MATTHAI 7
7
1“Sawi na si nâkhnga lo, mi va sawi hlah. 2Zeitintiah mi na sawi hna bantukin, mi nih an in sawi ve lai; na tahnâk hmangin tah na si ve lai. 3Zeiruangahdah nangmah mit i thingpel hmanh ruat loin na unau mit i hmunthûr fa te na hmuh khawh? 4Zeitindah na unau sinah, na mit chung i hmunthûr fa te kha ka lakter tuah na ti khawh lai;’ zohhmanh, nangmah mit ah thingpel a um a si lo maw? 5Mi depde pa! Na mit chung i thingpel kha chuah hmaisa, cuticun na unau mit i hmunthûr fate kha chuah awkah fiang tein na hmuh khawh lai. 6A thiangmi thil cu uico vape hlah; vok hmaikâ zongah lungvar va chia hlah; an lamh chih lai i nangmah tiangin an in thlehbauh sual lai. 7Hal law, pêk na si lai; kawl law, na hmuh lai; king law, on piak na si lai. 8Zeitintiah a haltu kha an pêk i a kawltu nih a hmuh i a kingtu kha onpiak a si tawn. 9A fapa nih changreu a hal lio ah lungtum a petu ahotal an um hnga maw? 10Ngasa an in hal lio ah, rul a petu nan um hnga maw? 11Nanmah misual hmanh nih nan fale thilṭha pêk nan hngalh ahcun; van i nan Pa nih cun a haltu sinah thilṭha cu a pe chinchin hnga lo maw? 12Cucaah minih ka cungah tuah hna seh ti na duhmi kha, mi cung zongah va tuah ve, zeitintiah hihi nawlbia le Profet hna bia cu a si. 13Kutka bi ah lut u; zeitintiah rawhralnâk a phâkpitu kutka le lam cu a kau i cu lam i a kalmi cu mi tampi an si. 14Asinain nunnâk i luhnâk kutka cu a bi, a lam zong a har i a zulmi zong tlawmte an si. 15Profet deu kha i ralring u; tuu phaw aih in nan sinah an ra lai na in an chunglei tu cu a hrangmi cenghngia an si. 16An theitlai in nan hngalh hna lai. Hlingbur ah misur thei an lo bal lo, saihmurhling kungah theipi a tlai bal lo. 17Cubantukin thingṭha cu a thei a ṭha, thingchia cu a thei zong a chia. 18Thingṭha in thei chia a tlai ballo i thingchia in thei ṭha a tlai bal lo. 19Theiṭha a tlai lomi thing cu an hau i mei ah an khangh tawn. 20Cucaah annih cu an theitlai in nan hngalh khawh hna lai. 21Bawipa, Bawipa, aka timi pauh nih, vanbawi pennâk ah a lut lai lo; van i ka Pa duhnâk a tuahtu lawnglawng an lut lai. 22Cuniah cun mi tampi nih, Bawipa, Bawipa, na min in phung kan chim, na min in khuachia kan ṭhawl hna; na min in khuaruahhar thil tampi kan tuah a si lo mei,’ an ti te lai. 23Khi tikah, ‘Nannih nawlbuartu hna, kan hngal bal hna lo; ka sinin i ṭhen u!’ tiah ka ti te hna lai. 24Cucaah, hi ka bia a thei i a zulmi cu mifim, lungpi cungah inn a satu he tahchunh a si; 25ruah a sur i tilet a tho, thlitu hrangin cu inn cu a nam len nain lungpi cungah sakmi a si caah a rawk kho lo. 26Asinain ka chimmi bia a thei nain a zul lomi cu, mihrut, these cung i inn a sami he tahchunh an si; 27ruah a sur i tilet a tho, thlitu hrangin cu inn cu a nam tikah a rawk dih. A rawh ning cu a fak ngaingai,” tiah a ti. 28Jesuh nih cu bia a chim dih in, a cawnpiak mi ah an khuaruah a har ngai ngai. 29Zeitintiah nawlbia cawnpiaktu bantuk si loin, nawlngeihnâk he a cawnpiak hna caah.
Избрани в момента:
MATTHAI 7: HAKABSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.