TÂTEWBE 8
8
1Zai Stephenbe je tewchatbe deu ge Saulbe â pe suîhezuâ gai ze bam lei.
Saulbe je Tewsabe
Zai chipau mai ge Jerusalem ge herakiangname peireige tewsabe kedibe chu di de lei; zai apostolme je runne zangno keneime leine je â Judiaram benai Samaria leine ge penui je hûtimrarip kai ’ndi de lei. 2Herasie teika’mmime ne Stephenbe je ritbai gai de lei, zai pe peireige desui ze puîhap-desang gai de lei. 3Kane Saulbe â herakiangname je tew’ngga ’nde ra tew ze, kelakki tatwang ze ’mpeumi ramme benai ’mpuimi ramme je penui ki gene hela zupat ze, kebangki ge bang gai ra tew gai de lei.
Samaria ge Samyibe Paugaibe
4Chunage hûtimragaibeime ne tatrua ze samyibe ze pau de lei. 5Philipbe ne Samaria gu namdi kat ge wangkeu lu ze penui dage Krista rasam pau gai de lei. 6Zai Philipbe ne ka’nchetbe ramme ngau gai zai bekuâ seu gai dege pa sabeibe ge baudime ne lungkat-suikat ne ’ngkingrim ze bam de lei. 7Herui kahebâbe ramme penui dage misongga ze bambe ramme zene penui kuâ ’nrunggetie ze hela zuapat kam di dadegeu; zai penui pum pikatlam chaidime mei, nune penui pî siadime mei je tew’mmi kam bei de lei. 8Chigum ze chipau namdi ge hesuiyi-desang bam di de lei.
9Kane hangkat Simonbe kacheupeu, tingtie ge pa ne namdi ge kahekabe tâ tew bei ze heramzatme ne ’nningdaulak ze chipaupeu â ziemmena kedibe kau de lei ze pechu acheu ze chî ze bambepeu chige bam lei. 10Zai penui ’nteumena cheilangbe gene dilangbe riâ chang ze, pe sam’ngking nei ze acheu sa ze, “Aipau peu â, Hera gu rezieteibe kau, Kedibe kacheube ze de lei,” ze kacheu de lei. 11Zai pechu penui ne ’ngkingneibe ze â beting acheutiege pa ne kahekabe tewbambeibe zene penui ’nningdaulak ze bam ra tewgaibeibe ziegene de lei. 12Kane Philipbe ne Hera gu heguangram rasam keyibe paube benai Isua Krista ji ze pauruabe ge penui ’nnum’mmi gai dege â, penui ’mpeumi, ’mpuimi ’nteumena je baptistew kam gai bei de lei. 13Simonbe ’nsangdu ’nnum’mmi di de lei, zai pechu baptistewlube chângge du Philipbe dage pa â bam bam lei. Zai ka’nchetbe ramme benai tâ-kedibe ramme tewbeibe pa ngau lu ze ’nningdaulak ti de lei.
14Chunage Jerusalem ge apostolme ne Samariame ze Hera gu sam lutau de lei be seu lu dege, Peterbe benai Johanbe je penui dage lang gai de lei, 15penai ne chige wangkeu lu ze, Herui Ka’nchibe penui ngau ra hangge kellum gai de lei; 16Herui Ka’nchibe ze penui ruage mige peireige du wangkeu mak kerei dadegeu, kane penui â Heguang Isua ji gene baptistewgaibe runne zangnêu. 17Chidadege penai ne penui peireige penai ba die gai bei dadege â Herui Ka’nchibe penui ngau kam di de lei. 18Zai Simonbe, apostolme ne hebadiegaibe gene Herui ka’nchibe penui je peigai’ndibe pa ngau lu dege â penai je pa rangkâng pei de lei, 19acheu ze sa ze, “Aipau rezie ze achu du pei lau, chidezai mi-mi peireige I ne a ba diegaibeime ze Herui Ka’nchibe ngau le ra hangge zeu,” ze kacheu de lei. 20Kane Peterbe ne pechu, “Nang benai ning gu gepût (rangkâng) â peize ’ngga gai de lau, Hera gu kela ze rangkâng ne luichi le ra nang ’nninggaibe ziegeneu! 21Aipau deu ge â ning gu hedam mei, nune ning gu hedachakbe mei be â mâ de ga lei, Hera masuage ning lung ’nzeimakbe ziegeneu. 22Chidaze aipau ning lungriaksiabe gene heli zu lau, zai Heguangpeu dage kellum zu lau, changdui zai â ning lung ge nang ka’nningbe ze ningchu lûn gai be ra hangge zeu. 23Nang â hemimeube gekabe (karîbe) ge, zai helungriaksiabe kebang ge bambe I ngau daseu,” acheu bei de lei. 24Dadege Simonbe ne kak ze, “Heguangpeu dage a hangge kellumgaihâ lau, ningnai ne sam sagaibe ze a peireige mâ de peize wangchang me ra hangge zeu,” kacheu de lei.
25Zai penai sakkitew gai lu zai Heguangpeu gu sam salia gai lu dege, Jerusalem ’mbe hang dai lu, Samariame keloa ge Samkeyibe paurua ze tat ti de lei.
Philipbe benai Ethiopia’mpeu Saibe
26Kane Tingwang gu angel’mpeu hangkat ne Philipbe je, “Chu ze tingpî ’mbe Jerusalem gene Gaza tatbe ’mpuîki ge wangkeu zu lau,” kacheu de lei. Aipau ’mpuîki â hênamkang ’mpuî lei. 27Dadege pa chu lu tat ti de lei. Zai pie le lau, kahetiâpeu, Ethiopia’mpeu, Ethiopiame gu heguangpui, Kandakile guâ ka’ngguapeu, pe gu rangkâng kereîpeu Jerusalem ’mbe kellum ra tat lu ze, 28helatwang kadai de lei; pe gu hekun-timriang ge chua lu, kemeu’mpeu Isaiabe gu leisi kiâ de lei. 29Dadege Herui ne Philipbe je, “Hang lu ze chi hekun-timriang taige wanghechut le lau,” kacheu de lei. 30Dadege Philipbe ne pe tailam paktat ti ze, kemeu’mpeu Isaiabe gu leisi sam pa kia bambe kuâ seu lu, pechu, “Nang kia bambe sam ze nang chîdesi de mei?” ze ka’nneu lei, 31Dadege pa ne, “’Ndaigum ze I chîdesi ra lau, mige ne achu geteilia makchai neu?” ze kacheu de lei. Zai pa ne Philipbe je chu’ntau ra ku de lei. 32Zai rawdiakkaibe leisi sam pa kiâ-bambe ze:
“Meli bichatrabe bâm ge nguatat gum ze,
melipoine pe gêu chiapbepeu suage,
pe kuâneu mak ze bam gum ze,
pa du pe kuâneupat mak ze bam lei.
33Pechu tewkahelêube luage,
samramkapelingbe pechu ’ngkim ’ndi lei.
Pe dagene piakeume je châu ne rangliachi ra lau?
Kedei gene pa keringbe ze lutat ti daseu,” kacheube ze de lei.
34Zai kahetiâpeu ne Philipbe je, “Ningchu I ne kiam lei, châu rasam deu ge kemeu’mpeu ne aipau sam ze sa lau, pa singbe rasam sa mei nune kêdapeu rasam sa lau?” ze kacheu de lei. 35Chidadege Philipbe ne sam sachu dai ze, aipau rawdiakkaibe leisi sam gene putchu ze Isua rasam yibe ze pe dage salia bei de lei. 36Zai penai ’mpuîki ge tat lage hedui bambe bâm ge penai wangchang de lei, zai kahetiâpeu ne, “Ni, aige hedui lamui lei! Achu baptistewrabe hangge mâ-kenambe la mei?” kacheu de lei. 37(Dadege Philipbe ne, “Ning lung sing ne ’nnum’mmi dizai â tew le duî lei,” ze acheu bei de lei. Zai pa ne kak ze, “Isua Krista â, Hera Na de lei be I â ’nnum’mmi lei,” kacheu de lei.) 38Zai pa ne hekun-timriang ze tew’nsau gai lu ze penai hangna hedui ’mbe wangkeu de lei, Philipbe benai chi kahetiâpeu zeu, zai Philipbe ne pechu baptistew gai bei de lei. 39Zai penai hedui gene zuachu dege, Heguangpeu gu Herui ne Philipbe je nguatat ti de lei; zai chi kahetiâpeu ze pechu ngau ta di de lei, dadege pe suiyi’nta ze wang di de lei. 40Kane Philipbe je Azota ge ngau kadai de lei, zai chigene tatpela ze, keloa leine ge tat kai ze, Kaisaria changbe riâ ze Sam Keyibe paurua ze bam de lei.
Избрани в момента:
TÂTEWBE 8: ZEMEBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.