LUCAS 16
16
Ang Dimaminatud-on nga Tulugyanan
1Nagsiling man sia sa iya mga gintoton-an, “May tawo nga manggaranon nga may tulugyanan, kag ini ginsumbung sa iya nga nagausik sang iya mga pagkabutang. 2Kag gintawag niya sia kag nagsiling sa iya, ‘Ano bala ining ginapamatian ko nahanungud sa imo? Ihatag ang husay sang imo pagkatinugyanan, kay indi ka na makapadayon nga tulugyanan.’ 3Kag ang tulugyanan nagsiling sa iya kaugalingon, ‘Ano bala ang akon himoon, sanglit ang agalon ko nagakuha sa akon sang akon pagkatinugyanan? Wala ako sing kusug sa pagkutkut, kag nahuya ako magpakilimos. 4Nakatapat ako sang akon buhaton, agud nga kon kuhaon ako sa pagkatinugyanan batonon ako sang katawohan sa ila mga balay.’ 5Gani, sang napatawag niya sa iya ang tagsatagsa sang mga nakautang sa iya agalon, nagsiling sia sa nahauna, ‘Pila bala ang utang mo sa akon agalon?’ 6Nagsiling sia, ‘Isa ka gatus ka sukub nga lana.’ Kag nagsiling sia sa iya, ‘Kuhaa ang imo kalig-onan, kag lingkod ka sing madali kag isulat kalim-an.’ 7Niyan nagsiling sia sa isa, ‘Kag pila bala ang utang mo?’ Nagsiling sia, ‘Isa ka gatus ka sukub nga trigo.’ Nagsiling sia sa iya, ‘Kuhaa ang imo kalig-onan, kag isulat kawaloan.’ 8Ang agalon nagdayaw sang dimatarung nga tulugyanan bangud nga nakahimo sia sing maalamon; kay ang mga anak sining kalibutan sa ila kaliwatan labing maalam sa mga anak sang kapawa. 9Kag ako nagasiling sa inyo, maghimo kamo sing mga abyan paagi sa manggad nga dimatarung, agud nga kon madula ini mabaton nila kamo sa mga puluy-an nga walay katapusan.
10“Ang matutum sa diotay gid matutum man sa madamu; kag ang dimatarung sa diotay gid dimatarung man sa madamu. 11Busa kon wala kamo magmatutum sa manggad nga dimatarung, sin-o bala ang magatugyan sa inyo sang manggad nga matuud? 12Kag kon wala kamo magmatutum sa iya sang iban, sin-o bala ang magahatag sa inyo sang inyo kaugalingon? 13Walay sologoon nga makaalagad sa duha ka agalon; kay magadumut sia sa isa kag magahigugma sa isa, ukon magadampig sia sa isa kag magatamay sa isa. Indi kamo makaalagad sa Dios kag sa manggad.#Mat. 6:24.”
14Ang mga Fariseo, nga mga mahigugmaon sang pilak, nakabati sini tanan, kag nagyaguta sila sa iya. 15Apang nagsiling sia sa ila, “Kamo amo ang mga nagapakamatarung sang inyo kaugalingon sa atubangan sang mga tawo, apang ang Dios nakakilala sang inyo mga tagiposoon; kay ang ginapakamataas sa tunga sang mga tawo kangil-aran sa itololok sang Dios.
Ang Kasogoan kag ang Ginharian sang Dios
16“Ang kasogoan kag ang mga manalagna tubtub kay Juan; kutub sadtong tion ginawali ang maayong balita sang ginharian sang Dios, kag ang tagsa ka tawo nagasulud sing palugus sa sini.#Mat. 11:12-13. 17Apang mahapus pa nga magtaliwan ang langit kag duta, sang sa manginwalay pulus ang isa ka kudlit sang kasogoan.#Mat. 5:18.
Ang Pagtolon-an ni Jesus nahanungud sa Pagbulagay
(Mat. 19:1-12; Mar. 10:1-12)
18“Ang tagsatagsa nga nagabulag sa iya asawa kag nagapangasawa sing lain nagapanglahi, kag ang nagapangasawa sa isa nga binulagan sang iya bana nagapanglahi.#Mat. 5:32; 1 Cor. 7:10-11.
Ang Manggaranon kag si Lazaro
19“May isa ka tawo nga manggaranon, nga napanaptan sing purpura kag lino nga manipis kag nagakabuhi sa lakas nga kadayawan adlawadlaw. 20Kag sa iya gawang nahal-id ang isa ka imol nga tawo nga ginhingalanan si Lazaro, naputus sang mga tabukaw, 21nga naghandum nga pakan-on sang mga usik nga nagkalaholog sa latok sang manggaranon; bisan pa ang mga ido nagpalapit kag nagdilap sang iya mga tabukaw. 22Napatay ang imol nga tawo kag gindala sia sang mga manugtunda sa sabak ni Abraham. Ang tawo nga manggaranon napatay man kag ginlubung; 23kag sa Hades, sang naga-antus sia, ginbayaw niya ang iya mga mata, kag nakita niya si Abraham sa malayo kag si Lazaro sa iya sabak. 24Kag nagpanawag sia, ‘Amay nga Abraham, kalooyi ako, kag ipadala si Lazaro agud nga itum-oy niya ang ukbung sang iya tudlo sa tubig kag mapabugnawan ang akon dila; kay nagakasakit ako sa sining dabdab.’ 25Apang si Abraham nagsiling, ‘Anak, dumduma nga ikaw sang nagakabuhi pa nagbaton sang imo maayong mga butang, kag si Lazaro sa amo nga bagay sang malaut nga mga butang; apang karon diri ginalipay sia, kag ikaw yara sa kasakit. 26Kag dugang pa sini tanan, sa ulut namon kag ninyo may ginbutang nga daku nga kadadalman, agud nga ang mga buut maglaton gikan diri pakadto sa inyo indi makasarang, kag walay makatabok gikan dira pakari sa amon.’ 27Kag nagsiling sia, ‘Busa ginapakilooy ko sa imo, amay, nga ipadala mo sia sa balay sang akon amay, 28kay may lima ako ka utud nga lalaki, agud nga makapaandam sia sa ila, nga indi sila man magkari sa sining duug sang pag-antus.’ 29Apang si Abraham nagsiling sa iya, ‘Sila may Moises kag mga manalagna; papamati-a sila sa ila.’ 30Kag nagsiling sia, ‘Indi, amay nga Abraham; apang kon may isa nga gikan sa mga minatay magkadto sa ila, magahinulsul sila.’ 31Nagsiling sia sa iya, ‘Kon indi sila magpamati kay Moises kag sa mga manalagna, indi man sila mabuyok bisan may isa nga mabanhaw.’”
Избрани в момента:
LUCAS 16: ABHIL82
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ang Biblia ©1982 Philippine Bible Society