Luk 23
23
Jisɔs ɛkparoisɔ a Pailait
(Mat 27:1-2,11-14; Mak 15:1-5; Jɔn 18:28-38)
1Kadi abɛ fɛb ra ɛtɔ rɛkɨm wa tɨmɔnɛ mɨnɛ wa timɔ Jisɔs wa dulɔ ɛkpa Pailait. 2Mɨnɛ wa bɨnɛ wa kana Pailait ikani ɛja ibɛ abaŋa Jisɔs na, “Re ruŋini rɛ gbɛra na odumini nwu ɔkɔga obia birɛ, ɔkani na ani wa nikpɛ ntubatuba gɔmɛn wanyɛ ɔkɨm a Rom. Mɨnɛ na amɔmɔ ɔra Kɨraist ɔkɨm.”
3Rɛfɔ adifɛ, Pailait ɔbɨbɔ Jisɔs na, “Awu mɔ ara ɔkɨm a Ju-ɛ?” Ofini na, “Ɛra kɛmanchi alamɔ.” 4Kadi Pailait ɔkani ɔkɨm asia kɔya akɨla rɛkau na, “Ami mbi chɛ kebia tum chinɛ ra odumini nwu.”
5Gbɔ abɛ wa bi yilɛ, wa lama na, “Ɛkɔgɛkɔgɛ a Jisɔs ɛwɔ ra ratag esii, nda rabo binɛ kɛfɨrɔ ka Judia. Ɔbɨnɛ ra Galili kpat ta ɔjag nfa mɨnɛ.”
Jisɔs ɛkparoisɔ a ɔkɨm Ɛrɔd
6Ndi Pailait odimɔ birɛ mbi fɛb, ɔbɨbɔ na, “Odumini nwu onia Galili-ɛ?” 7Ndi Pailait odimɔ na Jisɔs osi sad kɛkpɛna nchi ɔkɨm Ɛrɔd ɔfɔnɔ nsɨm, otigɛ mɔ ɔnyɛ Ɛrɔd, kum Ɛrɔd ɔra ra Jɛrusɛlɛm kɛgbɔ achifɛ. 8Ndi Ɛrɔd ɔchɛ Jisɔs, etimɔ ɛdɔmɛ ebiebi, kum ɔra obuma ra ɔfɨrɛtɨma kɛgbɔ ɔchɛ mɔ. Ra birɛ esii mbi odimɔ ɔbaŋa mɔ, ɔfɔnɔ kerigɛjɛnɔ na kɨn ɔchɛ mɔ osi birɛ kɛbɛkpa. 9Ɛrɔd ɔbɨbɔ mɔ rabɨb esii, gbɔ Jisɔs obi fini tum dinɛ. 10Ɔkɨm asia kɔya arigɛ Akɔga Ibina wa barɔ afɛ mɨnɛ wa kugakuga wa nyɛga Jisɔs. 11Kadi Ɛrɔd akɨla arɨŋa reku abɛn wa ta wa yɔga mɨnɛ wa sima Jisɔs. Wa rɔmɔ ɔkɨmkɨm ɛbɔwɛ, kadi wa mulɛnɛ wa tigɛ mɔ ɛkpa Pailait. 12Reyi adifɛ, ɛchɛmɔ a Ɛrɔd ra Pailait ɛbɨnɛ ɛkɨla, kum wara ra njɨŋ egbonyi.
Wa kɨbi kɛlam na wa wulɔ Jisɔs
(Mat 27:15-26; Mak 15:6-15; Jɔn 18:39-19:16)
13Pailait otugɛlɛ akɨm asia kɔya, aniretu kɛfɨrɔ, arigɛ ani adudu, 14ɔkani bɛ na, “Ri timɔ odumini nwu ri wa nyi mɛ, mɨnɛ ri lamɔ na ɔtɨna ani wa si ratag. Ri dimɔ, mbɨbɔ mɔ rabɨb ɛkparoisɔ ewun, gbɔ mbi chɛ kebia tum chinɛ nchi osii. 15Tum Ɛrɔd obichɛ kebia tum chinɛ ra mɔ, afɛ dɛ omulɛnɛ otigɛ mɔ ɔnyɛ mɛ. Odumini nwu obi sii mbum tum bunɛ mbu nla ɔba. 16Rɛfɔ ndifa, ami kɨn nyɛ mɔ esinisini kadi nlɔ mɔ odulɔ.” 17Kum ɛlɔmɛnyɛ na Pailait ɔnyɛ bɛ oni wunɛ nwu ɔra ra ɛtɔa jɔu ra kɛgbɔ kɛtɔmɔ.#23:17 Rachɛrɛ radudu ra kɨla nfa kɛlam nchi kɛra irigɔ ra Mat 27:15 akɨla Mak 15:6 18Gbɔ rɛkau ndɨmdɨm re kugɔ na, “Timɔ odumini nwu jagɔ nfa ka wu mɔ! Gbɔ tibɔ ra Barabas nyɛ wul.” 19(Wa rɔ Barabas ra ɛtɔa jɔu rɛfɔ kɛrɨŋ, nchi osii ani wa rɨŋɔ ra Jɛrusɛlɛm akɨla oni nwu owulɔ.) 20Kum Pailait ɔra obuma ɔtaa Jisɔs otibɔ, ɔdɛŋa bɛ ɔkɨla. 21Gbɔ wa kuga wa kɨlakɨla na, “Mɨrɔ mɔ! Mɨrɔ mɔ!” 22Ra ɛgbɔ ɛtal, Pailait ɔkani ɔkɨla, na, “Gbɔ ma kebia chɛ amɔ osii? Mbi chɛ kebia tum chinɛ nchi osii, nchi ɛlɔmɛnyɛ na ɔba! Ami kɨn du mɔ, ntɛ mɔ ibɔ odulɔ.” 23Gbɔ ra akɨmkɨm ramu, wa kugɔ na mɨrɔ mɔ, mɨnɛ ra itɨm, ramu rabɛ ra kema. 24Rɛfɔ adifɛ, Pailait osi etimɔ ɛyɛn osi ɔnyɛ bɛ kɛmanchi wa bɨbɔ. 25Ɔta Barabas nwu wa finɔ ra ɛtɔa jɔu, rɛfɔ kɛrɨŋ akɨla ndi owulɔ oni, nwu rɛkau redugɔ, mɨnɛ okomi Jisɔs ɔnyɛ bɛ wa si ra mɔ kɛmanchi ɛda bɛ.
Ɛmɨrɛlɛ a Jisɔs ra keti-rɔbɔ
(Mat 27:31-44; Mak 15:21-32; Jɔn 19:17-27)
26Ndi wa tima Jisɔs waya, arɨŋa reku wa lawa odumini a Sairin wunɛ nwu wa yinɔ Saimɔn. Osi kɛkɔ ɔnɔla kɛfɨrɔ, wa tura mɔ keti-rɔbɔ nchɛn, ɔchɛŋɛ ɔtɔrɛ Jisɔs ekpirɨmɔ. 27Rɛkau ra ani esii rɛtɔra Jisɔs. Awani esii ra kɛdɔŋ rɛkau adifɛ wa sua rɛfɔ ra Jisɔs. 28Jisɔs ɔfagɛlɛ ɔkani bɛ na, “Awania Jɛrusɛlɛm, rika sɔ rɛfɔ rɛdɨm; risɔ ri nyɛ ikpaju iwun arigɛ bɔnawun. 29Kum kɛgbɔ kɛtawɔ nchi ri nɨŋɔ kani na, ‘Ɛmɔlɛmɔlɛ ɛfɔnɔ awani mba mbɔn wa bi malɔ, itɔ ɔmaa nyi rasɔ ibi yimɔ, arigɛ raba nda mbɔn wa bi ŋɔ!’ 30Kɛgbɔ achi,
“Ani kɨn wa kani okul na, ‘To wul!’
Mɨnɛ kɨn wa kani oguŋuŋ na, ‘Kɨbe wul!’
31Kum abɔ kɨn wa si obia birɛ mbi wanyɛ keti nchi kɛra kebin, etuma nnan keti kɛbɔ ba?” 32Wa timɔ asia obia afaa wa ka mɨr mɔ mɨnɛ. 33Wa kɨlɔ jag kumka wa yina “Kɛkpaga Retu#23:33 Kɛkpaga Retu Nfa ridɨnɔ kekul nchi ke bini kɛkpaga retu ka oni, kekul nchi ɔkpaga ratu wɔ ra kikɛ,” afɛ dɛ wa mɨrɔ Jisɔs ra keti-rɔbɔ, matiii ma asia obia aba. Wunɛ kɔbɔ kodumɔ ra keti-rɔbɔ, nwuka mɨnɛ kɔbɔ kofid ra keti-rɔbɔ. 34Jisɔs ɔlamɔ na, “Mitɛ, fɔrɛ bɛ, kum wa bi gbɛra bumbu wa sia.” Mɨnɛ wa tu mkpoŋa #23:34 mkpoŋa Nfa kɛma nchi wayo sia wa fɔnɔ oni nwu otima mbum ra kɛdɔŋ ka ani esii. Titi abɔ bumbɛn wobi yawɔ. Ani adudu wa yɨba bɔn-tita, adudu omuu rafɛn, omuu igu, adudu wa yɨba agbuga wa nemi ibɔwɛ a Jisɔs. 35Ani wa barɔ afɛ wa chia, gbɔ aniretu wa yɔga Jisɔs, wa lama na, “Ɔnani ani; lɔɔ mɔ ɔnani ɛkpaju ɛyɛn, abɔ amɔmɔ ɔra Kɨraist nwu Ɛbɨrɔkpabi ɛraŋɔraŋ.” 36Ajuaraku mɨnɛ wawa yɔg Jisɔs. Wanyɛ mɔ kefuŋɔ matug, 37wa lamɔ na, “Abɔ awu ara Ɔkɨm a Ju, nani ɛkpaju eyi.” 38Wa tɨla rachɛrɛ wa ka lagɛ ra keti-rɔbɔ na, “Nfa Ɔkɨm a Ju.” 39Osia obia wunɛ nwu wa mɨrɔ kɛdɔŋ ra mɔ ɔta obuma osi kebinɛ ridɨnɔ ra Jisɔs na, “Awu Kɨraist kikɛ-ɛ? Nani ɛkpaju eyi ra awul kɛdɔŋ!” 40Gbɔ osia obia nwuka ɔtɛmakɛsɨb ɔnyɛ ɔchɛmɔ nwuka na, “Ɛrau ɛra sia wu ra Ɛbɨrɔkpabi-ɛ? Tum ndi wa kɨbi kɛlam wanye wul kɛma kɛchɛn-ɛ? 41Wanye wul esinisini irigirigɔ kɛmanchi obia obul wɔra, gbɔ odumini nwu obi sii kebia tum chinɛ kum ɔwanɛwanɛ.” 42Kadi ɔkani Jisɔs na, “ƆKƆKƆ, tilɛnɛ ami abɔ nɔ rɛkɨm redi.” 43Jisɔs ofini mɔ na, “Nkani wu raikpɛ, ɛdɛndifa, kɨn anɔlɔ Paradais#23:43 paradais Kumka awanɛwanɛ ani Ɛbɨrɔkpabi mba wabɔ ba wara, irigirigɔ ra kɛfɨrɔ ka Ɛbɨrɔkpabi, kumka etuma. rami.”
Rɔbɔ ra Jisɔs
(Mat 27:45-56; Mak 15:33-41; Jɔn 19:28-30)
44Ndi ɛjagɔ igbaŋ juu ra ifaa (12) nyi kefin, kɛrɨrɔ kɛ kɨbɛ kɛkpɛna kɛfɨrɔ achi ndɨmdɨm tata ɛjagɔ igbaŋ ital nyi kefin; 45kum royi rɔfuɛnɛ elumɛlɛ. Mɨnɛ ikpege nfi wa kɨbɛ ra Ɛtɔa Ɛbɨrɔkpabi isari nɛ matii nkum kafaa. 46Jisɔs okugɔ ra ɔkɨmkɨm remu na, “Mitɛ, nkomi roifɛ rodum nrɔ ra ibɔ iyi.” Ndi Jisɔs ɔkɨlɔ lam ɛdɔnyi, ɔba. 47Ndi oniretu ajuaraku ɔchɛ bumbu wɔ jagɔ, ɔkalɔ Ɛbɨrɔkpabi, mɨnɛ ɔlamɔ na, “Raikpɛ raikpɛ, odumini nwu ɔwanɛwanɛ.” 48Ndi ani fɛb mba wa tugɛlɛnɛ wa chɛ bumbu wɔ jagɔ, wa kɨlɛ wa lɨba ibɔ ra ngaŋ. 49Gbɔ ani fɛb mba wa gbɛra Jisɔs, kɛdɔŋ ra awani mba wa tɔrɛ mɔ bɨnɛ ra Galili wawɔ, wa barɔ ɔfɨrɛtɨma, wa chia birɛ mbi wɛra wɛ jaga.
Ɛfɨlɛfɨlɛ a Jisɔs
(Mat 27:57-61; Mak 15:42-47; Jɔn 19:38-42)
50Gbɔ ɛfɔnɔ wunɛ nwu wa yinɔ ridɨnɔ na Josɛf, ɔra Bɨrika oni, ɔwanɛwanɛ, mɨnɛ ɔra ra kɛdɔŋ ka akɨm a Jus, 51obi yilɛ ra obia nkatir akɔratu a Ju mbaka. Osi kɛfɨrɔ ka Arimatia rikalɔ ra Judia, mɨnɛ ɔra odimana rɛkɨm ra Ɛbɨrɔkpabi rɛwɔ. 52Odulɔ ɛkpa Pailait ɔka bɨb ɔbaŋa keburɛ ka ɛkpaju a Jisɔs. 53Kadi otimɔ chɛ ɔrɛ ra keti-rɔbɔ, ɔfɨlɔ chɛ ra ɛbɔwɛ nyi emuŋamuŋa mɨnɛ ɔka fɨlɛ chɛ ra kɔba nku wa tɔɔ ra ibugɔta, nku wa bɨri fɨlɛfɨlɛ oni kpa. 54Ɛra reyi ndi ani wa mɔlanɛ ikpa Reyi Kɛfuɛkpa. 55Awani mba wa tɔrɛ Jisɔs bɨnɛ Galili wa wɔ, wa tɔrɛ Josɛf mɨnɛ wa chɛ kɔba nkɛn arigɛ kɛmanchi wa fɨlɛ keburɛ ka ɛkpaju ɛyɛn. 56Kadi wa kɨlɛ, wa ka mɔlɛ isɔ arigɛ manɔ mma ma dɔmɛ kɛnyam. Gbɔ wa fuɛnɛ ikpa Reyi Kɛfuɛkpa kɛmanchi Ibina ikani.
Цяпер абрана:
Luk 23: Olulumo-Ikom
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©️2024 Luke Initiative for Scripture Translation