Utom 1
1
Eben Yisọs edọọk abio ubọọñ Abasi
1Ke akpa ñwed mmi, Tiofidọs, ami mmaawet mbaña afịd se Yisọs aketọọñọ anam anyʌñ akpeeb 2tutu usen ekebenne anye edọọk ke anyọñ ke anye amaakedọkkọ mme abọsịd a-anye akemekke ato ke Adisana Sịbidịd se ammọ ediinam. 3Ke ini anye amaakebọ ukuud ama, anye amaawọt ammọ idem ye mme uwak utom idiọọñọ e-mmiidooho se efafaaña, ke emọ mmọọiba ke uwem. Anye amaawọt ammọ idem ke idaha ñkpọ nte usen aba anyʌñatañ ikọ abaña abio ubọọñ Abasi. 4Ini keed, ke ini anye akesʌkkọ adia ndidia ye ammọ, anye amaanọ uyo abo, “Ikiikpọñ Yerusedem, ado itie ibet enọ e-Ete mmi akenwọñọke inọ ndufo, a-ndufo ekekoppo ento miin. 5Sia Yọọn akedat mmọọñ anịm uduọkmmọọñ, ado eyainịm ndufo uduọkmmọọñ ke Adisana Sịbidịd ke mme usen ifañ a-abooho idi.”
6Ndin, ke ini ammọ ekebaññake itie keed, ammọ emaebịp anye ete, “Abọọñ, afo ayaatịmme ayaak ukara abio ubọọñ anọ Isred idahami ndin?”
7Anye amaabọọrọ ammọ ate, “Inaaha ndufo ediọọñọ mme ini me usen e-Ete akenịmme ke adudu amọ. 8Ado ndufo eyaebọ adudu ke ini Adisana Sịbidịd amaadidoro ndufo ke idem; ndufo eyaenyʌñ edo mme ntiense mmi ke Yerusedem, ke afịd Yudia ye Sameria, tutu asịm ke akpatre ederimbod.”
9Ke anye amaaketañ ikọ ami ama, emaeben anye edọọk anyọñ ke iso ammọ tutu ntọñanyọñ afʌk anye, ammọ ikịtte anye aba.
10Ke ammọ esʌkkọ ewuuk anyen ese anyọñ naña anye adọọk, ete ise awo iba e-ekesịneke mfia afọñ edida ke ñkañ ammọ. 11Ammọ emaebịp mme mbed mbịme ete, “Ndufo mbon Kadidi, nsinam ndufo edudak mi ewuuk anyen ese ikpaanyọñ? Yisọs e-ebenne ikpọñ ndufo mi edọọk ke anyọñ, ayaatịmme adi ke ukem-ukem usʌñ a-ndufo ekịtte naña anye asaña adʌk abio ubọọñ Abasi.”
Emek Matayas adat itie Yudas
12Akekem, mme abọsịd emaetịmme ekpọñ Abod Ọdif enyọñ edi Yerusedem, a-akedooho isañ usen Sabad keed. 13Ammọ ekediwuọ, ammọ emaedọọk ufọk anyọñ eka ubeed ammọ ekebaagha. Mbon e-ekebaaha do ekedoñño:
Bita, Yọọn, Yemsi ye Andru;
Fidib ye Tọmọs;
Batodomiu ye Matiu;
Yemsi ayịn Afiọs, Saimọn amaidʌñ Sidọd ye Yudas ayịn Yemsi.
14Afịd ammọ ye mme ibaan ye Mmeri eka Yisọs, ye nditọeka amọ ideen emaeboho itie keed ke ubọñ akam afịd ini.
15Ke mme usen ado, Bita amaadakka ada ke ufọọd mme andinịm ke akpanikọ (e-ekeyọhọke ñkpọ nte awo ikie ye edịb) 16anyʌñ abo ate, “Nditọete mmi, ibaan ye ideen, ana ikọ Abasi asu kpa naña Adisana Sịbidịd amaaketañ ke usen edem, ato inua Defid ake abañake Yudas a-akedatta mme andikimʌm Yisọs usʌñ. 17Sia emaebat anye nte keed ke atu ñnyịn, anye amaanyʌñ anie udeme ke iso utom ñnyịn.”
18(Yudas amaadat akʌk idiọọkñkpọ amọ adep ikọd; do ke anye akeketo iwuod aduọ, mme nsia amọ enyʌñ ewuọọñọ. 19Afịd awo ke Yerusedem emaekop ebaña ñkpa ami, do ndin emaeben itie ado ekood ke usem ammọ Akeddama, ado awuọ Inwañ Iyiib).
20Bita amaabo, “Sia, emaewewet ke ñwed mme Saam:
“ ‘Yak itie amọ ado ndoon;
yak awo ndomokeed akuudʌñ ke ndo,’
ñko,
“ ‘Yak awo mfen adat itie udaiso ke utom amọ.’
21Ke ntodo, afọn adimek keed ke atu mbon e-ekesʌkkọ eba ye ñnyịn afịd ini Abọọñ Yisọs akebaaha ye ñnyịn, 22tọọñọ ke ini uduọkmmọọñ ake Yọọn tutu asịm ini e-ekebenne Yisọs ikpọñ ñnyịn. Sia ana keed ke atu ammọ ado ntiense ye ñnyịn ke abaña adised Yisọs ke ñkpa.”
23Ndin ammọ emaesiak anyịñ awo iba, Yosef a-akekereke Basabas (e-ekenyʌññọ esikood Yọstus) ye Matayas. 24Ammọ ndin emaebọñ akam ntom, “Abọọñ, afo adiọọñọ afịd esịd awo, iwọt ñnyịn ke atu awo iba ami, anye a-afo amekke 25abo adidat itie iso utom abọsịd, ake Yudas akewuọọhọ akpọñ aka usʌñ amọ.” 26Ndin, ammọ emaesịn afia, ndin afia amaasana Matayas; ke ntodo emaedat Matayas edian ke atu mme abọsịd duob ye keed.
Избрани в момента:
Utom 1: NAAM
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.