Matthieu 6
6
Tà ke ɔje dè kunn nyan kade njéndooge
1An-in! tá nè a k’in-in kundei nyan ra ke se dè naje’n le si tàkum dooge’t tede kade an-in sei. Ke nè á sei i rai titeke bè ɓaa, a ingei nyan-kuge dè ji si ra Bɔ si ke ndi danran nga lé. 2Loo ke i unn nyan le kuwe’n noje ɓaa, ade d’ile ndil dèi’t titeke njékede gosge rai kêm kei kebe nange’t se ka-rebege tede kade dooge ilei riɓar dè de’t bè lé. Kerɔte kuwe, man m’ede sei ndàt, dé nè nga d’inge nyan-kuge dè ji de ɗarinè ɓá ta. 3Nè i ɓaa, loo ke a unn nyan le kuwe’n noje nga, ade ji geli ger nyan ke ji koin ra lé, 4tede kade nyan ke i unn uwe’n noje nga è se go ngein. Titeke bè á Bɔi ke njè kan nyan ke tò loo ngeinn’t nga à tel le kuge dè jii ɓai.
Nyan ndoo ke ɔje dè kɔje tà se Nube
(An-in Luc 11.2-4 tɔ)
5Loo ke a ɔji tà se Nube ɓaa, i rai titeke njékede gosge rai nga lé. Dé nga, dé ndige kɔje tà se Nube kade kum dooge an de njung kêm kei kebe nange’t a , se ngang rebege’t a tɔ. Kerɔte kuwe, man m’ede sei ndàt, dé nè nga d’inge nyan-kuge dè ji de ɗarinè ɓá ta.
Jésu ndó njékuwe-girnge rebe kɔje tà se Nube
6Nè i , loo ke a ɔje tà se Nube ɓaa, aw kêm kei lei utu tàbit kei lei dèi’t ɓita ɔje tà se Bɔi ke ndi loo ngeinn’t. Titeke bè á Bɔi ke njè kan nyan ke tò loo ngeinn’t nga, à tel kuge dè jii ɓai. 7Loo ke a ɔji tà se Nube ɓaa, i tami tàge dè nan’t-dè nan’t titeke dooge ke geri Nube lé rai nga lé. Ei giri titeke tàge ke n’ei n’tami ke dè nan’t-dè nan’t á Nube à ade’n de nyan ke n’deji nin nga. 8I teli i taai nan se de lé tede loo ke tà nain kêm si’t ɓai kuwe géa, Bɔ si ger nyan ke sei awi ndoo’n kété ɓita i deji nin nyan nè ɓai. 9Loo ke a ɔji tà se Nube ɓaa, i tami titeke bè edi nè:
«Bɔ jé i ke njè ndi danrán,
maje kade dooge malang geri titeke rii è ri ke tò se ninn’n gai.
10Maje kade on ɓee dè dooge a,
maje kade dé ra gute ndui d’ade ɔr njêt titeke dé ra’n danrán a tɔ.
11Maje kade ɓila ade jè nyankuse
ke j’aw ndoo’n se ndɔ jé-ndɔ jé.
12Maje kade ade kêmi tin mbit dè kure majelége’t le jé
titeke jè géa j’ade kêm jé tin mbit dè kure majelé ke made jége rai se jé.
13Maje kade inye loo ade nyan sú nan jè lé,
nè ɔr jè dann nyan ke majelé’t kɔke.
14Ke nè á adi kêm si tin mbit dè dooge’t ke njé ra se si majelé ɓaa, Bɔ si ke ndi danrán géa à ade kêm’n à tin mbit dè si’t tɔ. 15Ke nè á adi kêm si tin mbit dè dooge’t ke njé ra se si majelé lé ɓaa, Bɔ si ke ndi danran géa à ade kêm’n à tin mbit dè si’t ndan lé tɔ.
Jésu ndó njékuwe-girnge rebe kɔge kêm ɓo
16Loo ke ɔgi kêm si ɓo ɓaa, i siwi kum si siw-siw titeke njékede gosge rai nga lé. Ei rai titeke bè le kade dooge an-in titeke ɔgi kêm de ɓo. Kerɔte kuwe, man m’ede sei ndàt, dé nè nga d’inge nyankuge dè ji de ɗarinè ɓá ta. 17Nè i , loo ke i ɔge kêmi ɓo ɓaa, ube dèi se wubu ɓár-ɓár a, i togo kumi ndát-ndát a tɔ. 18Titeke bè á dooge à an-in nin titeke i ɔge kêmi ɓo lé. Nè Bɔi ke ndi loo ngeinn’t à an nyan ke i ra ɓaa à tel kuge dè jii ɓai.
Jésu ndó dooge tà ke ɔje dè nyanbawge ke danrán
(An-in Luc 12.33-34 tɔ)
19Uwei dè nja nyanbawge ke dè nang nè nga undei konn tede le si lé, tede dè nang nè nga è loo ke gide se kar tuji nyange tutu a, njéɓog-ge mbuti kum loo ɓogi a tɔ. 20Nè uwei dè nja nyanbawge le si undei konn danrán ra Nube’t, tede danrán nga è loo ke gide se kar tuji nyan tutu lé a, njéɓog-ge à mbuti kum loo le ɓogi lé a tɔ. 21Oiyo loo ke um nyanbaw lei tutu nga, ɓengrei à è dè’t kuwe tchên.
Kum jéi tò asenan se lampe le danra jéi bè
(An-in Luc 11.34-36 tɔ)
22Kum jéi tò asenan se lampe le danra jéi bè. Ke nè á kum jéi an loo njai ɓaa, danra jéi bere mbak è ke unju njai a tɔ. 23Nè loo ke kum jéi an loo majelé ɓaa, danra jéi bere mbak ndi dann tilkus’t a tɔ. Ke nè á lookar ke kêm jéi’t kei tel è loo ndul ɓaa, danra jéi bere mbak ndi dann loo ke ndul ndin-ndin’t.
Doo asekum ra kule ɓer le Nube se ra kule ɓer le nar kade nan’t joo lé
24Doo karé asekum ra kule kade kuwenge joo kêm kurloo ke karé’t lé. E à ɔr è ke karé njêt, nè è à unde è karé ke rang dann kumn’t. Taɓai è à ile koje dè è ke karé’t, nè à an è karé ke nyan lé. Sei asikum ra ɓer le Nube se ra ɓer le nar kade nan’t joo mbak lé.
Adi kêm si tò kekek dè ra si’t lé
(An-in Luc 12.22-31 tɔ)
25Gir’n ke nè á man m’ede’n sei: adi kêm si tò kekek ɔje nyankuse ke a usei éké mann kain si éké kubu kule ra si’t lé. Ké ndikumgajer le doo nga è soo’t dum nyankuse lé wa? Ké danra doo dum dè kubu kule ra’t lé wa? 26Unni kum si an-in helge ke walé. Dé dubu ko éké dé sa ko d’ɔse nja nan’t d’um kêm damge’t lé a tɔ. Nè Bɔ si ke ndi danrán kuwe ul de. Sei nga ké gate si dum le helge nja bule ngain lé wa? 27Ké nan dann si’t asekum kile ɓal ndikumgajer le’n dè made’t se go kêm tò kekek le’n nga wa?
28Ké bain á adi kêm si tò kekek dè kubu kule ra si’t tá wa? Undei kum si maje an-in loo tɔge le ndujege ke kêm ndɔr’t. Ei rai kule ɔri yàl-yàl lé a, ojoi kubu lé a tɔ. 29Kubu ngarge le Salomon maji ngain kuwe. Nè man m’ede sei, è ke karé bè ke maje tite putu-ndujege nè géa goto. 30Sei ke kundekêm le si tin lé, mu ke walé ke barè d’ade ró’n se por gé ɓai á Nube ade in mande ɓila nè nga, ké Nube asekum kade sei kubu ulei ra si’t lé wa? 31Adi kêm si tò kekek se ndɔge malang kade i tami edi nè: «Ké ri á barè j’à j’use? Ké ri á barè j’à kan-in? Ké ri á barè j’à kule ra jé’t wa?» lé. 32Nyange nè malang nga, è dooge ke geri Nube lé á ei njé sang de se ndɔge-ndɔge. Tede Bɔ si ke danrán ger nyange malang ke sei awi ndoo de. 33Nè i sangi Konɓee le Nube a, se nyan ke se dè naje’n ɓita Nube à ade sei gute nyange malang ke awi ndoo de. 34Adi kêm si tò kekek dè ndɔ ke barè’t lé, tede ndɔ ke barè à ree se kêm tò kekek ke ɔje dè’n è kuwe ɓai. Ndɔ karé aw se nyankêmkon le’n ke ase’n nák-nák.
Цяпер абрана:
Matthieu 6: GUL04
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Magtub Mann-ra ke Kige ©Alliance Biblique du Tchad, 2004