M. Mattayo 17
17
1LOMBA akapitepo masiku asano na limo Yesu eŵaula pamo naye Petro na Yakobo na Yohana mkwaŵo, ekwera naŵo ku lupiri lutali pa ŵeka: 2naye esanguka chinso pa menso paŵo: chinso chake ching'alala nga ni zuŵa, na minjira yake yenze mbuu nga ni kuŵala. 3Nipo ŵonani, eŵaŵonekera Musa na Eriya enzolaŵira naye. 4Petro elaŵira echiti kwa Yesu, Asikuru, ni chiweme kwasu kuŵa pano: mkazomera nimange pano misasa itatu, umo wanu, umo wa Musa, umo wa Eriya. 5Yeve akali enena, ŵonani, mkumbi usweta wiŵasitika: ŵonani, lizu lifuma mu mkumbi lichiti, Uyu ni mwana wangu wotemweka unutemwa naye; mumvwileni yeve. 6Naŵo asambili akalimvwe echiwa kamvunamile eyopa kwene kantu. 7Yesu echizoŵakumya echiti, Imani, msayopa. 8Ŵeve eŵinula menso ŵaŵo nteŵona muntu sembe Yesu yeka.
9Nipo penzoseluka ŵeve mlupiri Yesu eŵapanga echiti, Msakundululila muntu choŵoneka ichi, mpaka Mwana wa muntu pati auke kwa akufwa. 10Nipo asambili emkonsha echiti, Nga alembi oneneranji kuti Eriya ni ati atangule kuza? 11Naye eyasuka echiti, Lezee Eriya ni ati aze, azapanamike vyonse: 12sembe neo numuuzyani kuti Eriya aliuze, naŵo aliyomziŵa: lomba emchitira viri vyonse vyechipangwa. Tetyo naye Mwana wa muntu soti ni mwati azazuziwire naŵo. 13Pamene apo asambili eziŵa kuti walaŵira naŵo zya Yohana Mbatizi.
14Nipo pamene ŵeve akati zeni ku liumba echiza kwake muntu emfukamila echiti, 15Asikuru, mumchitire chitinti mwana wangu, pakuti ana njirinjiri kuzuzika kuŵipa: chikomo kanyinji opona ku mulilo, kanyinji ku manzi. 16Nimtwala kwa asambili ŵanu, naŵo aliyokumompozya. 17Yesu eyasuka echiti, We luko lulive mvwano nochita mmpuno, ninkale namwe mpaka zuŵanji? nimlekeleleni mpaka zuŵanji? izani naye kuno kwangu. 18Naye Yesu emtuzula, na chiŵanda chifuma mwake, na mlumbwana epola chitatikile kansita kamene ako. 19Pamene apo echiza asambili kwa Yesu peenze pa yeka echiti, Ni chinji patiliyokuma kuchifumya? 20Enena naŵo, Chifukwa chochepa mvwano kwanu: pakuti lezee numuuzyani, Kati muli nawo mvwano nga ni kambuto ka sinape, mngati ku lupiri ulu, Nyerapo uye kula, nipo lize linyere; paŵeve kantu kati kaŵe kosachitika na mweo. [21Lomba mtundu uyu sufumamo sembe polomba na politana vyakulya.]
22Penzekuswa ŵeve mGalilaya Yesu elaŵira naŵo kuti, Mwana wa muntu azavumbuliwe mmanja a ŵantu; 23amene ati azampaye, nipo siku la mazo azaushiwe. Naŵo endandaula kwene kantu.
24Lomba ŵeve akati fwike ku Kapernaumi ŵala opokera ndalama ya didrakima echiza kwa Petro enena naye, Nga msambizi wanu ntolipa kansi didrakima? 25Echiti, Inde, olipa. Nipo pechiloŵa mnanda Yesu ni etangolaŵira naye echiti, Ulinga syani, Simoni? nga mafumu a pano pansi opokera kwa ŵani vyolipa kano msonko? kwa ŵana ŵaŵo kano kwa alwendo? 26Naye akati, Kwa alwendo, Yesu echiti kwake, Chifukwa chake ŵana ni paali a wanoŵene. 27Lomba tingaŵapilingisye aŵo nkoya ku chimana, ukapoze uloŵo noula saŵi lotatikoloŵolewa; nipo ukalichenamule mkanwa ukafwangemo ndalama ya statera: uiule yamene iyo uzoŵapere pa mutu pangu na weo.
Цяпер абрана:
M. Mattayo 17: MA23
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mapangano Alomba © Bible Society of Zambia, 1923.