TĨĨGI WERE 3
3
À nii je twarn wo go de wãyn ɓil pay ma Eden no
1Cwe hay diŋ này ma de ɗeŋ yoo này ma mbásga wo, maga Manwuri, Baa hay joŋ ra mo ɓuy no. Á raw wii wãyn ga : Mbe nà kidolgi cwãy ga Baa de wããge ga nday mo re leʼge koore ma ɓil payn wo ɓuy wa? 2Wãyn raw wii cwe ga, wùr yaŋ mbe re leʼge koore ma ɓil pay sug nee wo no. 3Ama ti re leʼge koo ma ti gisiɗgi pay sug neen mo kaʼ no, Baa wãã ti sen ga : Nday re ge ne gà nday duʼn gi gà lay. Wur maga nday duʼn we no nday huɗ gi go. 4Doo kay nono cwe raw wii wãyn ga : Nday huɗ gi gà has ɓuy tuu! 5Ama Baa go de koge ga wur maga nday reen we no, nen ɓay day la bul go, nday joŋ ge doo baa wo nono, ma ko de el wo de ɓlagge.
6Wãyn wo koge, koon hay de el ma rege, ndo kon se de woore, day se go pah ma car ɓil wããre lay, á kal brag leʼge ɓe kal rege. War ɓe hay ti jeŋ ɓe ni lay, se hã ne hẽn lay, se kal rege go lay.
7Nen ɓaara kal bulgi go ɓog ɓuy, á raw wo koge ga saara go glog koɗe. Á kal wo yaʼge tan sug sway glog ɓaara de sug koo figiye. 8Doo kay nono, á raw wo laa gẽẽge Manwuri, Baa ɓil pay sug neen de law raŋge caw. Je twarn kal wo daŋge de ɗeere yoŋge doo Manwuri, Baa de wãy ɓe yoo koore ma ɓil pay sug nee wo no. 9Manwuri, Baa kal ɗe je twar no, day wiin ga : Ndo la gene? 10Á kal fer wããre le ga : Ndi laa gẽẽge ɓo le ɓil pay sug nee no, day hẽẽne raw joŋ mege, werga ndi go glog koɗe, doo sen ndi raw yoŋge.
11Manwur wiin ga : Wose wii mo ga ndo go glog koɗ la? Ndo nà de re leʼge koo maga ndi hay maŋ jag ɓo go ti ɓe ga ndo mo reen wa mo yawla? 12Je twarn kal fer wããre ga : Diŋ wãy maga ndo kaŋ me ti jeŋ lam no, ga hã koon me, day ndi kal rege ɓe. 13Doo kay nono, Manwuri, Baa raw wii wãyn ga : Diŋ wer may ga ndo joŋ doo kay no la? Wãyn kal fer wããre ga : Cwe bag bii ɓi day ndi kal rege ɓe.
14Manwuri, Baa raw wii cwe ga :
Patala ndo joŋ doo kay no so lay no,
Ndo joŋ ge go de faɗge yoo horog wo ɓuy,
Yoo nàyre ma mbásga wo ɓuy,
Ndo see ge yaŋ ne ɓiiri ɓo ti.
Day ndo hoɗ ge burgi yaŋ
Hãã go ti caw ɓon ɓuy tum.
15Ndi kaŋ ge hee yaŋ ti holaŋ ɓay de wãy no,
ti holaŋ wer mani ɓon wo de wer mani ɓe no.
Wer mani wãyn mbug gi ti ɓo yaŋ go,
day ndo longn ge yaŋ ti diŋriŋ ɓaale lay.
16Á wii wãyn ga :
Ndi kol ge ɓiili maga ndo farn yaŋ mo pel de gaali debaŋ,
Ndo biŋ gi yaŋ de gaali.
Ɗiggi ɓo joŋ ge de kaŋge go diŋ ti war ɓo,
Ama á wããge wããre ɓo yaŋe.
17Á wii je twarn ga : Doo ga ndo yãã jag wãy ɓo ndo re leʼge koo maga ndi hay go de maŋ jag ɓo ti ɓe so lay no,
Sir daʼ ge faɗge go wer ɓo.
Ndo daʼge rege ma jag ɓon
ti naw maga ndo joŋn ge caw ɓuy tuu diŋ de bone.
18Sir tĩĩ ge le ne ndo diŋ hõõre wo de ɗewseŋ, wo de yoo fíi.
Day ndo re ge fíi ma mbásga wora.
19Diŋ de gibigri ma pel ɓo, ga ndo joŋ ge nen daʼ hoole ma jag ɓo no,
hãã go ti wur maga ndo fer nen sir maga à hay naa mo le go ni mono.
Werga ndo diŋ ɓurgi, day ndo fer ge diŋ nen ɓurgi.
20Je twarn kal kaŋ ɗúu ne wãy ɓen ga Efa. Werga á hay diŋ man jar ma tenen wo ɓuy. 21Manwuri, Baa kal joŋ õõbe hõõge ne Adam wo de wãy ɓe, kal saɗge ɓe ne hara gloge.
22Manwuri, Baa day ga : Patala je táabay kol we go doo te naa no lay so no, go de ko de el wo de ɓlagge, naa joŋ we nen maga á mo coŋ doo brag leʼge koo ma tenenn lay day mo hay tenen caw tum wa so. 23Manwuri, Baa kal niigi ɓe go see pay sug nee ma Eden no, nen maga á mo yaʼ jee sir maga à hay naan le ni mono. 24Blam maga á nii je táabay go nii, Baa kal lag kerubẽẽ wo lag jag pay sug nee ma Eden no, le nen ɓaŋ wer no kay no, de moslam maga go de fliwgi car wùu jag kay ma gor faage koo ma tenen no.
Цяпер абрана:
TĨĨGI WERE 3: TUP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Tupuri Bible © Bible Society of Cameroon, 2016. All rights reserved.