लुका 7
7
रोमी कप्तानगीइ सेमल्हुक
(मत्ती ८:५-१३)
1येशुइ मीःइ पोर्चोमला लोप्सीःङमीःजीक खुङ कफर्नहुम युःलला काःल्सी। 2ओःला रोमी कप्तानगीइ माःङ्बुरा च्याःम्बु पेःक्योक लाबु नेःपा काःल्दी सीजेरा छोल्दी एःके। 3येशुइ बारेला कोःमीःजीक ओः कप्तानगीइ तीबी चीग यहुदीक्याइ छेस्यो मीःक्याला “ओःङ्दी ङाःइ लाबुला टाःच्युतेर” लाःकेन वासी पेःजेला ताङ्सी। 4ओः छेस्यो मीःक्याइ येशुसाःला ओःङ्दी वासी पेःदेरा लाःसी, “रोमी कप्तान तेःन्दामरा ख्याइ ग्वारी ज्योर्कोन मीः इःङे। 5खुङगीइ उःइ क्युःपाला च्याःम्बु पेःउए ओःले उःइ लागी यहुदीक्याइ जोम्साखीम चीगकाङ जोतेर्ती एः।” 6एःन्डुबा वासी पेःक्योक कोःदी येशु खुङक्या ङीमुरा काःल्सी। येशु खीम सुःरला लेप्कासुना कप्तानगीइ राःङगीइ रोःक्याला येशुला एःन्डुबा लेःङ्गो लाःचेला ताङ्सी, “प्रभु, ख्या तुःक्पु माःबे, ख्याला राःङगीइ खीम नाःङ्ला च्युजेला ङाः लायककीइदी म्याः 7नाः ङाः राःङाङ ख्याइ सुःरला ओःङेन लायककीइदी एः। इःनाङ ख्याइ आज्ञा तेर ओःले ङाःइ लाबु टाःदीहाल्ती। 8ङाः राःङाङ छ्योम्बो हाकीमक्याइ आङ्ज्याला तेःती एः, ओःले ङाःइ आङ्ज्यालाङ थेक्या एः। चीगला ‘सुङ’ लाःसी, ओःखो डोउए, राःङ्साला ‘स्यो’ लाःसी ओःखो ओःङ्गुए ओःले राःङगीइ लाबुलाङ ‘एःन्डु पेःदो’ लाःसी, ओःखोइ पेःदीहाल्तीउए।”
9दीखो ताम कोःदी येशु याःमाछाक काःल्सी ओःले राःङला ब्य्राङ्दी ओःङ्क्योक मीःक्याइ पोर्चोमछ्योले तादी खुङगीइ लाःसी, “ङाः ख्याक्याला लाःके, एःजे छ्योम्बो सेमल्हुक लुगेन मीः नी ङाःइ इस्राएलीक्या नाःङ्लाङ थोङ्दी म्याः।” 10ओःखो लेःङ्गो ख्योङेन्दी रोःक्या खीम लोःसुना ओः लाबुदी टाःसीःङ्दी एःके।
येशुइ मोःराङ्मुइ सीक्योक पुःला सेन्च्युक्योक
11चीङ ङीःमा तीङ्ला येशु नाइन लाःकेन क्याःसाला काःल्सी। खुङगीइ योबाक्या ओःले राःङ्सा माःङ्बुरा मीःक्याङ खुङ ङीमुरा काःल्सी। 12येशु क्याःसाइ कोःला लेप्कासुना सीक्योक रोः चीग खुर्ती रोःक्यालक्या डोदेरा एःके। सीक्योक मीःदी मेःराङ चीग मोःराङ्मुइ चीग्रा चीग पुः एःके। ओः मोःराङ्मु ङीमु क्याःसाइ माःङ्बुरा मीःक्याङ एःके। 13मोःराङ्मुइ तुःङाल थोङ्सुना प्रभुइ सेम नीङ च्योःदी ओःङ्सी ओःले खुङला लाःसी, “ख्या माःङु!” 14ओःले तोःङ्ला काःल्दी येशुइ टोःमला देसी ओःले रोःक्यालक्या टक्क अडीइतीसी। ओःले येशुइ सीक्योक पीःटुकला लाःसी, “ए पीःटुक, ङाः ख्याला लाःके, लोःङ!” 15ओःजेरा तीःजीला सीक्योक पीःटुक लाःङ्दी तेःसी ओःले ताम लाःकाला स्युःसी। ओःले येशुइ ओःखो पीःटुकला खुङगीइ आमाला तेर्सी।
16कोन्ज्योइ एःन्डुबा ल्हे थोङ्दी थाम्जेरकीइ खुङला जीबा पेःसी ओःले कोन्ज्योइदी प्रशंसा पेःदेरा लाःसी, “मेःराङ चीग छ्योम्बो कोन्ज्योइ लेःङ्गो तेर्केन्दी उः नाःङ्ला थोङ्दी एः! कोन्ज्यो राःङगीइ मीःक्याला सेन्च्युजेला ओःङ्दी एः!” 17येशुइ ओः पीःटुकला सेन्च्युक्योक लेःङ्गो यहुदीयाकाःङ ओःले ओःखोइ छुर फारकीइ थाम्जेर क्षेत्रक्याला टाःम्सी।
युहन्नाइ येशुइ बारेला ताम सेजेला ताङ्क्योक मीःक्या
(मत्ती ११:२-१९)
18युहन्नाइ योबाक्याइ खुङला येशुइ पेःक्योक दी थाम्जेर ताम लाःसी ओःले युहन्नाइ राःङगीइ ङीथाल योबाक्याला केक्याःप्ती 19प्रभु येशुसाःला एःन्डु लाःती टीःगाला ताङ्सी, “उःइ कुःदी तेःक्योक थार्च्युगेन ख्रीष्ट ख्यारा इःङे ना उःइ राःङ्साइदीरा लाःम ताकोःन्दी इःम्बा?”#७:१९ दीला खुङक्याइ कोन्ज्योइ लेःङ्गो तेर्केन मीःक्याइ माःङ्बुरा तोःङ्ला खुङक्याला लाःक्योक थार्च्युगेन्दी येशु राःङ्रा इःङे ना राःङ्सारा एःपा लाःती येशुला टीःगाला ओःङ्क्योक इःङे। 20ओःले खुङक्याइ येशुसाःला ओःङ्दी टीःसी, “ङीःइ कुःदी तेःक्योक थार्च्युगेन्दी ख्रीष्ट ख्यारा इःङे ना ङीः राःङ्साइदीरा लाःम तागा? दीखो ताम बप्तीस्मा तेर्केन्दी युहन्नाइ ख्याला टीःजेला ङीःला ताङ्क्योक इःङे।”
21ओःखोरा तीःजीला येशुइ माःङ्बुरा मीःक्याला नाःजाक्यालाःम्ले, नेःपाक्यालाःम्ले ओःले हेन्डीक्यालाःम्ले टाःच्युदेरा एःके ओःले माःङ्बुरा मी मेःथोङेन्दी मीःक्याङ मी थोङेन्दी काःल्सी। 22येशुइ युहन्नाइ योबाक्याला लाःसी, “ख्याक्याइ ची ची थोङ्दी एःपा ओःले कोःदी एःपा, काःल्दी ओःखो तामरा युहन्नाला लाःतेर: मी मेःथोङेनक्या थोङ्देरा एः, स्याःल्ठाकक्या डोखुउए, जे नाःजा थेङ्क्योकक्या चाङ्मा जोदी एः, नाःदीङक्याइ कोःदेरा एः, सीक्योकक्या सेन्देरा एः ओःले तुःक्सी-प्राङ्नाक्याइ कोन्ज्योइ याःबु लेःङ्गो कोःजे ज्योर्तेरा एः। 23ङाःइ बारेला पाःकेन मेःबेगेन्दी मीःइ तेःन्दामरा मोलाम ज्योर्ती एः!”
24युहन्नाइ योबाक्या लोःमीःजीक येशुइ मीःक्याला युहन्नाइ बारेला लाःसी, “ख्याक्या उजाड ठाउँला ची तागाला काःल्दी एःके? ची ल्हाबाइ योङ्देरा पेःक्योक मीमाला? 25सुलादी तागाला काःल्क्योक? ची याःबु याःबु केःला केःङ्क्योक मीःला? याःबु याःबु केःला केःङेन मीः नी क्याःल्खाङला छ्याम्डाल पेःदी तेःक्योक ओःङ्गुए। 26तेःन्दामरा लोःप ले, ख्याक्या ची तागाला काःल्दी एःके? ची काःन्दीङ कोन्ज्योइ लेःङ्गो तेर्केन्दीला मीःला? इःङे, तेःन्दामरा ङाः लाःके ख्याक्याइ कोन्ज्योइ लेःङ्गो तेर्केन्दीलेङ छ्योम्बो मेःराङ चीगला थोङ्दी एः 27चीलेलाःना युहन्नाइ बारेला छ्येइ पेज्याला कोन्ज्योइ एःन्डुले लाःती एः:
‘तादो, ङाः ख्या भन्दा तोःङ तोःङ्ला ङाःइ लेःङ्गो तेर्केन्दीला ताङ्देरा एः।
ओःले खुङगीइ ख्याइ लागी लाःम जोगेन एः।’#मलाकी ३:१
28ङाः ख्याक्याला लाःके, दी जाम्बुलीङला केक्योकक्या नाःङ्ला युहन्ना भन्दा छ्योम्बो मीः सुङ म्याः। इःनाङ कोन्ज्योइ क्याःल्खापला काःखो थाम्जेर भन्दा छीमी एःपा, ओःखो खुङ भन्दा ताःरुङ छ्योम्बो इःङे।” 29एःन्डुले थाम्जेर मीःक्याइ ओःले च्याल्गो तुःगेनक्याइयाङ येशुइ ताम कोःसी ओःले कोन्ज्योइ लाःम याःबु एः लाःती ङीःन्सी, चीलेलाःना खुङक्याइ युहन्नालाःम्ले बप्तीस्मा लेःङ्दी एःके। 30इःनाङ फारीसी ओःले छ्येइ ठीमगीइ लोबेनक्याइदी कोन्ज्योइ तेःदाम माःङीन, चीलेलाःना खुङक्याइ युहन्नालाःम्ले बप्तीस्मा लेःङ्दी म्याःके।
31येशुइ लाःसी, “तीःङ्साङ्गीइ मीःक्याला सु ङीमु कार्का ले? खुङक्या काःन्डुबा एःपा? 32खुङक्या नी छोङ्साला केतेङ्देरा तेःकेन पीःजाक्या च्योःङ्रा इःङे। चीगकीइ राःङ्साला एःन्डुले लाःकुएः:
‘ङीःइ ख्याक्याइ लागी लेमु फुतेर्सुना ख्याक्या माःछ्याम।
ङीःइ तुङालगीइ लु लेःङ्गासुना ख्याक्या माःङु।’
33चीलेलाःना बप्तीस्मा तेर्केन्दी युहन्ना ओःङ्सी, ओःले खुङ खा चाङ्मा तेःती अङ्गुरकीइ नीःङ्गार माःथुङ। ओःले ख्याक्याइ खुङला लाःसी, ‘खुङला हेन्डी क्याःप्ती एः।’ 34साःगेन्दी ओःले थुङेन्दी ङाः मीःइ पुः ओःङ्सी ओःले ङाःला दी ख्याक्याइ ‘तादो, ओःखो ङ्यागुरे ओःले छ्याङ्स्योरे, च्याल्गो तुःगेन्दी ओःले लाःयो पेःगेनक्याइ रोः!’ लाःती माःताक्पा च्याःङ्देरा एः। 35इःनाङ नावा डीक्पु इःङे लाःकेन ताम नावा च्योःङ्राले डोगेनक्याइरा तेङेन्दी पेःउए।”
येशु सीमोन फारीसीइ खीमला काःल्क्योक
36मेःराङ चीग फारीसीइ येशुला साःप्च्या साःगाला केक्याःप्सी। येशु काःल्दीमाराङ खुङगीइ खीम नाःङ्ला स्युःदी साःप्च्या साःजेला तेःसी। 37ओः क्याःसाला मेःराङ चीग क्याःलाम लेःगा पेःगेन्दी पेःन्पीःजा एःके। ओः पेःन्पीःजाइ फारीसीइ खीमला येशु साःप्च्या साःगाला ओःङ्दी एः लाःती छोर्सी। ओःले ओः पेःन्पीःजाइ नेकी#७:३७ नेकी दीखो नेकीदी सीलखडी लाःकेन्दी तोःलाम्ले जोक्योक इःङे। चीगला छेन्दी अत्तर ख्योङ्दी ओः खीमलारा ओःङ्सी। 38खुङ क्याःपलाःम्ले ओःङ्दी येशुइ काङ्बाइ सुःरला लाःङ्दी ङुःगाला स्युःसी ओःले मीज्युइ येशुइ काङ्बा ठुतेर्सी। खुङगीइ येशुइ काङ्बा टाइ फ्यादेरा च्य्वाक पेःदी काङ्बाला अत्तर पुङ्तेर्सी।
39दीखो थोङ्दी येशुला केक्याःप्केन फारीसीइ सेम सेमलारा लाःसी, “येशु तेःन्दामरा कोन्ज्योइ लेःङ्गो तेर्केन्दी इःङे लाःना नी खुङला देगेन पेःन्पीःजा काःन्डुबा खाले लाःयो पेःगेन पेःन्पीःजा इःङे लाःती ङोःसेजेके।” 40ओः तेःकासु येशुइ ओः फारीसीला लाःसी, “सीमोन, ङाःइ ख्याला चीङ ताम लाःकोउए।” खुङगीइ लाःसी, “लोःप्ना, लोबेन!” 41“कोःदो, मेःन्दा चीग मीःलाःम्ले मेःराङ ङी मीःइ पेःलेन खेर्ती एःके। चीगकीइ क्याःङाथाल ओःले राःङ्साइ खाल ङी रा च्युथाल ङुलगीइ टाङ्गा डेबा खेर्ती एःके। 42खुङक्या काःखोइयाङ पेःलेन च्याल्माःखुगारा केःम्बाइ ङीक्कारला पेःलेन च्याल्मेःको लाःती लाःसी। ताः लोःप ले, काःखोइदी केःम्बाला माःङ्बु च्याःम्बु पेःडो?”
43सीमोनगीइ लाःसी, “ङाःइ ठीवाला माःङ्बु पेःलेन च्याल्मेःकोःन्दीइ च्याःम्बु पेःडो।” येशुइ लाःसी, “ख्याइ डीक्पु लाःसी।” 44येशुइ पेःन्पीःजाछ्योले तादी सीमोनला लाःसी, “दीखो पेःन्पीःजाला तादो ले। ङाः ख्याइ खीमला ओःङ्सी, ओःले ख्याइ ङाःला काङ्बा ठुगेन छ्युथुपाङ मातेर। इःनाङ दी पेःन्पीःजाइ नी ङाःइ काङ्बा मीज्युइ ठुतेर्सी ओःले राःङगीइ टाइ फ्यासी। 45ख्याइ ङाःला च्य्वाक पेःदी तोःङ्ज्याङ माःबे, इःनाङ दीखो पेःन्पीःजाइ नी ङाःला ओःङ्मीःजीकरा काङ्बाला च्य्वाक पेःदी तेःती एः। 46ख्याइ ङाःइ गोला माःर्कु टुःल्मातेर,#७:४६ यहुदीक्याइ खीमला डोम्बोक्या ओःङ्सी लाःना खुङक्याइ काङ्बा ठुजेला छ्यु तेर्कोःउके, खुङक्याइ डाम्बाला च्य्वाक पेःकोःउके ओःले खुङक्याइ गोला माःर्कु टुःल्तेर्कोःउके। इःनाङ दीखो पेःन्पीःजाइ नी ङाःइ काङ्बाला अत्तरथुप पुङ्तेर्सी। 47दीखो पेःन्पीःजाइ चीले एःन्डुबा पेःदी एःपा लाःती ङाः ख्याला लाःके, दीखोइदी माःङ्बुरा लाःयोक्या क्षमा काःल्सीःङ्दी एः। ओः सोङ्गारा, दीखोइ ङाःला माःङ्बुरा च्याःम्बु पेःसी। इःनाङ तीबी लाःयो क्षमा काःल्क्योक मीःइदी तीबीरा च्याःम्बु पेःउए।” 48येशुइ पेःन्पीःजाला लाःसी, “ख्याइ लाःयो क्षमा काःल्सीःङ्दी एः।” 49ओःला साःप्च्या साःजेला तेःक्योक मीःक्याइ लाःकाला स्युःसी, “लाःयो क्षमा पेःखुँ लाःकेन्दी दीखो सु इःङे?” 50इःनाङ येशुइ ओः पेःन्पीःजाला लाःसी, “ख्याइ ङाःला सेमल्हुक लुक्योक सोङ्गारा कोन्ज्योइ ख्याला सेन्च्युदी एः। ताः खाम्साङ्बुले सुङ।”
Цяпер абрана:
लुका 7: SYW
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2024 (Active), Wycliffe Bible Translators, Inc. All rights reserved.