लुका 18
18
मोःराङ्मु ओःले ठीम पेःगेन्दीइ पेदाम
1ओः तीङ्ला येशुइ राःङगीइ योबाक्याला तेन्दुरा प्रार्थना पेःज्युक ओःले नाःमाङ हरेस माःसाःज्युक लाःती पेदाम चीग खुङक्याला लाःसी। 2“क्याःसा चीगला मेःन्दा चीग ठीम पेःगेन्दी एःके। खुङगीइ कोन्ज्योला जीबा मेःबेके ओःले मीःलाङ वास्ता मेःबेके। 3ओः क्याःसालारा मेःन्दा चीग मोःराङ्मुङ एःके। खुङ ओः ठीम पेःगेन्दीसाःला ओःङ्दीरा तेःकुके ओःले लाःकुके, ‘ङाःला ङाःइ टाःलाङलाःम्ले ठीम पेःतेर।’ 4माःङ्बुरा ङीःमाथुप नी खुङगीइ ओः मोःराङ्मुइ ताम कोःजे सेमरा माःबे। फीर्च्या तीङ्ला खुङगीइ सेम सेमलारा लाःसी, ‘ङाः कोन्ज्योइ जीबाङ मेःबेए ओःले मीःला वास्ताङ मेःबेए, 5फीर्च्या दी मोःराङ्मुइ ङाःला माःङ्बुरा तुःक्पु तेर्कारा दीखोला ठीम पेःतेर्के, मीःङे लाःना दीखोइ ओःङ्दीरा तेःती ङाःला तुःक्पु तेर्केन एः!’”
6ओःले प्रभुइ लाःसी, “ओः माःताक्पा ठीम पेःगेन्दीइ लाःक्योक ताम कोःदो। 7ओःन्डुलेरा कुःङ्मु ङीःमाला कोन्ज्योला ङुःदेरा वासी पेःगेन राःङगीइ मीःक्याला खुङगीइ अन्यायलाःम्ले न्याय मेतेर्पा ले? ची खुङगीइ ओः खुङक्याला रोः पेःजेला कुःल्बु पेःउबा ले? 8ङाः ख्याक्याला लाःके, कोन्ज्योइ खुङक्याला गेबुरा ठीम पेःतेर्केन एः। इःनाङ ङाः मीःइ पुः लोःदी ओःङ्गासुना ची ङाःइ जाम्बुलीङला कोन्ज्योला सेमल्हुक लुगेन मीःक्या फ्रेटो ले?”
प्रार्थना पेःगेन मेःराङ ङी मीःक्या
9राःङला चीग्रा ताःक्पा टेःम्बा साल्गेन्दी ओःले राःङ्साक्यालादी तुच्छ लाःकेन्दी मीःक्याला येशुइ दीखो पेदाम लाःसी, 10“मेःन्दा ङी मीःक्या यहुदीक्याइ कोन्ज्योइ मन्दीरला प्रार्थना पेःगाला काःल्सी। खुङक्या मेःन्दा चीग फारीसी एःके ओःले राःङ्सादी च्याल्गो तुःगेन्दी एःके।
11फारीसीइ लाःङ्दी राःङगीइ बारेला एःन्डुले प्रार्थना पेःसी, ‘ए कोन्ज्यो, ङाः ख्याला थुजीछे तेर्के चीलेलाःना ङाः राःङ्सा मीःक्या च्योःङ्रा ताःम्बु, माःइबा लेःगाक्या पेःगेन्दी ओःले व्यभीचार पेःगेन्दी च्योःङ्रा म्याः। ओःले ङाः दीखो च्याल्गो तुःगेन्दी च्योःङ्राङ म्याः। 12ङाः हप्ताला थाङ्मा ङी खा चाङ्मा तेःकुए ओःले ङाःइ ज्योर्क्योक थाम्जेरकीइ बो च्युइ बो चीग ङाः ख्याला तेर्कुए।’
13फीर्च्या च्याल्गो तुःगेन्दी मीःइदी थारीङ्बुरा लाःङ्दी नाःम्खालीङछ्योले मीङ माता, बरु प्राःङ्गोक तुःङ्दी ङुःदेरा एःन्डु लाःसी, ‘ए कोन्ज्यो, ङाः लाःयो पेःगेन्दीला नीङ च्योःदो!’” 14ओःले येशुइ लाःसी, “ङाः ख्याक्याला लाःके, ओः फारीसी मीःङे बरु च्याल्गो तुःगेन मीःदी कोन्ज्योइ तोःङ्ला ताःक्पा काःल्दी खीमछ्योले लोःसी। चीलेलाःना काँःदीइ राःङला छ्योम्बो जोउबा, ओःखोदी छीमी ओःङेन एः, ओःले राःङला छीमी जेगेनक्यादी छ्योम्बो ओःङेन एः।”
पीःजाक्याला मोलाम
(मत्ती १९:१३-१५; मर्कुस १०:१३-१६)
15येशुइ राःङगीइ लाःक्पा ज्यादी मोलाम तेर्च्युक लाःती मीःक्याइ राःङगीइ ओःङे पीःजाक्याला खुङसाःला ख्योङ्सी। दीखो थोङ्दी योबाक्याइ ओः मीःक्याला केतेङ्सी। 16इःनाङ येशुइ ओः पीःजाक्याला खुङसाःला केक्याःप्सी ओःले योबाक्याला लाःसी, “पीःजाक्याला ङाःसाःला ओःङ्जे तेर, खुङक्याला माका, चीलेलाःना कोन्ज्योइ क्याःल्खाप दीखोक्या च्योःङ्राइ लागीरा इःङे। 17तेःन्दामरा ख्योक्याला ङाः लाःके, ख्योक्या दी पीःजाक्याइ च्योःङ्रा सेम पेःदी कोन्ज्योइ क्याःल्खापला माःलेङथुप ख्योक्या ओः नाःङ्ला स्युःजे मेःज्योर एः।”
छ्युक्पु मीः
(मत्ती १९:१६-३०; मर्कुस १०:१७-३१)
18मेःन्दा चीग इस्राएली शासककीइ येशुला टीःसी, “ए याःबु लोबेन, ङाःइ नाःमाङ मीसीगेन मीःली ज्योःर्चेला ङाःइ ची पेःकोउबा?” 19येशुइ खुङला लाःसी, “ख्याइ ङाःला चीले याःबु लाःकुबा? कोन्ज्यो चीग्रा याःबु एः राःङ्सा सुङ म्याः। 20छ्येइ ठीमगीइ आज्ञाक्या ख्याइ सेदीरा एः, ‘व्यभीचार माःबे, मीः मासे, माकु, राःङ्साक्याइ बारेला स्योप माक्युःर, ओःले आबा आमाला सेःसा पेःदो।’”#प्रस्थान २०:१२-१६; व्यवस्था ५:१६-२० 21ओः शासककीइ लेःन लोदी लाःसी, “दी थाम्जेर आज्ञा नी ङाःइ छ्यामेमीःजीकरा ङीःन्दी एः।” 22दीखो कोःदी येशुइ लाःसी, “ख्याइ ताःरुङ लेःगा चीग पेःजे लीःती एः, ख्या ङीमु एःक्योक थाम्जेर स्याःक्या चोङ्दी प्राङ्नाक्याला केःदीतेर ओःले ख्याइ नाःम्खालीङला नोःर ज्योर्केन एः, ओः तीङ्ला स्यो ओःले ङाःला ब्य्राङ्दो।” 23दीखो ताम कोःदी खुङगीइ सेम सुःक्याःप्सी, चीलेलाःना खुङ माःङ्बुरा छ्युक्पु मीः एःके।
24खुङगीइ सेम सुःक्याःप्क्योक थोङ्दी येशुइ लाःसी, “छ्युक्पु मीःक्या कोन्ज्योइ क्याःल्खापला स्युःजेला माःङ्बुरा काःबु एः! 25छ्युक्पु मीः कोन्ज्योइ क्याःल्खापला स्युःजे भन्दा ऊँट खापकीइ सुपलाःम्ले स्युःजे तेःमु एः!” 26दीखो ताम कोःगेनक्याइ खुङला टीःसी, “ओःन्डु एःना सुइदी थार्चे ज्योर्खुउबाले?” 27येशुइ लेःन लोदी लाःसी, “मीःक्याइ पेःरामीःखुगेन लेःगाक्या कोन्ज्योइ पेःखुउए।”
28ओःले पत्रुसकीइ लाःसी, “तादो, ङीःक्याइ खीम, पुः-पोःमो ओःले छ्युङ्मा पोःर्ती ख्याला ब्य्राङ्दी एः।” 29येशुइ खुङक्याला लाःसी, “तेःन्दामरा ङाः ख्याक्याला लाःके, कोन्ज्योइ क्याःल्खापकीइ लागी राःङगीइ आबा आमा, की आतानोः, की छ्युङ्मा, की पुःपोःमो की खीम पोःर्केन्दीइ 30ताःसेरा ओः भन्दा माःङ्बु कोन्ज्योइ मोलाम ज्योर्केन एः ओःले सीमीःजीक तीङ्ला नाःमाङ मीसीगेन मीःली खुङक्याइ ज्योर्केन एः।”
येशुइ फीर्च्या राःङ सीगेन ङीःमाइ बारेला लाःक्योक
(मत्ती २०:१७-१९; मर्कुस १०:३२-३४)
31येशुइ चीङ्ङीथाल योबाक्याला छ्यो चीगला खेर्ती लाःसी, “कोःदो, उः यरुशलेमला डोदेरा एः। कोन्ज्योइ लेःङ्गो तेर्केनक्याइ ङाः मीःइ पुःइ बारेला प्रुःक्योक थाम्जेर तामक्या ताः ओःला छाङेन एः। 32चीलेलाःना ङाःला राःङ्सा क्युःपाइ मीःक्याइ लाःक्पाला तेर्केन एः। ओःले खुङक्याइ ङाःला ङ्याप्च्युक पेःगेन एः, बेइज्जत पेःगेन एः, ओःले ङाःइ छेन्दाला छेमाक क्याःप्केन एः। 33खुङक्याइ ङाःला कोर्राइ क्याःप्केन एः, ओःले सेकेन एः। इःनाङ ङीःमा सुमगीइ ङीःमु ङाः सीक्योकलाःम्ले सेन्ङेन एः।” 34इःनाङ योबाक्याइ दीखो काःन्दीङ तामक्या सेमाःखु, चीलेलाःना दीखो तामगीइ लेःन खुङक्यालाःम्ले इप्ती एःके। ओः सोङ्गारा, दीखो ताम खुङक्याइ सेम नाःङ्ला माःकाल।
मेःराङ चीग मी मेःथोङेन मीः मी थोङेन्दी काःल्क्योक
(मत्ती २०:२९-३४; मर्कुस १०:४६-५२)
35येशु यरीहो सहारला लेप्चे चाल्सुना मेःन्दा चीग मी मेःथोङेन्दी मीः लाःमगीइ सुःरला लाङ्दी तेःती एःके। 36मीःक्याइ पोर्चोम डोदेरा पेःक्योक कोःदी ओः मी मेःथोङेन मीःइ ची काःल्देरा दुबा लाःती टीःसी। 37मीःक्याइ ओःखोला लाःसी, “नासरतकीइ येशु दीलाःम्ले डोदेरा एः।” 38दीखो कोःदी ओः मी मेःथोङेन मीःइ छ्योम्बो के तेङ्दी लाःसी, “ए दाऊदकीइ पुः, येशु, ङाःखाला नीङ च्योःदो!” 39ओःले तोःङ तोःङ्ला डोगेन मीःक्याइ ओःखोला खाजुम तेः लाःती केतेङ्सी, इःनाङ खुङगीइ ताःरुङ छ्योम्बो के तेङ्दी लाःसी, “ए दाऊदकी पुः, ङाःखाला नीङ च्योःदो!” 40डोदेरा एःसुना येशु ठीङे लाःङ्दी ओःखो मीःला ओःला खेर्च्यो लाःसी। ओः मी मेःथोङेन मीः येशुइ सुःरला ओःङ्सी ओःले येशुइ टीःसी, 41“ख्योइ लागी ङाःइ ची पेःगा लाःती ख्यो सेम पेःउबा?” ओःखोइ लाःसी, “प्रभु, ङाःइ मी थोङ्खुज्युक।” 42येशुइ खुङला लाःसी, “ख्योइ मी थोङ्ज्युक। ख्योइ सेमल्हुक लुक्योक सोङ्गारा ख्यो टाःदी एः।” 43ओः तेःकासुरा खुङगीइ मी थोङ्सी ओःले कोन्ज्योला थुजीछे तेर्तेरा येशुइ तीङ्ला काःल्सी। दीखो थोङ्दी राःङ्सा मीःक्याइयाङ कोन्ज्योला प्रशंसा पेःसी।
Цяпер абрана:
लुका 18: SYW
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2024 (Active), Wycliffe Bible Translators, Inc. All rights reserved.