ಲೂಕ 23
23
ಪಿಲಾತಂಡ ಮಿಂಞತ್ ಯೇಸು
(ಮತ್ತಾಯ 27.1,2; 27.11–14; ಮಾರ್ಕ 15.1–5; ಯೋಹಾನ 18.28–38)
1ಪಿಂಞ ಅಲ್ಲಿ ಇಂಜಯಿಂಗೆಲ್ಲ, ಯೇಸುನ ಪಿಲಾತ ಎಣ್ಣುವ ಅದಿಪತಿರ ಪಕ್ಕ ಕಾಕಿಯಂಡ್ ಪೋಚಿ. 2ಅಲ್ಲಿ ಯೇಸುರ ಮೇಲೆ ಕುತ್ತಪರಿವಕ್ ಸುರು ಮಾಡ್‍ಚಿ. ಇಂವೊ, ಕೈಸರಂಗ್ ಕಂದಾಯ ಕೊಡ್‌ಕತಿ, ನಾನೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಎಣ್ಣುವ ಯೆಹೂದ್ಯಂಗಡ ರಾಜಾಂದ್ ಎಣ್ಣಿತ್, ಜನಡ ಮನಸ್ಸ್‌ನ ಕಲಹ ಮಾಡಂಡೂಂದ್ ಪಾಳ್ ಮಾಡಿಯಂಡ್ ಇಂಜದ್‍ನ ನಂಗ ಕಂಡತ್‍ೕಂದ್ ಎಣ್ಣ್‌ಚಿ.
3ಆನಗುಂಡ್ ಪಿಲಾತ: ನೀನ್ ಯೆಹೂದ್ಯಂಗಡ ರಾಜನಾಂದ್ ಕ್‍ೕಟತ್.
ಅಂವೊಂಗ್ ಯೇಸು: ನೀನ್ ಎಣ್ಣ್‌ನನೆಕೆ, ಅಕ್ಕೂಂದ್ ಎಣ್ಣ್‌ಚಿ.
4ಅಕ್ಕ ಪಿಲಾತ: ಮುಕ್ಯ ಯಾಜಕಂಗಕು ಪಿಂಞ ಜನಡ ಗುಂಪ್‌ಕು, ನಾನ್ ಅಂವೊನ ತೀರ್ಪ್ ಮಾಡ್‌ವಕ್, ಅಂವೊಂಡ ಮೇಲೆ ಒರ್ ತಪ್ಪು ಕಾಂಬ್‍ಲೇಂದ್ ಎಣ್ಣ್‌ಚಿ.
5ಆಚೇಂಗಿ ಅಯಿಂಗ ಇಂಞು ಜೋರಾಯಿತ್: ಇಂವೊ ಗಲಿಲಾಯತ್ಂಜ ಇಲ್ಲಿಕತ್ತನೆ ಯೂದಾಯ ಸೀಮೆಯೆಲ್ಲ ಇಂವೊಂಡ ಬೋದನೆಲ್ ಜನಡ ಮನಸ್ಸ್‌ನ ಕಲಹ ಮಾಡ್‌ವಕಾಯಿತ್ ಪಾಳ್ ಮಾಡಿಯಂಡ್ ಉಂಡ್‍ೕಂದ್ ಎಣ್ಣಿಯಂಡಿಂಜತ್.
ಹೆರೋದಂಡ ಮಿಂಞತ್ ಯೇಸು
6ಇದ್‍ನ ಕ್‍ೕಟ ಪಿಂಞ ಪಿಲಾತ ಅದಿಪತಿ ಇಂವೊ ಗಲಿಲಾಯತ್‍ರ ಮನುಷ್ಯನಾಂದ್ ಕ್‍ೕಟತ್?
7ಯೇಸು, ರಾಜನಾನ ಹೆರೋದ ಆಳಿಯಂಡಿಂಜ ಜಾಗತ್ಂಜ ಬಾತ್‍ೕಂದ್ ಗೊತ್ತಾನ ಪಿಂಞ ಪಿಲಾತ ರಾಜ, ಆ ಸಮಯತ್‍ಲ್ ಯೆರೂಸಲೇಮ್‍ಲ್ ಇಂಜ ಹೆರೋದ ರಾಜಂಡ ಪಕ್ಕ ಯೇಸುನ ಅಯಿಚತ್.
8ಹೆರೋದ ಯೇಸುರ ವಿಷಯತ್‍ನ ದುಂಬ ಕ್‍ೕ‍ಟಿತ್ಂಜತ್. ಯೇಸು ಮಾಡ್‍ನ ಅದ್ಬುತ ಕಾರ್ಯತ್‍ನ ನೋಟ್‍ವಕಾಯಿತ್ ದುಂಬ ನಿರಿಕ್ಷೇಲ್ ಇಂಜತ್. ಅಂವೊನ ಕಾಂಗಂಡೂಂಡ್ ದುಂಬ ದಿವಸತ್ಂಜ ಪಾರಕಾತಂಡ್ ಇಂಜತ್. ಅದ್ಂಗ್ ರಾಜನಾನ ಹೆರೋದ ಯೇಸುನ ಕಾಂಬಕ ದುಂಬ ಕುಶಿಪಟ್ಟತ್. 9ಹೆರೋದ, ಯೇಸುಕ್ ದುಂಬ ಪ್ರಶ್ನೆ ಇಟ್ಟತ್. ಆಚೇಂಗಿ ಯೇಸು ಒಂದಾಂಗು ಉತ್ತರ ಕೊಡ್‍ತಿತ್‌ಲ್ಲೆ. ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಅಲ್ಲಿ ನಿಂದಂಡ್ ಯೇಸುರ ಮೇಲೆ ಜೋರಾಯಿತ್ ಕುತ್ತ ಪರ್ಂದಂಡಿಂಜತ್. 10-11ಕಡೇಕ್ ಹೆರೋದ ಪಿಂಞ ಅಂವೊಂಡ ಸಿಪಾಯಿಯ ಯೇಸುನ ಪರಿಹಾಸ ಮಾಡಿತ್ ಕಮ್ಮಿ ತರತ್‍ಲ್ ನಡ್‍ತ್‍ಚಿ. ಯೇಸುಕ್ ಚಾಯುಳ್ಳ ಮಿನ್ನುವ ಬಟ್ಟೇನ ಇಟ್ಟಿತ್ ಪಿಲಾತಂಡ ಪಕ್ಕ ಅಯಿಚತ್. 12ವೈರಿಯಾಯಿತ್ಂಜ ಪಿಲಾತ ಪಿಂಞ ಹೆರೋದ, ಆ ದಿವಸತ್ಂಜ ಸ್ನೇಹಿತಂಗಳಾಚಿ.
ಯೇಸುಕ್ ಮರಣ ತೀರ್ಪ್ ಕ್‍ಟ್ಟ್‌ನದ್
(ಮತ್ತಾಯ 27.15–26; ಮಾರ್ಕ 15.6–15; ಯೋಹಾನ 18.39–19.16)
13ಪಿಲಾತ, ಮುಕ್ಯ ಯಾಜಕಂಗಳ, ಅದಿಕಾರಿಯಳ ಪಿಂಞ ಜನಳ ಕಾಕುವಂಜಿ ನಿಂಗ ಇಂವೊನ ನಾಡ ಪಕ್ಕ ಕಾಕಿಯಂಡ್ ಬಂತ್, 14ಇಂವೊ ಜನಳ ಕಲಹ ಮಾಡಂಡೂಂದ್ ಪಾಳ್ ಬಟ್ಟೇಕ್ ಕಾಕಿಯಂಡ್ ಪೋಯಂಡ್ ಉಂಡ್‍ೕಂದ್ ಎಣ್ಣಿರಲ್ಲ, ಆಚೇಂಗಿ ಇಂವೊಂಗ್ ನಾನ್ ನಿಂಗಡ ಮಿಂಞತ್‍ಲ್ ಪ್ರಶ್ನೆ ಇಟ್ಟಿಯೆ, ಅಂತು ನಿಂಗ ಇಂವೊ ಇಂತದೆಲ್ಲ ಮಾಡ್‍ಚೀಂದ್ ಕುತ್ತಪರ್ಂದನೆಕೆ ನಾನ್ ಇಂವೊಂಡ ಮೇಲೆ ಒರ್ ತಪ್ಪು ಕಂಡ್‌ಪುಡಿಪಕ್ ಕಯಿಂಜಿತ್‌ಲ್ಲೆ. 15ಹೆರೋದ ಸಹ ಇಂವೊಂಡ ಮೇಲೆ ಒರ್ ತಪ್ಪು ಕಂಡ್‌ಪುಡಿಕತೆ ಪುನಃ ನಾಡ ಪಕ್ಕ ಅಯಿಚತ್. ಕೊಲ್ಲ್‌ವಂತ ಒರ್ ತಪ್ಪು ಈ ಮನುಷ್ಯ ಮಾಡಿತ್‌ಲ್ಲೆ. 16ಆನಗುಂಡ್ ಅಂವೊನ ಕೊರಡ್‍ಲ್ ಪೊಯ್ಯುವಂಜಿ, ನಾನ್ ಅಂವೊನ ಬುಟ್ಟ್‌ರ್‍ವೀಂದ್ ಎಣ್ಣ್‌ಚಿ. 17ಪಸ್ಕ ನಮ್ಮೆಲ್ ಜನಳ ಕ್‍ೕಪಂಜಿ ಜೈಲ್‍ಲ್ ಉಳ್ಳ ಒರ್ ಕೈದಿನ ಬುಡ್‌ತ್‌ವದ್ ಪಿಲಾತಂಡ ಪದ್ದತಿಯಾಯಿತ್ಂಜತ್#23.17 ಮೂಲ ಬಾಷೆಲ್ ಈ ವಾಕ್ಯ ಇಂಜಿತಿಲ್ಲೆ, ಆಚೇಂಗಿ ಬಯ್ಯ ಕಂಡ್‍ಪುಡ್‌ಚ ಮೂಲ ಬಾಷೆರ ಒಳ್‍ತ್‍ಲ್ ಇದ್ ಉಂಡ್..
18ಆಚೇಂಗಿ ಜನ ಎಲ್ಲಾ: ಯೇಸುನ ಕೊಲ್ಲ್! ಬರಬ್ಬನ ನಂಗಕ್ ತಾಂದ್ ಜೋರಾಯಿತ್ ಕೂತ್ ಕೊಡ್‍ತತ್. 19ಬರಬ್ಬ ಎಣ್ಣ್‌ವಂವೊ ಯೆರೂಸಲೇಮ್‍ಲ್ ಕಲಹ ಮಾಡಿತ್, ಕಲಹತ್‌ಲ್ ಒಬ್ಬನ ಕೊಲೆ ಮಾಡಿತ್ ಜೈಲ್‍ಲ್ ಇಂಜತ್. 20ಪಿಲಾತಂಗ್ ಯೇಸುನ ಬುಡ್‍ಗಡೆ ಮಾಡಂಡೂಂದ್ ಮನಸ್ಸ್ ಇಂಜಗುಂಡ್, ಇಂಞೊಮ್ಮ ಜನಡ ಪಕ್ಕ ಪೇಚಾಡ್‍ಚಿ, 21ಆಚೇಂಗಿ, ಜನಡ ಗುಂಪು, ಅಂವೊನ ಶಿಲುಬೇಕ್#23.21 ರೋಮ್ ರಾಜ್ಯಕ್ ವಿರೋದವಾಯಿತ್ ದಂಗೆ ನಿಪ್ಪಯಿಂಗಳ ಕ್ರೂರವಾಯಿತ್ ಶಿಲುಬೇಲ್ ಇಟ್ಟಿತ್ ಕೊಲ್ಲುವ. ಇಡೀ! ಅಂವೊನ ಶಿಲುಬೇಕ್ ಇಡೀಂದ್ ಪುನಃ ಜೋರಾಯಿತ್ ಕೂತ್ ಕೊಡ್‍ತತ್.
22ಮೂಂದನೆ ಕುರಿ: ಆಚೇಂಗಿ ಇಂವೊ ಎಂತ ತಪ್ಪ್ ಮಾಡ್‍ಚೀಂದ್ ಪಿಲಾತ ಕ್‍ೕಟತ್? ಇಂವೊನ ಕೊಲ್ಲ್‌ವಂತ ಒರ್ ತಪ್ಪು ನಾನ್ ಇಂವೊಂಡಲ್ಲಿ ಕಂಡಂಡಿಲ್ಲೆ. ಆನಗುಂಡ್ ಅಂವೊನ ಪೊಯ್ಯುವಂಜಿ, ನಾನ್ ಅಂವೊನ ಬುಟ್ಟ್‌ರ್‍ವೀಂದ್ ಎಣ್ಣ್‌ಚಿ.
23ಮಿಂಞಕಿಂಜ ಜೋರಾಯಿತ್ ಇಂವೊನ ಶಿಲುಬೇಕ್ ಇಡಿ ಎಣ್ಣಿಯಂಡ್ ಜನ ಕೂತ್ ಕೊಡ್‌ತಂಡ್ ಇಂಜತ್. ಅನ್ನನೆ ಅಯಿಂಗ ಜೋರ್ ಮಾಡ್‍ನಗುಂಡ್ ಅಯಿಂಗ ಗೆದ್ದ್‌ರ್‌ತ್. 24ಕಡೇಕ್ ಪಿಲಾತ ಜನ ಕ್‍ೕಟನೆಕೆ ಆಡ್‍ೕಂದ್ ತೀರ್ಪ್ ಮಾಡ್‍ಚಿ. 25ಕಲಹ ಮಾಡಿತ್, ಕಲಹತ್‌ಲ್ ಒಬ್ಬನ ಕೊಲೆ ಮಾಡಿತ್ ಜೈಲ್‍ಲ್ ಇಂಜ ಬರಬ್ಬನ ಅಯಿಂಗಕ್ ಬುಡ್‌ತಿತ್, ಯೇಸುನ ಎಂತ ಮಾಡ್‌ವಕ್ ಕುಶಿ ಉಂಡೋ ಅದ್‍ನ ಮಾಡ್‌ವಕ್ ಅಯಿಂಗಡ ಪಕ್ಕ ಒಪ್ಪ್‌ಚಿಟ್ಟತ್.
ಯೇಸುನ ಶಿಲುಬೇಕ್ ಇಟ್ಟದ್
(ಮತ್ತಾಯ 27.32–44; ಮಾರ್ಕ 15.21–32; ಯೋಹಾನ 19.17–27)
26ಯೇಸುನ ಕೊಲ್ಲ್‌ವಕ್ ಕಾಕಿಯಂಡ್ ಪೋಯಂಡ್ ಇಪ್ಪಕ, ಆ ಬಟ್ಟೇಲ್, ಕುರೇನೆ ಊರಿಂಜ ಅಕ್ಕ ಬಂದಂಡಿಂಜ ಸೀಮೋನ ಎಣ್ಣ್‌ವಂವೊನ ಕಂಡತ್. ಸಿಪಾಯಿಯ ಅಂವೊನ ನಿಪ್ಪ್‌ಚಿಟ್ಟಿತ್ ಒತ್ತಾಯ ಮಾಡಿತ್ ಯೇಸುರ ಶಿಲುಬೇನ ಪೊರ್‍ತಂಡ್ ಪೋಪಕ್ ಶಿಲುಬೇನ ಅಂವೊಂಡ ಮೇಲೆ ಬೆಚ್ಚತ್.
27ದುಂಬ ಜನಡ ಗುಂಪ್ ಯೇಸುರ ಬಯ್ಯ ಪೋಯಂಡಿಂಜತ್. ಅಯಿಂಗಡಲ್ಲಿ ದುಂಬ ಪೊಣ್ಣಾಳ್‍ವ ಎದೆ ಬಡ್‍ಚಂಡ್ ಯೇಸುರ ವಿಷಯತ್‍ಲ್ ಗೋಳಾಡಿಯಂಡ್ ಮೊರಟಂಡಿಂಜತ್. 28ಯೇಸು, ಅಯಿಂಗ ಗೋಳಾಡುವಾನ ಕಂಡಿತ್, ಯೆರೂಸಲೇಮ್‍ರ ಪೊಣ್ಣಾಳ್‌ವಳೇ, ನಾಕಾಯಿತ್ ನಿಂಗ ಮೊರಡತಿ! ನಿಂಗಡ ಮಕ್ಕಕಾಯಿತ್ ನಿಂಗಕಾಯಿತ್ ಗೋಳಾಡೀಂದ್ ಎಣ್ಣ್‌ಚಿ.
29ಗೊಡ್ಡಿಯಾಯಿತುಳ್ಳ ಪೊಣ್ಣಾಳುವ ಆಶೀರ್ವಾದ ಮಾಡ್‍ನಂವೋಂದು, ಕುಳುಮೆಕರ್‌ತಿ ಆಕತ ಉಳ್ಳ ಪೊಣ್ಣಾಳುವ ಪಿಂಞ ಮೊಲೆಪಾಲ್ ಕೊಡ್‍ಕತೆ ಉಳ್ಳ ಪೊಣ್ಣಾಳುವ ಆಶೀರ್ವಾದ ಮಾಡ್‌ನಯಿಂಗಾಂದ್ ಎಣ್ಣುವ ದಿವಸ ಬಪ್ಪಾಂದ್ ಯೇಸು ಎಣ್ಣ್‌ಚಿ.
30ಆ ಕಾಲತ್‍ಲ್ ಕುಂದ್‌ಕ್:
ನಂಗಡ ಮೇಲೆ ಬೂಳೀಂದು,
ನಂಗಳ ಮುಚ್ಚೊಳೀಂದು ಜನ ಎಣ್ಣುವ.#23.30 ಹೋಶೇಯ 10.8; ಪ್ರಕಟನೆ 6.16
31ಮರ ಪಚ್ಚೆ ಆಯಿತಿಪ್ಪಕಲೆ ಇಚ್ಚಕೆಲ್ಲಾ ಆಪಕ, ಮರ ಒಣಂಗಿ ಪೋನ ಪಿಂಞ ಎಂತೆಲ್ಲಾ ಆಕೂಂದ್ ಎಣ್ಣ್‌ಚಿ.#23.31 ಪಾಪ ಇಲ್ಲತ ನಾಕೇ ಇನ್ನನೆ ಮಾಡ್‍ಚೇಂಗಿ, ಪಾಪಿಯಳಾನ ನಿಂಗಕ್ ಎಂತದೆಲ್ಲಾ ಮಾಡ್‌ವಾಂದ್ ಯೇಸು ಎಣ್ಣಿಯಂಡುಂಡ್.
32ಬೋರೆ ದಂಡ್ ಕ್ರೂರ ಪಾಪ ಮಾಡ್‍ನ ಕಳ್ಳಂಗಳ, ಯೇಸುರ ಕೂಡೆ ಕೊಲ್ಲ್‌ವಕ್ ಕಾಕಿಯಂಡ್ ಪೋಚಿ. 33ಅದ್ಂಗ್ ಮಂಡೆರ ಓಡ್‍ೕಂದ್ ಅರ್ಥ ಆಪ ಕಪಾಲಸ್ಥಲ ಎಣ್ಣುವ ಜಾಗಕ್ ಬಪ್ಪಕ ಯೇಸುರ ಬಲ್‌ತೆ ಬರಿಲ್ ಒರ್ ಕಳ್ಳನ, ಎಡ್‍ತೆ ಬರಿಲ್ ಒರ್ ಕಳ್ಳನ ಶಿಲುಬೇಕ್ ಇಟ್ಟತ್.
34ಅಕ್ಕ ಯೇಸು: ಅಪ್ಪ, ಈಂಗಳ ಮನ್ನಿಚಿಡ್, ಈಂಗ ಎಂತ ಮಾಡಿಯಂಡುಂಡ್‍ೕಂದ್ ಅಯಿಂಗಕ್ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ. ಸಿಪಾಯಿಯಂಗ ಯೇಸುರ ಬಟ್ಟೇನ ಬಾಗ ಮಾಡಿತ್, ಚೀಟಿ ಇಟ್ಟಿತ್, ಬಟ್ಟೇನ ಎಡ್‍ತಂಡತ್.
35ಜನಡ ಗುಂಪ್ ಯೇಸುನ ನೋಟಿಯಂಡಿಂಜತ್. ಆಚೇಂಗಿ, ಯೆಹೂದ್ಯಂಗಡ ಅದಿಕಾರಿಯಂಗ: ಇಂವೊ ಬೋರೆಯಿಂಗಳ ರಕ್ಷಣೆ ಮಾಡ್‍ಚಿ, ಇಕ್ಕ ಇಂವೊನೇ ದೇವ ಗೊತ್ತ್ ಮಾಡಿತ್ ಅಯಿಚ ನೇರಾನ ಕ್ರಿಸ್ತನಾಯಿತ್ಂಜತೇಂಗಿ ಅಂವೊನ ಅಂವೊನೇ ಕಾಪಾಡಡ್‍ೕಂದ್ ಅಯಿಂಗಯಿಂಗಳೇ ಕೆಣಕಿಯಂಡ್ ತಕ್ಕ್ ಪರ್ಂದತ್.
36ಸಿಪಾಯಿಯ ಯೇಸುರ ಪಕ್ಕ ಬಪ್ಪಂಜಿ ಅಂವೊಂಗ್ ಪುಳಿಯಾಯಿತುಳ್ಳ ದ್ರಾಕ್ಷಿರಸತ್‍ನ ಕೊಡ್‌ತಿತ್, 37ನೀನ್ ಯೆಹೂದ್ಯಂಗಡ ರಾಜನಾಚೇಂಗಿ ನಿನ್ನ ನೀನೇ ಕಾಪಾಡಿಯಾಂದ್ ಎಣ್ಣಿಯಂಡ್ ಪರಿಹಾಸ ಮಾಡ್‍ಚಿ.
38ಇಂವೊ ಯೆಹೂದ್ಯಂಗಡ ರಾಜ ಎಣ್ಣಿಯಂಡ್ ಒಳ್‍ದಿತ್, ಶಿಲುಬೇರ ಮೇಲೆ ಕೆಟ್ಟಿ ಬೆಚ್ಚತ್.
39ಯೇಸುರ ಕೂಡೆ ಶಿಲುಬೇಕ್ ಇಟ್ಟ ಒರ್ ಕಳ್ಳ, ನೀನ್ ನೇರಾನ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಾಚೇಂಗಿ, ನಿನ್ನ ನೀನ್ ಕಾಪಾಡಿಯಂಡ್, ನಂಗಳ ಸಹ ಕಾಪಾಡ್‍ೕಂದ್ ಕೆಣಕ್‌ಚಿ.
40ಇಂಞೊರ್ ಕಳ್ಳ, ಆ ಕಳ್ಳನ ನೋಟಿತ್: ನೀನ್ ಇಕ್ಕಾಚೇಂಗಿಯು ದೇವಕ್ ಬೊತ್ತ್‌ಲೆಯಾ? 41ನಂಗ ನೇರಾಯಿತು ತಪ್ಪ್ ಮಾಡ್‍ನಯಿಂಗ, ನಂಗ ಮಾಡ್‍ನ ತಪ್ಪ್‌ಕ್ ತಕ್ಕ ಶಿಕ್ಷೆ ಕ್‌ಟ್ಟಿಯಂಡುಂಡ್. ಆಚೇಂಗಿ ಈ ಮನುಷ್ಯ ಒರ್ ತಪ್ಪು ಮಾಡಿತ್‌ಲ್ಲೆ.
42ಪಿಂಞ ಅಂವೊ, ನೀನ್ ರಾಜನಾಯಿತ್ ನೀಡ ರಾಜ್ಯತ್‍ಲ್ ಬಪ್ಪಕ ನನ್ನ ಗೇನ ಮಾಡ್‍ೕಂದ್ ಯೇಸುಕ್ ಎಣ್ಣ್‌ಚಿ.
43ಅದ್ಂಗ್ ಯೇಸು: ಇಂದ್ ನೀನ್ ನಾಡ ಕೂಡೆ ಪರದೈಸಿಲ್#23.43 ಪರದೈಸಿ ಎಣ್ಣ್‌ಚೇಂಗಿ ನೀತಿವಂದಯಿಂಗ ಸಂತೋಷವಾಯಿತ್ ಬದ್‍ಕ್‍ವ ಜಾಗ. ಇಪ್ಪಿಯಾಂದ್ ನಾನ್ ನೀಕ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.
ಯೇಸುರ ಚಾವ್
(ಮತ್ತಾಯ 27.45–56; ಮಾರ್ಕ 15.33–41; ಯೋಹಾನ 19.28–30)
44ಮಜ್ಜಣ ಆಪಕಾಪಕ ಪನ್ನೆರಂಡ್ ಗಂಟೆಯಿಂಜ ಮೂಂದ್ ಗಂಟೆಕತ್ತನೆ ದೇಶ ಪೂರ್ತಿ ಇರ್‌ಟಾಚಿ. 45ದೇವಾಲಯತ್‍ಲ್ ಇಂಜ ಪಡಿರ ಬಟ್ಟೆ ದಂಡ್ ಬಾಗವಾಯಿತ್ ಕೊಡಿಯಿಂಜ ಅಡಿಕತ್ತನೆ ಕೀತಿ ಪೋಚಿ. 46ಪಿಂಞ ಯೇಸು: ಅಪ್ಪ, ನಾಡ ಜೀವತ್‍ನ ನೀಡ ಕೈಯಿಕ್ ಒಪ್ಪ್‌ಚಿಡುವೀಂದ್ ಜೋರಾಯಿತ್ ಕೂತ್ ಕೊಡ್‌ಪಂಜಿ ಜೀವತ್‍ನ ಬುಟ್ಟತ್.#23.46 ದೇವಡ ಪಾಟ್ 31.5 47ನೂರ್ ಪಡೆಯಾಳಿಯಡ ಅದಿಕಾರಿ, ಯೇಸುಕ್ ಇನ್ನನೆ ಎಲ್ಲಾ ಆನದ್‍ನ ಕಂಡಿತ್, ಈ ಮನುಷ್ಯ ನೇರಾಯಿತು ನೀತಿವಂತನೇ ಎಣ್ಣಿಯಂಡ್ ದೇವನ ತುದಿಚತ್. 48ಈ ಘಟನೆಯೆಲ್ಲ ನೋಟ್‍ವಕ್ ಬಂದ ಜನ, ನಡ್ಂದದೆಲ್ಲ ನೋಟಿತ್, ಎದೆ ಬಡ್‍ಚಂಡ್ ಬಯ್ಯಕ್ ಮನೆಕ್ ಪೋಚಿ. 49ಯೇಸುನ ಚಾಯಿತೆ ಗೊತ್ತ್ಂಜ ಜನ ಪಿಂಞ ಅಂವೊಂಡ ಕೂಡೆ ಇಂಜ ಗಲಿಲಾಯತ್ಂಜ ಬಂದ ಚೆನ್ನ ಪೊಣ್ಣಾಳುವ ದೂರತ್‍ಲ್ ನಿಂದಂಡ್ ಇದ್‍ನೆಲ್ಲ ನೋಟಿಯಂಡಿಂಜತ್.
ಯೇಸುನ ಪೂತದ್
(ಮತ್ತಾಯ 27.57–61; ಮಾರ್ಕ 15.42–47; ಯೋಹಾನ 19.38–42)
50ದೇವಡ ರಾಜ್ಯ ಬಪ್ಪಕ್ ಪಾರಕಾತಂಡ್ ಇಂಜ ಯೆಹೂದ್ಯತ್‍ರ ಅರಿಮಥಾಯ ಊರ್‍ಂಜ ಬಂದ ಯೋಸೇಫ ಎಣ್ಣ್‌ವಂವೊ ಇಂಜತ್. ಅಂವೊ ನಲ್ಲಂವೊನು ನೀತಿವಂತಂವೊನು ಆಯಿತ್ಂಜತ್. ಅಂವೊ ಅಲ್ಲಿಯತ್‍ರ ಯೆಹೂದ್ಯ ಕಾನೂನ್‌ರ ಸಬೆರ ಒರ್ ಮರ್ಯಾದೆ ಉಳ್ಳ ಮನುಷ್ಯನಾಯಿತ್ಂಜತ್. 51ಅಂವೊ ಪೆರಿಯಯಿಂಗಡ ಸಬೇಲ್ ಒರ್ ಸದಸ್ಯನಾಯಿತ್ಂಜಕಲು, ಅಯಿಂಗಡ ಆಲೋಚನೆಕು, ಕೆಲಸಕು ಒತ್ತಂಡಿಲ್ಲೆ. 52ಅಂವೊ ಪಿಲಾತ ರಾಜಂಡ ಪಕ್ಕ ಪೋಯಿತ್ ಚತ್ತ್‌ಪೋನ ಯೇಸುರ ತಡೀನ ಕ್‍ೕಟತ್. 53ಯೇಸುರ ತಡೀನ ಶಿಲುಬೆಯಿಂಜ ಅಡಿಕ್ ಕೊಂಡ್‌ಬಂತ್, ಒರ್ ನಾರ್ಬಟ್ಟೆಲ್ ಸುತ್ತಿತ್, ಮಿಂಞಲೇ ಪಾರೆಕಲ್ಲ್‌ನ ಕೆತ್ತಿತ್ಂಜ ಗೋರಿರ ಒಳ್‍ಕ್ ಚತ್ತ್‌ಪೋನ ಯೇಸುರ ತಡೀನ ಬೆಚ್ಚತ್. ಈ ಗೋರಿ ಇಲ್ಲಿಕತ್ತನೆ ದಾರ್‌ನು ಇಡತೆ ಪುದಿಯ ಗೋರಿಯಾಯಿತ್ಂಜತ್. 54ಅಂದ್ ಸಬ್ಬತ್ ದಿವಸಕ್ ತಯಾರ್ ಮಾಡ್‌ವ ನಾಳಾಯಿತ್ಂಜತ್. ಸಬ್ಬತ್ ದಿವಸ ಆಪಕ್ ಚೆನ್ನ ಸಮಯ ಮಾತ್ರ ಇಂಜತ್. 55ಯೇಸುರ ಕೂಡೆ ಗಲಿಲಾಯತ್ಂಜ ಬಂದ ಪೊಣ್ಣಾಳುವ ಯೋಸೇಫಂಡ ಕೂಡೆ ಪೋಯಿತ್ ಗೋರಿನ ಪಿಂಞ ಯೇಸುರ ತಡೀನ ಗೋರಿಲ್ ಎನ್ನನೆ ಬೆಚ್ಚತ್‍ೕಂದ್ ನೋಟಿಯಂಡಿಂಜತ್. 56ಪಿಂಞ ಅಯಿಂಗ ಯೇಸುರ ತಡೀನ ಪೂಪಕ್ ಮಿಂಞ ಇಡ್‌ವಕಾಯಿತ್ ಪರಿಮಳದ್ರವ್ಯ ಪಿಂಞ ನಲ್ಲ ವಾಸನೆ ಉಳ್ಳ ಸುಗಂದ ತೈಲತ್‌ನ ತಯಾರ್ ಮಾಡಿತ್, ದೇವಡ ಕಾನೂನ್‌ರ ಪ್ರಕಾರ ಸಬ್ಬತ್ ದಿವಸತ್‍ಲ್ ಆರಾಮಾಯಿತಿಪ್ಪಕ್ ಅಯಿಂಗಡ ಮನೆಕ್ ವಾಪಸ್ ಪೋಚಿ.
Избрани в момента:
ಲೂಕ 23: ಕೊಡವ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2017, New Life Literature (NLL)