San Lucas 3
3
Udixiuleꞌe Juan Bautista Stichiaꞌ Diose
(Mt. 3:1-12; Mr. 1:1-8; Jn. 1:19-28)
1Chenu unga chiñuꞌ lana nú rnibiyaꞌ arre Tiberio César diqui lu iliulabe, che neca Poncio Pilato gobernador Judea, nu neca Herodes gobernador Galilea, nu bichilla Felipe neca gobernador Iturea cuna lu iliu Traconite, nu Lisanias neca gobernador Abilinia. 2Chequie Anás cuna Caifás unga uleꞌya enu mase rnibiyaꞌ lu beelá bee uleꞌya. Bee bichia zeꞌe uni Diose lu Juan llianaꞌ Zacarías lu dañi achi elu la nucuaꞌa bee bene. 3Nu uya Juan lu ye bee eyeche nú nchiucuꞌ axu reꞌcu Jordán, nu unilla lubee bene nú cheꞌe arquiꞌ bee bene lu stula beei cuna nú rinza beei, para nú riꞌi Diose perdona liꞌibeei. 4Scua uyalu tucu nú uquieꞌe profeta Isaías huaꞌtu, xne liꞌilla uquieꞌella nucuaꞌ nú rni:
Lu tucu dañi achi elu la nucuaꞌa bee bene, riene tucu chii bene nu rixialilla nú nilla:
“Utsu tsiñahua arquiꞌhua xne nzeꞌta liꞌinu enu neca Dioseꞌahua;
utsanaꞌ arquiꞌhua stulahua para nú yucu arquiꞌhua stichiaꞌnu.
5Utsucheꞌ nzeꞌcahua arquiꞌhua tucu nú reca teriallu tucu erluu,
nu utsanaꞌ arquiꞌhua elulliña cuna elurutiꞌ tucu nú reca teriallu elu neca loma cuna dañi,
ubenchilaꞌ arquiꞌhua lu inziuꞌ Diose tucu nú rlí inziu nú nerenguie,
nu utsucheꞌ nzeꞌcahua arquiꞌhua tucu nú neca inziu nú necacheꞌ nzeꞌca.
6Chequie ye bee bene iliulabe lañiꞌ liꞌinu enu tsilaꞌa bee bene, enu xeꞌla Diose.”
7Chenu uriña bee bene para nú rinza Juan liꞌibeei unilla lubeei:
―¡Liꞌi sihua netsiñahua xi netsiña bee beꞌla! ¿Ti udixiuleꞌe luhua nú tsilaꞌahua lu castiya juerte nú nzula? 8Uhuañi nzeꞌcahua para nú acachee nú neli nú ucheꞌe arquiꞌhua lu stulahua, nu la nihua: “Liꞌiru necaru enu nzeꞌta lubee beneꞌ tuxie Abraham”; xne nia luhua nú hasta bee quiee quieꞌ aca Diose riꞌi nú aca bee beneꞌ tuxie Abraham. 9Pero bee bene enu la nehuañi nzeꞌca tucu nú rnibiyaꞌ Diose, riꞌinu lubeei tucu nú rriꞌinu bee bene aca ndixi chenu la ayuaꞌ ndixí lue. Xiecuꞌ beei aca zeꞌe nu siquiꞌ beeii lu quii.
10Chequie unidichiaꞌ bee bene lu Juan:
―¿Xi riala riꞌiru che?
11Nu ucuaqui Juan lubeei:
―Enu rluꞌcu chiucu xucu, deteꞌnzeꞌe tucue utu bene enu la luꞌcune, nu enu nuꞌ nú racu deteꞌ nzeꞌe lleꞌnae lubee bene enu seca laꞌchaꞌe.
12Leꞌca uriña chiucu chuna bee bene enu rriꞌi cubre impuestos lu Juan para nú rinza Juan liꞌibeei, nu unidichiaꞌ beei lu Juan:
―Maestro, liꞌiquieru ¿xi riala riꞌiru?
13Che uni Juan lubeei:
―La riꞌihua cubre maselá lunú riala rriꞌihua cubre.
14Leꞌca unidichiaꞌ chiucu chuna bee sundado lu Juan:
―¿Nu liꞌiquieru xi riala riꞌiru?
Nu uni Juan lubeei:
―La axihua steneꞌ bee bene, nu la taꞌhua eluquichiaꞌ bee bene enu lecaxi uriꞌi para nú nuꞌ xi liquiꞌ beei luhua, nu uriꞌihua conforme lunú riaxutsiahua.
15Bee bene zeꞌe niarquiꞌ beei nú alaꞌ riꞌixu beei beyaꞌ tunu neca Juan Cristo, 16pero uni Juan lubeei:
―Liꞌá rrinza liꞌihua cuna inza. Pero nzeꞌta liꞌinu enu rinza bee bene cuna Espíritu Santo nu cuna quii. Liꞌinu necanu enu chiquiꞌ nibiyaꞌ luquelá liꞌá, nu niꞌ nú hua lucunu la yala xne neca equielánu lua. 17Tucu nú rcui bee bene trigo, scua riꞌinu lubee bene, bee bene enu nehuañi tucu nú rialane, deteꞌnu nú huañi bee bene zeꞌe elu rnibiyaꞌnu, nu bee bene enu la nehuañi tucu nú rialane, xeꞌlanu liꞌibeei lu quii nú leca xunga yala.
18Scua neca nú uni Juan lubeei, nu cuna huaxilá bee bedichiaꞌ nzeꞌca unilla bezeteꞌ lubeei, nu udixiuleꞌella bedichiaꞌ nzeꞌcaꞌ Diose lubeei. 19Leꞌca uquiꞌyaꞌ arre Herodes uriꞌi Juan, xne nzucunu Herodes Herodías unaꞌa bichilla Felipe, cuna equie huaxilá beenú necha neca uriꞌi Herodes. 20Pero Herodes luhuare nú zucuꞌlla lunú uni Juan, uriꞌi Herodes stucu nú necha neca: Nú uduꞌlla Juan niꞌcuꞌ.
Urinza Juan Bautista Jesuse
(Mt. 3:13-17; Mr. 1:9-11)
21Chequie chenu urinza Juan bee bene, leꞌca urinzalla Jesuse, diqui nú rnacuꞌ Jesuse lu Diose uyaꞌla liñibe. 22Nu ulaca Espíritu Santo equienu xi neca tucu paloma, nu ubene tucu chii enza liñibe nu uni chii zeꞌe:
―Liꞌilu necalu Lliꞌñia nu chiquiꞌ seꞌca liꞌilu nu ñia nzu arquia lulu.
Bee beneꞌ Jesuse enu udetela
(Mt. 1:1-17)
23Nza Jesuse tucu ala llichiꞌi lana chenu uquixienu uzeteꞌnu Stichiaꞌ Diose lubee bene.
Nu nzeli arquiꞌ bee bene nú unga Jesuse xi neca lliꞌñi José.
Nu unga José, lliñi Elí,
24Elí unga lliꞌñi Matat,
Matat unga lliꞌñi Leví,
Leví unga lliꞌñi Melqui,
Melqui unga lliꞌñi Jana,
Jana unga lliꞌñi José,
25José unga lliꞌñi Matatías,
Matatías unga lliꞌñi Amós,
Amós unga lliꞌñi Nahum,
Nahum unga lliꞌñi Esli,
Esli unga lliꞌñi Nagai.
26Nagai unga lliꞌñi Maat,
Maat unga lliꞌñi Matatías,
Matatías unga lliꞌñi Semei,
Semei unga lliꞌñi José,
José unga lliꞌñi Judá.
27Judá unga lliñi Joanán,
Joanán unga lliꞌñi Resa,
Resa unga lliꞌñi Zorobabel,
Zorobabel unga lliꞌñi Salatiel,
Salatiel unga lliꞌñi Neri.
28Neri unga lliꞌñi Melqui,
Melqui unga lliꞌñi Adi,
Adi unga lliꞌñi Cosam,
Cosam unga lliꞌñi Elmodam,
Elmodam unga lliꞌñi Er.
29Er unga lliꞌñi Josué,
Josué unga lliꞌñi Eliezer,
Eliezer unga lliꞌñi Jorim,
Jorim unga lliꞌñi Matat.
30Matat unga lliꞌñi Leví,
Leví unga lliꞌñi Simeón,
Simeón unga lliꞌñi Judá,
Judá unga lliꞌñi José,
José unga lliꞌñi Jonán,
Jonán unga lliꞌñi Eliaquim,
31Eliaquim unga lliꞌñi Melea,
Melea unga lliꞌñi Mainán,
Mainán unga lliꞌñi Matata,
Matata unga lliꞌñi Natán,
32Natán unga lliꞌñi David,
David unga lliꞌñi Isaí,
Isaí unga lliꞌñi Obed,
Obed unga lliꞌñi Booz,
Booz unga lliꞌñi Salmón,
Salmón unga lliñi Naasón,
33Naasón unga lliꞌñi Aminadab,
Aminadab unga lliꞌñi Aram,
Aram unga lliꞌñi Esrom,
Esrom unga lliꞌñi Fares,
Fares unga lliꞌñi Judá,
34Judá unga lliꞌñi Jacob,
Jacob unga lliꞌñi Isaac,
Isaac unga lliꞌñi Abraham,
Abraham unga lliꞌñi Taré,
Taré unga lliꞌñi Nacor,
35Nacor unga lliꞌñi Serug,
Serug unga lliꞌñi Ragau,
Ragau unga lliꞌñi Peleg,
Peleg unga lliꞌñi Heber,
Heber unga lliꞌñi Sala,
36Sala unga lliꞌñi Cainán,
Cainán unga lliꞌñi Arfaxad,
Arfaxad unga lliꞌñi Sem,
Sem unga lliꞌñi Noé,
Noé unga lliꞌñi Lamec,
37Lamec unga lliꞌñi Matusalén,
Matusalén unga lliꞌñi Enoc,
Enoc unga lliꞌñi Jared,
Jared unga lliꞌñi Mahalaleel,
Mahalaleel unga lliꞌñi Cainán,
38Cainán unga lliꞌñi Enós,
Enós unga lliꞌñi Set,
Set unga lliꞌñi Adán,
Adán unga lliꞌñi Diose.
Цяпер абрана:
San Lucas 3: zpl
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2010, Wycliffe Bible Translators, Inc. All rights reserved.