JOHAN 4
4
Isua benai Samaria’mpui
1Chunage Isua â Johanbe suadu pe gu kenieme hang tewgai’ngkie zai baptistew ka’ngkiebe rasam Pharisaime seu di de lei be Heguangpeu chî lu dege, 2(Isua sing ne â baptistew mak kane pe gu kenieme runne tew leusedu) 3Judia sâu nan ze, Galili ’mbe tat dai di de lei. 4Zai Samaria pa tatpela ra chang lei. 5Dadege Samaria gu namdi kat, Sukar kacheube, Jakobbe ne pe na Josepbe hang kedei peigaibe bâm taige pa tatchang de lei. 6Chige Jakobbe gu dekua bam lei, zai tebeîtewbe ziegene Isua leikeu di dege, dekuaki taige pa ’ntau gai de lei. Chize tîngna ’nchetkak kereu ze kena hî gum di de lei.
7Chige Samaria’mpui hangkat heduituak ra wangkeu de lei. Isua ne pechu, “I sak kai ra pei lau,” kacheu de lei. 8Pe gu kenieme â mâ teu ra lui ra hang namdi ’mbe tat ti dadegeu. 9Chi Samaria’mpui ne pechu, “’Ndaigum ze nang Juda’mpeu ne I Samaria’mpui dagene hedui sak kai ra kie lau?” kacheu de lei. Judame â Samariame benai mâ de ’ngnga mak bam dadegeu. 10Zai Isua ne pechu kak ze, “Hera gu kela peibe benai ‘Sak kai ra achu pei lau,’ ze ning dage kacheupeu je nang chî lu laîzai â pechu nang kie gu, dezai pa ne ningchu keringbe hedui pei bu de lei,” ze acheu bei de lei. 11Chi ’mpuimi ne pechu, “A pau gau, ning dage tuakrabe zat hang mâ de ga lei, zai dekuaki du chuk lei; ’ndai’nggene nang chi keringbe hedui ngau lau? 12Anui je aipau dekua ze peibepeu, zai aigene pa benai pe name, zai pe gu kaurui ramme du sak ze bambe, anui peu Jakobbe sua â nang di mei?” ze kacheu de lei. 13Zai Isua ne pechu, “Mi-mige de aipau dui sakme leine â, herei dai gu lei, 14kane mi-mige de I peirabe hedui sakbe kau â, mâtew-tewsede herei dai ra mak lei; pechu I peirabe hedui ze pa gene heduidepin chang ze keringbe betunmakbe hangge sungchu ze bam gu lei,” kacheu de lei. 15Chi ’mpuimi ne pechu, “A pau gau, aipau dui ze achu pei lau, I herei dai mak ra, zai aigene hedui tuak ra I wangkeu dai mak ra hangge zeu,” kacheu de lei.
16Isua ne pechu, “Tat ze ning napeu je kû lu, aige wang lau,” ze acheu bei de lei. 17Chi ’mpuimi ne pechu kak ze, “A napeu ga lei,” ze kacheu de lei, Isua ne pechu, “‘A napeu ga lei,’ ze nang kacheube ze gesang de lei; 18ning napeu hangmengeu chang de lei; zai chuna nang ngualungpeu du ning napeu mak lei; ai nang sabe ze gesang de lei,” kacheu de lei. 19Chi ’mpuimi ne pechu, “A pau gau, nang ze kemeu’mpeu lei be I chî de lei. 20Anui paume â aipau kedeiloa hube ge kakellum de lei; zai ningnui ne ziemmename kellum singrabe bâm â Jerusalem ze de lei” ze kacheu de lei. 21Isua ne pechu, “Mpuimi gau, achu ’nnum’mmi le lau, aipau kedeiloa hube peireige du zai Jerusalem ge du mak ze ningnui ne Bepeu je kellummerabe ting wang la de lei. 22Ningnui â ningnui chimakbe je kakellum lei; anui â anui chibe je kakellum lei, tewka’nringbe â Judame dagene pat daseu. 23Kane panehî wang mui de lei, zai chuna ze de lei, gesang ne kakellumme Bepeu je Herui benai samsang gene kellumrabe ting zeu, aigumbe kau je Bepeu ne pechu kellum ra peu daseu. 24Hera â herui lei, zai pechu kakellumme â herui benai samsang ne kellum himchang ra lei,” ze kacheu de lei. 25Chi ’mpuimi ne pechu, “Messiah (Krista kacheupeu) ze wangkeu zi gu lei be I chî lei; pa wangkeu dezai mâ-pelane pa ne anui je teilia gu lei,” kacheu de lei. 26Isua ne pechu, “I ningchu ka’mpaupeu I ze pa de lei,” kacheu de lei.
27Chipau luage pe gu kenieme wang de lei. ’Mpuimi je pa ka’mpaube ze penui ’nningdaulaklu-lu bam de lei, kane mî de, nang ’ndaikau lunei lau? ze mei nune “’Ndaitew nang pechu ka’mpau lau?” ze acheu mak lei. 28Dadege chi ’mpuimi pe gu heduibung sâu nan ze, namdi ’mbe tat ti de lei, zai ziemmena ramme je salia ze, 29“Wang lu ze a tatew leine rangliapeu je pie gai ni lau. Aipaupeu ze Krista de mei?” kacheu de lei. 30Namdi gene penui hela pat lu pe tailam wang de lei.
31Chipau kakge kenieme ne pechu kiâm ze, “Rabbi, mâ-teu zu lau,” kacheu de lei. 32Kane pa ne penui je, “Ningnui chimakbe hetak I teu ra la lei,” kacheu de lei. 33Dadege kenieme kat-kat je ’mpau ze, “Pe gu hetak hang mige ne teiwang bei semei?” kacheu de lei. 34Isua ne penui je, “A gu hetak â achu langgaipeu suî’nning tew ra, zai pe tâ ze tewpuigairabe ze lei. 35Ningnui ne, ‘Kêu medai dezai helugatrabe ting chang du de lei,’ ze acheu mak ti lau? Ningnui je I rang lei, ’ngngangchu ze helu ramme pie gai ni lau, gat ra hang helu ramme mei’nzin la de lei. 36Gatbepeu â tâtewbe hî ngau lei, zai keringbe betunmakbe hang perachî kaigekua gai lei, chidezai ka’nrukpeu benai penai hangna ne penai suiyi’nta ze bam ra hangge zeu. 37Aige sabe sam, ‘Hangkat ne ’nruk, zai kêdapeu ne gat lei,’ kacheube ze gesang lei. 38Ningnui ne tâtewhereugaimakbe gu ze gat ra I ne ningnui je lang gai lei; miramme ne tâtewhereu gai lei, zai ningnui â penui gu tatew ge gut lei,” ze kacheu de lei.
39Chi ’mpuimi ne, “I tâtewgai’ndibe leine ze pa ne achu ranglia bei de lei,” acheu ze sakkitewgaibeibe ziegene chipau namdi ge Samariame misonggame pechu ’nnum’mmi kam di de lei. 40Chigum ze Samariame ne pe dage wang ze penui dage ’nnai bam ra pechu kiam de lei; dadege chige hezie kena pa ’nnai gai de lei. 41Zai pe sam ziegene ziemmena misonggame ne du pechu ’nnum’mmi di de lei. 42Zai penui ne chi ’mpuimi je, “Chuna â ning sam ziegene anui ’nnumka’mmibe chang ta de lei, anui runne ne seu lu de lei, zai aize kedeirei tewka’nringpeu run lei be ze anui chî lu de lei,” ze kacheu de lei.
Isua ne Saîbe Na je Tewka’mmibe
43Zai hezie kena châng dege, Galili ’mbe pa tat ti de lei. 44Isua pa sing ne, kemeu’mpeu â pe ram sing ge â pengêu ga lei, ze sakkitew gai lu dadegeu. 45Chigum ze Galili ge pa wangchang dege, Galilime ne Jerusalem ge hengî ting ge pa tâtewgai’ndibe leine penui ngau kam lu ze, pechu ka’nchâ de lei, penui du kahengîbe ge tat lu dadegeu.
46Chigum ze Galili ge Kana keloa ge pa wang gai kadai de lei, chi hedui ne wain chang ra pa tewgaibe bâm gezeu. Zai Kaperna-um ge saibe hangkat pe na ’nrâ ze bam lei. 47Zai chi saibe ze Isua Judia gene Galili ge wang la de lei be sam seu lu dege, pe dage wang ze, pa ne wangkeu ze pe na je tew’mmi gai ra pechu kiam de lei, pe na chaitena bam di dadegeu. 48Chidadege Isua ne pechu, “Mâ-ka’nchetbe benai tâningdaulakbe ramme ningnui ngau makchaine â ningnui â ’nnum’mmi ra mak lei!” acheu bei lei. 49Chi saibe ne pechu, “A pau gau, a na chai makge wangkeu zu lau,” kacheu de lei. 50Isua ne pechu, “Tatchu lau; ning na ring gu lei,” acheu bei de lei. Chipaupeu ze Isua ne pechu rangbeibe sam ze ’nnum’mmi lu ze tat ti de lei. 51Zai pa acheu tatkeu lage pe gu tâka’ngguame ne pechu hedau lu pe na ze ring la de lei be ze pauliâ bei de lei. 52Dadege pa ne penui je pe na yibi di ze chudaidibe hî ze ’nneu gai dege penui ne pechu, “’Nzimai ’nchetkak kat hî gum ge pa ka’nrâbe sau di de lei,” ze acheu bei de lei. 53Isua ne chize pechu, “Ning na ring gu lei,” kacheube hî sing ge de lei be ze pe peu chî di de lei; zai pa benai pe kibaume leine ne ’nnum’mmi di de lei. 54Aize Judia gene Galili ge pa wangkeulube chângge Isua tâningdaulakbe tewbe pakenabe de lei.
Избрани в момента:
JOHAN 4: ZEMEBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.