Mattayo 5
5
1Leka pakaweni mapuga, akakweliti ku kidunda: na pakatemi pasi, wakanchilili wanafunsi wake: 2na akadindwili pa ndomo pake nakawayigalisi, kujowa,
3Wakusengwa wakiwa mu roho: pakuya utwa wa kunani uyii wa wombe.
4Wakusengwa wakuniongoneka: pakuya yawanyamasike.
5Wakusengwa wololo: pakuya yawayingile pa ndima lipwela.
6Wakusengwa wakuwona njala ni nywita ya ugolofu: pakuya yawatupile.
7Wakusengwa wakupwelekela lipyana: pakuya yawapwelekeleke lipyana.
8Wakusengwa wawalafu mu mwoyo: pakuya yawambone Mulungu.
9Wakusengwa wakukita kindamba: pakuya yawakemeleke wana wa Mulungu.
10Wakusengwa wala wakahyungiki ndawa ya ugolofu: pakuya utwa wa kunani uyii wa wombe. 11Wakusengwa mwenga pala yawalige, ni kuwahyunga, ni kujowa kiwifu kiyi kyoha pa kudeta ndawa ya nenga. 12Muhekelelaye ni kuyangala; pakuya njombe yinu yikulungu kunani: pakuya wiwila wakawahyungiti wakulweta wala wakayili palongolo pa mwenga.
13Mwenga muyii mwinyu wa ndima: koma mwinyu wona uyii wateke, yaulekeleke mwinyu ni kiki? kitumbulile bahalapala nukulinganila kandu lepa, lema kutagika kunja ni kuliwatika na wandu. 14Mwenga muyii lulangalila lwa ndima. Likaya lyakuwikika panani pa kidunda nakuhotoleka lepa kufihika. 15Nyali kawili wayipamba lepa ni kwiwika pasi pa kikong’ondela, koma pakuwikika pake; ni yiwamulikila woha wakutama mu nyumba. 16Wiwila lulangalila lwinu lumulike palongolo pa wandu, nausi wawone makitiko ginu manofu, ni wankwise Dadi winu uyu ayii kunani.
17Musihola kukita nachiti kuyananga torah pangi wakulweta: nachiti lepa kuyananga koma kumalakisa. 18Pakuya chakaka nijowa kwa mwenga, Mpaka kulutila ngani kunani nu ndima, kalembo kamonga pangi lutafi yalutile ngani lepa pa torah, mpaka pala fyoha yafipate kuya. 19Mumu ayi yoha uyu yawopole luwimbi lumonga lwa isi sichoko‐sichoko, na yayigalise wandu wiwi, yakemeleke nchoko pa utwa wa kunani: koma ayi yoha uyu yakite isi ni kusiyigalisa, yakemeleke nkulungu pa utwa wa kunani. 20Pakuya nijowa kwa mwenga kukita ugolofu winu wona ulemiti kuyoloka kulutila ugolofu wa wakulembela na waFarisayo, nukuyingila lepa mwenga pa utwa wa kunani.
21Mwayufwini kukita kukajowiki kwa wala wa mwandi, Usikoma; na ayi yoha uyu yakome yapelewe mhalo pa chengo: 22koma nenga niwajowela kukita ayi yoha uyu yandadile ndongo mundu yagoheke mhalo pa chengo; na ayi yoha uyu yajowe kwa ndongo mundu Raka, yagoheke mhalo pa chengo kya wakulungu; na ayi yoha uyu yajowe Wamhimu wenga, yagoheke mhalo pa gehena ya mwoto. 23Mumu wona uyii mu kulekela kiyetulo kyako pa mathbahu, leka bahalapala ukumbukila kukita ndongowo ayii ni kindu panani pa wenga, 24uleke baho kiyetulo kyako palongolo pa mathbahu, na ubite utepulane nu ndongowo pakutumbula, na bahalapala uyiche ni kulekela kiyetulo kyako. 25Utepulane ni wakupindika wako nyata, apa uyii nuyombe pa ndila; wakupindika wako asikufumbukisa kwali kwa wakupawula, na wakupawula kwa polisi, na yautumalike pa kukungika. 26Chakaka nikujowela, nukupita lepa bahalapala, mpaka yaulipile ngani senti yakumalakila.
27Mwayufwini kukita kukajowiki, Usikita ukeme: 28koma nenga niwajowela kukita ayi yoha uyu yandolalele ndala kwa kunnyonyela ngani, hino apa amaliti kukita ukeme nako pa mwoyo wake. 29Leka liho lyako lya ndilo wona likukuwasa, ulikolombole, ni kulitaga kuhuma pa wenga: pakuya ikunogela kukita kipingili kyako kimonga kiyanangike, nu mbili wako woha usitagika pa gehena. 30Ni kiwoko kyako kya ndilo wona kikukuwasa, ukidumule, ni kukitaga kuhuma pa wenga: pakuya ikunogela kukita kipingili kyako kimonga kiyanangike, nu mbili wako woha usibita ku gehena. 31Kukajowiki kawili, Ayi yoha uyu yansule mhanu mundu, ampele kalembo ka kulekana: 32koma nenga niwajowela kukita ayi yoha uyu yansule mhanu mundu, lema ndawa ya ukeme, ankita ndala wa ukeme: na ayi yoha uyu yantuwule ndala wakusulika akita ukeme.
33Kawili, mwayufwini kukita kukajowiki na wala wa mwandi, Usilapalakisa, koma ulipaye kwa Bambo ifi ufilapila: 34koma nenga niwajowela kukita Usilapila na pachokope; 35haka kunani, ndawa kitihu kya Mulungu kiyili; haka ndima, ndawa uyii pakuwikila pa njayo syake; haka Yerusalem, ndawa liyii likaya lya Mutwa nkulungu. 36Haka kwa mutu usilapila, ndawa uhotola lepa liyunju limonga kuliwalasa pangi kulipilisa. 37Leka kajoweko kinu kaye Ena, ena; Lepe, lepe: na kakulutila aga kayii kya wakuwipa.
38Mwayufwini kukita kukajowiki, Liho kwa liho, na lino kwa lino: 39koma nenga niwajowela kukita Usikanangana nu mundu mbifu: koma ayi yoha uyu yakutowe lupi pa lujeje lwa ndilo, ung’anamusile lungi kawili. 40Leka mundu wona alonda kukupela mhalo, ni anyaka nguo yako, umpele kawili mwingila wako. 41Leka ayi yoha uyu yakukikise ntambo umonga, ubitaye nako yiwili. 42Umpele yombe wakukuluwa, na kwa yombe wakulonda kukopa kwako, using’anamukila kungi.
43Mwayufwini kukita kukajowiki, Unganaye mwenesi wako, ni kumbipila wa mitumba wako: 44koma nenga niwajowela kukita Muwaganaye wa mitumba winu, na musalaye kwa wala wakuwahyunga mwenga; 45mpate kuya wana wa Dadi winu uyu ayii kunani: pakuya alikwesa lijuwa lyake pa wakuwipa na wanofu, na awatonyosela fula wakukita malinga na wangali kukita malinga. 46Pakuya wona muwagana wala wakuwagana mwenga, muyii ni njombe nyiki? wakuyupa nsongo si wakita wiwila ati? 47Leka wona muwalamukila walongo winu wakape, mukita kiki kyakulutila? wa Mihuku si wakita wiwila ati? 48Mumu yamuye wakumalakilana, ngati umu Dadi winu wa kunani ayii wakumalakilana.
Цяпер абрана:
Mattayo 5: MGS1937
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
First published by the British and Foreign Bible Society in 1937.