Zlr 25
25
Klafta Abraham ta Ketura
1Ka klaftá Abraham ta sana marakw guli, Ketura hga ni. 2Ka yayanatá tsi ta zwani: I Zimraŋ nda Yuksaŋ nda Medaŋ nda Midyaŋ nda Yisbak nda Suwah. 3Ka yatá Yuksaŋ ta i Seva nda Dədaŋ. Wya zivira Dədaŋ: I la Asur nda la Letus nda la Leʼum həŋ. 4Wya hguha zwana Midyaŋ: I Ghefa, nda Ghefer, nda Hanuk, nda Avida, nda Ildagha həŋ. Inda tsaha ya zwana Ketura.
5Ka vlaŋtá Abraham ta inda skwa ni ta Izak. 6Ka valaŋtá Abraham ta mbəhuha ta zwani ya yaya tsi nda miʼa sanagha. Ama ta ma nzakwa ni nda hafu, ka ghwaniŋtá tsi ta həŋ ta sana haɗik diʼiŋ nda Izak nda ma mndəra luwa.
Mtakwa Abraham
7Gwagwata ima Abraham nda hafu ná, dərmək nda ndəfáŋ mbsak hutaf mida həŋ. 8Ka sab hafu ma Abraham. Ka mtutá tsi ma halaku katakata nda zɗaku guli. Ka laghu tsi da dzidzíha ni. 9Ka paɗamtá i Izak nda Yismaghel ma galigha Makpela, ma vwaha Ghefruŋ zwaŋa Tsuhar mnda la Het ta nzakway ndusa nda Mamre, 10ma tsa vwaha Abraham ta skwata da zwana Het. Hada lamta lu ta i Abraham nda markwa taŋ Sara. 11Tahula mtatá Abraham, ka tfanaghatá Lazglafta ta wi ta Izak zwaŋa ni. Ka nzatá Izak ndusa nda Beʼer Lahay Ruʼi.
Mndəra la Yismaghel
12Wya rusa ta ghəŋa mndəra la Yismaghel zwaŋa Abraham, ya yana makwa la Masar Hagar, kurɗa Sara. 13Wya hga zwana Yismaghel ta tva na yayagatá həŋ: Nevayut zumala Yismaghel, ka fiŋtá i Kedar, nda Adbeʼel, nda Mivsam, 14nda Misma nda Duma nda Masa, 15nda Hadat nda Tema, nda Yetur nda Nafis nda Kedma. 16Tsaha ya zwana Yismaghel ghwaŋpəɗ his. Inda taŋ ka mgham ta ghəŋa mndəra mndu turtuk turtuk. Ka tsatsaftá həŋ ta həga luwa taŋ nda vla nzakwa taŋ, nda hga taŋ. 17Wya mbsaka vakwa Yismaghel nda hafu: Dərmək nda hkən mbsak ndəfáŋ mida, ka sab hafu mida, ka mtutá tsi. Ka laghu tsi da dzidzíha ni. 18Ka nzatá zivira Yismaghel ta haɗik sliʼafta ni ndusa nda Havila dikw ta vata Sur, mbəŋ ya mbəŋ ya nda Masar ta lab lu nda ma Asur. Diʼiŋ nda inda zwana ma taŋ nzata həŋ.
Mndəra la Izak
19Wya rusa ta ghəŋa mndəra la Izak zwaŋa Abraham. Abraham ta yatá Izak. 20Fwaɗ mbsak ima Izak ta klaftá tsi ŋa markwa taŋ ta Rebeka, makwa Betwel la Aram ma Padaŋ Aram. Si makuma ni ma Lavaŋ mnda la Aram ya guli. 21Ndiʼa ndiʼa Izak ka maga duʼa da Yawe ta ghəŋa markwa taŋ, kabga tsutsa ka dzəghəŋ. Ka tsuʼaftá Yawe ta duʼa ni, ka zlghaftá Rebeka markwa taŋ ta huɗi. 22Ka lmu zwani ta lmu ma huɗi ni. Kaʼa mantsa: « Ka si manda tsa tsi, kabgawu kəl tsi ka sliɗaghatá na? » ka Rebeka, ka laghu tsi ɗawaŋtá ndana Yawe. 23Ka Yawe nda tsi mantsa:
« His mndəra mndu ma huɗa gha,
his mndəra mndu dzaʼa yata ka.
Dzaʼa malaghu mala sani nda mbraku ta ghəŋa sani.
Mali dzaʼa nzakway ka kwalva sagəŋ, » kaʼa.
24Ka sagha fitika dgakwa ni. Gurzlalaʼ mbuhwali ma huɗa ni. 25Ka saha taŋtaŋa ni lbək ka swida dva dzeʼdzeʼ vgha ni manda huta. Ka tsanaftá lu ta hga ni ka Ghesav#25:25 Ghesav nda gwaɗa Hebru ná, manda mnay kazlay ka swidi dzeʼdzeʼ kəʼa ya.. 26Tahula tsa, ka saha zwaŋama ni nda ŋatá durama Ghesav ma dzvu. Ka tsanafta lu ta hga ni ka Yakubu#25:26 Yakubu nda gwaɗa Hebru ná, manda mnay kazlay durama kəʼa ya.. Mkuʼ mbsak ima Izak ta yatá lu ta həŋ.
Skwapta Ghesav ta mamali mala ni
27Ka galaku tsa zwani ya, ka nzaku Ghesav ka mnda raya viɗviɗ, mndu ta nzaku ma mtak. Ka nzatá Yakubu ka mndu nda hana ghəŋ ni mintgha ma tumpul. 28Ta ɗvu ɗva Izak ta Ghesav kabga zɗəgana zɗa sluʼa mtak. Ama ta ɗvutá Rebeka ta Yakubu.
29Ma sana fitik, ka datá Yakubu ta skwa zay. Ka vraktá Ghesav ma mtak. Nda hərfa katakata. 30Kaʼa nda Yakubu mantsa: « Kdəkkdək zliɗiŋ tvi ka niʼuta yu ta na ɗali ka dva na, kabga nda hərfa yu, » kaʼa. Tsaya kəl lu ka tsanaftá hgu ka Idum#25:30 Idum nda gwaɗa Hebru ná, manda mnay kazlay ka dva kəʼa ya.. 31Ka Yakubu mantsa: « Skwaɗip skwa karaku ta má mali mala gha, » kaʼa. 32Ka Ghesav mantsa: « Wana yu dzaʼa mtuta da maya, nu dzaʼa katifta má mali mala ɗa na? » kaʼa. 33Ka Yakubu mantsa: « Waɗiha waɗa karaku, » kaʼa. Ka waɗanatá tsi, ka skwanaptá mamali mala ni ta Yakubu. 34Ka vlaŋtá Yakubu ta Ghesav ta buradi nda datá mbiza. Ka zutá tsi, suha ta imi, ka sliʼaftá tsi ka laghwi. Ka hərtətatá Ghesav ta má mali mala ni.
Избрани в момента:
Zlr 25: xed
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Wycliffe Bible Translators, Inc. All rights reserved.