เห่ขุทวาลู่ 4
4
คูคาอิน เน๊อ คูอาแบล
1เพอาดาม โอ่เมอเต่อ เน๊อ อาเม เหมาะเอวา เร๊อ อา โหมะดอ เร๊อ อา พู๊โอ่หนิ อาพู๊เพรคู เตเพร เร๊อ เหมาะเอวา เฮ๊ เน๊อ, “จอแปแหร่ ตูจูเพร เมจว่า แว เร๊อ แว พู๊โอ่หนิ เฮ๊อ แว พู๊เพรคู เตเพร เฮ๊อ,” เร๊อ อา เอ๊ เกอเร๊อ ลูมุย เน๊อ คูคาอิน. 2เด๊อคยาเร๊อ อา พู๊โอ่ หนิ โป่ อาโป่ เพรคู คูอาแบล เร๊อ อา ทวา เพรเกซิหมิ. อาแหม่ คูคาอิน เร๊อ อา ทวา เพรเมแหล่เมกู่เกลพู๊.
3ค๊าขิ โตเฮ๊อ เด๊อ ส่อเส่เผร่ ส่อเส่มี เฮ๊อ เบ๊อะเนอ, คูคาอิน พย๊าแฮหนิ ส่อเส่เหว่โพ เด๊อ อาช๊ออาปลือ เกอเร๊อ เต๊เห่ เร๊อ อา แฮ หลู่แตแถ่ เน๊อ จอแปแหร่ ตูจูเพร. 4หม่าแน๊เรอ คูอาแบล เนอ อา พย๊าแฮหนิ ซิหมิ พู๊แหว่เพร่ว เด๊อ อาโปกู เร๊อดื่อ เออโตโด เร๊อ อา หลู่แถ่ อาบ๊า เด๊อ อาหวิเล๊อ ตื๊อบื่อ เน๊อ จอแปแหร่ ตูจูเพร เร๊อ จอแปแหร่ ซิปล่อ โตเร๊อ คูอาแบล เน๊อ อาเตหลู่เตแต. #ฮีบรู ๑๑:๔ 5หม่าแน๊เรอ คูคาอิน อาเตหลู่เตแต เออเนอ, อา โต จอแปแหร่ ตูจูเพร อาซิปล่อ โต่ อาขว่าอาคยา, คูคาอิน ซิปล่อดุ ตาลว๊า ซิลือ เร๊อ อาเป๊เส่ ปย๊าแก เจ๊อ.
6เร๊อ จอแปแหร่ ตูจูเพร แด๊เฮอ คูคาอิน เน๊อ, “เน จว๊า ซิปล่อดุ โต่ เมเต? เนเป๊เส่ จว๊า ปย๊า โต่ เมเต? 7เน เก่ เมโต เต เก่เฮ๊เรอ แว จู แหน่ เน โต่ แอ? เน เก่ เมโต เต โต่ เฮ๊เรอ เตซื๊อ เออเนอ อาแซ่เน๊อ แอ๊ซี เด๊อ อา โอ่ผื่อ เด๊อ เนช๊า เร๊อ อา เครปื่อเอ่ เน, เร๊อ อา ซิหยื่อ เป๊อหนิ เน หม่าแน๊เรอ เน เบ่ เมเป่แก ลู.”
8เตอเนอเค คูคาอิน เฮ๊ เกอเร๊อ อาโป่ คูอาแบล เน๊อ, “เป เถ่จว๊า เด๊อ เพร๊ขุ โป๋,” เบ๊อะ เหย่ซี โอ่ เด๊อ เพร๊ขุ เบ๊อะเนอ, อา ซิปล่อดุ อาโป่ คูอาแบล เร๊อ อา เมเซอ แก ลู.#มัทธิว ๒๓:๓๕, ลูกา ๑๑:๕๑, ยอห์น อาเหร่อเล๊อ ต๊าบ่า ๓:๑๒-๑๕
9เร๊อ จอแปแหร่ ตูจูเพร แด๊เฮอ คูคาอิน เน๊อ, “เนโป่ คูอาแบล โอ่โต เบ๊อะเต?”
เร๊อ อา เฮ๊ฉื่อ เน๊อ, “แว ซิเง โต่, แว หม่า เพรโอ่ป่อม๊า แวโป่ หม่าแหน่ แอ?”
10จอแปแหร่ ตูจูเพร เฮ๊ ลู เน๊อ, “เน จว๊าเมโต่ ฮู๊เออ เมเต? หนิดามอ! เนโป่สุ่ยเนอ อา โอ่ เด๊อ เห่เล เร๊อ เอ๊โทแถ่ เด๊อ แวโอ่ เฮ๊อ.#ฮีบรู ๑๒:๒๔ 11ฮู๊เนออาขว่าอาคยา, แซ่ฮู๊ เห่ขุ เด๊อ อา จุ๊ยโอ เนโป่ อาสุ่ย เด๊อ เน เมเซอสุ่ยตา ลู เออ เก่ เส่เถ่โพเถ่ เป่ ปา แต่ เด๊อ เนเง แต่เหม่เนอ, แว อิชอฮา แก เน เฮ๊อ. 12ช๋า เนเอ่เนแร อิช๊ออิปลือ เกออู เบ๊อะ เห่ขุ เออ ปาเนอ, อา เก่ เส่เถ่โพเถ่ เป่ เกอ เน โต่ ปา. เนโชโดหี่ โชโดเพร๊ ปา, เน เบ่ แกล่โทแกล่แล เด๊อ เห่ขุเออ ปา,” อา เฮ๊ ลู ฮู๊เนอ. 13คูคาอิน เฮ๊ จอแปแหร่ ตูจูเพร เน๊อ, “เนเตเมจากาคยาเออ อาแป่อาเช แหน่เจ๊อ เด๊อ แวเง เจ๊อ, แว ข่าเบ๊ ปาเจ๊อ แหน่โต่เฮ๊อ. 14กู๊แหน่เร๊อ เนเหว่เถ่จว๊า ตาพายา แกเฮ๊อ แว เน๊อ เห่ขุ เด๊อ แว เหล่อิช๊ออิปลือเอ่ เกอเร๊อเออ เน๊อ เด๊อ เนเป๊เส่เง เฮ๊อ. แว เก่ ทวาเฮ๊อ เพรเลโทเลแล โชโดเหล่โอ่โก๊ เด๊อ เห่ขุเออ เฮ๊อ. อูเปเป๋ เบ่เบ่ เด๊อ อา แม๊เถอะ แว เต๊เห่เนอ, อา เก่ เมเซอ แนเฮ๊อ แว ปา.” 15หม่าแน๊เรอ จอแปแหร่ ตูจูเพร เฮ๊ ลู เน๊อ, “อา หม่า โต่. แกแย เตเพรเพร เด๊อ อา เมเซอ เนเนอ อา เก่ ข่าเบ่ เลอ กาคยา จาเล๊อ ปาเจ๊อ เน๊อ เน โซซว๊า โตโพ่ เจ๊อปา.” โทเร๊อ แซ่ฮู๊ แกแย เด๊อ อา แม๊เถอะ คูคาอิน เต๊เห่ เก่ เมเซอ แต่ ลู แต่เหม่ อาเงเนอ, จอแปแหร่ ตูจูเพร เมม๊าเมแดแก เตเต๊อเจ่อ เด๊อ คูคาอินลู. 16เมฮู๊เนอเร๊อ คูคาอิน เถ่จว๊าตาพา แก เด๊อ จอแปแหร่ ตูจูเพร อาเป๊เส่เง เร๊อ อา จว๊าโอ่ เด๊อ โนดเก่, เอเดนเตเร๊ ซิเถ่ ตากยา. (โนด อาโหง่แลช๊า เด๊อ ฮีบรูโหง่ หม่า จว๊าเล ตาวา.)
คูคาอิน อากลุยอาลุ๊ย
17เร๊อ คูคาอิน โอ่เมอเต่อ เน๊อ อาเม เร๊อ อาโหมะดอแถ่, เร๊อ อาพู๊ โอ่ หนิ คูเอโนค. คูคาอิน ช๊อแถ่ หนิ วีเอโนค เร๊อ วี เออเนอ อา เอ๊มุย เกอเร๊อ เน๊อ อาพู๊มุย คูเอโนค. 18คูเอโนค อาพู๊ มุย เน๊อ คูอิราด, คูอิราด พู๊ หม่า อามุยเน๊อ คูเมหุยาเอล, คูเมหุยาเอล อาพู๊ หม่า อามุยเน๊อ คูเมธูชาเอล, คูเมธูชาเอล อาพู๊ หม่า อามุยเน๊อ คูลาเมค. 19คูลาเมค พย๊าหนิ อาเม ซิเนอ, เตเพรเร๊อ อามุย เน๊อ เหมาะอาดาห์, เตเพร เร๊อ อามุย เน๊อ เหมาะศิลลาห์. 20โหมะอาดาห์ พู๊โอ่ หนิ คูยาบาล เร๊อ คูยาบาล หม่า อา หม่าดื่อ เพอโพ เด๊อ อา เลอิช๊อโอ่ เหล่สื่อ โต๊โผะ โท โต๊โผะ เร๊อ อา โบ่ เตมีเตดอ อาเหร่อเล๊อ เตเพร เฮ๊อ. 21คูยาบาล อาโป่ อามุย เน๊อ คูยูบาล. คูยูบาล หม่า อาทวา ล๋อ แกแย เด๊อ อา ด่อ ตี่, อา โอ๊ ปีโล๊ เน๊อ อา โอ๊ ปี๊แกแล๊ เนอเต๊เห่ อาเพ เฮ๊อ. 22เหมาะศิลลาห์ พู๊โอ่ หนิ คูทูบัลคาอิน. อาหม่า เพร ดาเถ่ ล๋อ ตาหมื่อตาเต เน๊อ ตีลี เน๊อ ต่อเท๊ เนอ เตเพร เฮ๊อ. คูทูบัลคาอิน อาโป่เพรเหมาะ หม่า อามุย เน๊อ เหมาะนาอามาห์.
23เพลาเมค เฮ๊ เกอเร๊อ อาเม ซี เต๊เห่ เน๊อ,
“เก๊อ เหมาะโหมะ ซี!
หนิดา แลแค แว เฮ๊ เป่ ซี เออ.
เพรคู หน่าเจ่พู๊ เตเพร เมเช แว เร๊อ แว เมเซอแก ลู เฮ๊อ.
24แกแย เด๊อ อา เมเซอ คูคาอิน เตเพรเพรเนอ,
อา เบ่ ข่าเบ่ เล๊อ กาคยา จาเล๊อ เจ๊อเน๊อ ลู โซซว๊า โตโพ๊ ปา เก่เฮ๊เร๊อ แกแย เด๊อ อา เก่ เมเซอติ แว เตเพรเพร เฮ๊เนอ,
อา เบ่ ข่าเบ่ เลอ กาคยา จาเล๊อ เจ๊อเน๊อ โซซว๊า เตอเชอ เน๊อ โซซว๊า โตโพ๊ เจ๊อ ปา.”
25เพอาดาม โอ่เมอเต่อ คยาแซ๊ เน๊อ อาเม เร๊อ อา พู๊โอ่ หนิ อาพู๊เพรคู เตเพร เร๊อ โหมะเอวา เฮ๊ เน๊อ, “คูอาแบล เด๊อ คูคาอิน เมเซอแก ลู เนอเตเพร อาเหล่โอ่เนอ, จอแปแหร่ดุ เด๊อะ แว พู๊เพรคู เตเพร เร๊อ อา เด๊อะเต๊เปล่ คยาแซ๊ เป่เฮ๊อ แว พู๊เพรคู เตเพร เฮ๊อ,” ฮู๊เนอเร๊อ อา เอ๊ เกอเร๊อ ลูมุย เน๊อ คูเสท (เสทอาโหง่แลช๊า เด๊อ ฮีบรูโหง่ หม่า อา เด๊อะ.) 26เพเสท พู๊โอ่ หนิ อาพู๊เพรคู เตเพร เร๊อ อา เอ๊ เกอเร๊อ ลูมุย เน๊อ คูเอโนช เป๊อแถ่ เบ๊อะเนอเค, แกแย เต๊เห่ เป๊อแถ่ จ๊อเบแถ่ จอแปแหร่ ตูจูเพร เฮ๊อ.#ลูกา ๓:๓๘
Цяпер абрана:
เห่ขุทวาลู่ 4: EKTNTGEN
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце