यूहन्ना 3
3
ईशु ते निकुदेमुस
1फरीसिया महु निकुदेमुस नांवा चे हेक बन्दे हुते जको यहूदिया चा सरदार हुता। 2ओणे राती नु ईशु कनु आती केहले, “हे रब्बी, अम्ही जाणु कि तु गुरु छी ते नरीकार ची ओर कनु आला। कांकि इसड़े अचम्भे चे काम जको तु करी याहनु नरीकारा ची सहायता चे बिना कुई वी ना कर सग़ी।”
3ईशु ने ओनु उत्तर ङिला, “मैं तनु सच्च-सच्च किहे पला, अगर कुई नवें सिरे कनु ना जमही तां नरीकारा चा राज़ ङेख ना सग़ी।”
4निकुदेमुस ने ईशु कनु पूछले, “बन्दे जिसे बेले ब़ुढे हुती जाये, ते दुबारा जनम किवें गे सग़े? का ऊं आपणी आई चे ढिड्डा मां दुबारा जती कर जनम गे सग़े?”
5ईशु ने उत्तर ङिला, “मैं तम्हानु सच्च-सच्च किहे पला, जब तक कुई इन्सान जल ते आत्मा लारे ना जमही तां ऊं नरीकारा चे राज़ मां जा ना सग़ी। 6कांकि जको शरीरा लारे जमले, ऊं शरीर छै, ते जको आत्मा लारे जमले ऊं आत्मा छै। 7अचम्भा ना कर कि मैं तनु केहले, ‘तनु नवें सिरे कनु जनम गेहणा जरुरी छै।’ 8हवा जिठे चाहवे ऊंगी चले। ते तु विची अवाज सुणी, पर ना जाणी कि वा किठु आवे ते किंघा नु जाये। जको कुई आत्मा लारे जमले ऊं इसड़े छै।”
9निकुदेमुस ने ईशु कनु पूछले, “हा बात किवें हो सग़े?”
10ईं सुणती कर ईशु ने ओनु केहले, “तु इस्राएलीया चा गुरु हुती कर, यां बाता नु कां ना समझी? 11मैं तनु सच्च-सच्च किहे, कि जको अम्ही जाणु ऊंही किहुं, ते जानु अम्ही ङेखले ओची ग़वाही ङिऊं, ते तम्ही अम्ची ग़वाही ना मना। 12जिसे बेले मैं तम्हानु धरती चीया बाता बावड़लीया ते तम्ही विश्वास कोनी करला, तां अगर मैं तम्हानु स्वर्ग़ा चीया बाता किहे तां बल्ति तम्ही किवें विश्वास करा? 13मैं इन्साना चा पूत जको स्वर्ग़ा कनु उतरला मनु छोड़ती कर कुई वी स्वर्ग़ा मां कङी वी कोनी गेले।
14“जिंवे मूसा ने जंगला मां नाग़ा नु ऊंचे उपर चढ़ाले, ओही रीति लारे, मैं इन्सान चा पूत, वी ऊंचे उपर चढ़ाला जई, 15ताकि जको कुई माये उपर विश्वास करी ओनु अनन्त जीवन मिली।”
16कांकि नरीकारा ने संसारा लारे इसड़ा प्रेम राखला कि ओणे आपणा हिकड़ाता चा पूत ङिती ङिला, कि जको कुई ओचे उपर विश्वास करे ऊं नाश ना हो पर अनन्त जीवन गिहो। 17नरीकारा ने आपणे पूता नु संसारा मां ऐवास्ते कोनी भेज़ले कि संसारा उपर ङण्ड ची आज्ञा ङियो, पर ऐवास्ते कि संसार ओचे जरिये उद्धार गिहो।
18जको कुई ओचे उपर विश्वास करे ओचे उपर ङण्ड ची आज्ञा नी हुवी, पर जको ओचे उपर विश्वास ना करी ओह दोषी हुती गेला, ऐवास्ते कि ओणे नरीकारा चे हिकड़ाते पूता चे नांवा उपर विश्वास कोनी करला। 19ते ङण्ड ची आज्ञा ची वजह हा छै कि सोज़ले संसारा मां आले, ते बन्दा ने अन्धारे नु सोज़ले कनु ज्यादा प्यारे जाणले कांकि वांचे काम बुरे हुते। 20कांकि जको कुई बुराई करे ऊं सोज़ले लारे बैर करे, ते सोज़ले चे गोढु ना आवी इसड़े ना हो कि वांचे काम उजागर ना हुती जाओ। 21पर जको सच्चाई उपर टुरे ऊं सोज़ले चे गोढु आवे, ताकि ओचे काम उजागर हो कि ओचे कर्म नरीकार ची नजरी मां करले गेले।
ईशु चे बारे मां यूहन्ना ची ग़वाही
22ऐचे बाद, ईशु ते ओचे चैले यरुशलेम कनु यहूदिया देश मां आले, ते ओ उठे वांचे लारे रेहती कर बपतिस्मा ङिऊं लाग़ला। 23ते यूहन्ना वी शालेम चे गोढु एनोन मां बपतिस्मा ङिता, कांकि उठे घणे सारे पाणी हुते, ते लौक आती कर बपतिस्मा गेहते। 24#मत्ती 14:3; मरकु 6:17; लूक 3:19,20कांकि यूहन्ना ओह समय तक कैदखाने मां कोनी नाखला गेलता।
25उठे यूहन्ना चे कोच्छ चैला ची शोद्ध हुवणे ची परम्परा चे बारे मां यहूदी लारे बहस-बाजी हुली। 26ते वाणे यूहन्ना चे गोढु आती कर केहले, “हे रब्बी, जको शक्स यरदन नदी चे पार दुधे लारे हुता ते जाई तु ग़वाही ङिली, ङेख, ओह बपतिस्मा ङिये, ते सारी बन्दी ओचे गोढु आवी।”
27यूहन्ना ने उत्तर ङिला, “जब तक बन्दे नु स्वर्ग़ा कनु ना ङिले जई, तब तक ओह कहीं ना गे सग़ी। 28#यूह 1:20तम्ही तां आप ही माये ग़वाह छिवा कि मैं केहले, ‘मैं मसीह कोनी पर ओचे पेहले भेज़ला गेला।’ 29जाई बीन्दणी छै ओही बीन्द छै। पर बीन्दा चा मित्र जको भिला रेहती ओची सुणे, बीन्दा चीया बाता लारे ब़ोहत ही खौश हुवे। हमा हा माई खुशी पुरी हुली। 30जरुरी छै कि ओचे ना बधो ते माये घटो।”
जको उपर कनु आवे
31जको उपर कनु आवे ओह सबकनु उपर छै। जको धरती कनु छै ओ धरती चा छै, ते धरती चा ही बाता करे। जको स्वर्ग़ा कनु आवे ओह सारा कनु उपर छै।
32जको कहीं ओणे ङेखले ते सुणले, ओची ग़वाही ङिये, ते कुई ओची ग़वाही ग्रहण ना करी। 33जेह्णे ओची ग़वाही ग्रहण करती गेली ओणे ये बाते उपर छाप लाली कि नरीकार सच्चा छै। 34कांकि जानु नरीकार ने भेज़ले ओह नरीकारा चीया बाता किहे, कांकि नरीकार आत्मा नापती कर ना ङी। 35#मत्ती 11:27; लूक 10:22ब़ा पूता लारे प्रेम राखे ते ब़ा ने सारीया चीजा पूता चे हाथा मां ङिती ङिलीया। 36जको पूता उपर विश्वास करे अनन्त जीवन ओचा छै, पर जको पूता नु ना मनी ओह जीवन नु नी ङेखी, पर नरीकार चा गुस्सा ओचे उपर रिहे।
Цяпер абрана:
यूहन्ना 3: ODR
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
CC BY-NC-ND 4.0
