MATTHEW 2
2
Gyani Gonokrao phai ba
1Raja Herod, raja jahi dongba ha, Juda raji ni Bethlehem nogor ha, Jisu hajai ba. Boha sainja ni phrang gonokrao Jerusalem ha phai hi sing ba, 2Judarao ni raja hajai phayaba braha dong? Sainja ni phrang boni sathrai khe jing nu hi, bokhe khlim ma ne jing phai ba, thi hi bonsi thi ba.
3Raja Herod ebo grao khe khna ba jang khah waimu nang ba, ode Jerusalem ni khrip subungbo bo jang baosi gamang lai ba. 4Odehe, Jonthaimarao, Dara khe slingriyarao, subung buthu khe longthim hi bonsi khe bo sing ba, Krista la braha hajai ma?
5Bonsi boni ha, Juda raji ni Bethlehem ha, gorasali elei rebyaba dong:
6O ning Juda raji ni Bethlehem,
Juda nogor buthu ni bising ha ning khasi daothao ja phuya;
Bedethikhade, ani subung Israel sarao khe naiso-nuso ginyaba de,
Nini phrang se baigo ma, thi hi bonsi thi ba.
7Yaohon ha Herod gonokrao khe longkhao hi sathrai nujaoba ni bubli khe ragao sisi sing hi thi ba, 8Thang, nana ni balam ha hamsisi sing tha; ode, angbo bokhe khlim mane khlai hi nisi nu kha ning a ne khna ri phin, thi hi bonsi khe Bethlehem ha haiha kha.
9Odehe, bonsi raja ni grao khe khna hi thang la kha. Sainja ni phrang sathrai nuyaba de nana dongyaba krosao bujui ha songthaoba nuya si bonsi ni sagang sagang thang pha lang ba. 10Bonsi sathrai khe nu hi gabang khaja kha. 11Odehe, noh ha hapsing hi boni buma Mari niha, nana khe nu dada, yasgu thu hi bonsi khlim ba. Ode, bonsi jar jar ni don bubim buthu khe khuru hi khajama ni yaosandi-gajao, murra, athor bonthane bonsi ri ba.
12Odehe, bonsi Herod ni ha thangphinya mane khlai hi saomi ha thijaoyaba grao dongba ni, lama gibin gede jar ni nolei ha bonsi thangphin la kha.
Egypt ha khailang ba
13Odehe, bonsi thang la bani yaohon ha, Gabra ni degla saosi saomi ha nujao phai hi Josef khe thi ba, Baija hi nana jang boni buma khe lang hi, Egypt raji ha khailang lah; ode, ning khe ang thiphinya si, oraha ning dong lah. Bedethikhade, nana khe Herod sthai mane smai du.
14Odebani, baija hi, hor ha ning nana jang boni buma khe lang hi Egypt ha bo thang la kha. 15Gabra ning gorasali ni khuh ha thi ba, Ani basa khe Egypt ni phrang longhun ma, thiyaba sophai phu mane khlai hi oraha ning bonsi dong ba.
Nanarao khe sthaiba
16Odehe, Herod khe gonokrao thokhi kha thi hi bo tharmai ba jang hamsi ning thamsi baigo hi, subung haiha hi, bubli ha gonokrao khe ragao sisi grao singphlaba lai, Bethlehem ni khrip haphai ha nana miyah nokha maithai gin ni phrang bakhla ni khrip khe bonsi dainthai thar ba.
17Odehe, bo bubli ha gorasali Jeremia grao thiyaba gibi japhai kha:
18“Rama nolei ha jirikkhao hi grayaba
khurang khna ha du,
Thihyaba khe wainso hi jiu khlai hi gra lai du,
Rakhil jar ni basathu giri kha bani gra du
Ar, bo malai jang waimu phoron ma nangjaoya”.
Egypt ni phrang phaiphin ba
19Herod thih bani yaohon ha, Gabra ni degla Egypt ha Josef niha saomi jang nujao phai hi thi ba, 20Baija hi nana jang boni buma khe lang hi Israel raji ha thang lah; nana sthaima baoyarao bonsi thih kha. 21Odehe, baija hi nana jang boni buma khe lang hi Israel raji ha phaiphin kha.
22Thikhabo, Herod ni basa Arkelaus, boni bupha ni baslai ha raja jahi dong thi hi khna dada oraha thang raoya kha. Ode, saomi ha thijaoba ni Galili gede thang la kha. 23Gorasali ni khuh jang thilang ba, Bo de Nazareth ni subung thijao ma thiyaba grao gibi japhaima ne khlai hi nogor masi Nazareth thiyaba ha bonsi dong hi ba.
Избрани в момента:
MATTHEW 2: DIMASBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.