Жыві паводле Духа: Пасьвячэньні ад Джона ПайпэраУзор

Дух напаўняе нас радасьцю.

"Дык глядзеце, дзейце асьцярожна, ня як неразумныя, а як мудрыя, цэнячы дорага час, бо дні - ліхія. Дык ня будзьце ж неразважныя, а спазнавайце, што ёсьць воля Божая. І не ўпівайцеся віном, ад якога бывае распуста; а напаўняйцеся Духам." - Эфэсцаў 5:15-18

Навошта людзі зьвяртаюцца да алькаголю? Каб знайсьці ўцеху. Кожны з нас хоча быць шчасьлівым, але вось праблема: "Дні - ліхія" (верш 16).

Да чаго ты зьвяртаесься ў ліхія дні, калі табе страшна, або калі ты ўпаў духам, або калі ў цябе дэпрэсія альбо трывога? Павал раіць нам: "Не зьвяртайся да алькаголю, зьвяртайся да Сьвятога Духа. Нават калі й падаецца, што алькаголь можа прынесьці табе нешта вартаснае, дык Божы Дух здолее прынесьці больш за тое."

Ёсьць людзі, якім цяжка пачаць сьвістаць вясёлую мэлёдыю або пяяць сьпеў на працы, бо іх поўняць згрызоты ды трывога. Але ўвечары, прыклаўшыся да чаркі, яны гатовыя з усімі абдымацца, пяяць ды сьмяяцца.

Кожны з нас прагне быць бестурботным, шчасьлівым і бесклапотным. І трагедыя нашых часоў, як і Паўлавых, у тым, што ўсё болей ды болей людзей (нават вернікаў) думаюць, што адзіны шлях да гэтае бестурботнае свабоды - гэта алькаголь. Гэтакія паводзіны ганьбяць Бога, і Павал кажа, што існуе лепшы шлях барацьбы зь ліхімі днямі - напаўняцца Духам, што дазволіць табе зазнаць непараўнальную радасьць, якая сьпявае Госпаду.

Дык што значыць напаўняцца Духам?

Дух, які напаўняе нас - гэта Дух радасьці, вечна прысутны паміж Богам-Бацькам ды Богам-Сынам, бо яны любяць адзін аднога. Таму напаўняцца Духам азначае адчуваць радасьць, што ў Сьвятой Тройцы, і любіць Бога-Бацьку й Бога-Сына любоўю, якою яны любяць адзін аднога.

Сьцежка, якую Дух прабівае праз гушчар нашае трывогі да радасьці, - гэта сьцежка веры. Павал кажа, што напаўняцца Духам - значыць верыць, што Бог сапраўды валадарыць - што ніводзін верабей ня падае на зямлю безь Ягонае волі (Мацея 10:29) - і што Ён кіруе сусьветам дзеля цябе і дзеля ўсіх тых, хто давярае Ягонаму Слову. Верачы ў тое, ты будзеш напоўнены Сьвятым Духам ды радасьцю.

Даведайся болей: http://www.desiringgod.org/messages/be-filled-with-the-spirit