Marcos 1
1
Ti kjuako Juan Bautista
(Mt. 3:1-12; Lc. 3:1-9, 15-17; Jn. 1:19-28)
1Xi̱kihi xránkíxixín ti itan jína kuènté Jesucristo, Xje̱en Díos.
2 #
Mal. 3:1. *Éxi tsíkjin ti chꞌin Isaías, ti nkexro kꞌuéchronka itén Díos, ndáchro:
Janhan tsochrꞌan ijnko nkexro tsochronka ti itan kuénta̱na tsꞌitónxin nti̱a,
kixin tsjasiyóxin ti nti̱a kuèntá.
3 #
Is. 40:3. *Ndá tsihin sin itén ijnko nkexro tsjakꞌe nte̱je̱ tsꞌèya tsondáchro:
“Tóxakohanra ncheyóxinra nti̱a tsi̱xi̱n Ìnchéni, Takitjehéra ijnko nti̱a ndoí.”
4Tíha mé xiteyá ikui chꞌin Juan Bautista, kjuákꞌe chꞌan nte̱je̱ kui̱ki̱te chꞌan chojni. Kjua̱ko̱he̱ chꞌan chojni kixin chrókjuinkí sin ti nkehe tjenka̱yáxin sin ndá chrókuikite sin mé xi̱kaha chróxika ti iji̱é sin. 5Nchónhña chojni kui̱xi̱n nonte Judea la ko chjasin Jerusalén ikui sin ti itjen chꞌin Juan, la kuíhin sin ti nkehe kjuako chꞌan la chrónka sin ti ijie̱ chónta sin, ndá chꞌin Juan mé kui̱ki̱texín chꞌan sin ti nda̱río Jordán.
6 #
2Rs. 1:8. *Ti iké chꞌin Juan mé tsíkꞌónaxín ka̱xre̱e kokamello la ko ti tjo̱a̱ chrinkatꞌóxin chꞌan mé kja̱xin tsíkꞌónaxín tjo̱é iko. A̱ndá ti nkehe kjónie chꞌan mé kochjoá la ko itsje̱n kotsje̱nta tónoxín nte̱je̱. 7Mé kjuako chꞌan, ndáchro chꞌan:
―Iton ti janhan mé tsichréhe̱ ijnko nkexro a̱ntsí chónta kjuachaxin ke janhan. Méxra̱ tósuàna chrókjuásinta̱nka̱ ti correa to̱ka̱té chꞌan. 8Janhan mé ìnta̱ ó kuíki̱texínra. A̱ndá jehe chꞌan mé tsi̱ki̱texínra ti Ncha̱kuén Díos.
Chꞌin Juan kui̱ki̱te chꞌin Jesús
(Mt. 3:13-17; Lc. 3:21-22)
9A̱ndá ti ña̱o a chꞌin Jesús kꞌuaxrjexín chꞌan Nazaret nonte Galilea la chꞌin Juan kui̱ki̱texín ti chꞌin Jesús ti nda̱río Jordán. 10Ti ó kꞌuaxrjenkíxin chꞌin Jesús ti ìnta̱, la kꞌuíkon chꞌan xitje̱he̱ nka̱jní la ti Ncha̱kuén Díos, mé éxi ijnko kontóá tsjehe, kui̱xi̱n nkaya nka̱jní la kjuákꞌekjen chritaón ti jehe chꞌan. 11#Gn. 22:2; Sal. 2:7; Is. 42:1; Mt. 3:17; 12:18; Mr. 9:7; Lc. 3:22.*Ndá xrína̱hña nixja ijnko itan kui̱xi̱n nka̱jní, ndáchro:
―Jaha mé xja̱na imá tjua̱há. Imá chàna kixin nchexiteyá.
Ti Jínahña chrókjuachròe chꞌin Jesús
(Mt. 4:1-11; Lc. 4:1-13)
12A̱ndá ti Ncha̱kuén Díos mé sákjuíko ti chꞌin Jesús nte̱je̱. 13Ntiha kjuákꞌe chꞌan cuarenta ña̱o la ntiha mé siín iko jie̱he, la ti Jínahña mé tjinkaon chrókjuachròe ti jehe chꞌan. La ti sin ángel ikui sin kꞌuayakohen sin ti jehe chꞌan.
Chꞌin Jesús kjuankíxixín kjuako
(Mt. 4:12-17; Lc. 4:14-15)
14Ndá ti ó kjuákꞌechjina chꞌin Juan, la chꞌin Jesús mé sákjuí chꞌan nó Galilea sákjuikjako chꞌan ti itan jína kuènté ti kjuachaxin tꞌe̱to̱axín Díos 15#Mt. 3:2.*la ndáchro chꞌan:
―Ó kjuixraká ti ña̱o, la ó kuichjina ti kjuachaxin kuènté Díos. Méxra̱ chrókui̱to̱héra ti nkehe jínahña tjénka̱yáxinra, la chrókuitekáonra ti itan jína tsaáxinra.
Chꞌin Jesús kꞌuéye̱he̱ noó ti sin itsé koche
(Mt. 4:18-22; Lc. 5:1-11)
16Ndá chꞌin Jesús tjetji chꞌan chrínta nda̱ñao Galilea, ndá xrína̱hña kꞌuíkon chꞌan ti chꞌin Simón la ko ti kícho chꞌan Andrés tjejótꞌe sin ti nchísén chrínkí ìnta̱ kixin tsotsé sin koche. 17Ndá ndáchro chꞌin Jesús:
―Chréhéra ti janhan, ndá tso̱tja̱hára ixra̱ tsjéyára chojni.
18Ndá tuénxín kuíto̱he sin ti nchísén tséya sin koche, la chréhe̱ sin chꞌan.
19Ndá kjínhña kjuíji chꞌin Jesús, ndá kꞌuíkon chꞌan chꞌin Jacobo la ko ti kícho chꞌan, Juan, xje̱en ti chꞌin Zebedeo. Jehe sin la ko ti itꞌé sin tjejóxehen sin ijnko ntabarco tjejótjo̱nité sin ti nchísén tséya sin koche. 20La chꞌin Jesús kꞌuéye̱he̱ chꞌan sin kja̱xin. A̱ndá tuénxín kuíto̱he sin ti itꞌé sin Zebedeo la ko ti ntabarco la ko ti sin ichꞌe ixra̱. Ndá chréhe̱ sin ti chꞌin Jesús.
Ijnko chojni chónta ncha̱kuén jínahña
(Lc. 4:31-37)
21Ndá kjuíji sin chjasin Capernaum. La ti ña̱o to̱kꞌéhe chojni mé kꞌuíxehen chꞌin Jesús ti ni̱nkué ti sin judío la kjuankíxin kjuako chꞌan. 22#Mt. 7:28, 29.*A̱ndá ti chojni siín ntiha la chrakon sin nkexrín kjuako chꞌan kixin kjua̱ko̱xi̱n chꞌan éxi ijnko chojni chónta kjuachaxin, la jehya éxi ti sin tjako ley. 23Ndá ti nchia tja̱ko̱xi̱n ti sin judío mé itjen ijnko chojni chónta ncha̱kuén jínahña, mé kꞌóyako ndáchro:
24―¿Nkekuènté tji̱a̱té ti nkehe ichꞌeni, jaha Jesús tsíkji̱xi̱n Nazaret? ¿Á kꞌuinka kixin si̱nchekꞌitjáña ti jeheni ní? Ó noheni kixin jaha mé ti nkexro tjóá kuènté Díos.
25A̱ndá chꞌin Jesús mé kꞌue̱tue̱hen ti ncha̱kuén jínahña, ndáchro:
―Tániá, tꞌaxrjéxian ti nkexro i.
26A̱ndá ti ncha̱kuén jínahña mé kjuínchekꞌaniáte ti nkexro a la ko kꞌóyako itsen ndá kꞌuaxrje. 27Ndá kaín ti chojni siín ntiha la chrákon sin la kjuanchankíhi kícho sin, ndáchro sin:
―¿Xá nkexro tíhi? ¿Xá nkehe ti tan ni̱xin chronka chꞌan? Kixin nchónhña kjuachaxin chónta chꞌan tꞌe̱tue̱hen chꞌan ti ncha̱kuén jínahña la titekaon ―ichro sin.
28A̱ndá tjoka kónohe kaín chojni tjejó Galilea kixin nkexrín ti kjuachaxin chónta chꞌin Jesús.
Kuíto̱he jína ti ichꞌe̱e Pedro
(Mt. 8:14-15; Lc. 4:38-39)
29Ndá ti ó kꞌuaxrjexín chꞌin Jesús ti ni̱nko, la sákjuíko chꞌan Jacobo la ko Juan ndo̱e chꞌin Simón la ko Andrés. 30Ndá ti ichꞌe̱e chꞌin Simón la tjetsínka tjan, níhi tjan chónta tjan sóa. Ndá chenka sin ti chꞌin Jesús kixin níhi tjan. 31Ndá kóchjina chꞌan ti tjetsínka tjan ndá itsé chꞌan itja tjan la kjuínchekꞌinkatjen chꞌan tjan. Ndá tuénxín kjuìihin tjan ti sóa chónta tjan la kjuajon tjan nkehe kjónie sin.
Nchónhña chojni níhi kuito̱he jína
(Mt. 8:16-17; Lc. 4:40-41)
32A̱ndá ti ó kjuiátaón ña̱o la kꞌuíxitie, la ti chojni ntiha kjui̱kohe sin ti chꞌin Jesús kaín ti sin níhi la ko ti sin chónta ncha̱kuén jínahña; 33la kuenté chjasin kónkotsé sin kꞌuejó sin ndója ti nchia itjen chꞌan. 34Ndá kjuínchekito̱he chꞌan jína kaín ti chojni níhi chónta itsjé ichin la ko kuakitsje chꞌan kaín ti ncha̱kuén jínahña. La í kjuajonhña chꞌan kjuachaxin kixin tsonixja ti ncha̱kuén jínahña kixin ó chóxin nkexro ti jehe chꞌan.
Chꞌin Jesús kjuáji kuenté Galilea
(Lc. 4:42-44)
35Ndá imá nchítjen na̱xa̱ sítietaon nonte la kꞌuàya chꞌin Jesús la kꞌuaxrjexín chꞌan ti chjasin a la sákjui̱ chꞌan nte̱je̱ kixin ntiha tsonixje̱xín chꞌan Itꞌé chꞌan itjen nkaya nka̱jní. 36Ndá chꞌin Simón la ko ti sin xriko chꞌan mé sákjuikjeyá sin chꞌan. 37Ndá ti ó kꞌuitja sin la ndáchro sin:
―Kaín chojni xritjeyá sin ti jaha.
38A̱ndá ndáchro chꞌin Jesús:
―Sátsjini íso chjasin chjinaxón kixin ntiha kja̱xin tsjákuá ti itan jína, kixin tíha ti ixra̱ kꞌuinkaxian janhan.
39 #
Mt. 4:23; 9:35. *Ndá sákjuí chꞌan nkuíxín Galilea nkákjako chꞌan nkojnko nchia tónkotséxin ti sin judío la ko kuakitsje chꞌan ti ncha̱kuén jínahña chónta chojni.
Ijnko nkexro chónta chinlepra kuito̱he jína
(Mt. 8:1-4; Lc. 5:12-16)
40Ndá xrína̱hña ijnko nkexro chónta chinlepra la kóchjinehe ti chꞌin Jesús la kjuákꞌexín tochꞌin la chrónòa, ndáchro:
―Ti tjinkaoan la jína chrókjui̱nchekito̱héni jína.
41Ndá chꞌin Jesús la imá kui̱konoéhe̱ chꞌan ti nkexro a la kjuákꞌetja tja chꞌan, la ndáchro chꞌan:
―Jeén tjínka̱oan. Tito̱ha jína ijie ―ichro chꞌan.
42Ndá ti kjuixin ndáchro chꞌan tíhi, la tuénxín kjuìin ti chinlepra la kuíto̱he chꞌan jína. 43Ndá kꞌue̱tue̱hen chꞌin Jesús ti nkexro kixin sátsji, la ndáchro chꞌan:
44 #
Lv. 14:1-32. *―Ninkexró chenkahya tíhi; jehó sátjia tjákohé ti ncha̱tꞌá kixin ó kjuìin ti chinlepra la ko tjánjua ti nkehe tsíkꞌe̱to̱an Moisés kixin xi̱kaha tso̱noexín kaín chojni kixin ó kuito̱ha jína ―ichro chꞌan.
45A̱ndá ti chꞌin tsíkito̱he jína la ti ó sákjuí chꞌan la kjuankíxin chenka chꞌan kaín chojni kixin nkexrín kuíto̱he chꞌan jína. Méxra̱ Jesús la xitjahya noxín tsꞌixehen chꞌan nijnko chjasin, méxra̱ kꞌuaxrjenta chꞌan ti kohya chojni. Kjánchó, kjónté xi̱kaha, la itsjé chojni kjui̱xi̱n itsjé chjasin kjuitsjehe sin ti jehe chꞌan.
Избрани в момента:
Marcos 1: poeNTplus
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016, Wycliffe Bible Translators, Inc. All rights reserved.