Kananet 49
49
A̱mu̱yu̱k Ya̱ko̱bo̱ dooli ciginnek
1Utu zin Ya̱ko̱bo̱ logoz ciginnek kar kizek nogo ne: I̱vi̱ta̱ u̱lu̱tte̱ ngatu kar anna ku̱du̱wa̱u̱ng kaal cik atin ovvo a̱vvu̱ i̱i̱nya̱we̱ cik atin ovvo a̱vvu̱ ko̱.
2“U̱lu̱tte̱ ngatu kar izikto, logoz cik Ya̱ko̱bo̱;
Iziyyet zoz ci be̱e̱ti̱nno̱ng Israil.
3Reuben, i̱nne̱t ci e̱e̱ni̱ a̱bu̱ cinanni,
i̱nne̱t ci e̱e̱ni̱ doiz cinanni o̱o̱wu̱,
i̱nne̱t ci ogoni kaal ju̱rru̱m, i̱nne̱t ci anyai doiz.
4Ogonni i̱nna̱ ki i̱yo̱ko̱ tawani ci a̱ri̱k ko̱, iróng atin i̱nna̱ ngen ogonni kaal ju̱rru̱m,
eci i̱nna̱ uuwu rok kwe̱e̱n ci baatunne,
u̱tu̱wu̱lu̱ rok nginti koonge anna.#49:4 U̱tu̱wu̱lu̱ rok nginti koonge anna: IkebKananet 35:22.
5E̱e̱ggi̱nnu̱ niga Si̱mo̱ne̱ ki Le̱vi̱ gotonen
e̱e̱ggi̱n illanya ciggo̱k turet cik jo̱o̱ra̱k.
6Iróng anna korongi ki̱tto̱ nginti aavtte nege,
iróng anna korongi ki̱tto̱ nginti alutene nege,
eci u̱ru̱we̱t nege ol mozinte cinne̱ng#49:6 U̱ru̱we̱t nege ol mozinte cinne̱ng: IkebKananet 34:1-29.
kar ku̱du̱lle̱t o̱le̱nya̱ ming orong nege.
7Kotori zin anna mozinet cinne̱ng gerze oroot ko̱,
okko burnenet nong cinne̱ng gerza oroot!
Kazanni atin anna nogo ngati Ya̱ko̱bo̱
kar kazan nogo Israila.
8Ju̱da̱, ovvo atin gotonoggu inati i̱nne̱ta̱;
aave atin a̱zzi̱ti̱ cunne eleme ci mo̱ddo̱ cigunnek;
ovvo atin logoz cik baatunne akanneki i̱nne̱t u̱zu̱ngti̱nne̱.
9Oh Ju̱da̱, ogonni i̱nna̱ ki joroni ci maawo;
oboda ngati a̱gga̱me̱ enne elegje, ngeranni.
Ogonni i̱nna̱ ki maa ci aluc zo̱o̱ kar ka̱ta̱ngu̱ lo̱o̱ta̱,
ogonni i̱nna̱ ki ngazizi ci orong kitingawe nonno?
10Iróng atin alaanzet ungnek Ju̱da̱ lo̱o̱c,
icima keet ci alaanzetu aave zone ciginnek,
zee ki̱ki̱ya̱k enne manyi alaanzet
kar ngo̱o̱li̱ne̱t ci lo̱o̱cco̱k do̱o̱k een cinne.
11Ecebek atin enne zi̱gi̱r cinne keet ci een vi̱no̱,
kar mo̱o̱le̱t cinne kecebek alawoc ci ahala enne;
uuny atin enne ru̱u̱ma̱ni̱ ciginnek merte ci ma̱ri̱,
kar ru̱u̱ma̱ni̱ wak u̱u̱ntti̱k ko̱ bi̱ye̱te̱ cik keet ci een vi̱no̱.
12Ovvo ebere ciginnek o̱lle̱te̱ ter kommogit vi̱no̱,
ovvo nyigita ciginnek voore per kommogit i̱ra̱.
13Zebulun, abai atin i̱nna̱ ti̱ti̱me̱ ci liil ci a̱ddi̱ki̱re̱
kar ize e̱e̱t ci ebei i̱be̱t;
okko atin lokore cunne ki Sidon.
14Issachar, oroboi atin i̱nna̱ kiwagon zi̱gi̱ri̱ ci okkomi
ci adunge lo̱o̱ta̱ orgene ci lodet rama.
15Ming acin enne abunna nginti oonge enne ko̱
kar bo̱do̱k a̱zi̱ze̱ looci neci oroot,
agingek enne i̱ba̱tti̱ ciginnek kaal ne̱k amuny nonno ke̱
kar kelema li̱ngli̱ngo̱n ci adangek ol nonno.
16Dan, abal atin enne ol ciginnek ju̱rru̱m
ki booriti co̱de̱ ci Israilo.
17Ogon atin Dani kiwagon uwat goola abanyca,
ki uwat goola,
wak engedet vartange zo̱o̱
kar zin e̱e̱ti̱ ci otod vartangec ko̱ ku̱yu̱we̱ eci vu̱rrto̱.
18Korongi anna ti̱ri̱ze̱ne̱t cunne, Manyi Ta̱mu̱ta̱dde̱n.
19Gad, ooryi atin mo̱ddo̱ i̱nne̱ta̱,
ma̱i̱je̱ atin i̱nna̱ ooryi nogo zoone cigge̱k.
20Asheri, anyai atin i̱nna̱ da̱i̱ne̱t cik meelek;
aanyik atin i̱nna̱ da̱i̱ne̱t cik abunna alaan.
21Naphtali, ogoni atin i̱nna̱ kiwagon megeri ci owo labak
ci a̱rri̱ta̱ megerwa cik a̱zi̱ze̱.
22Yosevo, ogoni i̱nna̱ kiwagon keet#49:22 Keet: Atali olli Ya̱u̱do̱ keet zo̱ze̱ ci o̱ya̱u̱ ciginnek ming amacca ol kize merte ci een vi̱no̱. Azi Ta̱mu̱ta̱dde̱n een olli Israilo kize keet ci riili bali ariri enne kar abunna ming a̱rri̱ta̱ o̱ya̱u̱. A̱gga̱ zin ol cik een demezyak ming ozoz Ye̱su̱ zoz ci obod ki nogo. IkebIsaya 5:1-7. ci een vi̱no̱ a̱bbi̱re̱,
keet ci a̱bbi̱re̱ aave e̱be̱re̱ce̱ ci maamu ojonun,
atanak alawo ciginnek ottod a̱lu̱wa̱.
23Imma mozinta, ooryi bali ol cik anyak lanit i̱nne̱ta̱;
Ovoci nege i̱nne̱ta̱ mootiza.
24Imma laani cunne abile ṯop,
ovvo azzina cigunnek e̱re̱ye̱ ju̱rru̱m,
eci zo̱ze̱ ci a̱zzi̱t ci Manyi wa O̱de̱ Ya̱ko̱bo̱ wa anyak Komiz do̱o̱k,
eci zo̱ze̱ ci Tuwayoit, Bee ci Israilo,
25eci zo̱ze̱ ci Ta̱mu̱ta̱dde̱n ci baatunne, ci eelanni i̱nne̱ta̱,
eci zo̱ze̱ ci Manyi wa anyak Komiz do̱o̱k, nonno ci a̱mu̱yu̱ki̱
ma̱yu̱we̱nte̱ ci a̱kku̱ ta̱mu̱-kenga,
ki ma̱yu̱we̱ne̱t ci aave lo̱o̱ta̱ ecito,
ki ma̱yu̱we̱ne̱t ci eezit ki momu.
26Ommog ma̱yu̱we̱ne̱t ci baatunne
ma̱yu̱we̱ne̱t cik biyen balik reentik ke̱,
ommog kaal cik abunna a̱vvu̱ biyene balik reentik.
Anyik ma̱yu̱we̱ne̱t ne̱ko̱ do̱o̱k ka̱vvu̱to̱ oowe ci Yosevo,
anyik ka̱vvu̱ oowe ci do̱le̱c ci aragiz alaanzet orgene ci gotonoggi.
27Benjamin, ogonni i̱nna̱ kiwagon u̱du̱ma̱nti̱ ci adak magiz;
nge̱rre̱t, adak enne e̱le̱gi̱t,
okko yo̱mo̱na̱, enger enne i̱di̱ng neci.”
28E̱e̱ggi̱n ne̱ko̱ do̱o̱k booryyok cik Israilo omoto ki rama, kar zin ne̱ko̱ een zoz ci u̱du̱wa̱k be̱e̱ti̱nne̱ng nogo baling a̱mu̱yu̱k enne nogo co̱de̱ co̱de̱. Aanyik ngenngene ma̱yu̱we̱ne̱t ci eleno nonno.
Daiz ci Ya̱ko̱bo̱
29Aanyik zin enne nogo ti̱lo̱wi̱ne̱t cu: “Ize ojon kar anna kuk ngato ol cigannik. A̱da̱ye̱a̱ng annit ki baba ngi̱lo̱m co̱de̱, ci bali een ci Ephroni e̱e̱t ci Hittite, 30aave ngi̱lo̱mi̱ ma̱ne̱ ci Machpelah, ojono ki Mamre Kanaana, uuta bali Aburahami ngin neci ngati Ephron wa een Hittites kize ilomet ki ma̱na̱. 31A̱da̱ye̱ zin Aburahami ki ngaa cinne Sarah nginati, ki bo̱do̱k I̱sa̱ko̱ ki ngaa cinne Rebekah, kar nginati kadaweya anna Le̱ya̱. 32U̱tu̱ya̱i̱ ilomi ki ma̱na̱ do̱o̱k ngati ol cik een Hittites.”
33Baling edeca Ya̱ko̱bo̱ ti̱lo̱wi̱ne̱t logoz ciginnek, odong zo̱o̱ ciginnek kaarik kwe̱e̱n, kar zin ketteda zinin, uk ngato ji̱ji̱ti̱gi̱nne̱k.
Избрани в момента:
Kananet 49: tex
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018, Wycliffe Bible Translators, Inc. All rights reserved.