Lucas 1
1
I TEJCHIBAL I T'AÑ: JUÑ CHA'AÑ TEÓFILO
(1.1-4)
1Añ ca'bʌlob tsa' bʌ i ñopo i ts'ijbañob ti quepecña chuqui tac tsa' ujti ti isujm ti lac tojlel. 2Lajal tsi' ts'ijbayob bajche' tsi' cʌntesayonla jiñi tsa' bʌ i q'ueleyob c'ʌlʌl ti' cajibal. Jiñobʌch mu' bʌ i su'bob jiñi t'añ. 3Jiñi cha'añ che' bʌ tsa' ujti c ña'tan ti toj isujmlel pejtelel chuqui tsa' ujti c'ʌlʌl ti' cajibal, joñon ja'el tsa' c ña'ta uts'at mic ts'ijbubeñet ti quepecña, uts'at bʌ Teófilo, 4cha'añ ma' wen cʌn isujmlel che' bajche' tsa' cʌntesʌntiyet.
1. CHE' ALɅ TO JUAN TSA' BɅ I YɅC'Ʌ CH'ɅMJA' YIC'OT JESÚS
(1.5—2.52)
I tsictesʌntel cha'añ mi caj i yilan pañimil Juan
5Che' ti yorajlel i yumʌntel rey Herodes#1.5 Herodes: Jiñʌch jiñi mu' bʌ i su'bentel ti Herodes Grande tsa' bʌ i mele i ye'tel ti pejtelel Israel che' ti ja'bil 37 c'ʌlʌl ti 4 che' maxto tilemic Cristo (Q'uele ja'el Mt 2.1). ti Judea, añ juntiquil motomaj i c'aba' Zacarías lajal bʌ i ye'tel bajche' Abías;#1.5 Abías: Jiñʌch junmojt motomajob mu' bʌ i melob i ye'tel ti Templo, come añob che' bajche' chʌmp'ejl i cha'c'al (24) ti' mojt jiñi motomajob (1 Cr 24.10). Jujunmojt motomajob mi' melob i ye'tel jump'ejl semana ya' ti Templo ti Jerusalén. Cha'yajl ti jump'ejl ja'b mi' melob i ye'tel. añ i yijñam Zacarías i c'aba' Elisabet, loq'uem bʌ ti' p'olbal Aarón. 6Ti' cha'ticlelob tojob ti' tojlel Dios. Ts'ʌcʌl tsi' jac'ʌyob pejtelel i su'bal lac Yum yic'ot i mandar. 7Pero ma'añobic i yalobil, come to'ol wa'al jach bʌ x'ixic jiñi Elisabet. Ca'bʌlix i ja'bilel ti' cha'ticlelob.#Gn 11.30; 17.15-21; 1 Sm 1
8Che' bʌ añob ti' wenta Zacarías yic'ot i pi'ʌlob ti e'tel cha'añ mi' melob ye'tel ti motomaj ti' tojlel Dios, 9come i tilel mi' cha'leñob yajcaya che' mi' q'uexob i bʌ jiñi motomajob. Tsa' c'oti ti' wenta Zacarías cha'añ mi' yochel ti' Templo lac Yum cha'añ mi' pul pom.#1.9 Jiñi pom Mi' pulel ti' pam jiñi pulʌntib ya' ti' tojel jiñi C'ax Ch'ujul bʌ ajñibʌl, che' mi' sʌc'an yic'ot che' mi yic'an (Ex 30.1-8; 1 R 7.48-50). Che' ya' tempʌbil Pejtelel wiñicob x'ixicob (v. 10) jiñʌch che' ti ic'ajel (Q'uele. Hch 3.1). Mi' ña'tʌntel cha'añ añob waxʌclujump'ejl mil (18,000) motomajob. Jiñi cha'añ cojach mi' ñumelob cha'añ mi' pulob pom ya' ti templo junyajl o cha'yajl jujuntiquil motomaj. 10Pejtelel wiñicob x'ixicob añob ti jumpat, woli' pejcañob Dios che' ti' yorajlel woli' pulel pom. 11Che' jiñi tsa' tsictiyi ti wut Zacarías i yÁngel lac Yum, wa'al ti' ñoj ba'añ i pulʌntib pom. 12Tsa' toj sajti i pusic'al Zacarías che' bʌ tsi' q'uele, tsa' wen caji ti bʌq'uen.
13Pero jiñi ángel tsi' su'be:
—Zacarías, mach a cha'len bʌq'uen, come tsa' u'binti a woración. A wijñam Elisabet mi caj i yʌc' ti pañimil ch'itoñ bʌ a walobil, mi caj a wotsʌben i c'aba' Juan. 14Tijicña mi caj a wu'bin yic'ot mi caj i ñuc añ a pusic'al yic'ot tijicñajax mi caj i yu'biñob ca'bʌlob che' mi yilan pañimil a walobil. 15Come ñuc mi caj i q'uejlel a walobil ti' tojlel Dios. Ma'añic mi caj i jap vino mi lembal.#1.15 Che'ʌch i cuxtʌlel juntiquil mu' bʌ i yʌc' xuc'ul bʌ i t'añ cha'añ mi' yajñel che' bajche' nazareo (Nm 6.1-5; Jue 13.4,7-14); che'ʌch ja'el i cuxtʌlel jiñi recabob (Jer 35). C'ʌlʌl che' cʌntʌbil, but'ul ti Ch'ujul bʌ Espíritu#1.15 Jiñi Lucas mi' wen tsictesan i ye'tel jiñi Ch'ujul bʌ Espíritu (Lc 1.35,41,67; 2.25-27; 3.16,22; 4.1,14,18; 10.21; 11.13; 12.12). mi caj i yajñel. 16Mi caj i yʌq'ueñob i sutq'uin i bʌ ca'bʌl israelob cha'añ mi' ñopob i Yum Dios. 17Mi caj i majlel a walobil ti ñaxan ti' tojlel Lac Yum, lajal i ye'tel yic'ot i p'ʌtʌlel bajche' Elías, cha'añ mi' yʌq'ueñob uts bʌ i pusic'al tatʌl ña'ʌlob cha'añ mi' c'uxbiñob i yalobilob, cha'añ mi' yʌq'ueñob wen bʌ i pusic'al xñusa mandarob cha'añ mi' tajob i ña'tʌbal lajal bajche' jiñi tojo' bʌ. Che' jiñi mi caj i yʌq'ueñob wiñicob x'ixicob i chajpañob i pusic'al cha'añ lac Yum.
18Zacarías tsi' c'ajtibe jiñi ángel:
—¿Bajche' mi caj c ña'tan mi isujm jiñi? Come joñon ñoxoñix. Che' ja'el quijñam añix ca'bʌl i ja'bilel, —che'en.
19Jiñi ángel tsi' jac'be:
—Joñon Gabriel,#1.19 Gabriel jiñi jach bʌ jiñi ángel tsa' bʌ i tsictesʌbe Daniel i jilibal i p'ʌtʌlel i ye'tel pañimil (Dn 8.16-17; 9.21). Jiñi jilibal woli bʌ la cʌl tsa' ujti che' ba ora tsi' yila pañimil Juan tsa' bʌ i yʌc'ʌ ch'ʌmja' (Lc 1.17). añon ti' tojlel Dios, chocbilon tilel cha'añ mic pejcañet cha'añ mic su'beñet ili wen t'añ. 20Awilan, cha'añ ti' caj ma'añic tsa' ñopo c t'añ cha'añ jiñi mu' bʌ caj ti ujtel che' ti' yorajlel, mi caj a wochel ti x'uma'. Ma'añic mi caj a mejlel ti t'añ c'ʌlʌl ti jiñi q'uiñ che' mi' yujtel jiñi tsa' bʌ c su'beyet, che'en jiñi ángel.
21Che' bʌ woli' chʌn pijtañob Zacarías jiñi wiñicob x'ixicob, tsi' c'ajtibeyob i bʌ chucoch woli i chʌn jal-añ Zacarías ti Templo. 22Che' bʌ tsa' loq'ui tilel Zacarías, ma'añic tsa' mejli i pejcañob, tsa' jach i pejcayob ti' c'ʌb. Che' jiñi tsi' ña'tayob añ chuqui tsi' q'uele Zacarías ti Templo ch'oyol bʌ ti panchan. Che'ʌch tsa' cʌle Zacarías ti x'uma'. 23Che' bʌ tsa' ujti i mel i ye'tel, tsa' majli Zacarías ti' yotot.
24Ti wi'il tsa' caji i cʌntan i yalobil Elisabet. Jo'p'ejl uw ma'añic tsa' loq'ui ti' yotot come tsi' ña'ta: 25“Lac Yum tsa'ix i yʌq'ueyon calobil cha'añ mi' lajmel c wajlentel ti' tojlel wiñicob x'ixicob”,#1.25 Ti' tojlel jiñi judíojob, juntiquil x'ixic mach bʌ añic i yalobil, yom mi' yʌl cha'añ mach uts'atic woli i q'uejlel ti Dios (Gn 30.23; 1 Sm 1.1-18). che'en.
I tsictesʌntel cha'añ mi caj i yilan pañimil Jesús
26Ti' wʌcp'ejlel uw Dios tsi' choco tilel jiñi ángel Gabriel ti jump'ejl tejclum ya' ti Galilea i c'aba' Nazaret.#1.26 Ti jim bʌ q'uiñ jiñʌch alʌ tejclum am bʌ ti' pam wits ya' ti Galilea. 27Tsa' tili jiñi ángel ba'añ juntiquil tsiji' bʌ xch'oc, c'ajtibil bʌ i cha'añ José loq'uem bʌ ti' p'olbal David. I c'aba' jiñi xch'oc jiñʌch María. 28Che' bʌ tsa' ochi ángel ya' ba'añ María tsi' su'be:
—¡Cotañet. Uts'at woli' q'uelet Dios! Añ lac Yum a wic'ot. [Uts'at mi caj a q'uejlel ti' tojlel x'ixicob.]#1.28 Ti yan tac bʌ Biblia ma'añic mi lac taj ili t'añ: Uts'at mi caj a q'uejlel ti' tojlel x'ixicob. —Che'en.
29Pero María, che' bʌ tsi' q'uele jiñi ángel tsa' toj sajti i pusic'al. Tsa' caji ti t'añ ti' pusic'al cha'añ jiñi t'añ tsa' bʌ i yʌlʌ ángel. 30Jiñi ángel tsi' su'be:
—María, mach ma' cha'len bʌq'uen, come uts'at woli' q'uelet Dios. 31Mi caj a cʌntan alʌl, mi caj i yilan pañimil ch'itoñ bʌ a walobil, mi caj a wotsʌben i c'aba' Jesús.#1.31 Ili versículo woli i taj ti t'añ jiñi am bʌ ti Is 7.14. Jesús añ isujmlel “lac Yum mi' Coltañonla”. Q'uele Mt 1.21-23. 32Mi caj i q'uejlel ti ñuc. Mi caj i pejcʌntel ti' Yalobil jiñi C'ax Ñuc bʌ. Lac Yum Dios mi caj i yʌq'ueñ i ye'tel ti Rey ti' q'uexol i ñojte'el, i c'aba' David. 33Mi caj i mel i ye'tel ti Rey ti' tojlel i p'olbal Jacob ti pejtelel ora, ma'añic mi caj i jilel i yumʌntel,#1.32-33 Jiñi ángel woli i taj ti t'añ ili texto tac (2 Sm 7.9,12-14,16; Is 9.7; Miq 4.6-7). che'en jiñi ángel.
34María tsi' c'ajtibe jiñi ángel:
—¿Bajche' mi caj i yujtel jiñi? Come maxto añic quic'ot wiñic, —che'en.
35Jiñi ángel tsi' su'be:
—Mi caj i tilel jiñi Ch'ujul bʌ Espíritu ti a tojlel. I p'ʌtʌlel jiñi C'ax Ñuc Bʌ mi caj i moset.#1.35 Mi caj i moset: Ili t'añ jiñʌch i lajintel che' bajche' ts'ijbubil ti Oñiyi bʌ Wen T'añ che' tsa' ju'bi tilel tocal cha'añ mi' mos jiñi otot o wits cha'añ mi' yʌc' ti tsictiyel cha'añ ya'ʌch añ Dios (Ex 24.15-18; 40.35). Q'uele ja'el Lc 9.34-35. Jiñi cha'añ jiñi ch'ujul bʌ alʌl mu' bʌ caj i yilan pañimil mux i pejcʌntel ti' Yalobil Dios. 36Awilan, a pi'ʌl Elisabet jiñi a cʌñʌ bʌ wolix i cʌntan ch'itoñ bʌ i yalobil ja'el, anquese ca'bʌlix i ja'bilel. Wʌcp'ejlix uw woli' cʌntan alʌl jiñi tsa' bʌ ajli ti to'ol wa'al jach bʌ x'ixic. 37Come ma'añic chuqui mach mejlic i mel Dios.#Gn 18.14; Jer 32.17,27
38Jiñi cha'añ María tsi' yʌlʌ:
—Joñon x'e'telon i cha'añ lac Yum. La' melbenticon che' bajche' tsa' wʌlʌ.
Tsa' loq'ui majlel jiñi ángel ba'añ María.
María tsa' majli i jula'tan Elisabet
39Che' ñumeñix cha'p'ejl uxp'ejl q'uiñ tsa' caji ti xʌmbal María. Ti ora tsa' letsi majlel ti wits c'ʌlʌl ti jump'ejl tejclum ya' ti Judá. 40Tsa' ochi ti' yotot Zacarías. Tsi' yʌq'ue cortesía Elisabet. 41Che' bʌ tsi' yu'bibe i t'añ María jiñi Elisabet, jiñi alʌl cʌntʌbil bʌ i cha'añ tsʌts tsi' ñijca i bʌ ti' ñʌc'. Jiñi Elisabet tsa' bujt'i ti' Ch'ujul bʌ Espíritu. 42Tsa' caji i cha'len c'am bʌ t'añ, tsi' yʌlʌ:
—Mi caj a sujbel ti ñuc cha'añ x'ixicob. Mi caj i sujbel ti ñuc jiñi alʌl cʌntʌbil bʌ a cha'añ.#Jue 5.24; Lc 11.27-28 43¿Ñucon ba cha'añ mi' tilel i jula'tañon i ña' c Yum? 44Come ba' ora tsa' cu'bi a t'añ, jiñi alʌl cʌntʌbil bʌ c cha'añ tsʌts tsi' ñijca i bʌ cha'añ i tijicñʌyel. 45Tijicñayet cha'añ tsa' ñopbe i t'añ lac Yum mu' bʌ caj i ts'ʌctiyel, che'en Elisabet.
I c'ay María
46Jiñi cha'añ María tsi' yʌlʌ:
Mic su'b i ñuclel lac Yum ti pejtelel c pusic'al,
47tijicña c ch'ujlel ti Dios xColtaya c cha'añ,#Is 61.10; Hab 3.17-18
48come Dios tsi' q'uele mach ñuquic jiñi x'e'tel i cha'añ.
Jiñi cha'añ wʌle, wiñicob x'ixicob ti' lajm ti' lajm
mi caj i yʌlob tijicñayon.
49Come jiñi am bʌ i P'ʌtʌlel tsi' melbeyon chuqui tac ñuc.
Ch'ujul i c'aba'.
50Mi' p'untan wiñicob x'ixicob yic'ot i yalobilob ti' lajm ti' lajm,
mu' bʌ i bʌc'ñañob Dios.#Sal 103.13,17
51Tsa'ix i pʌsʌ ñuc bʌ i melbal ti p'ʌtʌlel i c'ʌb;
tsi' jembeyob jontol bʌ i ña'tʌbal jiñi tsa' bʌ i q'ueleyob i bʌ ti ñuc.#Sal 118.15-16
52Tsi' chilbeyob i ye'tel jiñi tsa' bʌ buchleyob ti ñuc bʌ i ye'tel
yic'ot tsi' yʌq'ueyob i ñuclel jiñi pec' bʌ tsi' meleyob i bʌ.#1 Sm 2.8; Job 12.19; Dn 5.18-20; Abd 4; Hag 2.22; Job 5.11; Ez 21.26
53Jiñi wi'ñayo' bʌ tsi' yʌq'ueyob ca'bʌl chuqui tac wen,
jiñi wen chumulo' bʌ che' jach tsi' to'ol choco sujtel.#Sal 107.9; 113.7
54Tsi' colta israelob, i wiñicob,
come c'ajal i cha'añ i p'untaya,
55—che' bajche' tsi' pejcayob lac ñojte'el,
ti' tojlel Abraham yic'ot pejtelel wi'ilo' bʌ i p'olbal,#Gn 17.7; 26.3; Sal 105.8-9; Miq 7.20 che'en María.
56Ya' to tsa' jal-a María che' bajche' uxp'ejl uw yic'ot Elisabet. Ti wi'il tsa' sujti ti' yotot.
Tsi' yila pañimil Juan tsa' bʌ i yʌc'ʌ ch'ʌmja'
57Tsa' c'oti i yorajlel cha'añ mi' yilan pañimil i yalobil Elisabet. Tsi' yʌc'ʌ ti pañimil ch'itoñ bʌ i yalobil. 58Che' bʌ tsi' yu'biyob i pi'ʌlob ti chumtʌl yic'ot i cʌñʌyo' bʌ Elisabet che' bajche' Dios tsi' p'unta, tsi' yu'biyob i tijicñʌyel i pusic'al yic'ot Elisabet.
59Ti' waxʌcp'ejlel q'uiñ tsa' tiliyob cha'añ mi' tsepbentel i pʌchʌlel jiñi alʌ ch'itoñ.#1.59 Pejtelel ch'itoñ judío bʌ, mi' tsepbentel i pʌchʌlel ti' waxʌcp'ejlel q'uiñ i yilʌben pañimil. Jiñʌch i yejtal xuc'ul bʌ i t'añ Dios ti' tojlel i tejclum Israel (Gn 17.10-12; Lv 12.3). Yom i lon otsʌbeñob i c'aba' ti Zacarías ti' q'uexol i tat. 60Pero i ña' jiñi alʌl tsi' su'beyob:
—Mach che'ic yom. Mi caj i yotsʌbentel i c'aba' Juan, —che'en.
61Tsi' su'beyob:
—¿Chucoch? Come ma'añic mi juntiquilic a cʌñʌyo' bʌ am bʌ i c'aba' ti Juan.
62Che' jiñi tsa' caji i pejcañob Zacarías ti' c'ʌb cha'añ mi' c'ajtibeñob bajche' yom i yotsʌben i c'aba' i yalobil. 63Tsi' c'ajti wechel bʌ te' ba' tsi' ts'ijba: “I c'aba'ʌch Juan”. Tsa' toj sajtiyob i pusic'al ti pejtelelob. 64Ti jim bʌ ora tsa' cha' caji ti t'añ Zacarías, tsa' jijti i yac', che' jiñi tsa' caji i su'b i ñuclel Dios. 65Tsa' wen cajiyob ti bʌq'uen pejtelel i pi'ʌlob ti chumtʌl. Ti pejtelel wits ya' ti Judea tsa' caji ti sujbel pejtelel ili tsa' bʌ ujti. 66Pejtelel tsa' bʌ i yu'biyob tsi' lotoyob ti' pusic'al. Tsi' yʌlʌyob: “¿Chuqui i c'ʌjñibal mi caj i majlel jiñi ch'itoñ?” Come i c'ʌb lac Yum añ yic'ot.
Tsi' su'bu t'añ Zacarías
67Zacarías, i tat jiñi ch'itoñ, tsa' bujt'i ti Ch'ujul bʌ Espíritu. Tsa' caji ti alt'añ. Tsi' yʌlʌ:
68La' sujbic i ñuclel lac Yum Dios, i Dios Israel.
Come tsa'ix tili i mʌñob i cha'año' bʌ.#Lc 1.78; 7.16; 19.44; Hch 15.14
69Tsa'ix i yʌq'ueyonla p'ʌtʌl bʌ xColtaya
loq'uem bʌ ti' p'olbal David, x'e'tel bʌ i cha'añ.#1 Sm 2.10; Sal 18.2; 89.24
70Che' bajche' tsi' cha'le t'añ Dios yic'ot ch'ujul bʌ x'alt'añob i cha'añ ti wajali.
71Mi caj laj coltʌntel loq'uel ti' c'ʌb laj contrajob
yic'ot ti' c'ʌb pejtelel mu' bʌ i ts'a'leñonla.
72Che' jiñi mi caj i p'untañonla che' bajche' tsi' su'beyob lac ñojte'el.
Mi caj i ña'tan jiñi ch'ujul bʌ xuc'ul bʌ t'añ,#Ex 2.24; Lv 26.42; Sal 106.45-46; 111.5,9
73che' bajche' tsi' su'be lac tat Abraham
ba' ora tsi' wa'choco i t'añ.#Gn 17.7; Sal 105.8-9; Miq 7.20
74Che' coltʌbiloñixla loq'uel ti' c'ʌb laj contrajob,
che' jiñi ma'añic bʌq'uen mi caj lac melben i ye'tel
75ti ch'ujul yic'ot toj ti' wut Dios che' cuxulontola.
76Jatet, alʌ ch'itoñ, mi caj a pejcʌntel ti x'alt'añ i cha'añ jiñi C'ax Ñuc Bʌ,
come mi caj a majlel ñaxan ti' wut lac Yum
cha'añ ma' chajpʌben i bijlel,#Mal 3.1; Mt 3.3; 11.10; Mc 1.2-3; Lc 3.4; 7.27; Jn 1.23
77cha'añ ma' wʌq'ueñob i cʌn wiñicob x'ixicob bajche' mi caj i coltʌntelob
cha'añ mi' ñusʌbentelob i mul.
78Come ca'bʌl tsi' p'untayonla lac Dios.
Mi caj i chocbeñonla tilel i sʌclel pañimil#Mal 4.2; Ef 5.14; 2 P 1.19 ch'oyol bʌ ti chañ,
79cha'añ mi' yʌq'ueñob i sʌclel pañimil
jiñi chumulo' bʌ ti ic'ch'ipan bʌ pañimil,
yic'ot jiñi año' bʌ ti yʌxñʌlel chʌmel,
cha'añ mi' toj-esan majlel la coc ba' ñʌch'ʌl mi la cajñel, che' tsi' yʌlʌ Zacarías.#Is 58.8; 60.1-2; Mt 4.16
80Tsa' coli jiñi alʌ ch'itoñ. Tsi' taja i p'ʌtʌlel i pusic'al. Tsa' ajñi ti colem bʌ i tiquiñal pañimil jinto tsi' pʌsʌ i bʌ ba'añ israelob.
Избрани в момента:
Lucas 1: NTCH
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia de Estudio en Ch´ol de Tumbalá, Chiapas, México © Sociedad Bíblica de México A.C.