GÉNESIS 3
3
Runaca, Diosta na cazushcamanda
1Ashtahuangarin, Mandaj Taita Dios rurashca animalcunamanda yalica, pambapi causaj culebrami, umachinata alipacha yachaj carca. Chai culebrami, huarmitaca cashna nirca:
“Cangunataca, ¿Taita Dioschu: ‘Huertapi tucui quirucunamandaca, na micunachu canguichi’ nirca?” nishpami tapurca.
2Shina tapujpimi huarmica, culebrataca cashna nirca:
“Huertapi tiyaj quirucunapi fucushcataca, micunallami canchi. 3Ashtahuangarin, Taita Diosca, huerta chaupipi shayajuj quirupi fucushcamandaca: ‘Ama huañungapaca, napacha micunachu canguichi, tacaritapash na tacarinachu canguichi’ nircami” nirca.
4Shina nijpimi culebrapash, huarmitaca cashna nirca:
“Napacha huañunguichica. 5Ashtahuangarin, chai quirumanda ima punlla micushpapash, cangunapaj ñavi pascarijpimi, alita, na alitapash yachashpa, cangunapash, Taita Dios yachajshnallata tucuita yachai ushanguichi. Chaitaca, Taita Diospash yachanmi” nircami.
6Chashna nijpimi huarmica, quirupi fucushcataca micungapa ali cajta, munanayai ricurijujta yacharca. Chai quirupi fucushcataca, alipacha yachashca cangapa, ali cajtami ricurca. Chaimandami, chai quirupi fucushcataca japishpa micurca. Shinallata, paipaj cusamambash carajpimi paipash, chashnallata micurca. 7Chaita micujhuanmi, ishcandipaj ñavi pascarijpi, lluchullacuna carishcata yachanajurca. Shina cashpami, higo fangacunata sirashpa, paicuna quilparinata ruranajurca.
8Ña chishi huairajujpimi, Mandaj Taita Diostaca huertapi purijujta uyanajurca. Shina cajpimi jarica, paipaj huarmindi Mandaj Taita Diospaj ñaupajmanda, huerta yura ucupi pacajugrirca. 9Ashtahuangarin, Mandaj Taita Diosca, runataca:
“¿Maipita cangui?” nishpami cayarca.
10Shina cayajpimi paica, cashna nirca:
“Huerta ucupi, Can rimajujta uyashpami, lluchulla caimanda, manllashpa pacajurcani” nircami.
11Shina nijpimi Taita Diosca, cashna nirca:
“Candaca, ¿pita, lluchullami cangui, nirca? ¿Ama micunguichu nishpa, Ñuca mandashca quirumandachu micurcangui?” nirca.
12Shina nijpimi runaca, cashna nirca:
“Ñuca cumba cachun, Can carashca huarmimi, quirumanda japishpa carahuarca. Shina carajpimi, ñucapash micurcani” nirca.
13Shina nijpimi Mandaj Taita Diosca, chai huarmitaca:
“¿Imatata rurarcanguiyari?” nirca.
Shina nijpimi, chai huarmica:
“Culebra umachijpimari micurcani” nirca.
14Shina nijpimi Mandaj Taita Diosca, culebrataca cashna nirca:
“Can chashna rurashcamandaca, tucui animalpuramandapash, pambapi causaj tucui animalpuramandapash yalita, na alicachi tucushcapachami cangui. Chaimandami, vijsahuanlla llucashpa puringui. Cambaj tucui causaipimi, alpata micushpa causangui. 15Canhuan, huarmihuanga, fiñanajushpa causachunmi churasha. Shinallata, cambaj miraihuambash, huarmipaj miraihuambash fiñanajuchunmi churasha. Paipaj miraimi, candaca umapi chugrichinga. Canga, chaqui talonbimi chugrichingui” nircami.
16Huarmitaca cashnami nirca:
“Huahuata vijsayu tucushpaca, ashtaca nanaihuanmi ungungui. Shinallata, cambaj munaica, cambaj cusapajmi canga. Paimi, candaca mandashpa charinga” nircami.
17Runatapash cashnami nirca:
“Cambaj huarmi rimajta cazushpami: ‘Chai quirumandaca, ama micunguichu’ nishpa, Ñuca mandashcataca na cazushpa micushcangui. Cambaj jahuami, alpapash ninanda na alicachi tucunga. Tucui cambaj causaipimi, alpapi shinllitapacha shaijushpa imatapash rurashpa, micunataca chari ushangui. 18Pambapica, jatun casha yuracuna, uchilla cashacunami viñanga. Pambapi viñashca jihuacunatami micushpa causangui. 19Canga, cutin alpa tucungacamanmi, imatapash rurashpa, ninandapacha jumbishpa, micunata taringui. Canga, chai alpamanda japishpami rurai tucurcangui. Ñutu alpami cangui, ñutu alpamanllatami tigrangui” nircami.
20Adanga, paipaj huarmitaca, tucui gentecunapaj mama tucuna cajpimi, Eva#3:20 Eva nishpaca causai tiyanatami nijun shutita shutichirca. 21Mandaj Taita Diosca, runamambash, paipaj huarmimambash, animalpaj caracunatami, churajunata rurashpa churachirca. 22Chashna churachishpami, Mandaj Taita Diosca, cashna nirca: “Cunanga runaca alita, na alitapash yachashpami, Ñucanchishnalla tucushca. Cunanga, causaita caraj quirumandaca, paipaj maquihuan japishpa, micushpa, causaita causachunga, napacha saquinachu canchi” nircami.
23Mandaj Diosca, alpamanda japishpa, paita rurashca alpapillata imatapash rurashpa causachunmi, Edén huertamanda llujchishpa cacharca. 24Runata canllaman calpachishpaca, Edén huertamanda, indi llujshimujmanmi, querubín angelcunata churarca. Shinallata, muyushpa ninanda rupajuj espadatapash, causaita caraj quiruman rina ñambi jarcachunmi churarca.
Цяпер абрана:
GÉNESIS 3: QVI16
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.