Евангелле паводле Мацвея Раздзел 24
Раздзел 24
1 #
Мк. 13:1; Лк. 21:5 І, выйшаўшы, Ісус пакрочыў ад святыні, і падышлі вучні Яго, каб паказаць Яму пабудовы святыні.
2 #
Мк. 13:2; Лк. 19:44 Ён жа, адказваючы, сказаў ім: «Хіба не бачыце вы гэта ўсё? Сапраўды кажу вам: не застанецца тут каменя на камені, які б не быў зруйнаваны».
3 #
Мк. 13:3; Лк. 17:20; 2Пёт. 3:10 А калі Ён сядзеў на Аліўнай гары, прыйшлі вучні да Яго на адзіноце і пыталіся: «Скажы, калі гэта будзе, і які знак Твайго прышэсця і сканчэння веку?»
4І, адказваючы, Ісус сказаў ім: «Глядзіце, каб хто вас не звёў.
5 #
Лк. 21:8; Ян. 5:43; Дзеі 5:36; 1Ян. 2:18 Бо многія прыйдуць у імя Маё, кажучы: “Я – Хрыстос”, і многіх звядуць.
6 #
Мк. 13:7; Адкр. 6:2 Пачуеце вы пра войны і чуткі пра войны; глядзіце, каб не напалохаліся, бо так належыць быць, але гэта яшчэ не канец.
7 #
Мк. 13:8; Адкр. 6:5 Падымецца народ на народ і царства на царства, і будуць голад, моры і месцамі землятрусы.
8Гэта ўсё – пачатак родавых боляў.
9 #
Мк. 13:9; Лк. 21:12 Тады будуць выдаваць вас на пакуты і забіваць вас будуць, ды будзеце вы зненавіджаны ўсімі народамі за імя Маё.
10І тады многія згоршацца, і будуць выдаваць адзін аднаго, і будуць ненавідзець адзін аднаго,
11 #
Дзеі 20:29; 2Пёт. 2:1 і паўстануць многія фальшывыя прарокі і будуць зводзіць многіх.
12І ад таго, што памножыцца беззаконне, астыне любоў у многіх.
13 #
Мк. 13:13; Адкр. 2:10 Але хто вытрывае да канца, той будзе збаўлены.
14 #
Рым. 10:18; Адкр. 14:6 І будзе прапаведавацца гэтае Евангелле Валадарства па ўсім свеце на сведчанне ўсім народам; і тады прыйдзе канец.
15 #
Дан. 9:27; 11:31; 12:11; Мк. 13:14; Лк. 21:20 І, калі ўбачыце нарэшце агіду спусташэння, якая паўстане на святым месцы, як сказана Даніэлем прарокам, – хто чытае, хай разумее, –
16тады тыя, што ў Юдэі, хай уцякаюць у горы,
17і хто на даху, хай не сыходзіць, каб узяць што-небудзь з дома свайго;
18і хто на полі, хай не вяртаецца забраць свой плашч.
19 #
Лк. 23:29
Гора цяжарным і тым, хто корміць грудзьмі у тыя дні!
20Дык прасіце, каб вашы ўцёкі не былі зімою ці ў суботу.
21 #
Дан. 12:1; Адкр. 3:10; 7:14 Бо тады будзе вялікая пакута, якой не было ад пачатку свету аж дасюль, дый не будзе.
22І, калі б не былі скарочаны тыя дні, аніякае цела не ўратавалася б, але дзеля выбраных будуць скарочаны тыя дні.
23 #
Мк. 13:21; Лк. 17:23 Тады, калі б хто вам казаў: “Вось тут Хрыстос”, або: “Там”, – не верце.
24 #
Ян. 4:48; 2Тэс. 2:9; Адкр. 13:13 Паўстануць бо фальшывыя хрысты і фальшывыя прарокі і прадставяць вялікія знакі і цуды, – так, каб у зман увесці, калі гэта магчыма, нават абраных.
25Вось, Я наперад вам гэта сказаў.
26Дык калі б вам потым сказалі: “Вось, Ён у пустыні”, – не выходзьце; “Вось, Ён у пакоях”, – не верце.
27 #
Лк. 17:24
Бо, як маланка з’яўляецца на ўсходзе і віднеецца аж да захаду, такім будзе і прышэсце Сына Чалавечага.
28 #
Лк. 17:34
Дзе будзе труп, там збяруцца і арлы.
29 #
Іс. 13:10; 34:4; Эзэк. 32:7; Ёэль 2:10, 31; 3:15; Дзеі 2:20; Адкр. 6:12 А зараз па тузе тых дзён сонца зацемрыцца, і месяц не дасць святла свайго, і нябесныя зоркі падаць будуць, і сілы, што на небе, пахіснуцца.
30 #
Дан. 7:13; Зах. 12:10-14; Мк. 14:62 І тады з’явіцца знак Сына Чалавечага на небе, і тады заплачуць усе плямёны зямныя, і ўбачаць Сына Чалавечага, Які прыходзіць на аблоках нябесных з магутнасцю і славаю вялікай.
31 #
Геб. 12:19; Адкр. 8:2 І пашле Ён анёлаў Сваіх з трубою гучнай, і збяруць яны абраных Яго з чатырох вятроў, ад краю неба аж да канца яго.
32 #
Мк. 13:28; Лк. 21:29 І навучыцеся прыкладам фігавага дрэва: калі ўжо галінка яго лагаднее і пускае лісты, вы ведаеце, што блізка лета.
33 #
Як. 5:9
Так і вы, калі ўбачыце ўсё гэта, ведайце, што блізка, пры дзвярах.
34 #
Мк. 13:30; Лк. 21:32 Сапраўды кажу вам: не праміне гэтае пакаленне, аж усё гэта станецца.
35 #
Мк. 13:31; Лк. 21:33 Неба і зямля сыдуць, але слова Маё не праміне.
36 #
Мк. 13:32
Што да дня таго і хвіліны, ніхто не ведае, – ані анёлы нябесныя, – толькі Айцец адзін.
37 #
Род. 6:5-8; Лк. 17:26 І як у дні Ноя, так будзе і прышэсце Сына Чалавечага.
38 #
Лк. 17:27; 1Пёт. 3:20 Бо як у той час перад патопам елі і пілі, жаніліся і замуж аддавалі, аж да таго дня, калі Ной увайшоў у каўчэг,
39 #
Род. 7:6-24
і не зразумелі, аж пакуль не прыйшоў патоп і не знішчыў усіх, так будзе і ў прышэсце Сына Чалавечага.
40 #
Лк. 17:36
Тады двое будуць на полі: аднаго возьмуць, а другога пакінуць.
41 #
Лк. 17:35
Дзве будуць малоць у жорнах: адну возьмуць, другую пакінуць.
42 #
Мк. 13:33; Лк. 21:36 Дык чувайце, бо не ведаеце, у які час прыйдзе Госпад ваш.
43 #
Лк. 12:39; 1Тэс. 5:2; Адкр. 3:3 А гэта ведайце, што, каб гаспадар дома ведаў, а якой гадзіне злодзей мае прыйсці, пільнаваў бы і не дазволіў падкапаць дом свой.
44 #
Лк. 12:35; 1Тэс. 5:6 Таму і вы будзьце гатовы, бо ў гадзіну, якой вы не ведаеце, Сын Чалавечы прыйдзе.
45 #
Лк. 12:42; Дзеі 20:28; 1Пёт. 5:2 Хто, думаеш, з’яўляецца верным і разумным паслугачом, якога паставіў гаспадар над падданымі сваімі, каб ён у вызначаны час даваў ім меру пшаніцы?
46Дабраславёны той паслугач, якога, калі прыйдзе, гаспадар яго знойдзе за такім заняткам.
47 #
Адкр. 21:7
Сапраўды кажу вам, што паставіць яго над усёй сваёй маёмасцю.
48 #
Геб. 10:37
А калі скажа гэны ліхі паслугач у сэрцы сваім: “Марудзіць гаспадар мой з прышэсцем”,
49і пачне біць таварышаў сваіх, і будзе есці і піць з п’яніцамі,
50 #
Мк. 13:32
то прыйдзе гаспадар слугі таго ў дзень неспадзяваны, у гадзіну невядомую
51і аддзеліць яго, ды прызначыць яго долю разам з крывадушнікамі: там будзе плач і скрыгатанне зубоў.
Цяпер абрана:
Евангелле паводле Мацвея Раздзел 24: ББЧ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© МХРБ «Біблейскае таварыства ў Рэспубліцы Беларусь», 2017