Mateo 12
12
Ti sin kꞌuájiko Jesús tsétaón noatrigo
(Mr. 2:23-28; Lc. 6:1-5)
1 #
Dt. 23:25. *A̱ndá ijnko ña̱o kꞌuatsínka chꞌin Jesús ijnko nonte tsíkꞌínká noatrigo ti ña̱o to̱kꞌéhe chojni. La ti sin kꞌuájiko chꞌan mé ikꞌuén sin kjinta, la kjuankíxin ikꞌuin sin noatrigo inie sin. 2A̱ndá ti ó kꞌuíkon ti sin fariseo kixin xi̱kaha ichꞌe ti sin kꞌuájiko chꞌin Jesús la ndáchro sin:
―Tsjehé, ti sin xriko̱a la tjejóchꞌe sin ijnko nkehe kohya kjuachaxin tso̱hen ti ña̱o to̱kꞌéheni ―ichro sin.
3 #
1Sam. 21:1-6. *Ndá chꞌin Jesús ndáchro:
―¿Á kjui̱nchekuáxinhñara ti xroon itén Díos chrónka nkehe kjuíchꞌe David la ko ti sin kꞌuájiko chꞌan ti ó ikꞌuén sin kjinta ní? 4#Lv. 24:9.*Jehe sin mé kꞌuíxehen sin ti nchia kuènté Díos la kjónie sin kaín ti nio̱tja̱ tsíkóñao kuènté Díos, kjónté kohya kjuachaxin sinie sin, jehó ti sin ncha̱tꞌá mé chónta sin kjuachaxin sinie sin tíha. 5#Nm. 28:9, 10.*O̱, ¿á nchekuáxinhñara ti xroon tsíkjin chꞌin Moisés ndáchro kixin ti sin ncha̱tꞌá kuènté ni̱nko la ichꞌe sin ixra̱ ti ña̱o to̱kꞌéhe chojni, la kjónté xi̱kaha, la ninkexró ndáchrohya ninkehó ní? 6Kjánchó ndáxrja̱n kixin ntihi itjen ijnko nkexro a̱ntsí chónta kjuachaxin ke ti ni̱nko. 7#Mt. 9:13; Os. 6:6.*Chrokiénxinra nkehe tꞌaxrjexín ti nkehe ndáchro xroon itén Díos: “Janhan tjínka̱oan kixin chrókui̱konoéhéra chojni, la tjínka̱konhña kixin chrókjuájonra nkojín iko itsꞌen.” Ti chrókiénxinra tíha, la chrókꞌuekahyara ijie ti chojni chóntahya ninkehó ijie̱. 8A̱ndá ti Xje̱en Díos kꞌóna Chojni, mé chónta kjuachaxin tséto̱an nkehe tso̱hen ti ña̱o to̱kꞌéheni ―ichro chꞌin Jesús.
Jesús kjuínchekito̱he jína ijnko chojni tsíxámá itja
(Mr. 3:1-6; Lc. 6:6-11)
9Ndá chꞌin Jesús sákjuixin chꞌan ntiha la kꞌuíxehen chꞌan ijnko nchia xrakue̱xin ti sin judío. 10Ndá ntiha itjen ijnko nkexro tsíxámá ijnko tja. La ti sin fariseo tjinkaon tsꞌeka ijie̱ ti chꞌin Jesús la kjuanchankí ndáchro:
―¿Siín kjuachaxin tsito̱he jína ijnko chojni níhi ti ña̱o to̱kꞌéheni ní?
11 #
Lc. 14:5. *Ndá kjuáte̱he chꞌin Jesús, ndáchro:
―Ti nkojinra, ti chrókꞌuánótje̱ñá ijnko kolélo kuèntára ijnko tòye̱ ni̱nka ti ña̱o to̱kꞌéheni la, ¿á chrókjuihyara chrókuakítsjetaónra va ní? 12A̱ndá ijnko chojni la a̱ntsí tjete ke ijnko kolélo. Méxra̱ ncho̱xon tsjinki̱tsani ijnko chojni kjónté ti ña̱o to̱kꞌéheni.
13Ndá ndáche chꞌan ti nkexro níhi:
―Tjéntoá ti itjá.
A̱ndá ti nkexro níhi la kjuendoá ti itja la tuénxín kuito̱he jína, la tsjehe éxi ti íjnko itja chꞌan. 14Kjánchó ti sin fariseo la imá kónínkaon sin, la kꞌuaxrje sin ndója la kjuénka̱yáxin sin nkexrín tsꞌóñá sin ti chꞌin Jesús.
Ti nkexro kjueyá Díos sichꞌe ixra̱
15A̱ndá chꞌin Jesús kónohe chꞌan nkexrín tjenka̱yáxin sin la sákjuixin chꞌan ntiha, la nchónhña chojni chréhe̱ ti jehe chꞌan la kjuínchekito̱he chꞌan jína kaín ti sin níhi 16la kꞌue̱to̱an chꞌan kixin tsochronkahya sin nkexro ti jehe chꞌan. 17Mé xi̱kaha kóhen kixin xiteyá ti nkehe chrónka Isaías, ijnko nkexro kꞌuéchronka itén Díos ósé, ndáchro:
18 #
Is. 42:1-4. *Tíhi nkexro tꞌaná ixra̱, janhan kjuéyá chꞌan,
la imá tjua̱ha̱ chꞌan la chàna kixin itjen chꞌan.
Janhan tsotja̱ha̱ chꞌan ti ncha̱kuená
la jehe chꞌan tsochronka chꞌan ti itan tsaáxin chojni kuenté chjasintajni.
19Jehe chꞌan la tso̱nínkakonhña chꞌan la ko tsꞌóyakohña chꞌan,
la ninkexró tsienhña ti itén chꞌan ti nti̱a.
20Tsꞌóchjejinhña chꞌan ti itji tsíxrèya,
la tsókꞌankahya chꞌan ti xrohi ó chjina tsꞌanka sítꞌaxrje ihnchi,
hasta tsixrakájña ti ña̱o tsꞌe̱to̱an chꞌan.
21La kaín chojni siín chjasintajni la tsitekaon sin ti jehe chꞌan.
Ti Jínahña tꞌe̱tue̱hen Jesús, ichro ti sin fariseo
(Mr. 3:19-30; Lc. 11:14-23; 12:10)
22Ndá iso chojni kjuikohe sin chꞌin Jesús ijnko nkexro tꞌikonhña la ko nixjahya kixin chónta ncha̱kuén jínahña. Ndá chꞌin Jesús kjuínchekito̱he chꞌan jína, la tuénxín nixja la ko tꞌikon ti nkexro a. 23Ndá kaín chojni la kjuanchankíhi kícho sin ndáchro sin:
―¿Á jehya tíhi ti nkexro tsꞌaxrjeníxin David tjejóchóheni itsi ní?
24 #
Mt. 9:34; 10:25. *Ndá ti ó kuíhin ti sin fariseo la ndáchro:
―Ti nkexro í, la takitsje ti ncha̱kuén jínahña kixin chónta ti kjuachaxin kuènté Beelzebú, ti Jínahña tꞌe̱tue̱hen kaín ti jínahña.
25Ndá ti ó kónohe chꞌin Jesús ti nkehe tjenka̱yáxin sin, la ndáchro chꞌan:
―Ti nkoko̱ahya tjenka̱yáxin ti gobierno ndá tjajo̱nko kícho la tsꞌitjáña ti chjasén. La kja̱xin ti ijnko chjasin nkoko̱ahya tjenka̱yáxin o̱ ti sin nkoko̱a nchia nkokónhña tjenka̱yáxin sin, la kja̱xin xi̱kaha séhya tsꞌejó sin, tsꞌitjáña sin. 26A̱ndá ti Satanás chrókuakitsje ti jínahña la kja̱ í chróchóntahya kjuachaxin na̱xa̱ chrókꞌue̱to̱an. 27A̱ndá ndáchrora kixin janhan takítsjexián ti ncha̱kuén jínahña kjuachaxíen Satanás. A̱ndá ti xi̱kaha la, ¿nkexro chjéhe kjuachaxin ti sin chréhe̱ ti jahara kixin tjacha sin tsakítsje sin ti ncha̱kuén jínahña? Jehe sin mé tja̱ko̱xi̱n sin kixin nduáhya ti nkehe tjénka̱yáxinra. 28A̱ndá janhan takítsjexián ti ncha̱kuén jínahña kjuachaxíen Ncha̱kuén Díos, la tíha tja̱ko̱xi̱n kixin ti kjuachaxin kuènté Díos la ó tjen ntihi.
29’¿Xá nkexrín chrókꞌuixehen ijnko chojni ndo̱e ijnko nkexro imá tse̱he̱ la ko jie̱he, la chrókuakitsje ti nkehe chónta? ¿Á jehya sa̱o chrókjuinchenteto sin ti nkexro a, ndá jína chrókueé ti nkehe ní?
30 #
Mr. 9:40. *’Ti nkexro titekakonhña ti janhan la mé nínkakona la ko ti nkexro tjinkakonhña ti janhan mé tjinkákonhña ti ixra̱ itꞌa̱.
31’Méxra̱ tjo̱nka̱ra kixin Díos tsjakjìin ti ijie̱ tjasin chojni la ko kaín nkehe jínahña nixja chojni, kjánchó ti nkexro tsꞌándaxínhi̱n ti Ncha̱kuén Díos la xrokjuahya tsjìin ti iji̱é sin. 32#Lc. 12:10.*La ko ti nkojín nkexro tsꞌándaxínhi̱n ti Xje̱en Díos kꞌóna Chojni la tsjìin ti iji̱é sin. A̱ndá ti nkexro tꞌándaxíhi̱n ti Ncha̱kuén Díos, la í tsi̱konòehña Díos ti jehe sin, la tsakjìinhña chꞌan ti iji̱é sin ntihi chjasintajni la ko ti ó ña̱o tsjixixín.
Ti inta chrókjuatso̱anxíni ti ito tꞌóna
(Lc. 6:43-45)
33 #
Mt. 7:20; Lc. 6:44. *’Ti inta jína la tꞌóna ito jína, a̱ndá ti jehya inta jína la tꞌónahña ito jína. Méxra̱ ti inta la chrókjuatso̱anxíni ti ito tꞌóna. 34#Mt. 3:7; 23:33; Lc. 3:7; Mt. 15:18; Lc. 6:45.*Jahara tsíkꞌaxrjeníxinra konche. ¿Nkexrín chrónixjara ijnko nkehe jína ti jehya chojni jínara? Ti nkehe ndáchro a̱sén chojni mé xi̱kaha nixja. 35Ijnko chojni jína mé nixja ijnko nkehe jína kixin jína ti a̱sén sin. A̱ndá ijnko chojni tjenka̱yáxin nkehe jínahña la nixja ti nkehe jínahña tjenka̱yáxin kixin ti a̱sén sin la jínahña. 36Kjánchó janhan ndáxrja̱n kixin ti ña̱o tsjixixín ti ó sinchekito̱exín Díos iji̱é chojni, la ntiha ticháxi̱n tsochronkani kaín ti nkehe nixjani 37kixin ti nkehe nixjani mé tsja̱ko̱xi̱n á kjuasini ijie̱ o̱ náhí.
Tjinkaon sin tsja̱ko̱xi̱n Jesús ijnko kjuaxroan
(Mr. 8:12; Lc. 11:29-32)
38 #
Mt. 16:1; Mr. 8:11; Lc. 11:16. *Ndá iso ti sin fariseo la ko ti sin tjako ley mé ndáchro:
―Maestro, tjinkaoni tsꞌikoni tsjáko̱xian ijnko kjuaxroan kixin tso̱noexíni nkexro ti jaha ―ichro sin.
39 #
Mt. 16:4; Mr. 8:12. *Ndá kjuáte̱he chꞌin Jesús ndáchro:
―Ti chojni tjenka̱yáxin nkehe jínahña la ko titekakonhña Díos mé tjanchia kixin chrókjuákoxian ijnko kjuaxroan ijié. Kjánchó tsjáko̱xi̱nhña ninkehó kjuaxroan, jehó ti kjuaxroan kóhen Jonás, ti nkexro kꞌuéchronka itén Díos ósé. 40#Jon. 1:17.*Kixin éxi Jonás kjuákꞌe nkaya tse̱e ijnko koche ijié iní ña̱o la ko iní tie, mé xi̱kaha tsjakꞌe nkaxehen tòye̱ ti Xje̱en Díos kꞌóna Chojni, iní ña̱o ko iní tie. 41#Jon. 3:5.*Méxra̱ ti ña̱o tsito̱exín iji̱é chojni la ti sin chjasin Nínive la tsꞌaya sin, tsjanchia sin ijie̱ kixin tsjasóte ti chojni siín ijie, kixin jehe sin la tuénxín kuíto̱he sin ti iji̱é sin ti ó kuíhin sin ti itén Díos chrónka Jonás. A̱ndá ijie itjen ijnko nkexro a̱ntsí chónta kjuachaxin ke Jonás. 42#1Rs. 10:1-10; 2Cr. 9:1-12.*Kja̱xin ti reina tsíkji̱xi̱n nó Sur mé tsꞌaya tjan ti ña̱o a, la tsjanchia tjan ijie̱ kixin tsjasóte sin, kixin jehe tjan ikjín kjui̱xi̱n tjan kuíhin tjan ti kjuaxrexinkaon jína kjuako Salomón. A̱ndá ijie itjen ijnko nkexro a̱ntsí nohe ke Salomón.
Ti ó ikjan ti ncha̱kuén jínahña
(Lc. 11:24-26)
43’Ti ó ijnko ncha̱kuén jínahña tꞌaxrjexín ijnko chojni, la sátji nte̱je̱ ti nonte xámá xritjeyá nketí tso̱kꞌèxín. A̱ndá ti tꞌitjahya nketí tso̱kꞌéxín, la ndáchro: 44“Ícha jína tsokjan ti nchia kꞌuaxrjéxi̱a̱n.” A̱ndá ti ó ikjan la tꞌikon éxi ijnko nchia tsíxéhe̱, tsíkótjóá la ko náxrjón tsjehe, 45a̱ndá ikjan sátjikakjín í yato ncha̱kuén jínahña a̱ntsí jínahña ke ti jehe, la tꞌixehen ti chojni, la ntiha tito̱he. A̱ndá ti chojni la ikjan a̱ntsí náxrjónhña ichꞌe, tjasin ijie̱ ke ti senó. Mé xi̱kaha tso̱hen kaín ti chojni tjejó ijie, kixin titekakonhña sin la tjasin sin ijie̱.
Ti ìñé la ko kícho Jesús
(Mr. 3:31-35; Lc. 8:19-21)
46A̱ndá na̱xa̱ tjenixje̱he̱ chꞌin Jesús ti chojni kꞌuejó ntiha, la kjuíji ti ìñé chꞌan la ko ti sin kícho chꞌan. La ndója ó kuíto̱he sin la tjinkaon sin chrónixje̱he̱ sin chꞌan. 47Ndá ijnko nkexro itjen ntiha chenka ti chꞌin Jesús, ndáchro:
―Ìná la ko kichua tjejó sin ndója la tjinkaon sin tsonixja̱ha sin.
48A̱ndá chꞌin Jesús kjuáte̱he, ndáchro:
―¿Xá nkexro ti na̱ná la ko ti kíchina?
49Ndá kjua̱ko̱xi̱n itja chꞌan ti sin xriko chꞌan la ndáchro chꞌan:
―Ti sin i mé na̱ná la ko kíchina. 50Kaín ti chojni nchexiteyá ti nkehe tjinkaon Tꞌaná itjen nkaya nka̱jní mé tíha ti na̱ná la ko kíchina ―ichro chꞌan.
Избрани в момента:
Mateo 12: poeNTplus
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016, Wycliffe Bible Translators, Inc. All rights reserved.