Génesis 30
30
1Raquelqa Jacobpaj mana wawayoj kayta atispa, ñañan Leawan jap'inakorqa. Chantá qosan Jacobta nerqa: Wawallichiway, manachayqa wañusaj, nispa. 2Jacobtajrí phiñakuspa, payta nerqa: Noqaqa mana Dioschu kani. Pay wawayoj kanaykita mana munanchu, nispa.
3Chantá Raquel Jacobta nerqa: Uyariway, kay kamachiy Bilawan puñuykuy. Pay wawayoj kanqa chayqa, noqapis wawayoj kashayman jina kanqa, nispa.
4Ajinata Raquelqa qosan Jacobman kamachin Bilata ujnin warmin kananpaj qorqa. Jacobtaj paywan puñuykorqa. 5Jinataj Bilaqa Jacobpaj wawayoj karqa. 6Chantá Raquel nerqa: Kay wawaj sutenqa “Dan” kanqa, imajtinchus Tata Dios mañakusqayta uyarispa, uj wawata qowan. Ajinata ruwaspa, justiciata ruwawan, nispa.
7Chay qhepata Bilaqa ujtawan Jacobpaj wawayoj kallarqataj. 8Chantá Raquel nerqa: Ñañaywan sinch'ita jap'inakuni, atipanitaj. Chayrayku kay wawaj sutenqa “Neftalí” kanqa, nispa.
9Leapis manaña wawayoj kayta atispa, kamachin Zilpata ujnin warmin kananpaj Jacobman qorqa. 10Leaj kamachin Zilpataj Jacobpaj wawayoj karqa. 11Chayrayku Lea nerqa: Kusiy kayqa. Chayrayku wawaj sutin “Gad” kanqa, nispa.
12Chay qhepata Leaj kamachin Zilpaqa Jacobpaj ujtawan wawayoj kallarqataj. 13Chantá Lea nerqa: Kusikunaypaj kayqa. Kunanqa warmikuna niwanqanku kusisqa kasqayta. Chayrayku wawaj sutenqa “Aser” kanqa, nispa.
14Uj kuti Leaj kuraj kaj churin Rubenqa trigo oqhariy tiempota qallpaman rerqa. Chantá chaypi mandragoraj poqoyninta tarispa,#30.14 Mandrágora poqoy: Ñawpajta yuyaj kasqanku mandrágoraj poqoynin warmikuna wijsallikuyta atinankupaj yanapasqanta. Ajinata yuyasqankurayku Raquelqa ñañan Leata nerqa churin Rubenpa apamusqan mandragorata qorinanta. maman Leaman aparqa. Raqueltajrí chay poqoyta rikuspa, Leata nerqa: Ama jinachu kay, wawaykej apamusqanmanta wakinta qoriway ari, nispa.
15Leatajrí kuticherqa: Qosayta qhechuwankiña, kunantaj wawaypa apamusqan mandragoratawanchu qhechuwayta munashanki? nispa. Raqueltaj nerqa: Sichus wawaykej apamusqan mandragorata qowanki chayqa, Jacob kunan ch'isi qanwan puñonqa, nispa.
16Inti yaykuyta jina campomanta Jacob kutimushajtin, Lea payta taripaj rerqa. Chantá nerqa: Kunan ch'isi noqawan puñusun, imaraykuchus wawaypa apampuwasqan mandragorata Raquelman pagani, nispa. Chay ch'isitaj Jacobqa Leawan puñorqa. 17Diostaj Leaj mañakusqanta uyarerqa. Onqoj rikhurispataj, uj qhari wawata paqarichikorqa. Chaywanqa Lea qosan Jacobpaj phishqa wawayoj karqa. 18Chantá Lea nerqa: Dios kay t'inkata qowan, imaraykuchus qosayman kamachiyta ujnin warmin kananpaj qorqani. Chayrayku kay wawaj sutenqa “Isacar” kanqa, nispa.
19Chay qhepata Lea ujtawan wawayoj kallarqataj. Chaywanqa Jacobpaj sojta wawayojña karqa. 20Chantá Lea nerqa: Dios sumaj t'inkata qowan. Kunanqa qosay noqata astawan munakuwanqa, imaraykuchus payman sojta wawataña rejsichini. Chayrayku kay wawaj sutenqa “Zabulón” kanqa, nispa.
21Chaymanta qhepata Leaqa uj warmi wawatañataj paqarichikorqa, chay wawatataj “Dina” nispa suticharqa.
22Chantá Diosqa Raquelmanta yuyarikorqa, mañakusqanta uyarispataj, nerqa wawayoj kananta. 23Ña wawayojña kaspa, Raquel nerqa: Mana wawa rejsisqaymanta p'enqachisqa kasqayta Tata Dios chinkachin. 24Pay munachun ari ujtawan wawayoj kanayta, nispa. Chayrayku Raquel wawanta “José” sutiwan suticharqa.
Labanwan Jacobwan mana allintachu kawsanku
25Raquel wawan Joseta paqarichikusqanmanta qhepaman, Jacob Labanta nerqa: Kachapuway, llajtayman ripuyta munani. 26Warmiykunata, wawaykunatawan qopuwaspa kachapuway, imaraykuchus paykunarayku unayta qanpaj llank'arqani. Imaynatachus llank'asqayta qan yachanki, nispa.
27Labantajrí kuticherqa: Ama ripuychu ari, kakullay. Noqa yachani qanrayku Tata Dios saminchaspa yanapawasqanta. 28Niway kunanmanta qhepaman mashkhatachus ganayta munasqaykita, noqataj chayta pagapusqayki, nispa.
29Chantá Jacob nerqa: Qan allinta yachanki imaynatachus sinch'ita llank'asqayta, jinataj uywaykikunata qhawapususqayta. 30Manaraj kayman chayamushajteyqa, uywayki pisilla karqa. Kunantajrí ashkhaña tiyapusunki. Chayamusqaymantapacha Tata Dios ashkhata qosunki. Kunantajrí aylluypajñataj llank'arikuyta munani ari, nispa.
31Labantaj nerqa: Mashkhatapunitaj pagasunayta munankiri? nispa. Chantá Jacob nerqa: Ama imatapis pagawaychu. Imatachus nisusqay allin rijch'asunki chayqa, ovejaykikunata michipullasqaykipuni. 32Kunan rispa, tukuy ovejaykikunamanta, cabraykikunamanta ima ch'ejchikunata, yanakunata, alqakunata ima t'aqasaj. Chaylla uywaykita michipususqaymanta pagoy kanqa. 33Ajinaqa q'aya pagoyta qhawaj jamuspa, cheqanta ruwasqayta rikunki. Sichus uyway ukhupi kanqanku mana ch'ejchi kaj, mana yana kaj, mana sani kaj chayqa, suwasusqayta yachanki, nispa.
34Labantaj nerqa: Walejpacha, qanpa nisqaykiman jina kachun, nispa.
35Chaywanpis Labanqa chay p'unchaypacha t'aqararqa cabrakunamanta, chantá ovejakunamanta ima tukuy ch'ejchi kajta, alqakunata, yanakunata, sanikunata ima. Chaykunatataj churinkunawan michicherqa. 36Chantá Labán chay uywakunata kinsa p'unchay puriyta jina qhaterqa, maypichus Jacob kasharqa, chaymanta. Chaykamataj Jacobqa Labanpa chay waj uywankunata michisharqa.
37Jacobtajrí álamo sach'amanta, almendromanta, chantá castañamanta ima k'aspita p'akispa, qaranta sinkharqa, yurajnin yachakunanpaj. 38Chantá sinkharasqa k'aspikunata, maypichus uywakuna yakuta ujyaj kanku, chaynejman churararqa ajinamanta uywakuna yakuta ujyaj jamuspa, sinkhasqa k'aspikunata rikunankupaj. Ajinaqa q'oñirisqa ovejakuna, cabrakuna ima yakuta ujyaj jamuspa, 39muchukoj kanku sinkharasqa k'aspikunaj ñawpaqenpi. Chayrayku chichuyaspa, ch'ejchita, yanata, sanita ima wachararqanku. 40Chantá Jacobqa borregokunata t'aqarqa. Jinallataj Labanpa tropanmanta ch'ejchikunata, chantá yanakunata ima t'aqaspa tropanman churarqa. Ajinata Jacobqa tropanta ashkhayacherqa, manañataj Labanpa tropantawan tantarqachu.
41Sapa kuti sumaj kaj uywakuna q'oñirejtinku, Jacobqa sinkhasqan k'aspikunata ñawpaqenkuman churaj. Ajinamanta muchukushaspa, uywakunaqa sinkhasqa k'aspikunata rikusharqanku. 42Mana allin kaj uywa muchukushajtinrí, k'aspikunata mana churajchu. Chayrayku mana allinnin kaj uywakunaqa Labanpaj karqa, sumajnin kajkunatajrí Jacobpaj karqa. 43Ajinata Jacob maytapuni qhapajyaykorqa. Tiyaporqa may chhika ovejakuna, wata runakuna, camellokuna chantá burrokuna ima.
Избрани в момента:
Génesis 30: DQDC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Revisión Biblia Quechua Boliviano © Sociedad Bíblica Boliviana, 2017.