
Bita akọk mbʌñọ abeeñe-ebeeñe
1Usen keed Bita ye Yọọn emaeka tembịd ke ini ubọñ akam, ke ñkanika ita uweemeayo. 2Nte ammọ ekekpereke tembịd, ammọ emaekịt awo a-akemanake mbʌñọ nte eben eka inuaatob tembịd e-ekekoodo Uyaiya Inuaatob, nọ anye atie do abeeñe mme awo e-edʌkkọ mme afe tembịd ñkpọ. 3Anye amaabeeñe Bita ye Yọọn akʌk ke ini anye akịtte nte ammọ ebiidʌk tembịd. 4Bita ye Yọọn emaesak anyen ese anye. Ndin Bita amaabo anye, “Nekke ise ñnyịn.” 5Ndin awo mbʌñọ ado anekke ase ammọ, akere ke ammọ eyainọ ñkpọ.
6Akem Bita amaabo anye, “Ami nnieeghe sịrifa me kood a-mbooho unọ fiin, ado se nnie ke mbo unọ. Ke anyịñ Yisọs Krais ake Nasared, dakka da saña.” 7Do ndin Bita amaanyan ubọk udom abenne awo mbʌñọ ami ke anyọñ, kpa ataa idahado, ikpad ye itọñ ukod ete ado amaasọñ. 8Anye atamma ada ke ukod atọọñọ adisaña. Anye amaakeene adʌk mme afe tembịd ye ammọ, asaaña, ataam anyʌñ atooro Abasi. 9Idem amaanekke akpa mme awo ke ini ammọ ekịtte nte anye asaña anyʌñ atooro Abasi, 10ammọ emaetoiyo ke anye ado kpa awo a-akesitieehe ke inuaatob tembịd e-ekoodo Uyaiya Inuaatob, ndin idem amaakpa ammọ abaña se ikitịppe inọ anye.
Bita atañ ikọ anọ mme andida nse
11Ke ini awodeen ami akesʌkkọ amʌm Bita ye Yọọn akama, afịd awo emaefeeñe eka ke afe Sọdọmọn ye akpọsọñ ñkpaidem. 12Bita akekịt ami, anye amaabo ammọ: “Nditọ Isred ñnyịn, ntaha ikpaaha ndufo idem-e? Ntaha ndufo iseehe ñnyịn nte ebo ke ato ke adudu me nti uwem ñnyịn ke ñnyịn inam awodeen ami asaña?” 13Abasi Ebraham, Aisik, ye Yekọb ye Abasi mme eteete ñnyịn anam ami anọ ayịn amọ Yisọs itooro. Ndufo ekeben anye enọ ebo yak ewot, emaesịn anye ke iso Baided, akpesʌk ado nte anye akenyịmmeke adisaana Yisọs ñyaak. 14Ndufo emaesịn Eti ye Adisana Awo, etịmme ebo yak esaana awodawo eyaak. 15Emaewot andinọ uwem ado Abasi amaanam anye aset ke ñkpa, nte ñnyịn idooho mme ntiense ibaña. 16Awo a-ndufo ekịtte mi enyʌñ ediọọñọ, akop nsọñidem ato ke mbuọdidem ke anyịñ Yisọs. Mbuọdidem a-atooho ke anyịñ Yisọs anọ anye ata nsọñidem, nte afịd ndufo ekịtte.
17“Nditọ Isred ñnyịn, idahami ami mmediọọñọ ke ndufo ekenam ñkpọ ami ke unana adidiọọñọ kpasʌk nte mbọọñ e-ekikarake ndufo ekenamma. 18Ado ami ado naña Abasi akesaña anam se anye aketañ ato ke inua afịd mme brọfed asu, abo ke Mesaya ayaabọ ufen. 19Ikappa esịd, ndin, inyʌñ itịmme ikeene Abasi, ma esọọk ndiọiñkpọ ndufo esio, ma ini adidemme ado ato Abọọñ, 20ñko ma anye anọ Mesaya, e-ekemeke esio enịm inọ ndufo, adooho Yisọs. 21Anye ayaaba ke Anyọñ tutu ini akem a-Abasi adinọ afịd se anye akeanwọñọke usen edem ato ke mme ndisana brọfed amọ. 22Sia Moses akebo, ‘Abọọñ Abasi ndufo ayaasio brọfed a-adiiba nte ami ke atu ndufo; ana ndufo ekpañ utọñ ekop afịd se anye aditañ inọ ndufo. 23Ndin awo a-ammiikpañña utọñ inọ anye, eyaebịne anye esio afịd-afịd ke atu ndufo.’
24“Ke akpanikọ, afịd mme brọfed, tọọñọ ke Samued, e-emaeketatañ ikọ ebaña, emaebak etañ ebaña mme usen ami. 25Ndufo edo mme adiaakpa mme brọfed ado, emenyʌñ esịne ke enwọñọ a-Abasi akenamma ye mme eteete ndufo. Anye akebo Ebraham, ‘Nyaadiọñ afịd awo ke ederimbod ato ke mfịd idịb mfo.’ 26Ke Abasi amaakenam ayịn amọ, Yisọs, aset ke ñkpa, anye aketo anọ anye adidiọñ ndufo, ke adinam ndufo ekappa ekpọñ mme usʌñ idiọọk ñkpọ.”
Избрани в момента:
Utom 3: NAAM
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.