JOHAN 7
7
Jisu nu Ma Cünyuthu
1Tsaseng wi Jisu na Galilee yyi wi wa; ma Judea wi nwa mvu, kepaghenanye Judah nyi kekhang kesenthu na ma pathiale bhaden. 2Kelishu Kho kesa tsü na cu wadha, 3tsalina Jisu cünyuthu na ma wi khi, “No keniethu la no kuli kebenthu muya thsüle kesalina no apen ha teshi nu Judea wi walo. 4Kepaghenanye anyi kesütanla nyu ya ma chüya thsüle sathu nyu kuthi nu kuli nten. No hathu kuli keben ghena ayyi nyithu yala no chüya thsülo!” 5(Ma cünyuthu lela ma nondi nten.)
6Jisu na mathu wi khi, “Itsüwa na npi cu, isala nthu tsüwa tsü keshüthangla ben. 7Ayyi nyithu na nthu nanmeghü meyacha, isala hi nanmeghü ben, kepaghenanye hi mathu kekulithu tsüna nmehai le pi kiza keten ghena. 8Nthu na akho witsü shulo. Hi akho hawa ha wi shuya nten, kepaghenanye itsüwa na npi cu.” 9Ma hati khi nu Galilee wi ben wa.
Jisu nu Kelishu Kho Wi kewa
10Ma cünyuthu na akho wi keshu seng wi Jisu la nyu nchü thsüla kuthi akho wi wa. 11Judah nyi kekhang kesenthu na akho witsü Jisu bha nu “Ma khiewa ben nu?” tsüti keü.
12Ciwi anyitenti jawi kicennali nu pahan na “Ma anyi kemehai kesü le,” nu kepa na “Nyele, ma anyi ssideja tenle,” isa khi. 13Isala mathu na Judah nyi kekhang kesenthu kemessi ghena thola ma cüki tsü khishi nwa.
14Akho tsü sa mnon keben wi Jisu na wa Kekinyijjen wi nyu sansi shhu. 15Judah nyi kekhang kesenthu na ma kesansi jüh ghena amansa nu khi, “Anyi hawa ha khiela lesüjjen wi nwa lethu, ma khati nu pala hajuju chüben nu?”
16Tsalina Jisu na mathu wi khi, “Hi pi nthu kesansi jüh hana ijüh nye, isala hi kesun kechiwa jüh le! 17Keujüla anyi kesü le kesü lela Anyiza kenenwa tsü sa mvu ten lethu, ma hi kesansi jühwa hana Anyiza wina ghola hi ketanla hi kekhang wina khiben khe chüya ben. 18Anyi thowa na ma ketanla ma kekhang wina khiten khe tsüna ma ketanla ma nyankethang tsü bhaden, isala thowa na ma kesun kechiwa nyankethang bhaten khe tsüna atsentsa, nu ma wi milikemesa mangla nmi. 19Mosa ayenwa tsü pi nthu ncü kwe? Isala nthu na tsü nie nten. isathu nthu mangkesa na hi pathiale bhaten nu?”
20Anyitenti tsüna khi, “No wi atsaghang kesü ben man ha! Thowa na no pathiale bhaten nu?”
21Jisu na luneng, “Hi azensu kulichi nan nthu tsüdila amansa. 22#Lev 12.3; Ade 17.10 Mosa na nthu tsathu hyuhan lo kiza (tsüna Mosa na nye isala nthu bamyithu na sa shagha), nu nthu na Sabbath tsathang wi atsa hyuhan den. 23#Jhn 5.9 Mosa Yenwa tsü npasa le kesa ghena Sabbath tsathang wi atsa hyuhan den, isalethu, mangkesa na hi Sabbath tsathang wi anyi kesü sa pi mehai cencu kecü ghena nthu na imiwi aghepvü ten nu? 24Amei wi kemu ketan wi kemehai-keteshi chüyale nsa la, isala atsentsa wina kessi nu chüyalo.”
Ma Messiya kwe?
25Jerusalem wi anyi pahan na hati khi, “Anyi hawa ha kekhang kesenthu na ma pathiale bha ketenwa tsü nye kwe? 26Ghangchilo! Ma anyitenti jawi ajühkhiben, nu thola ma wi mangla nkhi le! Mathu na hawa ha ntsakhiwa Messiya le kesa chüya nben kwe? 27Anyi hawa ha khie wina gho khe ithu tsüdila chüben, isala Messiya tsü kusi khie wina gho ten khe anyi thola nchü.
28Jisu na Kekinyijjen wi nyu kesansi wi jisha nu khi, “Nthu na ntsakhiwa hi nu hi khiewa na gho khe chüben kwe? Hi ketanla hi kekhang wina ngho, hi kesun kechiwa tsüna atsentsawa, isala nthu na ma nchü. 29Hi ma chüben, kepaghenanye hi ma wina gho, nu ma hi kesunchi.”
30Mathu na ma ghanyale kiden, isala anyi kesütanla ma nkidhen, kepaghenanye ma tsüwa na gho npi cu. 31Isala anyitenti jawi kejon na ma nondiya nu khi, “Messiya tsüna gho lethu, ma anyi hawa miwi azensuthu ji kayi kulichi ben kwe?”
Aghikehiethu Kesun pi Jisu Ghan wa Kethsü
32Farisithu na anyitenti jawi Jisu cüki hathu khi keben zaya, tsalina mathu nu keqhaikedithu na aghikehiethu pahan kesun pi Jisu ghan wa thsü. 33Jisu na khi, “Hi matsü keu nthu gweghe benla nu tsaseng wi hi kesun kechiwa wi waben. 34Nthu na hi bhaben, isala nthu na hi muya nben, kepaghenanye nthu na hi khiewa wa ten khe ciwi ghaya nben.”
35Judah nyi kekhang kesenthu na mathu jawi khi, “Anyi ha ma khiewa wale keben ghena ithu ma muya nben nu? Ma ithu nyi na wa hang keben Grik nyunutithu wi wala Grik nyithu sansi wa ben la? 36Ma mangwa jjügi na hati khiben nu? ‘Nthu na hi bhaben, isala nthu na hi muya nben, kepaghenanye nthu na hi khiewa wa ten khe ciwi ghaya nben.’ ”
Kahangtssü Ghaku
37 #
Lev 23.36
Akho ghanan asakhenwa wi tsüna atsathang kemechan ntsawa, ciwi Jisu na shagha jisha nu khi, “Anyi kesü le kesü lela dighe ben lethu ma yala hi wi gha nu jjüya thsülo. 38Ntsawajüh khi keben ti, ‘Anyi thowa na hi nondi ten khe ma leben wi kahang khuchi keten ghaku tssü lle shhugho ben.’ ”
39Jisu na ha ma nondi keyathu na aghamu muya keten cüki khichi. Tsü tsüwi aghamu tsü npi khuchicü, kepaghenanye Jisu na ma nyankethang npi sachi.
Anyi Gishü kepapa Kesa
40Anyitenti jawi pahan na ma ha kekhi zaya nu khi, “Anyi hawa ha ntsakhiwa atusenjüh-kechüwa tsü le!”
41Kepathu na khi, “Ma Messiya le!” Isala kepathu na khi, “Messiya tsüna Galilee wina ghoben kwe? 42#2 Sam 7.12; Mik 5.2 Messiya tsüna Kadimi David shicü kesü sa nu David kahang pen Bethlehem nyuti witsü pvüghaya benle kesa Ntsawajüh na khiben.” 43Tsalina ciwi anyitenti jawi Jisu ghena gishü kepapa sa. 44Pahan na ma ghanya mvu sa kiden, isala thola ma kidhen meya la.
Judah Nyi kekhang Kesenthu na Nkenondi
45Aghikehiethu na kheneng keqhaikedithu nu Farisithu wi gho nan hati mathu wi keü, “Nthu mangkesa na ma ghan sen ngho nu?”
46Aghikehiethu na luneng, “Anyi thola ma ti ajühkhi meya le!”
47Farisithu na mathu wi keü, “Ma nthu la juyadha kwe? 48Kekhang kesenthu nyelela Farisithu kesü la ma nondikeya nthu na chüyale nu? 49Anyitenti hawa ha Mosa Yenwa tsü nkechü ghena mathu Anyiza kishen-keshi pvüyadha le!”
50 #
Jhn 3.1-2
Ciwi Farisi kesü Nikodema, hatu wi Jisu wi keghowa tsüna kepathu wi khi, 51“Ithu Yenwa kenie wina anyi kesü ma mangwa kulitheng khe npi zakeya nu chükeya tuwi ithu ma meshensaya nben.”
52Mathu na luneng, “Mehaiben, no la Galilee wina gho la? Ntsawajüh tsü si nanlo, atusenjüh-kechü kesü la Galilee wina gho nben kesa no chüyaben.”
Избрани в момента:
JOHAN 7: RENGNBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.