युहन्ना 2
2
गलील जीलान काना मां ईयाव
1पछेन तीसरे दाहड़े#2:1 दिन गलील जीलान काना सहर मां ईयाव हतलु। ने ईसुन माय बी चां हतली 2चां ईयाव मां ईसु ने तेरा चेला काजे बी नेवता आपीन बुलाय रवला। 3जत्यार चां अंगुरेन रस सर गुयु, ती ईसुन माय ईसुक कय, “हींद्रे धड़े ते अंगुरेन रस सर गुयु।”
4ईसु हेरी माय काजे कह्यु, “तु मेसे असी काहा कय रय? मारे साते तारो काय काम छे? हय मारी टेम नी आय रय।”
5ईसुन माय पावर्या काजे कय, “हीयु तुहुंक जु काय कहं चत करजु।”
6चां दगड़ान छव बेसका-मटा गुळा मेल्ला हतला, हीनु गुळाम सी पाणी हेड़ीन यहुदी माणसे चुखा हवणे करीन हात-पाय धुवतेला। हीनु गुळाम सोवेक लीटर पाणी समायतेलो। 7ईसु चां वाळा पावर्याक कह्यु, “गुळा मां पाणी भर देवु” ने चे पावर्या ईसुन वात मानीन उगेळतो पाणी भर देदा। 8तत्यार ईसु तीनुक कह्यु, “हय ईतरोक पाणी नीकाळीन वारत्यान धड़े ली जावु।” चे पावर्या च पाणी नीकाळीन वारत्यान्चां ली गुया। 9तत्यार वारती च पाणी चाख्यु अंगुरेन रस बण गुयो ने तीनाक नी मालुम हतलो की अंगुरेन रस कां सी लावला। बाकुन#2:9 परन्तु तीनु पावर्याक मालुम हतलो की कां सी लावला ती आरत्यु दुल्लाक बुलायन तीनाक कह्यु। 10“कुय बी माणुस पेहली बार वारलु अंगुरेन रस आपे ने तत्यार माणसे पीन आफरी जाय तत्यार हळकु अंगुरेन रस आपे; बाकुन तु ते वारलु अंगुरेन रस हय लग मेल रवलु।”
11ईसु गलीलेन काना सहर मां पेहली कावा वारु कामेन सहलाणी देखाड़ीन आपसुत सेक-सींगार देखाड़्यु। ने ज देखीन ईसुन चेला ईसु पर भुरसु कर्या।
12हेरे पछेन ईसु ने हेरी माय ने हेरु भाय ने हेरा चेला कफरनहुम सहर मां गुया ने चां थुड़ाक दाहड़ा रया।
ईसु मंदीर मां सी लेण देण करन्याक बाहार नीकाळे
(मत्ती 21:12,13; मरकुस 11:15-17; लुका 19:45,46)
13यहुदी माणसेन फसह तीहवार सातेत आय रवलु। तेरेमां ईसु यरुसलेम सहर मां जाती रयु। 14चां ईसु मंदीर मां देख्यु की माणसे बेल गाडरा ने पेरवा वेचतेला देख्यु ने चां लेण देण वाळा वेपारी आटे-साटे करन्या बठ रवला देख्यु। 15तेरेमां ईसु रासेन सपाटु बणायन आखा गाडरा ने बेल काजे मंदीर मां सी नीकाळ देदु ने लेण-देण करने वाळान पयस्या खडळी देदु ने ठेला गाडी काजे उन्धलाय देदु। 16पेरवा वेचण्या काजे कह्यु, “ज आखो जां सी छेटा ली जावु। मारा बासेन#2:16 पिता घर काजे वेपारीन घर मां बणावु।” 17ईसुन वात सामळीन ईसुन चेला काजे खरला-सास्तुर मां लिखली वात हेर आय गुय, “तारा घरेन धुन मां मेसेक आकठान तसी धपाड़ देसे।”
18ईसुन वात सामळीन यहुदी माणसे ईसु काजे कह्या, “तु जो काय करने बाजी रयु? कदी भगवान तुसेक जो करनेन हक आपलु हय ती, ईनी वातेन पुरावु देणे करीन, हामुक चकराड़े असी एक वारु-कामेन सहलाणी देखाड़।”
19ईसु तीनुक जपाप आप्यु, “कदी तुहुं भगवानेन हीना मंदीर काजे उदार नाखसु, ती मे हीनाक अळी तीन दाहड़ाम पछु बणाय दीस।”
20जो सामळीन यहुदी माणसे ईसु काजे कह्या, “भगवान हीना मंदीर काजे बणावणे मां चालीस ने छव साल लागला, ती हय तु हीनाक तीन दाहड़ा मां बणाय देसी काय!”
21बाकुन ईसु आपसा डीलेन मंदीरेन बारामां बताड़लु। 22जत्यार ईसु जत्यार मर्या-सर्याम सी जी उठ्यु, ती ईसुन चेला काजे ईसुन साहरे मंदीरेक उदारनेन ने पछु उबु करनेन बारामां कह्ली वात हेर आय, ने चेला खरला-सास्तुरेन वात पर ने ईसुन कवली वात पर भुरसु कर्या।
ईसु माणसेन मन काजे जाणे
23पासका तीहवारेन दाहड़ा, मां, ईसु यरुसलेम सहर मां हतलु। तत्यार बेसका माणसे तेरा करला वारु कामेन सहलाणी देखीन ईसु पर भुरसु कर्या। 24बाकुन ईसु हीनु काजे तींद्रा भुरसा पर नी छुड़्यु, काहाकी#2:24 क्योंकि हयु आखा माणसे काजे जाणतेलु। 25ने हीनाक जरुवत नी हतली, की माणसेन बारामां काहींग गवा पुरावु देय, काहाकी हयु आपसुत जाणतेलु की माणसेन मन मां काय छे?
Цяпер абрана:
युहन्ना 2: NTBSP23
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.