Piiligu 8
8
Kopaali maa baasigu
1Niŋi n na, Naawunni daa n bi tami Nuhu ni buŋkobiri la zaa n daa n ba ŋariŋu maa puu la yela, o ti sauwa vaara, koom maa piili n sigira. 2O ti konimbiisi zaa n daa n ba tiŋŋa bulisira la zaa nyeri, ka yo saa dinaŋgbana, saa maa kasigi. 3Koom maa naa daasi koowa ni pisinu a sigi. 4Dapii ni ayapoin daari, ŋmerisi ayapoin daana niŋi, ŋariŋu maa sigi n ti za zoso ba n boona Ararat la zukpaa niŋi. 5Koom maa sigira, a ti paa ŋmerisi pii daana dayinni, zoori yi n turi.
6Dapisinaasi nyaaŋa, Nuhu yoo sugulugu. 7Ka tumi nyiŋgbuŋ, o bi lee n pori n ta, ka ba niŋi n yigi n poli n jinna, a ti paa koom maa n ŋu. 8Niŋi n na, Nuhu lee n tumi ŋmenni ni o yi n nyaasi n nyee koom maa sigiya a. 9Ŋmenni maa daa n bi nye ziya o dobi, a kpali koom maa daa n na n paali maa zu, o pori n ta ŋariŋu maa ziya, Nuhu teeg o nuu gbaag u niŋi. 10O guri daba ayapoin nyaaŋa, o lee n tumi ŋmenni. 11Dindaari maa zaanoori, ŋmenni maa pori n ta ka tiso ba n boona olivi la vapaali kagini o noori. Niŋi n na, Nuhu baŋŋi maa koom maa sigira. 12O lee n guri daba ayapoin, ka lee tumi ŋmenni maa gbagba, ŋala wune ŋmenni maa bi lee n pori n ta.
13Nuhu yuma kobsiyoobu ni yinni, o ŋmeripiiligu dayinni n na koom maa sigi nyem. Niŋi n na, Nuhu yoo ŋariŋu maa dinoori, ka nye maa tiŋŋa pa kuugira. 14O ŋmerisi ayi daana dapisiyi ni ayapoin n na tiŋŋa daa kuu nyem. 15Niŋi n na, Naawunni yeli Nuhu, 16“Pimparaŋa, e ni e poga ni ya biduusi ni ba pogiba ya yi ŋariŋu maa puwa. 17Nyisi niinsi ni bunvuusira zaa n ba ŋariŋu la puu la paasi n yi, a ba niŋi dogi n wasi n paali tiŋŋa a.” 18Niŋi Nuhu ni o poga ni ba biduusi ni ba pogiba yi ŋariŋu maa puwa. 19Lala n na ba nyisi bunvuusira ni niinsi la gba yi ŋariŋu maa puwa, a ni a peerigusi.
20Niŋi n na, Nuhu laŋsi kuga a maali sariga nyisigu ziya, ka nyisi buŋkobiri la ni niinsi la seesi n daga sariga nyisigu, a nyisi sariga, a kusi a ti Naawunni. 21Naawunni ni wumi bunvuusira la sariga ŋuwa, o yeli o maŋŋa, “M ki lee n si tiŋŋa a noori, a kpali niriba yaniŋisa zu. M baŋiya maa nisaala bibiilim niŋi zaa, fere feera niŋini yabeeri, m ki lee n muri bunvuusira seema ni daa n niŋi la zaa. 22Za jemani a wa ti paa durinye nyisigirisim, jemani ni ba niŋi ti n ŋa binaa, bumbutigu ni a naagirisim, waari ni zibiiŋu, wuuni ni seeniŋi, bee ni yiiŋu, a zaa ni mari a jemani.”
Избрани в момента:
Piiligu 8: hag
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2015, Ghana Institute of Linguistics, Literacy and Bible Translation (GILBTT)