KADADIAN 7
7
1Undinnato ma’kadami PUANG lako Nuh Nakua: Tamamoko lembang sola mintu’ to lan banuammu, belanna ikomo tu Kutiro malambu’ dio oloKu tu mintu’na tau attu iate.
2Dio mai mintu’ olo’-olo’ tang dipemalianna la muala sipitu rundun bali, misa’ laki na misa’ birang, apa dio mai mintu’ olo’-olo’ dipemalianna da’duari, misa’ laki na misa’ birang.
3Sia dio mai manuk-manuk dao lu langi’ sipitu rundun bali misa’ londong na misa’ birang, la umpatumale’ bati’ lan mintu’na lino.
4Belanna pitung allopa angKu pasae uran tama lino patangpulo allona patangpulo bonginna, na mintu’ angge menono’ tu mangka Kupadadi la Kusabu’i lan mai lino.
5Napogau’mi Nuh tu mintu’ apa Napasan PUANG lako kalena.
6Iatu Nuh annanratu’mo taunna dadinna tonna sae tama lino tu uai saba’.
7Iatu Nuh sola repokna, sia iatu mai bainena anakna mentamami lembang umpallaian kalena dio mai uai saba’.
8Dio mai mintu’na olo’-olo’ tang dipemalianna sia dipemalianna sia mintu’ manuk-manuk sia mintu’ olo’-olo’ mendonglo’ dao kuli’na padang,
9sae rundun bali, ke sangrupaoi, lako Nuh mentama lembang, misa’ lakinna misa’ birangna, susitu kadanNa Puang Matua lako Nuh.
10Tonna lendu’mo pitung allo, saemi tu uai saba’ tama lino.
11Iamo tonna annanratu’mo taunna dadinna tu Nuh, tonna bulan ma’penduan, allo ma’pessangpulo pitunna, allo ia dukato mintu’ kalimbuang lan posi’na tana kumala’dak anna mintu’ mata kalimbuang dao langi’ tibungka’ duka.
12Saemi tu uran kamban tama lino patangpulo allona patangpulo bonginna.
13Allo ia dukamoto anna tama lembang tu Nuh na Sem, Ham na Yafet, anakna Nuh sia bainena Nuh anna bainena anakna sola tallui.
14Iatu tau iato mai sola mintu’ olo’-olo’ marira situru’ a’ganna sia mintu’ patuoan situru’ a’ganna sia mintu’ olo’-olo’ mendonglo’ lan lino situru’ a’ganna sia mintu’ manuk-manuk situru’ a’ganna, mintu’ manuk-manuk pantan laen pani’na.
15Dio mai mintu’na pa’padadi kepenaa sia menono’ sae rundun bali tama lembang lako Nuh.
16Iatu mintu’nato sae situang laki situang birang dio mai mintu’ pa’padadi susitu Napokadanna Puang Matua lako Nuh. Namane untutu’i PUANG tu lembang.
17Iatu uai saba’ patangpulo allona lan lino, anna sakendek-kendekna tu uai, anna aanganni tu lembang diong mai padang.
18Sakapua-puanami tu uai sia sakendek-kendeknamo lan lino, anna unnaang-aang tu lembang dao uai.
19Iatu uai sakapua-puana lan lino, naurunganni mintu’ buntu malangka’ nasambo langi’ naleanni.
20Sangpulo limapa sikunna langngan tu uai, tonna leannimi tu mintu’ buntu.
21Namintu’ pa’padadi tu menono’ lan lino ka’tu sunga’na, la mintu’na manuk-manuk la mintu’na patuoan, la mintu’ olo’-olo’ marira sia mintu’ olo’-olo’ mendonglo’ lan lino sia mintu’ dukato lino.
22Mintu’ pa’padadi dao kapadanganna tu denna penaa napotuo lan illongna mate.
23Susimo lalanna dinii ummangsanni tu angge menono’ lan te lino, la tolino, la patuoan sia mintu’ olo’-olo’ mendonglo’ sia mintu’ manuk-manuk dao lu langi’; mintu’nato dimangsanni lan mai lino, Nuh manna tu tuo sola mintu’ to nasolan lan lembang.
24Saratu’ limangpulo allona tu uai ponno lan lino.
Избрани в момента:
KADADIAN 7: SDA
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009