San Mateo 8
8
Tu'c jayau oytanic
1Imanacta̱jc Jesús en ayé copac, may jayajwat iguinatspoguigau, 2mit tu'c jayau ijtʉpay may lla̱gas min mam Jesús itsʉ̱na mit nicos̈atenda̱jcʉu je' ita'ná̱m, inʉm:
—Señor, te inwamp, oyap is̈ac-oytamp.
3Mit Jesús iyajcau icʉ' mit inʉjmau:
—Tʉnwamp. Mi-oytanáj.
Mit cʉs̈ iguitajyau jaran ayé lla̱gas. 4Mit Jesús inajau:
—Camnʉjma nepʉn po nʉs̈ actu-e'p judíujat ipa̱nij ni'c mi-oytanway, mit yac ayé ofrenda lo que imanda̱tway Moisés, pa jayajwat ma jawiga ni'c mi-oytanway.
Jesús i-ac-oytajnap tu'c jayau iway
5Icojy Jesús Capernaum, iguicutomiu tu'c capitán mit iguiyo'jtau tu'c favor, 6inʉm:
—Señor, tʉnwáy cʉmnap tʉntʉcm ni'c cumʉgʉguip, mit itunas̈o'cp.
7Mit Jesús inajau:
—Nʉs̈áj tʉs̈ac-oytan.
8Po ayé capitán iguipo'n:
—Señor, tʉs̈camerecia̱tp intʉgʉywa'n tʉntujugum. Con is̈nʉmwa'n ni'c ma oytan, oytanáj tʉnwáy. 9Ni'c ʉ̱ itpey pʉn tʉs̈manda̱tpay, mit tʉnmanda̱tpey soldajat. Mit te tʉnyʉjmap tu'c ma nʉs̈, itp ti inʉs̈wa'n. Mit te tʉnyʉjmap jatu'c ma mi'n, itp ti imi'nwa'n. Mit te tʉnyʉjmap tʉnmozo ma wat tu'c cosa, itp ti iguiwatwa'n.
10Iguimarajw we'n Jesús, nigu-épijyʉu mit inʉmgʉs̈au jeme iguinatspoguigaway:
—Iyacs̈ta'cway tʉnʉmgʉs̈ap: Ne Israelway na̱s̈ tʉnganipa̱tp tu'c jayau cupʉcpay mʉgʉc as̈am ayʉ̱́j jayau. 11Mit tʉnʉmgʉs̈ap ni'c mingáj mayo'c jayajwat nu'pʉjʉn lajatway en ayʉ̱́j mundu. Je'jat tsʉ̱ngáj tuwitic mit Abraham, Isaac mit Jacob mam imanda̱twa'n Dios. 12Po una̱c Israejlatway jeme tʉgʉygámpayate mam imanda̱twa'n Dios, ica'tspichingáj pe'ta̱m chitimicni'c, mit jem ijʉygawa'n mit iguitunas̈cawa'n mʉgʉc.
13Mit Jesús inajau ayé capitán:
—Nʉs̈, mit jatáj as̈am incupʉjc.
Mit oytan jaran iway.
Pedro imʉ't-ájchway
14Mit icojy Jesús Pedro itʉcm, i-is̈au imʉ't-ájchway cʉmnap che's̈ni'c ni'c ijtʉu mʉgʉc jʉjn. 15Mit Jesús iyajcau icʉ' ayé tu'nijway, mit iguiyac jaran ayé jʉjn. Mit ayé ajchwaywáy ca's̈ʉ'c mit cʉs̈ i-atendia̱tcʉs̈atu.
Jesús i-ac-oytangʉs̈p mayo'c tu'nijatway
16Icutsu'ij, imumingajau mayo'c jayajwat itcʉjʉway demo̱nyujat. Mit iguimucotscʉs̈ ayé demo̱nyujat, pichingau jaran. Mit i-ac-oytangʉs̈ nu'pʉjʉn tsʉ̱ngaway tu'nij. 17Jat we'n pa ma cumplia̱t lo que inʉmway ayé profeta Isaías, inʉm: “Je' nas̈chi'tcajau na-enfermedajat mit i-actogoy nas̈actu'ngʉjʉpay.”
Jeme inatspoguigapay Jesús
18Mit igui-is̈ Jesús ni'c may jayaujuc igui-apitucje̱jcau, inʉmgʉs̈au ipʉctampajyat ni'c nas̈cáj tuganʉ-ájw. 19Mit tu'c i-ajque's̈pay ley iguicutomiu mit inajau:
—Amayipay, tʉnatspoguiyáj jʉmgapa'tu mam inyʉs̈wa'n.
20Mit Jesús iguinʉjmau:
—Zurrí̱yujat itcʉjʉp cʉt mam itsʉ̱nga, mit jonwájat itcʉjʉp ipe'jnat, po ʉ̱ jeme tʉjatway jayau tʉnga-aguep laj mam tʉpo'cs̈wa'n.
21Jatu'c ipʉctampay iguinʉjmau:
—Señor, tʉnatspoguiyáj po mojyʉ'gac laj tʉs̈-e'pwa'n tʉnte̱t hasta i-o'cwa'n.
22Mit Jesús inʉjmau:
—Mi̱ natspoguiyac mit yajcʉs̈ jeme tangapay ma ni̱pca i-ánimajat, ni'c je'jat as̈am o'guijcatey ni'c tʉs̈cacupʉjcap.
Jesús i-actentamp tu'c s̈e'm
23Mit itʉgʉjy Jesús ajni'c, tʉgʉygawey ipʉctampajyat. 24Mit chu̱chiu tu'c s̈e'mtu̱ mʉgʉcway lagunani'c mit ayé nʉ-ola tʉgʉy ajni'c, mit Jesús ma̱pate. 25Mit ipʉctampajyat iguicutomigau mit i-acjutujcau, inʉmgau:
—¡Señor, salva̱tcac ni'c natogoygap!
26Mit je' inʉmgʉs̈au:
—¿Tini'c impʉ̱́tca? Mijchat migacupʉjcap may.
Cʉs̈ ca's̈ʉ'c mit imucots ayé s̈e'm mit ayé laguna, mit tentan jaran. 27Mit nigu-épigʉjʉu ayé pʉctampajyat, inʉmgau:
—¿Pʉna jayau ayʉ̱́j, ni'c iguijayaumaygap hasta s̈e'm mit laguna.
Jayajwat itcʉjʉpay demo̱nyujat
28Icojy Jesús tuGalaguna-ájw itʉcmayna̱s̈at Gadarajwayna'jat, iguipichijnau mechc jayajwat itcʉjʉpay demo̱nyu, mit je'jat pichingau campu santu. Mit je'jat ma̱lo'jcat hasta nepʉn ca-oyap igui-acnás̈ca en ayé to̱u. 29Mit ya̱s̈cau mʉgʉc, inʉmgau:
—¿Ti inwamp mit ʉjtsat Jesús, Dios iway? ¿Mimimp pa is̈actunas̈cáj jaran antes icojawa'n ayé tiempu?
30Mit tu'c mayway i̱chimjuc cayche'ngapate en ayé laj. 31Mit ayé demo̱nyujat iyo'tcajau favor Jesús, inʉmgau:
—Te is̈acpichingap yam, acnʉs̈cac pa tʉtʉgʉygawa'n i̱chimna'jat ijo̱jtugujmat.
32Mit Jesús inʉmgʉs̈au:
—Nʉs̈ca jem.
Mit cʉs̈ pichingau mit tʉgʉygau ijo̱jtugujmat ayé í̱chijmat, mit nu'pʉjʉn ayé i̱chimjuc pujʉ'cmanajcau copac-auni'c mit tʉgʉygau lagunajugum, mit jem inʉ-o'jcaj.
33Mit i̱chimcuida̱tpayna'jat po'jcau, mit nʉs̈cau nʉ'jcopacni'c, mit inʉmgau nu'pʉjʉn jeme jatway, mit inʉmgau lo que iguijatcaway ayé jayajwat itcʉjʉway demo̱nyujat. 34Mit cʉs̈ nu'pʉjʉn nʉ'jcopac jayajwat nʉs̈cau iguipá̱tca Jesús. Mit igui-is̈caj, inʉmgajau ma pichin itʉcmayna̱s̈at.
Избрани в момента:
San Mateo 8: PSNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nuevo Testamento en Popoluca de Sayula © Sociedad Bíblica de México, [1969].