Jang 10
10
Cau ê belàt lơbơn niam
1“Ngan, Añ đơs ngan mơ bol mê, cau lơi ò bơh mpồng mơ mut tòm wàng belàt, mơya hào mut bơh gùng ndai, cau hơ̆ la cau ntung, cau kơñau. 2Mơya cau lơi mut bơh mpồng, hơ̆ la cau ê belàt. 3Cau kơp mpồng pò khai in, belàt kơno jơnau đơs cau ê dê; cau ê hòi sơnđan belàt khai dê mơ lam gơlik hơ tiah. 4Tŭ neh tơlik jơh ală belàt khai dê, cau ê lòt lài; belàt jat bơh tơnơ̆, bơh belàt mòng di jơnau đơs khai dê. 5Belàt ò jat cau crih mat, mơya gơ dô bơh di khai, tài bơh belàt ò mòng di jơnau đơs cau crih mat dê.” 6Yàng Jesu yal pơnyơu hơ̆ bol khai in, mơya bol khai ò git wă ñchi jơnau Kơnràñ kòñ đơs.
7Behơ̆, Yàng Jesu đơs tai lah: “Ngan, Añ đơs ngan mơ bol mê, Añ la mpồng belàt dê. 8Jơh ală cau neh lòt tus lài mơ Añ hơ̆ la ală cau ntung, cau kơñau, mơya belàt ò iat bol khai. 9Añ la mpồng: Dilah cau lơi bơh Añ mơ mut, gen rơp geh dong klàs. Bol khai rơp mut lik mơ bàn ƀlàng ñhơt. 10Cau kơñau mìng tus nàng kơñau, hàl mơ tơnroh; ai Añ neh tus tồ belàt in geh bơta kis mơ bơta kis tơngkah tơngkañ.
11Añ la cau ê niam. Cau ê niam bơh mpồl belàt mơ phi bơta kis he. 12Cau ê ơpah ò di la cau ê; belàt ò bal mơ khai, gen tàng tŭ gŏ so rhau tus, gen khai sang belàt mơ dô. So rhau kap belàt mơ lơh gơprah gơpring jơh. 13Tài bơh khai la cau ê ơpah, gen tàng ò kơlôi bơh belàt dô êt lơi. 14Añ la cau ê lơbơn niam. Añ git belàt Añ jê mơ belàt Añ git Añ, 15#Mat 11:27; Luk 10:22.kung be Bèp git Añ mơ Añ git Bèp behơ̆ sơl. Añ bơh mpồl belàt mơ phi bơta kis Añ. 16Añ gam gơs ală belàt ndai ò bal mơ wàng do; Añ pal lam gơrê sơl, belàt hơ̆ rơp kơno jơnau đơs Añ jê, mơ rơp gơs mìng dô mpồl mơ dô nă cau ê lơm. 17Tài behơ̆ tàng Bèp kòñ gơboh dê Añ, la bơh Añ phi bơta kis Añ nàng geh dòp wơl. 18Ò gơs cau lơi tă bơta kis Añ, mơya Añ phi is Añ jê; Añ gơs gơnoar phi bơta kis mơ gơs gơnoar ai wơl; Añ neh dòp jơnau sồr hơ̆ bơh di Bèp Añ.”
19Tài bơh ală jơnau hơ̆, ală cau Juda gơs bơta cah mpồl tai. 20Oă cau tòm bol khai đơs lah: “Khai kòl cà lơh mơ sơnrang; ñchi bol mê gam iat khai taih?” 21Cau ƀà đơs lah: “Hơ̆ ò di la jơnau đơs dô nă cau kòl cà lơh ò. Mbe cà rgơi pò mat cau jơngo in tiah?”
Yàng Jesu kòl pơndang sang
22Tŭ hơ̆ la kơnhai noat mrềt, tòm ƀòn dờng Jerusalem gơs bơta pơjum ơn Hìu Duh Khoai. 23Yàng Jesu lòt tòm tiah gơrê bal mơ hìu duh khoai, hơđơm ƀlàng rơng Salômôn dê. 24Gen ală cau Juda gơrwàng gùt dar Kơnràñ mơ lùp lah: “Cau Bơto lòi bol hi pal kơp gơn jơl tus tŭ lơi taih? Dilah Cau Bơto la Bơtau Krist, gen đơs tĕ loh làng bol hi in.” 25Yàng Jesu ho lah: “Añ neh yal bol mê in, mơya bol mê ò dòn; ală broă Añ neh lơh tòm sơnđan Bèp Añ lơh cơng Añ in lơm. 26Mơya bol mê ò dòn, tài bơh bol mê ò di la belàt Añ jê. 27Belàt Añ kơno jơnau Añ, Añ git bol gơ mơ bol gơ jat Añ. 28Añ ai bol gơ in bơta kis gam sùm sùm; bol gơ ò gơs tŭ lơi roh rui ò mơ ò gơs cau lơi kơñau bol gơ bơh tê Añ. 29Bèp Añ, la Bơtau dờng rlau jơh#10:29 Gơs dô êt sră cih tê cih lah: Bơta Bèp Añ ai Añ in la dờng rlau jơh. neh ai ală belàt hơ̆ Añ in mơ ò gơs cau lơi rgơi kơñau bol gơ bơh di tê Bèp. 30Añ mơ Bèp la dùl.”
Ală cau Juda kòñ cơm lŭ di Yàng Jesu
31Ală cau Juda dòñ tai lŭ nàng cơm di Kơnràñ. 32Yàng Jesu đơs mơ bol khai lah: “Añ neh ràng tơlik bol mê in oă broă niam bơh di Bèp; behơ̆, bơh broă lơi ală bol mê cơm lŭ di Añ taih?” 33#Leb 24:16.Ală cau Juda ho lah: “Bol hi ò cơm lŭ di ồng tài bơh broă niam, mơya bơh jơnau đơs tràl sơrbil; ồng la kòn mơnus mơ bơtào is să he la Yàng Tom Trồ.” 34#Đơs Crih 82:6.Yàng Jesu ho lah: “Ò di tòm bơta boh lam bol mê dê gơs cih lah: ‘Añ neh đơs: Ală bol mê la yàng,’ ò ơ? 35Dilah bơta boh lam sơnđan ală cau dòp geh jơnau Yàng Tom Trồ dê la yàng, (mơ jơnau Sră Goh ò rgơi sang lòi ò), 36gen Añ do, la Bơtau Bèp neh ơn is sàng goh mơ sồr lòt tus tòm dunnia, ñchi bơh tài bol mê đơs Añ đơs tràl sơrbil tòm tŭ Añ đơs lah: ‘Añ la Kòn Yàng Tom Trồ,’ dê taih? 37Dilah Añ ò lơh ală broă Bèp Añ jê, gen bol mê bañ dòn Añ; 38Ai dilah Añ lơh ală broă hơ̆, gen bulah bol mê ò dòn Añ, dòn tĕ ală broă Añ jê, nàng bol mê in rgơi git mơ wă lah Bèp ơm tòm Añ mơ Añ ơm tòm Bèp.”
Yàng Jesu tiă đah ne hiòng Jordan
39Bol khai jòi tai bơta nàng kup Kơnràñ, mơya Kơnràñ pleh klàs bơh di tê bol khai. 40#Jang 1:28.Yàng Jesu tiă wơl đah mattơngai lik hiòng Jordan, tus di tiah Jang neh lơh ƀaptem dơ̆ sơnròp, mơ ơm wơl tềng hơ̆. 41Gơs oă cau lòt tus hơ Kơnràñ mơ đơs lah: “Jang ò lơh dô nơm tềl krơi lơi ò, mơya ală bơta Jang neh đơs bơh cau do la song ngan.” 42Mơ tềng hơ̆ gơs oă cau dòn Kơnràñ.
Избрани в момента:
Jang 10: KPM2018
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 United Bible Societies. All rights reserved.