San Mateo 15
15
Lo que nas̈actuwatpay mal
1Mit iguicutomigau Jesús una̱c fariseujat mit jeme i-ajque's̈capay ley. Je'jat mingau Jerusalén, mit i-ucyo'tcau Jesús:
2—¿Tini'c impʉctampajyat igajayaumaygap ayé costumbre itcʉjʉway ampay jayajwat? Je'jat igacupujcap icʉ'jat icaygawa'n as̈am ʉjtsat tʉs̈watca.
3Jesús ipo'ngʉs̈:
—¿Mit tini'c is̈cajayaumáyga lo que imanda̱tway Dios? Mijchat solo inwangap incostumbrejatu. 4Ni'c Dios imanda̱t: “Oyninʉm inte̱t mit inma̱m”, mit jeme itucotsámpay ite̱t o ima̱m, ayé jayau ma o'c. 5Po mijchat inyʉmgap ni'c tu'c jayau oyap iguinʉ́jma ite̱t o ima̱m: “Caja-oyap tʉmajyi mit tumi̱n ni'c tʉnmoyway Dios lo que tʉmo'ámpayate”, 6mit ayé jayau inʉmway we'n, cajatsʉ̱nap obliga̱tic iguimajyiwa'n ite̱t o ima̱m. We'n is̈ajque's̈ca mijchat mit inyajcau jalmanu lo que inʉmway Dios ni'c más inwangap incostumbrejat. 7¡Mijchatu miniwe̱tcʉjʉp! Oyo'gu Dios igui-actunʉjm profeta Isaías lo que inwatcapay mijchat, inʉm:
8Ayʉ̱́j jayajwat i-auni'jcatu tʉs̈-oyninʉmgap,
po ijo̱tni'jcat tʉs̈cawangap iyacs̈ta'cway.
9Jalmanu tʉs̈-adora̱tcap,
Ni'c i-ajque's̈cap tu'c ama̱s̈an lo que inʉmgapay jayajwat.
10Mit Jesús iguiya̱s̈cʉs̈ jayaujuc, inʉmgʉs̈au:
—Márauga, mit entendiá̱tca tʉnʉmgʉs̈ámpay. 11Nas̈ca-actuwatcap mal ayé cayan nacompay na-auni'c, po nas̈actuwatcap mal jeme pichimpay najo̱tni'jcat.
12Mit cʉs̈ Jesús iguicutomigau ipʉctampajyat, iguinʉmgajau:
—¿Ingajawip ni'c fariseujat icutu'mpʉjcau iguimarauga lo que inyʉmgʉs̈away?
13Po Jesús ipo'ngʉs̈:
—Nu'pʉjʉn cujy igani̱pway tʉnte̱t Dios jeme tsʉ̱napay tsajpni'c, itáj ti iguiwis̈cawa'n. 14Mijchat camwatca cuenta ayé fariseujat. Je'jat as̈am winchat mit iwejnu'pcajap winchat. Mit te tu'c winch icʉ'ju'p jatu'c winch, inimechquij cʉmdʉgʉygáj en tu'c cʉt.
15Mit Pedro inʉjmau Jesús:
—Actujawigac ti inʉmo'jcʉp ayé inyʉmway.
16Jesús inʉmgʉs̈au:
—¿Ne mijchat ingani-entendia̱tcap ayé? 17Injawigap ni'c nu'pʉjʉn nacaypay, ayé tʉgʉyp na-auni'c, mit ayé coyp natinchayni'c mit pichimpatu. 18Po ayé mal jeme pichimpay na-auni'c, aye mimp najo̱tni'c, mit ayé nas̈actuwatcap mal. 19Ni'c najo̱tni'c imi'n ayé mal napensa̱tcapay, na-ago'cwa'n, nachajyo'ywa'n, nanu'mwa'n, nas̈we̱twajtawa'n jatu'c jayau, natucotswa'n. 20Ayʉ̱́j mal mimp najo̱tni'c mit nas̈actuwatcap mal. Po nas̈ca-actuwatcap mal te nagacupujp nacʉ'jat nacaywa'n as̈am ayé costumbre iwatcapay fariseujat.
Nat icupʉc tu'c to's̈ay Canaánway
21Mit ipichijn jem Jesús, nʉcs̈ pa ayé na̱s̈at Tiro mit Sidón. 22Mit coy tu'c to's̈ay Canaánway jeme tsʉ̱napay en ayé na̱s̈. Mit je' ya̱s̈, inʉm:
—¡Señor, mi̱ mipichin David ifamiliani'c pa is̈salva̱tcáj, ayo̱wis̈ac! ni'c tʉnto'chwáy itunas̈o'cp ni'c ijtʉp tu'c demo̱nyu.
23Po Jesús igapo'nu ayé to's̈ay. Mit iguicutomigau ipʉctampajyat mit iguinʉmgajau:
—Acnʉ́s̈nu ayé to's̈ay ni'c ya̱s̈tacmimp namugus̈á̱jmat.
24Jesús ipo'ngʉs̈:
—Tʉs̈ajyu't Dios solo pa ayé Israelway jayajwat ni'c je'jat yo'ygap as̈am borregujat tógoyijcatway.
25Po ayé to's̈ay iguicutomiu mit nicos̈atenda̱jcʉu Jesús iwiná̱m, inʉm:
—Señor, majyiyac.
26Po Jesús inʉjmau:
—Ca-oy tʉs̈chi'tcajawa'n tʉnwajyat ima̱s̈anʉ̱jnat pa tʉs̈moygawa'n tacwájat.
27Iguipo'n ayé to's̈ay:
—Jo̱, Señor, po tacwájat icaygap ma̱s̈anʉ̱nco's̈wájat jeme ca'ugapay ijaycat ime̱s̈ani'c.
28Mit cʉs̈ Jesús ipo'n:
—¡Mi̱ mi tu'c to's̈ay micupʉcpay mayo'c! Pi is̈wajtac Dios as̈am is̈wa'n.
Mit oytan jaran ito'chwáy.
Jesús i-ac-oytamp may jayau
29Mit ipichijn jem Jesús, nas̈ laguna-auni'c Galilea. Mit cu't en tu'c copac mit nitsʉ̱nda̱jcʉu jem. 30Mit iguicutomigau may jayajwat mit imumingajau cu̱s̈ujat, winchat, u̱jmat, tótsijcatway mit japu̱t jayajwat tu'nijatway. Mit iyajcajau ita'ná̱m Jesús, mit je' i-ac-oytangʉs̈. 31Mit ayé jayajwat nigu-épigʉjʉu igui-is̈caj ni'c cotsta̱jcap u̱jmat, mit oytangau tótsijcatway, yo'ygau cu̱s̈ujat, mit e'pta̱jcau winchat. Mit ayé Israejlatway i-oyninʉmgau iDiosat.
Jesús i-ajcayp cuatro mil jayajwat
32Mit cʉs̈ Jesús iguiya̱s̈cʉs̈ ipʉctampajyat, inʉmgʉs̈au:
—Tʉnayo̱wis̈cʉs̈p ayʉ̱́j jayajwat ni'c tu̱gup s̈ʉjwanu itsʉ̱ngaj mit ʉ̱ mit ca-itcʉjʉp ti icaygámpay. Mit tʉngawamp tʉs̈acnʉs̈cʉs̈wa'n sin cay magadesmaya̱tca to̱uni'c.
33Cʉs̈ iguinʉmgajau ipʉctampajyat:
—¿Jʉm nas̈pa̱tcawa'n may cayan yam mam iga-it tʉjcat pa nas̈ajcu̱s̈cʉjʉwa'n ayʉ̱́j jayaujuc?
34Jesús inʉmgʉs̈au:
—¿Pʉjʉn ma̱s̈anʉ̱n is̈aguepca?
Iguipo'ngau:
—Tʉnaguepcap siete ma̱s̈anʉ̱n mit una̱c acs̈wájat.
35Mit Jesús inʉmgʉs̈au ayé jayaujuc ma nitsʉ̱nda̱jcʉjʉ na̱s̈ni'c.
36Mit iguipʉjcʉs̈ ayé siete ma̱s̈anʉ̱nwájat mit ayé acs̈wájat, inʉjmau Dios ni'ctiyu̱s̈, mit i-emgada̱c mit imoygʉs̈ ipʉctampajyat, mit ipʉctampajyat i-acpas̈angau pa ayé jayajwat. 37Mit caybʉ'ngau mit cu̱s̈cʉjʉu. Mit cʉs̈ i-apiumujcau siete ca'c patsijcat mit ma̱s̈anʉ̱ncutucwájat jeme icaytangaway. 38Mit it cuatro mil jayajwat jeme caygaway, aparte to's̈ajyat mit ya̱wájat. 39Mit Jesús i-acnʉs̈cʉs̈nuw ayé jayaujuc, mit je' tʉgʉy ajni'c, mit nʉcs̈ pa Magdalajway na̱s̈.
Избрани в момента:
San Mateo 15: PSNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nuevo Testamento en Popoluca de Sayula © Sociedad Bíblica de México, [1969].