JOHAN 17
17
Isua ne Pe gu Kenieme hang Kakellumbe
1Aipau sam ramme Isua sa gai lu dege, tinggîm ’ngngangpie lu acheu sa ze, “A peu gau, panehî wangchang de lei; ning Na ngeu-tew’ndi gai lau, dezai ning Na ne ning ngeu-tew’ndi gai ra hangge zeu, 2nang ne pechu peigaibeime leine je keringbe betunmakbe pei gai ra hang ziemmename leine peireige nang ne pechu rezie pei gai ’ndi daseu. 3Zai aize keringbe betunmakbe lei, chi penui ne nang Hera kagesangbe benai nang langgaipeu Isua Krista je gechîbe zeu. 4Kedeirei ge I ne ning ngeu-tew’ndi gai ’nde lei, nang ne achu tâtew ra peigaibe I tewpui-’nsangsiak lu zeu; 5zai a peu gau, kedei ’ndam gai makge ning dagene pengêudibe a dage bambe, chize ne chuna ning masua sing gene a ngeu-tew’ndi gai lau.
6“Kedeirei gene nang ne achu peigaime ziemmename dage ning ji I teilia bei de lei; penui â ning gume lei, zai nang ne penui je a dage pei gai lei, zai penui ning sam tei’mmi ze la lei. 7Mâgetaleine nang ne achu peigaibe ze ning dagene pat lei be chuna â penui chî la de lei, 8nang ne achu peibe sam ramme ze penui dage I pei bei daseu, zai penui ne chiramme lu lu ze, I ze ning dagene wangkeu lei be peling ne penui chî lu de lei; zai nang ne achu langgaibe ze penui ’nnum’mmi lu de lei. 9Penui hangge I kakellum lei; kedeirei hangge I â kakellum mak lei, kane nang ne achu peigaime hang I kakellum lei, penui â ning gume dadegeu; 10a gu leine ze ning gu kam lei, zai ning gu ze a gu lei, zai penui ge a ngeu-tew’ndi gai bei de lei. 11Zai chuna â kedeirei ge I bam ta du de lei, kane penui â kedeirei ge bam la lei, zai I ning lam wang lei. A peu Ka’nchipeu gau, nang ne achu peigaibeime je ning ji gene penui je ’nggum lau, anai kat chang gum ze penui pumkat chang le ra hangge zeu. 12Penui dage I bambe luage nang ne achu peibeime je ning ji gene I ’nggum bei de lei; penui je I ne reî de lei, zai penui ruage mî de ga me lei, kane chai’nggaderabe Na runne zangno, rawdiakkaibe leisi sam ze tewpui gai be ra hangge zeu. 13Kane chunage I ning lam wang lei; zai airamme kedeirei ge I sa de lei, dezai a suigut penui ge tewpuigit kai be ra hangge zeu. 14Ning sam penui je I pei bei de lei; zai kedeirei ne penui je ngaugailak lei, penui â kedeirei gu makbe ziegeneu, I kedeirei gu mak gum zeu. 15Nang ne penui je kedeirei gene lupat ne ra I a kie mak lei, kane nang ne kesiapeu dagene penui je reî’mmirabe hanggene lei. 16Penui â kedeirei gu mak lei, I kedeirei gu mak gum zeu. 17Ning gu samsang ne penui je tew’nchi gai lau; ning sam â samsang lei. 18Kedeirei ge nang ne achu lang gai bei gum ze I du kedeirei ge penui je lang gai bei de lei. 19Zai penui hang ziegene a runne achu tew’nchi gai lei, chidezai penui du samsang ne tew’nchi le ra hangge zeu.
20“Aime hang runne I kakellum mak lei, kane penui sam ziegene achu ’nnumka’mmime hangge du I kakellum lei, 21chidezai penui ’nteumena pumkat chang kam le ra hangge zeu; a peu, nang ne I ge bam, zai I nang ge bam gum ze, penui du anai ge bam le ra hangge zeu, chidezai nang ne achu lang gai de lei be kedeireime ne ’nnum’mmi le ra hangge zeu. 22Chi pengêudibe nang ne achu peigaibeibe ze penui dage I pei bei de lei, chidezai anai kat chang gum ze penui pumkat chang le ra hangge zeu. 23I penui ge bam zai nang I ge bam lei, penui pumkat chang sing le ra hangge zeu, chidezai nang ne achu lang gai lei be benai achu nang hung gum ze penui je du nang hung lei be kedeirei ne chî le ra hangge zeu. 24A peu gau, nang ne achu peibeime je I bambe bâm ge penui du bam ra I lunei lei, kedei ’ndam gai makge nang kehungbe ne chi pengêudibe nang achu peigai’ndibe ze penui ngaudesi le ra hangge zeu. 25A peu katelingpeu gau, kedeirei ne ningchu chî mak lei, kane I â ningchu chî lu de lei; zai nang ne achu lang gai lei be aime ne chî lei. 26Ning ji ze penui dage I chiliâ gai bei de lei, zai I chiliâ gai bam gu lei. Nang achu hungbe chi kehungbe ze penui ge bam le ra, zai I penui ge bam le ra hangge zeu,” ze kacheu de lei.
Избрани в момента:
JOHAN 17: ZEMEBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.