TÂTEWBE 6
6
Ka’nggame Hangsena
1Chunage aigumbe kenieme riak pung-sang-pung ze bambe ting ge Grik lad teime ne Hebraime peireige sam katelumbe bam di de lei, penui ne patingnai’nsangne mâ merua ka’nzibe ge penui gu kemîpuime ramme je mâ-hang chakkaimakbe ziegeneu. 2Chidadege kenieme hangkereu-ze-kename ne keneime baudime je kûwang’ndui lu acheu sa ze, “Hera gu sam pauruabe tâ sâu nan ze keteu-kesak lam ge anui ne ’ngguahâ di ze bam ra â yi me lei. 3Chidaze mi puiname gau, ningnui ruage Herui Ka’nchibe benai kaningchingbe ne puime, penui ’nsâyime hangsename je kelâng le lau, aipau tâ hangge anui ne sum gai ra hangge zeu. 4Kane anui â kakellumbe benai sam pauruabe tâ ge anui runne anui lung pei gai ra de lei,” ze kacheu de lei. 5Zai kenieme ne rangbe sam ze baudime ne ’nchâ di de lei, dadege Stephenbe, chi keneibe benai Herui Ka’nchibe ne pui-peu, zai Philipbe, Prokorasbe, Nikanorbe, Timonbe, Parmenasbe, zai Nikolasbe, Antiok’mpeu Juda sie ge guttipeu je penui kelâng gai de lei. 6Aime je penui ne kenieme suage teiwang ze kai bei de lei, dadege penui peireige kenieme ne kellum gai ze, penui ba die gai de lei.
7Dadege â Hera gu sam ze pungbi-bi ze bam lei; zai Jerusalem namdi ge kenieme riak pung-sang-pung di de lei, zai tingkume misongga ze keneibe-sie ge tatchi ze bam de lei.
Stephenbe je Nimbe
8Zai Stephenbe ne ka’nggiabe benai tâtewchibe ne pui lu ze ziemmename ruage tâningdaulakbe ramme benai ka’nchetbe ramme tew gai bei de lei. 9Kane kebang gene ripatkaibeime ka’nduibeki ge bamme bau, (acheu ze kûgaime) penui ruage, hanggesame â Kurinime benai Alekzandriame zai hanggesame â, Kilikiaram benai Asiaram ge bamme penui ne Stephenbe je hegeichu di de lei. 10Kane Herui benai kaningchingbe ne pa sam sapatbe ze penui geikâulak tai lei. 11Chidadege ’ngkim ne miramme je kelutew gai bei de lei, “Mosabe benai Hera je pa ne sakahebâbe sam ramme anui seu lei,” ze acheu ra hangge zeu. 12Dadege penui ne baudime zai gechîngme zai leisirawme je gecheulum gai lu pe dage penui wang lu ze pechu nîm lu zai ret lu samrambeki suage teiwang gai ze, 13karasa gu sakki ramme, “Aipaupeu zene ai ka’nchibe bâm benai hingde peireige saka’nsiabe sam mâdau de sasau me lei; 14ai Nazareth’mpeu Isua ne aipau bâm ze tew’nsia gai gu lei, zai anui je Mosabe ne mi-kisie hang peibe ze tewkedet kai gu lei ze kacheube anui seu de lei,” ze karasa ne acheu same je puîwang gai de lei. 15Zai samrambeki ge bamme leine ne Stephenbe je piereking bambe lua Stephenbe ju â angel’mpeu ju gum bambe penui ngau de lei.
Избрани в момента:
TÂTEWBE 6: ZEMEBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.