Gênesis 16
16
Agarĩ bake Ismael kainikiaki, na hãtxarã
1-3Canaã anua 10 ano ka hiwebiashũ Abrão bake wanũ, iwanã, hawẽ aĩ kayabi Sarai txutabiakubaina Sarai bakeumakũkaĩkĩ shinã betsa watã hawẽ bene yuikĩ:
—Uĩwẽ. Mĩ ea bake wabiapanã Senhor Deusũ ea bake bimama ea nemamiski. Haskawẽ taeshũ ẽ shinaĩ ẽ mia yuiaii. Ẽ dayaru escrava Egito nawa hayaki. Agar bishũ ha txutakĩ ea haki bakewashũwẽ. Peiwẽ Agar ẽ dayaru tsuma ẽ waniwẽ taeshũ hatũ bake bibia ena ishanikiki, hakia ẽ huni bake hayatirumẽkainã— aka hawẽ bene Abrão hawẽ aĩ Sarai hãtxa nĩkakĩ:
—Peki. Haska mĩ ea yunuai ẽ mia ashũtiruki— ikaya Sarai hawẽ dayaru escrava Agar hawẽ bene Abrão yunuaiwẽ taeshũ 4Abrão Agar hubũtã bake wa Agar bake bishĩshũ ma tuya unaĩ: “Ma ẽ bakeyaki”, ikĩ ha dayashũmis Sarai ana betxipaiama danaĩ: “Ẽ ma binuaki”, ika haki paranai kasheaya 5hanua Sarai Abrãoki sinatakĩ yuikĩ:
—Ẽ escrava Agar ẽ mia yunuimarã, mĩ ha bake waima ea danãkĩ yuãkĩ txakabuwaiwẽ taea mĩ mia txakabuki, ẽ dayarubia bake bimawẽ taea ea danaĩkikirã. Haratu nũ txakabu itirumẽ? Mĩ miamẽkaĩ? Ẽ earaka? Haratura Senhor Deusũ besti nuku unãtiruki— aka
6Abrão hawẽ aĩ Sarai daewanũ, iwanã, kemakĩ:
—Uĩwẽ. Miarã, mĩ ẽ aĩ kayabiki. Mĩ dayaru escravorã, minaki. Hawara mĩ haska pe shinaĩ keska wakĩ haska wawe— aka hanushũ Sarai hawẽ escrava Agar danãkĩ itxakawa uĩtã pashai 7-8mae betsa Sur bai kawẽ kai hanu tsua hiweabumanu Agar pashashina hari ha txatxa dapi tsaukẽ Senhor Deusũ nai tsuma haki nukutã yukakĩ:
—Agarĩ, mĩ Sarai dayaru escravoki. Harakiria mĩ huamẽ? Harakiri mĩ kai?— aka yuikĩ:
—Ẽ tsuma Sarai anua pashai ẽ hunekirãshinaki— akĩ yuia
9Senhor Deusũ nai tsumã Agar ana yuikĩ:
—Hariri ana kama nenua txĩtũrikaĩwẽ. Mĩ dayashũmistũ hãtxa nĩkakĩ hawẽ yunua ashũrikubaĩtãwẽ— atã
10-11—Dateyamawe. Mĩ bakewẽ taeshũ minabu pakubainaibu ẽ hatu itxapa wariashanaii, tsuã hatu tanatirumawariakinã— atã —Uiã, ha mĩ tuyarã, mĩ huni bake kaĩshanaii. Mĩ tsumapã mia itxakawaya Senhor Deusũ mĩ bika teneai nĩkaiwẽ taeshũ mĩ bake kenakinã: “Ismael”, washãwẽ. 12Ha mĩ huni bake ewatã tsuã mekĩ daewakĩ yurãwãtiruma keska ishanikiki, yuinaka ni merã hiwea hawẽ yura cavalo keska pubenã. Haska keskariai dasibibuki hatuki sinataya haki sinatariakubaĩshãkanikiki. Ha inũ, hawenabu mestenepa wakĩ hatu kushipa Deusũ wanikẽ hanua tsuãra haki sinatabiakĩ hawa maematirubuma ipakeshãkanikiki— aka 13Agar Deusbe hãtxashu shinãkĩ yuikĩ:
—Deusũ ea uĩbiashu mawama ẽ hiweyuaki. Haskawẽ taeshũ na nenu kenakinã: “Deusũ uiaĩki”— akĩ Agarĩ kenanikiaki. 14Haskawẽ taeshũ mae Cades inũ Berede ha dabe namakis ũpash txatxa kenakĩ: “Laai-Roiki”, akĩ nuku hãtxarã, “Hamebi Hiweatũ Ea Uĩmistũ Txatxaki”, akĩ kenakĩ ani haska yuimisbuki. 15-16Hanua Agar pashashina txĩtũkirã hawẽ tsuma Sarai anua hawẽ huni bake kaiã Abrão 86 bariyatũ kenakĩ: “Ismaelki” anikiaki.
Избрани в момента:
Gênesis 16: cbsBR
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.