Génesis 24
24
Isaac Rebecawan casaran
1Abraham allin machuña karqa, Tata Diostaj payta tukuy imapi yanaparqa. 2Uj kuti pay kamachinkunamanta aswan machu kaj mayordomonta wajyaspa, nerqa: Makiykita khapayman churay. 3Jinaspataj, janaj pachapi, kay pachapipis Tata Diosrayku tiluy ari, noqa maypichus tiyakushani kay Canaanpi kaj warmikunawan amapuni churiyta casarachinaykita. 4Manachayqa llajtayman rispa, aylluy ukhumanta uj warmita churiy Isaacpaj pusamunki, nispa.#24.3-4 Ayllun ukhumanta kaj qhariwan, chayrí warmiwan casarachina unay usu karqa. Abrahampa miraynin ajinata ruwaspa casararqanku, uj k'ata Diosta yupaychana ama pisimanta pisi chinkapunanpaj. Ex 34.15-16; Dt 7.3-4; Esd 9.2.
5Abrahampa kamachintaj kuticherqa: Warmi mana jamuyta munajtinrí, imanasajtajri? Llojsimorqanki, chay suyumanchu churiykita pusasaj? nispa.
6Abrahamtajrí nerqa: Amapuni churiytaqa jaqayman pusankichu. 7Janaj pachapi kaj Tata Dios llajtaymanta, tataypa wasinmanta ima orqhomuwaspa, tiluwarqa: Kay jallp'ata mirayniykiman qosaj, nispa. Chayrayku paymin angelninta ñawpaqeykita kachanqa, churiypaj warmita pusamuyta yanapasunanpaj. 8Sichus chay warmi qanwan mana jamuyta munanmanchu chayrí, tilusqaykimanta qan mana juchayojchu kanki. Jina kajtinpis, amapuni churiyta jaqayman pusankichu, nispa.
9Chantá kamacheqa makinta Abrahampata khapanman churaspa, tilorqa patronnin Abrahampa nisqanta junt'ananta. 10Chantá patronninpa tiyapuyninmanta sumajninta ajllaspa, chunka camellokunaman chajnaykorqa. Jinaspataj, Mesopotamia cheqapi Najorpa llajtanman purirerqa.
11Kamacheqa unayta purispa, inti yaykushajtinña llajta kantuman chayarqa. Chantá camellokunata pujyu kantupi samaricherqa. Chay karqa warmikuna yakuta apamoj rinanku phanita.
12Chantá kamacheqa Diosmanta mañarikorqa: Tata Dios, patronniy Abrahampata Diosnin, mañarikuyki allin rinawanpaj yanapanawaykita. Patronniyta khuyaspa, k'acha kasqaykita rejsichikuy ari. 13Noqa kay pujyu kantupi suyasaj, kay llajtayoj sipaskuna yakuman jamunankuta. 14Chantá paykunamanta ujninta nisaj: Ama jina kaspa, p'uñuykita urayk'uchikuy, yakuta ujyanaypaj, nispa. Sichus pay p'uñunta urayk'uchikuspa, niwanqa: Kayqa, ujyarikuy, camelloykikunamanpis ujyarichipusqayki, nispa chayqa, chay kachun kamachiyki Isaacpaj ajllasqayki warmi. Ajinapi yachasaj qan patronniyta khuyakusqaykita, nispa.
15Kamachi manaraj Diosmanta mañakuyta tukushajtin, uj sipas p'uñu lijrarisqa yakuman jamorqa. Payqa Rebeca karqa, Betuelpa ususin. Betuelqa Milcajta, Najorpatawan churin karqa. Najortajrí Abrahampata wawqen karqa. 16Rebecaqa manchay k'achita karqa, chantapis manaraj qharita rejsej. Paytaj pujyuman urayk'uspa, p'uñunman yakuta junt'achiytawan kutipusharqa.
17Jinapi Abrahampa kamachin usqhayta sayarispa, taripaj phawarqa. Chantá nerqa: Sipas, ama jinachu kay, ujyanaypaj p'uñuykimanta uj chhika yakuta qoriway, nispa. 18Rebecataj kuticherqa: Imarayku mana. Ujyarikuy, wiraqochi, nispa. Chantá usqhayta p'uñunta urayk'uchispa, ujyacherqa. 19Kamachi ujyayta tukojtintaj, sipas nerqa: Camelloykikunapajpis yakuta orqhopusqayki sajsakunankukama ujyanankupaj, nispa. 20Usqhayta rispataj, rumi bateaman yakuta jich'arqa. Chantá ashkha kutita pujyuman yaykuspa, yakuta orqhomorqa, tukuynin camellokuna ujyanankukama.
21Chaykama kamacheqa ch'inllamanta qhawasharqa, imaraykuchus pay allinta yachayta munarqa, puriyninpi Tata Dios yanapanqachus manachus, chayta. 22Camellokuna yakuta ujyayta tukojtinkutaj, kamacheqa uj qori anillota sipaspa senqanman churarqa. Chay anillo sojta gramoyoj jina karqa. Chantá qorimanta iskay brazaleteta sipaspa makinman churallarqataj, chaytaj pachaj gramoyoj jina karqa. 23Chaymantataj Abrahampa kamachin nerqa: Ama jina kaspa, willaway ari. Pejpa ususintaj kankiri? Tatayki wasinman kunan ch'isi wajyarikuwaykumanchu? nispa.
24Chantá sipaku nerqa: Noqaqa Betuelpa ususin kani, Milcajta Najorpatawan allchhin. 25Wasiykupeqa camellokunapaj ashkha paja, chantá q'achu ima tiyan. Puñunaykichejpajpis campo kallantaj, nispa.
26Chantá kamacheqa qonqoriykukuspa, Tata Diosta kay jinata yupaycharqa: 27Patronniy Abrahampata Tata Diosnin, yupaychasqa kay, imajtinchus qanqa patronniywan k'acha karqanki, jinataj nisqaykita junt'anki. Qanllamin ayllunpa wasinman pusamuwarqanki, nispa.
28Chantá sipasqa usqhay usqhayta wasinman rispa, imachus kasqanta mamanman willarqa. 29Rebecajta uj turan Labán sutiyoj karqa. Paytaj chay runata taripaj yaku pujyuman phawarqa, 30imaraykuchus Labanqa panan anillota, brazaleteta ima makinpi apaykachashajta rikusqa. Chantá chay runa pananta imatachus nisqanta uyarillasqataj. Chayrayku Labanqa Abrahampa kamachinta mask'aj rispa, camellonkunawan pujyu chaypi kashajta tariparqa. 31Nerqataj: Jamuy ari, Tata Diospa saminchasqan, ama kayllapi kakuychu. Wasitapis k'uchunchaykuña. Camelloykikuna puñunankupajpis tiyanña, nispa.
32Chantá kamacheqa Labanpa wasinman rerqa. Labantaj Abrahampa kamachin wasinman chayajtinkama, camellokunamanta q'epita urayk'ucherqa. Jinaspataj, pajata, q'achutawan ima camellokunaman qararqa. Chaymantataj yakuta apamorqa Abrahampa kamachin, paywan jamojkuna ima chakinkuta mayllanankupaj.
33Chantá paykunaman mikhunata jaywarqanku. Chaywanpis Abrahampa kamachin nerqa: Mana mikhusajrajchu, imachus ninay kashan, chayta qankunaman manaraj nishaspaqa, nispa. Labantaj nerqa: Parlallay, nispa.
34Chantá kamachi nerqa: Noqaqa Abrahampa kamachin kani. 35Patronniy Abrahamqa manchay qhapaj, Tata Dios may jinata yanapasqanrayku. Tata Dios payman qon ovejakunata, wakakunata, qolqe metalta, qorita, qhari kamachikunata, warmi kamachikunata, camellokunata, chantá burrokunata ima.
36Jinallataj warmin Sarapis payayayninpi patronniypaj uj qhari wawata rejsin. Patronniytaj churin Isaacman tukuy kapuyninta saqeykonqa. 37Jinapi patronniy tiluchiwaspa, niwarqa: Maypichus tiyakushani, kay Canaán llajtayoj warmikunawan ama churiyta casarachinkichu. 38Aswanpis tataypa ayllunman rispa, chaymanta churiypaj warmita pusamunki, nispa.
39Noqataj nerqani: Wiraqochíy, sichus warmi noqawan mana jamuyta munanmanchu chayri? nispa. 40Paytaj niwarqa: Noqaqa Tata Diosta kasuspa purini. Chayrayku paymin angelninta qanta yanapasunanpaj kachamonqa, kay risqaykipi allin risunanpaj. Qanqa aylluy ukhumanta churiypaj uj warmita pusamunki. 41Aylluyman rejtiyki, sichus ususinkuta mana qoyta munankumanchu chayqa, chaypacha tilusqaykita mana junt'asqaykimanta mana juchayojchu kanki, nispa.
42Chayrayku ari, kunan noqa pujyuman chayamuspa, Diosmanta kay jinata mañakorqani: Patronniy Abrahampata Tata Diosnin, mañarikuyki imamanchus jamusqaypi allin rinawanpaj yanapanawaykita. 43Kunan pujyu qayllapi kashani. Kay jina kachun: Noqa yakuman jamoj sipasta nisaj: Ama jinachu kay, p'uñuykimanta yakuta ujyanaypaj qoriway, nispa. 44Nejtiytaj, sichus chay sipaku niwanman: Kayqa, ujyarikuy, noqataj camelloykikuna ujyanankupajpis yakuta orqhopusqayki, nispa chayqa, chay kachun ari patronniypa churinpaj ajllapusqayki warmi, nispa.
45Manaraj Diosmanta mañakuyta tukushaspataj, Rebecata p'uñun jap'irisqa yakuman jamushajta rikorqani. Pujyumanta yakuta orqhospa kutimpushajtintaj, nerqani: Sipas, ujyanaypaj yakuykita qoriway, nispa. 46Paytaj usqhayllata p'uñunta urayk'uchispa, niwarqa: Kayqa yaku, ujyarikuy, camelloykikunatapis ujyarachipusqayki, nispa. Noqataj yakuta ujyarqani, Rebecataj camelloykunatapis ujyachipullawarqataj.
47Chantá Rebecata taporqani: Pejpa ususintaj kankiri? nispa. Paytaj niwarqa: Noqaqa Betuelpa ususin kani, Najorpata Milcajpatawan allchhin, nispa. Niwajtinkama, senqanman uj anillota churarqani, makinmantaj brazaleteta.
48Chantá qonqoriykukuspa, Tata Diosta yupaycharqani. Noqa patronniy Abrahampata Tata Diosninta jatuncharqani pay cheqanta pusamuwasqanmanta, patronniypa wawqenpa ususinta churin Isaacpaj pusanaypaj. 49Kunantaj sut'inta niwaychej ari, patronniypa mañakusqanta junt'ankichejchus manachus, chayta. Ajinamanta imatachus niwasqaykichejta yachaspa, noqa imatachus ruwanayta nisaj, nispa.
50Chantá Labanwan, Betuelwan ima kuticherqanku: Kayqa Tata Diosmantamin, chayrayku mana niykumanchu “arí”, nispa, nitaj “mana”, nispa. 51Chayqa, ñawpaqeykipi Rebeca kashan, pusay ari. Tata Diospa nisqanman jina, patronniykej churinpa warmin kachun, nispa.
52Chantá Abrahampata kamachin ajinata nejta uyarispa, pampakama k'umuykukorqa Tata Diosta yupaychananpaj. 53Chaymantataj qorimanta, qolqe metalmanta tukuy imata, p'achata ima q'epimanta orqhospa, Rebecaman jaywarqa. Jinallataj turanman, mamanman ima sumaj imakunata qollarqataj. 54Chaymantaraj Abrahampa kamachin chantá paywan khuska jamojkuna mikhorqanku, ujyarqanku ima. Chantá chay ch'isi chaypi puñukorqanku. Jinataj q'ayantin tutamanta jatarispa, kamachi nerqa: Kunanqa patronniypaman kachapuwayku, nispa.
55Rebecaj turan Labanrí nerqa: Rebeca noqaykuwan chunka p'unchaytawan karikullachunraj ari, nispa. Kikillantataj mamanpis nerqa.
56Kamachitajrí kuticherqa: Amaña jark'awaychejchu. Tata Diosqa imamanchus jamusqaypi allin rinawanpaj yanapawanña. Chayrayku patronniypa wasinman kachapullawaychejña, nispa.
57Paykunataj kuticherqanku: Sipasta wajyaspa, tapusqayku, pay ima nenqachus, nispa. 58Chantá Rebecata wajyaspa, taporqanku: Kay runawan rillaytañachu munanki? nispa. Paytaj kuticherqa: Arí, rillasajña, nispa.
59Jinata nejtin, Labanqa Rebecata, uywaqen warmitawan ima, jinataj Abrahampa kamachintawan, chantá paywan jamojkunatawan ima kacharpayaporqanku. 60Kacharpayapushaspataj, Rebecaj ayllunmanta kajkuna ajinata nispa, samincharqanku:
Panayku, ashkha wawaj mamanku kay.
Mirayniykimanta kajkunataj awqankukunata atipachunku, nispa.
61Jinata nejtinkukama, Rebecaqa uywaqenwan ima camellokunaman wicharispa, Abrahampa kamachinpa qhepanta rerqanku. Ajinata Abrahampa kamachenqa Rebecata pusaspa kutiporqa.
62Chaykama Isaacqa “Rikuwaj Kawsaj Diospa Pujyun”, nisqa pujyumanta kutimusqa, imaraykuchus payqa Néguev nisqa cheqanejpi tiyakusharqa. 63Jinapi Isaac ch'isiyayta puriykacharej llojsisqa. Qhawarispataj, camellokunata jamushajta rikorqa. 64Jinallataj Rebecapis qhawarispa, Isaacta rikorqa, jinaspataj camellomanta urayk'orqa. 65Chantá Abrahampa kamachinta taporqa: Kaynejman jamushan, chay runa pitajri? nispa. Kamachitaj kuticherqa: Payqa patronniy, nispa. Chantá Rebecaqa velowan suk'umpaykukorqa.
66Chaymanta kamacheqa imatachus ruwasqanmanta tukuyninta Isaacman willarqa. 67Chantá Isaacqa maman Saraj toldonman Rebecata pusaykorqa, paywantaj casarakorqa. Isaacqa Rebecata mayta munakorqa. Ajinata maman wañupusqanmanta sonqochakorqa.
Избрани в момента:
Génesis 24: DQDC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Revisión Biblia Quechua Boliviano © Sociedad Bíblica Boliviana, 2017.