JOHAN 3
3
Jisu nu Nikodema Manyi
1Ciwi Farisi kesü Judah nyi yen pi nyu sansi keten ma nyan Nikodema kesa na ben. 2Ma aghaja wi Jisu wi gho nu ma kiza, “Kesansiwa, no Anyiza wina kegho kesansi le kesa ikhang na chüben. Kepaghenanye anyi thola Anyiza na ma ssi nketen tsü no kuliketen azensuthu ha saya nben.”
3Jisu na ma wi kiza, “Hi atsentsawa no kizaden: anyi kesütanla pvügha neng nkesa tsü ma Anyiza Kadiyyi mu meyacha.”
4Nikodema na ma wi keü neng, Anyi kesü keqhai seng wi khati sanu pvügha nengya mehai nu? Ma ma jja pvünon wi du nu keni tughuwa pvüghaya mehai kwe?”
5Jisu na luneng, “Hi atsentsawa no kizaden; anyi kesütanla atssü nu Aghamu wina pvügha nkeya tsü Anyiza Kadiyyi wi du meyacha. 6Asajjü wi kepvüghawa tsüna asajjü wi nu Aghamu wina kepvüghawa tsüna aghamu wile! 7Hi no kiza kebenwa ha meshen ndeja lalo, ‘No pvügha neng nsathu yishü.’ 8Ameghü tsüna ma ketanla sho tenle; nu no tsü hhai zayaden, isala no tsüna khiewa na gho nu khiewa wa ten khe chüya nten. Tsüti aghamu wi pvüghakeya la makesü le.”
9Nikodema na ma wi keü neng, “Khati nu tsüti saya mehai nu?”
10Jisu na ma luneng, “No Israel nyi kesansi kemechan kesü, isalethu no khilila ha nchü kwe? 11Hi atsentsawa no kizaden: ikhang na ikhang kechüwa tsü khiden, nu ikhang kemuwa tsü sheipiden; isala nthu na ikhang jüh nkinale! 12Hi ayyi hawi jüh pi nthu kiza lela nthu na tsü n-nondi, isalethu keujüla hi tang wi jüh pi nthu kiza lethu khati nu tsü nondiya ben nu? 13Anyi thola tang wi npi ki, isala tang wina kedugho Anyi Tsawa tsü ketan le!”
14Mosa na kheni agheja wi amaghang zanki kechi tsüti Anyi Tsawa lela zanki nsathu yishü, 15isanu anyi thowa na ma nondi ten khe anuphan kahang muyaben. 16Kepaghenanye Anyiza na ayyi nyi tizenghali ntsa kesalina ma Tsa ntsawa kesütan tsü lela khuchi, nu anyi thowa na ma nondiya khe dedi kesawa nyela anuphan kahang bendha. 17Kepaghenanye Anyiza na ma Tsawa kesun pi ayyi jühkekaghatenwa sa thsüle kesawa nye, isala ayyi Hangshawa sa thsü.
18Anyi thowa na ma nondi ten khe kemeshensa nmidha, isala thowa na ma n-nondi khe tsüthu meshensadha. Kepaghenanye ma Anyiza Tsa ntsawa tsü nkenondi ghena. 19Hawa hati nu ajühkekaghaten tsü saben: kewegüwa tsüna ayyi wi ghodha, isala anyithu na kewegüwa miwi kejangwa tizenki wa, kepaghenanye mathu kekuli na nmehai. 20Anyi thowa na ma kekuli nmehai khe kewegüwa tsü nanmeghüden, nu ma kekuli chüyathu kemessi ghena kewegüwa wi gho nten. 21Isala thowa na atsentsawa kuli ten khe kewegüwa wi ghoden, ma kekuli tsüna Anyiza jühkeya wina kulile kesa pi ccücale kesalina.
Jisu nu Johan Manyi
22Ha seng wi Jisu nu ma sansikeyathu na Judea yyi wi wa, ciwi ma mathu gweghe matsü pahan ben nu baptaiz sa. 23Johan la Salim tetsaki Aenon wi nyu baptaiz saben, kepaghenanye apen ciwi atssü kejonla ben. Anyithu na ma wi wa nu ma mathu pi baptaiz sa. 24#Mat 14.3; Mrk 6.17; Luk 3.19-20 (Hawa ha nyu Johan ghan pi atssüzüjjen wi npi kechi tuwi sa.)
25Johan sansikeyathu pahan nu Judah nyi kesü mathu na agwo satekemetha cüki khi pi keccücanli ben. 26Tsalina mathu Johan wi ghola ma kiza, “Kesansiwa, kheni Jordan Ghaku nishuwa no gweghe keten no ma cüki kekhiwa anyi tsü meshenben ma? Ma khili tsü nyu baptaiz sabendha, nu anyi tsüdila ma wi wa bendha le!”
27Johan na luneng, “Anyiza wina pi anyi nkecü tsü ma mangla mukeya nmi. 28#Jhn 1.20 Hi hatu wi, “Hi Khrista tsü nyele, isala ma tuwina hi kesun chile,” isa kekhi tsü nthu na hi chüzathu saben. 29Shanyili tsüna shanyiwa ji; isala shanyiwa pvüshang na ngan nu kinaden, nu ma khathansha wi shanyiwa hhai zaya khe ma nongheden. Tsü makesü inonkeghe na sacen yadha. 30Ma di kayi nwathu yishü, isala hi zza kayi waden.
Ma Tang wi na Keghowa
31Tang wina kedughowa tsüna tsüdi miwi diki. Ayyi wina keghowa tsüna ayyi ji nu ayyi cüki khiden, isala tang wina keghowa ma tsüdi miwi diki. 32Ma ma kemu nu kiza tsü sheipiden, isala thola ma sheikepi tsü ya nten. 33Isala thowa na ma jüh tsü nondiya khe Anyiza tsüna atsentsawa le kesa chüyaden. 34Anyiza na kesun kechiwa na Anyiza jüh khiden, kepaghenanye Anyiza na nkedela Aghamu pi ma cüden. 35#Mat 11.27; Luk 10.22 Abawa na Atsawa tizenghali nu pala tsüdi pi ma kwen wi chicüdha. 36Anyi thowa na Atsawa nondi ten khe anuphan kahang bendha; Thowa na Atsawa jüh nkina khe kahang nmi, isala Anyiza leben kekha kekhu wi benden.
Избрани в момента:
JOHAN 3: RENGNBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.