Waannisa 12
12
Yesuusana shitto tizheez asito
(Mat. 26:6-13; Mar. 14:3-9)
1Paaziqa bonchchiza gallasipp usuppun gallas tiinattii, Yesuusa yhayiqopp dentheez Alaazare yezi heera, Bitaana qiteeza. 2Ye aqayid unttii ees kaho giigiseeza. Alaazare Yesuusar wollal munttal betteezin Martta unttan mokkiza. 3Mayrama narddoosa giz gaame al7o geesh shitto ki7i Yesuusa toka tizheeza. Fa binnannayir e toka ucceeza; keetha ubbay shitto sawor tonkki geeza.
4Zin Yesuusa tamaaritaypp pettay, Yesuusa aathii inggoday, Asiqoroto Yihuda, 5«Abis yha shittay hayidzii xeet dinnare bayizinttii, miishay manqqitayis ingginttoosa?» yeegeeza. 6(E kayzo maaqqeez gishos yeya geezapp attin manqqitayis qadhinttii geekkaya. E miishe quribo aykkiza maaqqeez gishos ubba wode ezaypp paas ekkiza.)
7Yesuusa, «Iza paas yeza baz ta moogo gallasis minjjeez gishos izo ashii ashshoytta. 8Manqqitay ubba wode yinttar yezoda, zin taanii ubba wode yinttar yezaamii» yeegeeza.
9Ye wode gaame asay Yesuusa Bitaana yezana si7ii gede yhanigeeza. Unttii Yesuusa aadda baazin E yhayiqopp dentheez Alaazarakka be7adayis yhanigeeza. 10Yeyi gishos, qeese halaqitay Alaazarakka ma wodhodayis tobbeeza. 11Abis giiko, Alaazara baggar gaame Ayihuditay unttan ixxii Yesuusana ammaniza.
Yesuusa bonchchor Yerusalaame geleeza
(Mat. 21:1-11; Mar. 11:1-11; Luq. 19:28-40)
12Wonttitha gallas Paaziqa bonchchiza aqo ye7eez woya Yesuusa Yerusalaame yhanigiza si7ii, 13Zambba haye ekkii eza mokkodayis kezeeza. Fa qaala dhoqqi udii,
«Hosaana! Xoossay galatintto!
Goday sunthar yi7izay anjjintto!
Xoossa Isreele Kaattay anjjintto!»
yeegeeza.
14-15Geeshsha Maxaafayid,
«Xiyone katamas, yashittippe!
Yeezako, ne Kaatay hare na7al afa bettii yi7iza»
giinttintteezay garkk Yesuusa hare na7a dengii eza toggeeza.
16Yesuusa tamaaritay yeya tiin akaakekaya. Zin Yesuusa bonchchinttezaypp guye unttii yeya ubba akaakeeza. Yeyi ubbay geeshsha Maxaafay geezay gark haneeza.
17Yesuusa Alaazara duufoppi xeegii, yhayiqoppi dentheez wode ezar yez gaame asay Yesuusa oosa markkatteeza. 18Gaame asay eza mokkodayis kezeezay, E ye mallita ootheezana si7eez gishshosii. 19Yey gishos, Ferisaawe asay pettay peetayiko, «Nu abkka oothodayis danda7ooza bo7oytta; woya ubbay eza kaalliza» yeegeeza.
20Paaziqa bonchchiza gallas goynnodayis Yerusalaame yhanigeezitay gancce pettii pettii Girike asay yeza. 21Unttii Galila biitta Beetesayda katamapi ye7eez Filphoosakko yhanigii, «Godayyo, nuunii Yesuusa be7adayis koyiza» yeegii woosseeza. 22Filphoosa yhanigii Indiraases odin nam7itay yhanigii, Yesuusas odeeza.
23Yesuusa unttiko, «Asi Na7ay, bonchchinttiza wode helleeza. 24Taanii yinttis turo odiza; pettii gistte aafe biitta gancce wodhdhii wooqqekka attiko fa aaddas attiza. Zin ye gistte aafay wooqqiko gaame aafe aafiza. 25Fa shemppo qadhdhiza oonkka dhabisiza; fa shemppo yha alamayid ixxiza oonkka medhinas de7os nagisiza. 26Taanii yeza aqo taar yezod garkk taasi oothodayis koyiz oonkka tana kaallodayis beeziza. Taas oothiza oonakka ta Aday bonchchoda.
Yesuusa fa yhayiqo bagga tiinatii odeeza
27«Yhatti ta shemppay gaame un77initeeza; yeezin waago? ‹Ta Adayyo, tana yha saataypp ashshooyee› yeego? Wa77a, taanii ye7eezay meto ekkodayisii. 28Ta Adayyo, ne suntha bonchchoba» yeegeeza.
Yeypp guye salopp, «Taanii ta suntha bonchcheeza; gujjika bonchchoda» yeegizi qaala ye7eeza.
29Ye aqayid eqqeez gaame asay ye qaala si7ii, «Yeyi dada» yeegeeza.
Yhankkitay ma, «Kiitanchchay eesi odeeza» yeegeeza.
30Yesuusa mahii unttiko, «Yha qaalay yi gishos ye7eezaypp attin ta gishos baaya. 31Yha alamay pirddinttiza woday yhatte; yha alama aqisizana yhatti bale oloda. 32Ma taanii sa7app dhoqqi geez wode asi ubba taako ko7oda» yeegeeza. 33E yeya geezay ab garkk yhayiqo yhayqqodazako unttis erisodayisii.
34Gaame asay mahii, «Nu higgay Kiristtoosa medhinas yezana odiza. Yeezin, neenii waagii, As Na7ay dhoqi goddayis beeziza gee? E, As Na7ay oonoo?» yeegeeza.
35Yesuusa, «Poo7ay yinttar xiqqa wode gam7oda. Yinttis dhumaam garkk poo7o yezin, poo7ayir yedhdhoytta. Dhumar yedhdhiz as ana yhanigizako erooya. 36Poo7o na7ita maaqqad garkk poo7o yezin poo7ana ammanoytta» yeegeeza. Yesuusa yeya odeezayp guye yhanggii unttapp geemmeeza.
Ayihuditay ammanekaya
37E yey garkk mallita u tiinayid oothinkka ammanekkaya. 38Nabe Isayaasa,
«Godayyo, nu markketithi oonii ammaneennee?
Goday wolqqay oossi beentteennee?»
Geezay tuma maaqqaday garkk unttii eza ammanekkaya.
39-40Maakka Isayaasa,
«U aafay be7aam garkk,
u wozinay akaakam garkk,
unttii Xoossiko maaqqin, E unttan pathaamay garkk,
Xoossay u aafa too7iseeza.
U wozina miintheeza»
geez gishos unttii ammanodayis danda7ekkaya.
41Isayaasa yeya geezay, Yesuusa bonchcho be7eez gishonnee ebaz odeeza.
42Maaqqikokka, Ayihuditay halaqitayppekka gaamitay Yesuusana ammaneeza. Zin Ferisaawe asitay fana Ayihuditay Woosa keethap kessiza gi yashitteez gishos ammaneez gi geesha markkattekkaya. 43Yeya unttii ootheezay, Xoossar erinttodaypp aathii asar erinttodana doseez gishshosi.
44Yesuusa fa qaala dhoqi uddii, «Tana ammaniza oonkka tana azazeezanakka ammaneezaypp attin tana aadda ammanooya. 45Tana bi7iza oonkka tana azazeezanakka bi7iza. 46Tana ammaniza ubbay dhuma gancce yezaam garkk poo7o maaqqii alame taanii ye7eeza. 47Ta qaala si7ii kiitinttoowa oonakka taanii pirddaamii. Abis giiko, taanii alame ashshodayis ye7eezaypp attin pirddodayis ye7ekkaya. 48Tana ixxizannee ta qaala ekkowa oonakka pirddizay yeza. Taanii odeez qaalay wurssith gallas ye atha pirddoda. 49Abis giiko, taanii yeya taapp odekkaya, zin tana kiitteez ta Aday taanii ab godazakonne ab ododazako azazeeza. 50Ma e kiitay medhinas de7o maaqqizana taanii eriza. Yeyi gishos, taanii odizay ta Aday tana odoba geezana» yeegeeza.
Цяпер абрана:
Waannisa 12: MeloNTL
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The Word for the World Ethiopia