Rut 4
4
Boas Teis Teor
1Boas laa ni saalmata tuu tafae la sidadi i medei ni la-ura. Ni hati kidura, teor ubu room ois sidadi ma alibur loor oid daad teor. Raat nor raat, ni sao iid deis baefe nei 'direitu seul togout' oid leob kaben nor Rut meit faklau ois la-ura, i Boas haah ura oid dega, "Bou! Maa medei laad ni uri! Au naa kase nor iit." I roo ura meit laa medei ni la-ura. 2Boas haah teor ubu saguul ois sidadi kidura, oid sai sasin dega, "Am-nai room ma medei ni uri oid fliik teor uri." I room meit la medei.
3Boas dega la ni sao baefe nei 'direitu seul togout' la Rut, "Bou, iit hii anoin rae eha iid baefe iit sao Elimeleke ni, ka? Muna, rae hii beli, ura laa telo rae Moabe, raat maet ni la-ura. I ura ni hina Noemi sai hiin haul, suil soub ois la-ura, i ura akar seo ni rae. 4Fliik manura, au meit anoin dega: kerkoed au nee taad muun la bou, deislaa bou fe nei 'direitu naa seul togout' oid hu rae ura. Deislaa bou nor Elimeleke sai ois tata iid lea. Deis manuri se bou akar al rae ura, dega enene, ni taat maen teor ubu room nor artuub baefe ni meit ahe, oid room sai man sasin. Mahee se tais, dega ni sasin room ni ahe, deislaa au akar al. Tuir doloo bou fe nei direitu muun. Mahee se bou boi, direitu ura mou la au."
I roo ura ataan, "Doloo soub. Au fe al."
5I Boas dega deis, "Ba leob bruis, mahee bou tenki anoin, se arfiil iit al rae ura ois Noemi, iit meit tenki kaben nor hiin Moabe, gala Rut. Deislaa Rut fe kaben nor Elimeleke ni ana Malon baefe maet telo soub. I manura, bou hii kaben nor Rut, oid nee bei-ana la ni mane Malon baefe maet soub, manura ura ni soi nor rae seirgaa ba sai ois ura ni sao."
6Roo ura ataan, "Se manura, ba leob bruis, au boi al. Arfiil au al, au soi rae seirgaa lako soub. Au soi seirgaa nor au ana hii sai bei-ana la Elimeleke ni. Manura, kerkoed au balikan al. Fois la kau Boas lea fe seul togout rae ura i kaben nor hiin too."
7(Ni leolban la-ura, arfiil roo Israel akar nee room direitu oid seul togout ka seo room soi seir la roo selu al, room asai sinelus nee la roo too. Ura man sinaal iid dega, room nee soub room direitu.)#Deuteronomio 25:9
8Manura roo nee direitu la Boas dega, "Iit lea fe al". I ura meit asai sinelus nee la Boas.
9I Boas dega la teor ubu room nor roo meit ni la-ura, "Am-nai room meit sai sasin ni leolban iduri. Direitu ura mou soub la au. Au nee taad enene dega, au fe seul togout soub la Noemi soi baefe ois Elimeleke nor ni ana maen room, Kilion nor Malon, baefe maet soub. 10Au baloos akar rae ura lea, Au meit kaben hiin ois Moabe, Rut, Malon ni hina muna, deislaa au seul togout soub direitu iduri. Aem ubu ruu ni ana leob sai Malon ni bei-ana. I manuri, Malon ni sao nor roo ni aldeia hii ba miliug ni gala. Iim fe sai sasin ni leolban iduri."#Deuteronomio 25:5-6
11I teor ubu room ni sidade ura nor roo meit baefe alibur ni la-ura ataan dega, "Doloo didi! Aem fei rasik nor aem mata. Aem fe sai sasin.
Hiin baefe tafae la iit uma,
NAI Maromak fun ura sai man Rakel nor Lea.
Deislaa roo Israel meit maa ois room ubu ruu ni bei-ana.
NAI Maromak fun iit sai roo tuu ni Efrata,
i sai roo baefe gala kode ni sidade Belem.#Jenesis 29:31
12Tuug la NAI Maromak nee la iit, aan ois hiin milio ura,
manura iim ubu ruu ni bei-ana sai rini,
man Juda nor Tamar ni ana,
iit tata-kala Peres ni bei-ana."
Boas nor Rut eot ana
13Toom ma Boas kaben nor Rut. Arfiil room ubu ruu haah loor, NAI Maromak laek Rut ni ana hati, oid ura leob eta ruu. I ura medei aef an maen iid.
14Medei aef telo, hiin room ni Belem nee taad la Noemi dega,
"Anai la NAI Maromak!
Deislaa ura nee soub bei-ana la iit,
oid iit sao ni gala ba leob lako.
Manura an ura ada-airuu sai roo tuu ni Israel.
15Fedu aan too
fun iit senti milio siil!
Fedu aan ura
fois mata la iit arfiil iit mai soub!
Deislaa iit hiin heu baefe medei aef iit bei-ana too,
atuud soub ni doim la iit.
Hiin heu idura,
nee la iit kode faklau ana maen ubu liim-nai-rua too."
16Noemi kou telo aan too, i kuidaud ura man ni ana rasik.
17I hiin room ni sidade ura kase dega, "Noemi man nei siil aan soub." I room nee gala la aan too 'Obede'.
Arfiil Obede tuu, ura nei ana maen iid, gala Jesse. I Jesse nei aan maen iid, gala David, baefe sai daot.
18Idura fe tata-kala Peres ni bei-ana:
Peres ni ana fe Esron.
19Esron ni ana fe Raun.
Raun ni ana fe Aminadabe.
20Aminadabe ni ana fe Nason.
Nason ni ana fe Salmon.
21Salmon ni ana fe Boas.
Boas ni ana fe Obede.
22Obede ni ana fe Jesse.
Jesse ni ana fe daot David.
Цяпер абрана:
Rut 4: BMGM
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023 Wycliffe Bible Translators Inc