Génesis 18
18
Dios nin Abraham wawayoj kananta
1Abraham chaypacha Mamrej encina sach'an chaynejpi jarasqa karqa. Chantá chawpi p'unchay chay chayta Abram jaranpa punkunpi tiyarikushajtin, Tata Dios payman rikhurerqa. 2Chantá Abraham qhawaspa rikorqa, jaran qayllapi kinsa qharikuna sayashajta. Rikuytawantaj, paykunata taripaj rerqa, chantá pampakama k'umuykuspa,#18.2 Pampakama k'umuykuy: Maypaj qhawasqa runakunata pampakama k'umuykuspa napaykuyta yachaj kanku. 3nerqa: Wiraqochíy, sichus waturikunawaykichejpaj jina qhawawankichej chayqa, ama pasallaychejchu ari. 4Chakiykichejta mayllakunaykichejpaj noqa yakuta apachimusaj, chantá tumpallatapis kay sach'a llanthupi samarikuychej. 5Mikhunaykichejpajrí imallatapis aparimpusqaykichej, mikhuspa kallpachakunaykichejpaj, chantá ripullankichej. Chayraykupuni toldoy chaynejta jamorqankichej, nispa. Paykunataj nerqanku: Ruwallay imatachus nisqaykita, nispa.
6Chantá Abraham usqhayta, maypichus Sara kasharqa, chay toldoman rispa, nerqa: Tawa chunka libra sumajnin jak'umanta t'antata usqhayllata ruwarqoy, nispa. 7Chaymantataj Abraham usqhay usqhayta kanchaman rispa, sumajnin kaj torillota ajllaspa aysamorqa. Chantá ujnin kamachinman ñak'arqonanpaj qorqa, paytaj chaypachapacha ñak'aspa, chayacherqa. 8Waka aychata jaywaspataj, Abraham paykunaman ñojñuta, lechetawan jaywallarqataj. Paykuna sach'a llanthu urapi mikhunankukamataj, Abraham paykunaj qayllankupi sayasharqa.
9Mikhuyta tukuytawantaj, watukojkunaqa Abrahamta taporqanku: Maypitaj warmiyki Sara kashanri? nispa. Paytaj nerqa: Toldopi kashan, nispa.
10Chantá paykunamanta ujnin nerqa: Wataman kunanta jina kutimuspa, watukusqayki, chaypajtaj warmiyki Sara wawayojña kanqa, nispa. Saratajrí Abrahampa wasanmanta toldo punkumanta parlasqankuta uyarisharqa. 11Chaypacha Abrahamwan, chantá Sara warminwan ima machuña kasqanku, chantapis Sarajtaqa killa onqoynin chinkapusqaña. 12Chayrayku Saraqa sonqonpi asispa, nerqa: Qosaypis noqapis allin machuña kashayku. Jina kashaspachu wawata rejsispa kusikuyman? nispa.
13Tata Diostajrí Abrahamta nerqa: Imaraykutaj warmiyki Sara asikunri? Manachu yuyan payaña kashaspapis wawayoj kananta? 14Tata Diospaj imallapis ruway mana atina kanmanchu? Watapaj kunanta jinallataj kutimuspa, watukusqayki, chaypajtaj Sara wawayojña kanqa, nispa.
15Chayta uyariytawan, Sara mancharispa, nerqa: Mana asikorqanichu, nispa. Tata Diostajrí nerqa: Ama niychu “mana” nispa, qan asikorqankipuni, nispa.
Abraham Sodoma llajtarayku Diosmanta mañapun
16Chaymanta chay kinsa runakuna sayarispa, Sodoma cheqanejman rerqanku. Abrahamtaj kacharpayaj jina uj chhikanta paykunawan rerqa. 17Chantá Tata Dios sonqonpi nerqa: Imatachus ruwayta yuyashasqayta Abrahamman willasaj, 18imaraykuchus pay ashkha runayoj jatun suyoj tatan kanqa. Payman niniña kay pachapi tukuy suyuta paynejta saminchanayta. 19Noqa payta ajllakullarqanitaj wawankunata, miraynintapis kamachinanpaj, ajinamanta noqata kasuwaspa chantá cheqan kajta, allin kajtataj ruwaspa purinankupaj. Sichus Abraham nisqayta ruwanqa chayqa, noqa payman tukuy nisqayta junt'asaj, nispa. Ajinata Tata Dios Abrahamta nerqa.
20Chayrayku Tata Dios Abrahamman willarqa: Sodomapi Gomorrapiwan tiyakojkunaj millayta ruwasqankumanta anchaña uyarikun, juchallisqankutaj ancha millaypuni.#18.20 Sodomapi Gomorrapiwan tiyakojkunaj juchallisqanku: Wakin yuyanku Sodomapi Gomorrapiwan tiyakojkunaj juchankoqa qharipura qhari warmipis kankuman jina tiyakusqanku kasqanta. Judas 7. Chaywanpis Diosmanta sut'inchajkunaj nisqankuman jina, kay iskay llajtakunapi tiyakojkunaj juchankoqa mana qharipura khuchichakuyllachu kasqa. Is 1.10-17; 3.9; Jer 23.14; Ez 16.49; Gn 19.5. 21Noqa rispa yachamusaj willawasqankuman jinachus ruwasqanku ancha millaypuni kasqanta. Ajinapi yachamusaj, nispa.#Gn 11.5; Ex 2.25.
22Chantá Abrahamta watukoj jamojkunamanta iskay Sodomaman rerqanku. Abrahamtaj Tata Diospa qayllanpi kasharqa. 23Chantaqa uj chhikantawan qayllaykuspa, Abrahamqa Tata Diosta taporqa: Mana juchayoj runataqa juchayojtawan khuskachu wañuchinki? 24Ichapis chay llajtapi cheqanta ruwajkuna phishqa chunka kankuman. Chay phishqa chunkarayku manachu chay llajtapi tiyakojkunamanta khuyarikuwaj? 25Qanqa mana atiwajchu mana juchayojta juchayojtawan khuska wañuchiyta, iskayninkupis kikinta juchallinkuman karqa jinataqa. Ama chayta ruwaychu ari. Tukuy kay pachapi justiciata ruwaj kashaspa, manachu cheqan kajta ruwawaj? nispa. Ajinata Abraham nerqa.
26Tata Diostaj kuticherqa: Sichus Sodoma llajtapi phishqa chunka cheqanta ruwajkunata tarisaj chayqa, paykunarayku chay llajtapi tiyakojkunamanta khuyarikusaj, nispa.
27Chantá Abraham Tata Diosta ujtawan nillarqataj: Qanqa Diosmin kanki, noqataj mana ni imachu kani. Chaywanpis ama jina kaspa, mañakusqayta uyariway ari. 28Phishqa chunka cheqanta ruwajkunamanta phishqa mana kajtinkurí, llajtata chinkarparichiwajpunichu? nispa. Tata Diostaj kuticherqa: Sichus tawa chunka phishqayojllata tariyman chayqa, chay llajtata mana chinkarparichisajchu, nispa.
29Chantá Abraham nillarqapuni: Tawa chunkalla kajtinkuri? nispa. Tata Diostaj nerqa: Sichus cheqanta ruwajkuna tawa chunkalla kankuman chayqa, mana chay llajtata chinkarparichisajchu, nispa.
30Abrahamtajrí ujtawan nillarqataj: Diosníy, chayllamantapuni parlasqaymanta ama phiñakuychu ari. Sichus cheqanta ruwajkuna kinsa chunkalla kankuman chayrí? nispa. Tata Diostaj nerqa: Kinsa chunkalla kajtinkupis, chay llajtapi tiyakojkunamanta khuyarikusaj, nispa.
31Chantá Abraham ujtawan nillarqataj: Diosníy, qanwan ajinata parlasuspa, mana manchachikuyniyoj jina parlashasqayta yachani. Sichus cheqanta ruwajkunata iskay chunkallata tariwaj chayrí, imataj kanqari? nispa. Tata Diostaj kuticherqa: Chay iskay chunkarayku mana llajtata chinkarparichisajchu, nispa.
32Chantá Abraham ujtawan nillarqataj: Diosníy, ama noqapaj phiñakuychu ari, kayllatawanña parlarikusaj. Sichus chunkallata tariwaj chayri? Imanankitajri? nispa. Tata Diostaj kuticherqa: Chunka cheqanta ruwajkunalla kajtinkupis, chaykunarayku llajtapi tiyakojkunamanta khuyarikusaj, nispa.
33Chantá Tata Dios ajinata Abrahamwan parlaytawan, chaymanta riporqa. Abrahamtaj toldonman kutiporqa.
Избрани в момента:
Génesis 18: DQDC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Revisión Biblia Quechua Boliviano © Sociedad Bíblica Boliviana, 2017.