Génesis 20
20
Abrahamwan Abimelecwan
1Abraham maypichus kasharqa, chaymanta Néguev chaynejman riporqa. Chantá Gerar llajtapi tiyakorqa. Chay llajtaqa Cadeswan Shurwan chawpinnejpi kashan. 2Chaypi kashaspataj, Abrahamqa warmin Saramanta nerqa: Payqa panaymin, nispa. Chayrayku Gerarmanta kuraj kamachej Abimelecqa Sarata wasinman pusachimorqa. 3Chaywanpis Dios chay ch'isipacha Abimelecman mosqoypi rikhurispa, nerqa: Kunan qan wañunki, imajtinchus pi warmitachus pusachimunki, chayqa qosayojmin, nispa.
4Abimelecrí manaraj Sarawan puñuykusqachu. Chayrayku payqa Diosta nerqa: Tukuyta Kamachej Diosníy, mana juchayoj runata wañuchillawajchu? 5Kikin Abraham niwarqa Saraqa paypa panallan kasqanta. Sarapis nillawarqataj Abrahamqa turan kasqanta. Chayrayku mana sonqoy juchachawanchu, imajtinchus mana ni ima millayta ruwanichu, nispa.
6Diostaj mosqoypi Abimelecman kuticherqa: Noqa yachani qan allin sonqowan chayta ruwasqaykita. Chayrayku paywan puñuykunaykita mana saqerqaykichu, ama contraypi juchallikunaykipaj. 7Kunanqa chay warmita qosanman kutichipuy, imaraykuchus payqa noqamanta sut'inchajmin.#20.7 Diosmanta sut'inchaj: Diosmanta sut'inchajqa mana Diospa nisqallantachu willaj, manachayqa llakiypi rikhurejkunarayku, chayrí ima jawa ñak'arejkunarayku Diosmanta mañapullajtaj. 1 S 7.8; 12.19; Jer 37.3; 42.1-4; Am 7.2,5. Paytaj kawsanaykipaj qanrayku noqamanta mañapusonqa. Warmintachus mana kutichipunki chayrí, qan, chantá tukuy qanpata kajkuna ima wañunkichejpuni, nispa.
8Q'ayantin Abimelecqa tutamanta sayarispa, tukuy kamachinkunata wajyarqa. Chantá Dios mosqoypi imatachus nisqanta paykunaman willarqa. Chayta uyarispa, tukuyninku mayta mancharikorqanku. 9Chaymanta Abimelecqa Abrahamtañataj wajyachispa, nerqa: Imajtintaj kayta ruwawaykuri? Imata ruwaspataj sonqoykita nanacherqayki, noqata, jinataj runaykunata millayta juchallichinawaykupajri? Qanqa mana ruwanata noqawan ruwanki. 10Imata yuyaspataj kayta ruwarqankiri? nispa. Ajinata Abimelecqa Abrahamta k'amerqa.
11Chantá Abraham kuticherqa: Noqa sonqoypi nerqani: Kay llajtapi Diosta mana may jatun respetowan qhawayta yachankuchu. Chayrayku warmiyta qhechunawankupaj wañuchiwankumanchari, nispa. 12Arí, Saraqa panaypuni kashanpis, tataypa ususin, mana mamaypa wawanchu. Ajina kasqanrayku noqa paywan casarakorqani.#20.12 Chaypacha uj qhari khuskan pananwan, chayrí uj warmi khuskan turanwan casarananta allillan kasqanta qhawaj kanku. 2 S 13.13. Chaymanta qhepanejman Diosqa Moisesnejta kamachisqakunata qosqanpi sut'ita kamacherqa manaña chayta ruwanankuta. Lv 18.9,11; 20.17. 13Maypachachus Dios llajtaymanta ripunayta kamachiwarqa chaypacha, noqa warmiyta nerqani: Maymanchá chayasunchej, chaypi qan ninki: Payqa turaymin, nispa.
14Chantá Abimelecqa Abrahamman warmin Sarata kutichiporqa. Chantá payman qollarqataj ovejakunata, wakakunata, qhari kamachikunata, warmi kamachikunata ima. 15Paytaj Abrahamta nerqa: Qhaway, suyoyqa ñawpaqeykipi kashan. Tiyakunaykipaj maynejtachá munasqaykita ajllakuy, nispa.
16Chaymantataj Abimelecqa Saratañataj nerqa: Turaykiman waranqa phisu qolqeta qoni. Chay kanqa, qan allin warmi kasqaykita tukuy runakuna yachanankupaj. Ajinaqa mana pipis qanmanta manakajta parlayta atenqachu, nispa.
17Chaymanta Abrahamqa Diosmanta mañaporqa. Diostaj Abimelecta, jinallataj warmintapis, chantá warmi kamachinkunatapis thañichillarqataj, paykuna wawayoj kayta atinankupaj. 18Chayta Tata Dios ruwarqa, imajtinchus Abrahampa warmin Sararayku Dios nisqa Abimelecpa ayllunpi kaj warmikuna mana wawayoj kanankuta.
Избрани в момента:
Génesis 20: DQDC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Revisión Biblia Quechua Boliviano © Sociedad Bíblica Boliviana, 2017.