MATTHAI 12
12
1Cu cân ah Jesuh cu Sabbath niah changvut hmun ah a kal i a lamkaltu hna nih changvut kha an khiah i an ei. 2Farasih hna nih cucu an hmuh i a sinah, “Zohhmanh, na lamkaltu hna nih Sabbath niah a thiang lomi an tuah,” tiah an ti. 3Anih nih, “David le a hawi le an rawl a ṭam lio ah an tuahmi kha nan rel bal lo maw? 4Pathian inn ah a luh i amah le a hawi le nih a thiang lomi, tlângbawi hna ca lawng i a thiangmi an rak ei kha, ”tiah a ti hna. 5Asiah, Sabbath ni i ṭempal chungah a ummi tlângbawi hna nih Sabbath an buar zongah an ngaihthiam ko hna, timi hi nan rel bal lo maw? 6Zeiasihmanhah, ṭempal nâk i a ngan deuhmi hika ah a um, tiah kan chimh hna. 7Raithawinâk si loin zângfahnâk ka duh, timi sullam hi rak hngal ulaw thiam a comi thiamlo nan coter hnga lo. 8Zeitintiah Mi Fapa hi Sabbath Bawi zong a si,” tiah a ti. 9Cu hmun a chuahtâk hnuah an sinagog ah a lut. 10Zohhmanh, mi pakhat kut zengmi a rak um, sual an puh khawh nâkhnga, Jesuh sinah, “Sabbath ni ah damter a thiang maw?” tiah an hal. 11Anih nih, “Nan lakah tuu pakhat ngei in sabbath ni ah khor chungah tla sehlaw, a chuah lomi nan um hnga maw?” 12Tuu pakhat nâkin minung pakhat cu zeitlukindah a sunlawi deuh! Cucaah sabbath niah ṭhatnâk tuah a thiang ko,” tiah a ti hna. 13Cupa sinah, “Nakut samh tuah,” tiah a ti. A hun samh i khat te lei kut bantukin a dam cawlh. 14Farasih hna cu an chuak i Amah an thah khawh nâkhnga khua an khâng. 15Jesuh nih cucu a theih tikah cu hmun cu a chuahtâk. Mi tampi nih an zulh i an dih lakin a rak damter hna. 16Cuticun akong thanh lo dingin ralrin a pêk hna. 17Profet Isaiah nih a rak chimmi: 18“Zohhmanh, ka sal, ka thimmi, ka duhmi le, kâ lawmhnâk bik! A chungah ka Thlarau ka chiah lai i Gentel mi hna sinah diknâk a phuan lai. 19A el hna lai lo i a au khuang fawn lai lo. Zalam zongah a aw ahohmanh nih an thei lai lo. 20Tei dingah biaceihnâk a chuahter hlan pauh a rawpmi hluang a kiahter lai lo i la khu hmanh a hmit lai lo. 21Cun Gentel mi nih a min an i bochan lai,” timi a tlin nâkhnga caah a si. 22Cuhnuah khuachia tlaihmi mitcaw le a holh kho lomi pakhat an ratpi i anih nih a rak damter. A holh kho i khua zong a hmu. 23Mizapi nih mak an ti ngaingai, “Hipa hi David Fapa cu a si kho hnga lo maw?” tiah an ti. 24Farasih hna nih cucu an theih tikah, “Hipa nih hin khuachia bawi Belzebul thawng lo cun khuachia kha a ṭhawl kho lai lo,” tiah an ti. 25Jesuh nih an ruahnâk kha a rak hngalh i an sinah, khuazei ram pauh mah le mah â dohmi an lotlau tawn. Khua le chungkhar zong â dohmi a dir kho bal lo. 26Satan nih Satan a ṭhawl ahcun amah le amah â doh a si hnga lo maw? Zeitindah a pennâk cu a dir khawh lai? 27Kei nih Belzebul ruang i khua chia ka ṭhawl ahcun, nanfa le hna nih ta, ahothawngindah an rak ṭhawl? Cucaah anmah kha nanmah biaceihtu ding an si te lai. 28Asinain Kei nih Pathian Thlarau thawngin khuachia kha ka ṭhawl ahcun Pathian pennâk nan sinah a phân cang, tinâk a si. 29Miṭhawng cu ṭembawh a si hmasat lo ahcun, zeitindah a inn chungah lut in a thil cu an lâkpiak khawh lai? An ṭem hnu lawngah a inn chung thil kha an lâkpiak lai. 30Keimah lei i a ṭang lomi pauh cu aka dohtu a si i aka zunpi lomi pauh cu a ṭhektu an si. 31Cucaah kan chimh hna, minung sualnâk phunkip le (Pathian) an cawhdehnâk cu ngaihthiam an si ko lai, Thlarau ralchanh in a cawhdehtu cu ngaihthiam an si lai lo. 32Mizei pauh Mi Fapa ralchanh in bia a chimtu cu ngaihthiam an si ko lai, asinain Thlarau ralchanh in bia a chimtu cu, atu chan ah siseh, hmailei chan ah siseh, ngaihthiam an si lai lo. 33Thingṭha cu a thei a ṭha, nan ti lo le, thingchia cu a thei zong a chia ti lawlaw u, thing cu a theiin hngalh a si. 34Rul fale hna, misual nan si buin biaṭha nan chim kho hnga maw? Lungthin i a liammi kha kâ nih a chim tawn. 35Miṭha nih cun a ro bawm chung i thilṭha a chuahter tawn i mi ṭhalo nih â khawnmi thilṭha lo kha a chuahter tawn. 36Kan chimh hna, “Mi nih an chimmi bia hna hi biaceih niah an chimfian ṭhân a herh te lai. 37Zeitintiah na bia nih thiam an coter lai i na bia lila nih thiamlo an coter lai. 38Cuhnuah nawlbiacawnpiaktu le Farasih hna nih a sinah, “Cawnpiaktu, na sinin hmelchunhnâk hmuh kan duh ko,” tiah an ti. 39Anih nih, “Tuchan misual ṭangdang a kaimi hna nih hmelchunhnâk lawng hmuh an duh. Asinain Jona hmelchunhnâk dah tilo cu hmelchunnâk dang zeihmanh pêk an si lai lo. 40Zeitintiah Jona cu ngapi paw chungah nithum le zanthum a um bantuk khan, Mi Fapa zong hi nithum le zanthum lei chungah a um ve lai. 41Nineveh khua mi hna kha biaceih ni ah an tho lai i tuchan mi hna hi sual an phawt hna lai. Zeicatiah annih cu Jonah phungchimmi ruangah an i ngaihchih, ngaihmanh u, Jonah nâk i a ngan deuhmi hikâ ah a um. 42Thlanglei siangpahrang nu hmanh kha biaceih ni ah tuchan mi hna sinah a tho ve lai i thiamlo a coter hna lai; zeitintiah anih cu Solomon fimnâk ngai dingin vanhram dengin a ra, ngaihmanh u, Solomon nâk i a ngan deuhmi hikâ ah a um. 43“Thlarau thur pakhat cu mi chungin a chuah hnu ah, ti um lo nâkah dinhnâk a kawl i a hmu kho lo. 44Cuticun ka chuahtâkmi inn ah khan ka kirṭhan lai, tiah a ti. A vakir tikah lawng hir hiar le, thiangte i phiah le thenh in a va hmuh. 45Ava kal i amah nâkin a sual deuhmi thlarau pasarih ava sawm hna, an lut i an um hnawh. Cu minung nunning cu a hlan nâkin a let tam piin a chia kha deuh. Cubantukin hi chanthar misual hna cungah hin a um te lai,” tiah a ti hna. 46Mizapi sin i bia a chim lio ah, ngaihmanh, anu le a nau le cu Amah chawnh duh ah lêngah an dir. 47Mi pakhat nih a sinah, “Zohhmanh, nanu le na nau le Nangmah chawnh duh ah lêngah an dir ko,” tiah a chimh. 48Anih nih, “Kanu cu ahodah a si? Kanau le zong cu ahodah an si? tiah a leh. 49Cun a zultuhna lei ah a kut a thlir i, “Zohhmanh u, kanu le ka nau le hi! 50Zeitintiah mizei pauh van i ka Pa duhnâk a tuahtu pauh cu ka unau pa, kafar le kanu an si,” tiah a ti.
Избрани в момента:
MATTHAI 12: HAKABSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.