San Mateo 9
9
Acheti ma enga no úempka manakorheni ambakeranhantasti
(Mc 2.1-12; Lc 5.17-26)
1Tátsekua enga Jesusi k'éri icharhutarhu jatantapka, parhikuntaspti ka imeri iretarhu niántaspti. 2Ka jimaksï pérakuspti k'uírakua ma jimbo achetini ma enga no úempka manakorheni. Jesusi exearini eskaksï ima kánekua mintsikaxapka, p'amenchatini arhispti:
–Jucheti uátsï, uinhapekorhentsï, k'amanharhintskuechaniri púamenhantaskia.
3Ka máruksï kararicha arhijperaxapti: “I Diósïni útakuxati.” 4Jesusi mítetini ambe engaksï eratseni jápka, uandaspti:
–¿Andijtsïsï xáni nósesi jásï ambe p'ikuarhenhejki? 5¿Ambe sánderu no ts'unhapeski, uandani: “K'amanharhintskuechaniri púamenhantaskia arhini, o jauara ka xanhara arhini?” 6Jíksïni exeraaka eska Acheti Uájpa, parhakpeni juramukua jatsiska k'amanharhintskuechani púatspeantaani.
Ka arhispti imani enga no úempka manakorheni:
–Jauara ka k'uírakuani k'arhakorhentsï ka níia níntani.
7Ka ima acheti jauaraspti ka níntaspti. 8Ísï exenhatini, kánekua chérakorhenhatixapti ka Diósïnksï k'éri ambe arhispti jimboka xásï juramukua íntspespka.
Jesusi Mateoni uandajpasti
(Mc 2.13-17; Lc 5.27-32)
9Enga Jesusi jima kéndikupka, achetini ma exespti enga Mateo arhinhempka, enga tumina tánantskuarhu uaxakatini jápka ka arhispti:
–Chúxapurini.
Mateo jauaraspti ka chúxapaspti.
10Ísï tátsekua, enga Jesusi Mateuo t'ireni jápka, uánekuaksï tumina tánaticha ka k'amanharhintsticha niáraspti, ka uaxakasptiksï t'ireni jima enga Jesusi jurhengorheri jémbecha jinguni jápka. 11Engaksï fariseuecha exepka arhiasptiksï jurhengorherichani:
–¿Andisï chári jurhentpiri tumina tánaticha ka k'amanharhintstichani jinguni t'ireni jaki?
12Jesusi ísï kurharini arhiaspti:
–P'amenchatichaksïsï tsinajpirini uétarhenchajti, nóksï ima engaksï sési jámani jaka. 13Ni je ka jurhengorhe je ambe enga arhikuekajka “P'amojperakuasïni uéjka ka no parhandikua kéjtsïtakua ambe.” Jimbokani ji no kaxumbitichanisï ióarhiantaani juka, k'amanharhintstichanisïni juka ióarhiataani.
Jesusinksï k'arhinda jakueri ambe kurhamarhesti
(Mc 2.18-22; Lc 5.33-39)
14Juánu itsï atajtsïkpiriri jurhengorherichaksï, Jesusini andarheraspti ka kurhamarhesptiksï:
–¿Andisïni jucha ka fariseuechaksï mémechani k'arhinda jarhajki? ¿Ka andiksïsï chéti jurhengorhericha no k'arhinda jarhajki?
15Ka Jesusi arhiantaaspti:
–¿Andi úaksï tembuchakuarhu, jarhojpiricha mískorheni jarhani enga tembucha imechani jinguni jauaka? K'óru niáraati jurhiata enga tembucha p'íkunhantaaka ka jiájkani k'óruksï karhinda jauati.
16“Nónema takusï jimbanhe jimbo maiarasïndi xukuparhakua tamapuni, jimboka takusï jimbanhe tskúntasïnga ka tamapuni sánderu karukuni. 17Ka kauikua jimbanhejtu no jatsiranhasïndi kauikua jatakua tamapurhu, jimboka sïkuiri katikorhesïnga ka kauikua tsîncheni. Ísï jimbosï kauikua jimbanhe, jimbanhe jatakuarhu jatsiranhajti, ka ísïksï tsimani ambe márku patsakorheati.”
Jáiru uájpa uátsï tsítanhantasti
(Mc 5.21-43; Lc 8.40-56)
18Enga Jesusi íni ambe arhiani jápka, judiuecheri urhejtsïkuri ma andarheraspti, ka tinguixurhikutini arhispti:
–Nanaka sapichu jucheti iáiasï uarhisti; ju p'ájtsïkuni ka ima tsíntaati.
19Jesusi jauaraspti ka jurhengorheri jémbechaksï chúxapaspti. 20Ka xanhari jimbo, uarhiti ma andarheraspti enga témbeni tsimani uéxurhini p'amenchapkia, iurhirini no úni anhaxustani ka sunundani jupijparhukuspti, 21jimboka ísï p'ikuarhenhesïrempka: “Sunudajkuni ekani párhekupiringa, ambakentaaka.” 22K'óru Jesusi p'irhipakorhespti ka uarhitini erateparini arhispti:
–Ásï jáma p'ikuarherani jucheti uátsï, mintsikaskarini jimborisï ambakentaka.
Ka ima uarhiti jimajku ambakentapaspti.
23Enga Jesusi urhejtsïkurio inchapka, exeaspti kústatichani, ka imechani engaksï uerani jápka, ka engaksï mámaru ambe uandantani jápka, 24ka arhiaspti:
–Kéndiku je, nanaka sapichu no uarhirixati, k'uíxati.
Ka Jesusinksï teresmarhusïrempti. 25Ka engaksï iámenduecha petanhantapka, Jesusi inchaspti ka nanaka sapichuni jupijkuspti, ka nanaka sapichu tsíntaspti. 26Ka iápuru jimesï ima ambeterku uandanhantaxaptia.
Jesusi tsimani pátenharhichani éskataraasti
27Enga Jesusi uéntapka, tsimani pátenharhichaksï chúxapaspti uinhachakuparini:
–¡Dabi uájpa, p'amojkujtsïni!
28Ka enga Jesusi k'umanchekuarhu niántapka, pátenharhichaksï andarheraspti ka Jesusi kurhamarheaspti:
–¿Andi cha mitsikasïnki eskani úaka ísï úni?
Ka imaksï arhispti:
–¡Jo, Tata! Arhini.
29Jiájkani Jesusi p'ánharhikuaspti arhiaparini:
–Úkorhe ísï eskamendujtsï na mintsikani jaka.
30Ka exesptiksï ka Jesusi uinhamarhekuaspti:
–Ásï nemani aianguntsï je.
31K'óruksï ima kéndikutini iápuru jimesïksï uandantaspti.
Jesusi nunuxini ma uandarasti
32Engaksï pátenharhicha uéntani jápka, jimajkuksï pérakuspti nunuxini ma enga nósesi jásï ma incharhetini jápka. 33Enga Jesusi nósesi jásïni petarhetantapka, nunuxi uandaspti. Ka ísku pakareranhaspti ka uandanhasïrempti:
–Israeli iretarhu nómeni xásï ambe exenhaxapti.
34Ka fariseuechaksï uandasïrempti:
–K'éri nóambakitiri juramukua jimbo petarhpeantaasïndi nósesi járhatichani.
P'ikuntskua kánekuesti
35Jesusi iápuru k'érati ka sapirhati iretecharhu nirasïrempti, ka k'umanchekua tángorhentskuecharhu jurhentpesïrempti ambakiti aiangperakuani, ka iámendu jásï p'amenchakuechani ka p'ikuarherakuechani ambakerpentasïrempti. 36Ka xáni uáni exejpetini, kánekua p'amojkpespti jimboka tsînchekata ka etsakorhetini jánhaxapka, ísï eskaksï karichicha enga nónema eranguani jarhajka. 37Ka jurhengorheri jémbechani arhiaspti:
–Sési jimbo, p'ikuntskua kánesti ka p'ikuntstichaksï namuntkuesti. 38Kómarhi je Achani enga p'ikuntani jaka eska axauaka p'ikuntstichani.
Цяпер абрана:
San Mateo 9: DKPJ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Biblia en P´urhépecha, Michoacán, México © Sociedad Bíblica de México, A.C.