LUCAS 23
23
Si Jesus sa atubangan ni Pilato
(Mat. 27:1-2, 11-14; Mar. 15:1-5; Juan 18:28-38)
1Niyan ang bug-os nga guban sa ila nagtindug, kag nagdala sa iya atubangan ni Pilato. 2Kag ginsugdan nila ang pagsumbung sa iya, nga nagasiling, “Nakita namon ining tawo nga nagapatalang sang aton pungsud, kag nagadumili sa amon sa pagbayad sang buhis kay Cesar, kag nagasiling nga sia gid amo ang Cristo nga isa ka hari.” 3Kag si Pilato nagpamangkot sa iya, “Ikaw bala ang Hari sang mga Judio?” Kag nagsabat sia sa iya, “Ginsiling mo.” 4Kag si Pilato nagsiling sa puno nga mga sacerdote kag sa mga kadam-an, “Wala ako sing nakita nga kasal-anan sa sining tawo.” 5Apang nagpilit pa sila, nga nagasiling, “Ginasugyot niya ang katawohan, nga nagapanudlo sa bug-os gid nga Judea, kutub sa Galilea bisan tubtub diri.”
Si Jesus sa atubangan ni Herodes
6Sang pagkabati ni Pilato sini, nagpamangkot sia kon ang tawo Galileanhon. 7Kag sang nahibaloan niya nga sa ginsakpan sia ni Herodes, ginpadala niya sia kay Herodes, nga didto man sa Jerusalem sa sadtong mga adlaw. 8Karon sang nakita ni Herodes si Jesus, nagkalipay sia sing daku, kay dugay na nga nagahandum sia sa pagtan-aw sa iya, kay nakabati sia nahanungud sa iya, kag nagalaum sia sa pagtan-aw sing katingalahan nga nahimo niya. 9Gani ginpamangkot niya sia sing madugay; apang wala sia magsabat sing bisan ano. 10Nagtindug ang puno nga mga sacerdote kag ang mga escriba, nga ginasumbung sia sing masingkal. 11Kag si Herodes upud sang iya mga soldado nagtamay sa iya kag nag-uligyat sa iya; niyan, sang napasul-uban sia sing panapton nga malahalon, ginpabalik niya sia kay Pilato. 12Kag si Herodes kag si Pilato nag-abyanay sadto gid nga adlaw, kay anay mga kaaway sila.
Si Jesus Ginahukman nga Patyon
(Mat. 27:15-31; Mar. 15:6-20; Juan 18:38–19:16)
13Si Pilato nagpatipon sang puno nga mga sacerdote kag sang mga manugdumala kag sang katawohan, 14kag nagsiling sa ila, “Gindala ninyo sa akon ining tawo subong sang isa nga nagapatalang sang katawohan; kag yari karon, sang nausisa sia sa atubangan ninyo, ako walay nakita nga kasal-anan sa sining tawo sang bisan ano nga mga ginsumbung ninyo batok sa iya; 15wala, bisan pa si Herodes, kay ginpabalik niya sia sa aton. Yari karon, walay ano nga takus sa kamatayon nga nahimo niya; 16busa silotan ko sia kag buhian.” [ 17Karon dapat sia magbuhi sa ila sing isa ka binilanggo sa piesta.]
18Apang nagsinggit sila sing dungan, “Patya ining tawo, kag buhii sa amon si Barrabas”— 19ang isa nga ginbilanggo bangud sa isa ka ribok nga nahimo sa banwa, kag bangud sa pagpamatay. 20Si Pilato nagpamolong sa ila liwat, nga nagahandum sa pagbuhi kay Jesus; 21apang nagsinggit sila, “Ilansang sa cruz, ilansang sia sa cruz!” 22Nagsiling sia sa ila sa ikatlo, “Ngaa, ano bala nga kalainan ang nahimo sining tawo? Wala ako sing nakita sa iya nga kabangdanan sa kamatayon; busa silotan ko sia kag buhian.” 23Apang nagpilit sila sa mabaskug nga mga tingug, nga nagapangayo nga ilansang sia sa cruz. Kag ang ila mga tingug naglandas. 24Gani si Pilato naghukom nga ang ila ginapangayo himoon. 25Ginbuhian niya sia nga bangud sa ribok kag pagpamatay ginbilanggo, nga ila ginpangayo; apang si Jesus gintugyan niya sa kabubut-on nila.
Ang Paglansang kay Jesus
(Mat. 27:32-56; Mar. 15:21-41; Juan 19:17-30)
26Kag sang gindala nila sia, gindakup nila ang isa nga si Simon nga taga-Cirene, nga gikan sa kaumhan, kag ginpapas-an sa iya ang cruz, sa pagdala sini sa olihi ni Jesus. 27Kag may nagsonod sa iya nga dakung kadam-an sang katawohan, kag sang mga babayi nga nagahaya kag nagapanalabiton sa iya. 28Apang si Jesus nga nagbalikid sa ila nagsiling, “Mga babaying anak sang Jerusalem, dili kamo maghibi tungud sa akon, kondi maghibi kamo tungud sa inyo kaugalingon kag tungud sa inyo mga anak. 29Kay yari karon, nagaabut ang mga adlaw nga magasiling sila, ‘Bulahan ang mga baw-as, kag ang mga tiyan nga wala makadala, kag ang mga soso nga wala makapasoso!’ 30Niyan magasugud sila sa pagsiling sa mga kabukiran, ‘Pukani kami’; kag sa kabakoloran, ‘Taboni kami.’#Os. 10:8; Bug. 6:16. 31Kay kon ginahimo nila ini sa hilaw pa ang kahoy, ano bala ang mahanabu kon laya na ini?”
32Ang duha man, nga mga malauton, gindol-ong nga palatyon upud sa iya. 33Kag sang nag-abut sila sa duug nga ginatawag Ang Bagol, didto ginlansang nila sia sa cruz, kag ang mga malauton, ang isa sa too kag ang isa sa wala. 34Kag si Jesus nagsiling, “Amay, patawara sila; kay wala sila makahibalo sang ila ginahimo.” Kag nagpapalad sila sa pagbahinbahin sang iya mga panapton.#Sal. 22:18. 35Kag ang katawohan nagtindug, nga nagatan-aw; apang ang mga manugdumala nagyaguta sa iya, nga nagasiling, “Ang iban ginluwas niya; luwason niya ang iya kaugalingon, kon sia amo ang Cristo sang Dios, ang iya Pinili!” 36Ang mga soldado man nag-uligyat sa iya, nga nagapalapit kag nagatunghol sa iya sing langgaw, 37kag nagasiling, “Kon ikaw ang Hari sang mga Judio, luwasa ang imo kaugalingon!” 38May sinulat man sa ibabaw niya [sa Griego kag Latin kag Hebreo], “Ini Hari sang mga Judio.”
39Ang isa sang malauton nga nabitay nagbuyayaw sa iya, nga nagasiling, “Indi bala ikaw ang Cristo? Luwasa ang imo kaugalingon kag kami!” 40Apang ang isa nagsabdong sa iya nga nagasiling, “Wala ka gid bala mahadluk sa Dios, sanglit yara ka sa amo man nga katagudilian? 41Kag sa aton matarung gid; kay nagabaton kita sang nagakaigo nga balus sa aton mga buhat; apang ining tawo walay nahimo nga sayup.” 42Kag nagsiling sia, “Jesus, dumduma ako kon magsulud ka sa imo ginharian.” 43Kag nagsabat sia sa iya, “Sa pagkamatuud, nagasiling ako sa imo, karon nga adlaw manginkaupud ka nakon sa Paraiso.”
44Mga ikan-um na nga takna sadto, kag may kadudulman sa bug-os nga duta tubtub sa ikasiam nga takna, 45samtang ang adlaw nagadulum; kag ang kumbung#Ex. 26:31-33. sang templo napihak sa tunga. 46Niyan si Jesus, nga nagasinggit sa mabaskug nga tingug, nagsiling, “Amay, sa imo mga kamut ginatugyan ko ang akon espiritu!”#Sal. 31:5. Kag sang nakasiling sini nahunus ang iya ginhawa. 47Karon sang nakita sang capitan ang nahanabu, ginhimaya niya ang Dios, nga nagasiling, “Totoo gid nga ini matarung nga tawo!” 48Kag ang tanan nga kadam-an nga nagtipon sa sining talan-awon, sang nakita nila ang nahanabu, nagpauli nga nagapamukmuk sang ila mga dughan. 49Kag ang tanan nga kilala niya kag ang mga babayi nga nagsonod sa iya kutub sa Galilea#Luc. 8:2-3. nagtindug sa malayo nga nagtan-aw sining mga butang.
Ang Paglubung kay Jesus
(Mat. 27:57-61; Mar. 15:42-47; Juan 19:38-42)
50Karon may isa ka tawo nga ginhingalanan si Jose gikan sa Arimatea nga banwa sang Judio. Katapu sia sang corte, isa ka maayo kag matarung nga tawo, 51nga wala magsugut sa ila katuyoan kag buhat, kag nagahulat sia sang ginharian sang Dios. 52Ining tawo nagkadto kay Pilato kag nagpangayo sang bangkay ni Jesus. 53Niyan gintaltal niya ini kag ginputus sa panapton nga lino, kag ginpahamtang sia sa lulubngan nga ginguab sa bato, nga wala pa gid mapahamtangi sing tawo. 54Adlaw yadto sang Pag-aman, kag nagahilapit na ang adlaw nga inugpahuway. 55Ang mga babayi nga nag-abut upud sa iya gikan sa Galilea nagsonod, kag nagtan-aw sang lulubngan, kag kon paano ang pagpahamtang sang iya bangkay; 56niyan nagpauli sila, kag nag-aman sing mga pahumut kag mga ihalaplas.
Sa adlaw nga inugpahuway nagpahuway sila sono sa sogo.#Ex. 20:10; Deut. 5:14.
Избрани в момента:
LUCAS 23: ABHIL82
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ang Biblia ©1982 Philippine Bible Society