Ruka 6
6
A Kiniki Uaa ni Uita
(Mataio 12.1-8; Mareko 2.23-28)
1N te bong ae te Taabati, ngke E ri nukan nnen te aroka ae te uita Iesu ma ana reirei, ao a anai uaa n uita ana reirei, a bubui i baiia, ao a kang.
2A noraki irouia B'aritaio tabem'aang, ao a taku nako ia, “E aera ngkai kam karaoa ae ekaanako te tua i bukin te Taabati?”
3E kaekaia Iesu ao E taku, “Kam tuai ni wareka taekan te baere e karaoia Tawita ngke e baki, ngaia ma ake raona? 4E rin i nanon ana auti te Atua ao e anaa te berena are kaotiotaki are a tii katauaki i bukiia ibonga b'a ana kanna. Tawita e aki kanna n tii ngaia ma e anganiia naba ake raona b'a a na kanna?”
5E a manga taku riki nako ia, “Natin te aomata bon Uean te Taabati.”
E Kamaiuaki te Aomata Ae e Mate Baina
(Mataio 12.9-14; Mareko 3.1-6)
6N te Taabati teuana, ngke E rin Iesu ni m'aneabaia I-Iutaia ao E reireia aomata iai; ao e mena ikekei temanna ae e mate baina ae ataina. 7A taratara Iesu taani koroboki ma B'aritaio, b'a tao E na karaoa te m'akuri ni kamaiu n te Taabati ke E na aki, b'a a kani karekea kabuakakana. 8Ma E atai nanoia Iesu, ma ngaia are E taku nakon te aomata are e mate baina, Nako mai tei ikai. Ao ngaia e tei rake ao e nako n tei ikekei. 9Ao E taku nako ia Iesu, “I tuangngkami, e ekakinako te tua i bukin te Taabati ni karaoan ae raoiroi ke ae buakaka nakon te aomata, ni kamaiuana ke ni kamateana?” 10Ao E taraia nako ni kabaneia, ao E taku nako ina, “Arora nako baim.” E karaoa tuangana teuarei, ao e a manga oki marurungini baina. 11A rangi n un ao a iango i rouia b'a tera ae a na karaoia nakon Iesu.
A a rineaki Reirei ake Tengauni ma Uoman
(Mataio 10.1-4; Mareko 3.13-19)
12Ni boong akekei, ao E nako Iesu nakon te maunga b'a E na tataro iai, ao E kangainaa n tataro nakon te Atua. 13Ngke e a ingabong, ao E weteia ana reirei ao E rineia tengauni ma uoman mai buakoia, ao E atongiia b'a taan tuatua, Aikai araia; 14Timon, are E anganaki arana teuana iroun Iesu b'a Betero, ao Anterea are tarina; Iakobo ao Ioane, Biribo ma B'aretorom'aio, 15Mataio ma Toma, Iakobo are natin Areb'aio ao Timon are aranaki b'a Terote, #6.15 Timon are aranaki b'a Terote; te ara i bukin te aomata ae rangi n nano n Aro ke n aba. 16Iuta are tarin Iakobo ao Iuta Itekariota, are e riki rimwi b'a te tia kam'anea Iesu.
E Reirei Iesu ma ni Kakamaiu
17Ao E ruo Iesu man te maunga ma uake tengauni ma uoman ao E tei n te tabo ae aoraoi ni botaki ma ana reirei aika rangi ni m'aiti ao aomata aika bati ake a roko mai Iutaia ao Ierutarem ao man taabo ake i rarikin taari i Tuuro ao i Titon. A roko b'a a na ongora iroun Iesu ao a na kamaiuaki man aorakiia; 18ao a kamaiuaki ake a taniaki irouia anti ake a buakaka. 19Ao a bane aomata ni kan riingnga, i bukin ae e nako mai Rouna te m'aaka, ao E kamaiuia ni kabaneia.
Taekan te Kakab'aia ma te Rekenikai
(Mataio 5.1-12)
20E tabeki matana n taraia ana reirei, ao E taku,
Kam a kab'aia ngkami akana kam aki kaub'ai,
b'a ami b'ai uean te Atua!
21Kam a kab'aia ngkami akana kam baki ngkai,
b'a ane kam na nuai.
Kam a kab'aia ngkami akana kam tanginiwenei ngkai,
b'a ane kam na ngarengare!
22 #
1 Bet 4.14
Kam a kab'aia ngkana a ribaingkami aomata, ao ngkana a katinanikuingkami ma n taetaebuakaingkami, ao ngkana a atong arami b'a aara aika kam'araa, i bukin onimakinan Natin te Aomata i roumi! 23#M'akuri 7.52 Kam na kim'areirei n te bong arei, ao kam na kibakiba rake ni kukurei, b'a noria, a bati kaniwangami i karawa aika kam na anganaki mairoun te Atua; b'a a karaoi naba baikai aia bakatibu nakoia aia burabeti.
24Ma a na reke kaimi ngkami akana kam kaub'ai,
b'a a tia n reke karauan nanomi.
25A na reke kaimi ngkami akana kam ngae,
b'a ane kam na baki!
A na reke kaimi akana kam ngarengare ngkai,
b'a ane kam na tanginiwenei ao kam na katumaua te tang!
26A na reke kaimi, ngkana a bane aomata ni kamoamoaingkami, b'a a karaoa naba aron aei aia bakatibu nakoia burabeti ni kewe.
Tangiraia Kairiribai
(Mataio 5.38-48; 7.12)
27I taku nako imi akana kam ongora i Rou, Kam na tangiriia ami kairiribai, ao karaoa ae raoiroi nakoia akana ribaingkami. 28Kakab'aiaia akana a taetae ni kamaraiaingkami, ao tataro i bukiia akana a karaoa ae buakaka nako imi. 29Ane orea tabam teuana ao anganna naba tabam ane teuana b'a e na oreia; ao tai rawa n anga am kauatao ni kabaraaki nakon ane e anaa am kabaraaki ane i aan am kauatao. 30Aanga nakon ane butiiko; ao tai tangiri am b'ai b'a a na kaokaki mairoun ane kani uoti nako. 31#Mataio 7.12Karaoa naba nakoia aomata te baere ko kaantaningaia b'a a na karaoia nako im.
32Ngkana kam tangiriia akana tangiringkami, ao tera kamoamoaami ae na reke iai? B'a aomata aika taani bure a tangiria naba aomata ake a tangiraki i rouia. 33Ao ngkana kam karaoa ae raoiroi nakoia akana karaoa ae raoiroi nako imi, ao tera kamoamoaami ae na reke iai? B'a a karaoa naba aron aei taani bure. 34Ao ngkana kam anganiia akana kam taku b'a a na manga kaoka naba m'aitin are kam anga nako, ao tera kamoamoaami ae na reke iai? B'a anganga naba taani bure nakoia taani bure, b'a a aonga ni karekea naba m'aitin are a anga nako mai rouia. 35Ma kam na tangiriia ami kairiribai, ao karaoa ae raoiroi nako ia, ao aanga n aki manga kaantaninga booni mwiina b'a e na okiringkami; ane e na bati te kab'aia ane na reke i roumi iai, ao ane kam na riki b'a natin Teuare Moan te Rietaata; b'a E akoi te Atua nakoia akana bangaomata ao akana iangoia i bon i rouia. 36Kam na b'aina te nanoanga, n ai aron Tamami ae b'aina te nanoanga.
Motikan Taekaia Tem'angina
(Mataio 7.1-5)
37“Kam na tai motiki taekaia aomata, ao ane e na aki motikaki taekami iroun te Atua; kam na aki kabuakakaia aomata, ao ane na bon aki naba kabuakakako te Atua; b'aina te kab'arabure, ao ane a na kab'araki am bure iroun te Atua. 38B'aina te angaanga, b'a te Atua e na bon manga anganiko; ane e na kanoaaki rabin kunnikaimi ni kaonrakeaki. E na kaibeaki, e na ioioaki, ao e na taonako kanoana. B'a te baire are kam anga ao ane kam na manga anganaki.”
39 #
Mataio 15.14
E tuangiia naba Iesu te taeka n rabakau ae kangai,
E kona te aomata ae mataki ni kaira te aomata ae mataki? Tiaki ana bon uaia ni b'aka n te kinono iai? 40#Mataio 10.24,25; Ioa 13.16; 15.20E aki kakannato riki are reireiaki i aon ana tia reirei, ma ngkana a bane n reireiaki raoi aomata ao ane a na katotonga aron aia tia reirei.
41E aera b'a ko nora te maange ae moan te uarereke i nanoni matan tarim, ao ko aki nora te oka ane i nanoni matam? 42Ao ko kanga n rabakau ni kangai nakon tarim, “Tariu, N na kaaki te maange ane uarereke mai nanoni matam,” ngkai ko aki kona te nora te oka ane i nanoni matam? Te tia m'am'ana-te-aba, ko na kaaki moa te oka ane i nanoni matam, ao ko a tib'a konaa n nora raoi kanakoan te maange ae uarereke mai nanoni matan tarim.
E a Kinaaki te Kai man Uaana
(Mataio 7.16-20; 12.33-35)
43B'a akea te kai ae raoiroi ae na kariki uaana aika bubuaka, ao akea naba te kai ae buakaka ae na kariki uaana aika raraoi. 44#Mataio 12.33B'a a kinaaki aroni kaai nako n uaaia. B'a a aki anaaki biiku mani kaai aika akanta ao kureebe mani kaai aika kateketeke. 45#Mataio 12.34E kaoti baika raraoi te aomata ae raoiroi mani b'ain nanona aika raraoi; ao e kaoti baika bubuaka te aomata ae buakaka mani b'ain nanona aika bubuaka. E taetae te wii man onraken te nano.
Taani Katei Auti aika Uoman
(Mataio 7.24-27)
46“E aera ngkai kam atoatonga ae kangai nako Iu: ‘Te Uea, te Uea,’ ao kam aki ira nanon te bae I tuangngkami? 47Te aomata ane nako Iu ao e ongo au taeka ma n tou mwiia, ao N na tuangngkami arona. 48Ai aron te aomata are katea ana auti. E kena aontano ni kananoa, ao e kawenea iai aan ana auti i aon te b'a; ngke e roko te raanga, ao e neakina te auti arei te raanga, ma e aki kona ni kam'aeia, i bukina b'a e a tia ni katea raoi ana auti te aomata arei. 49Ma ane e ongo au taeka ma n aki tou mwiia, ao ai aron te aomata are katea te auti i aontano ma akea aana ae kabongana; e neakinaki te auti n te raanga ao e a b'aka naba, ao e korakora uruakina!”
Избрани в момента:
Ruka 6: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте