Génesis 2
2
1Ísïksï kueraakatesti auanta ka echeri ka iámentu ampe enka jima jaka. 2Acha Kuerap'iri iúmu tsimani jurhiatekua jimpo k'amaraspti kueraani ampe ka imani jurhiatekua mintsikorhespti. 3Ka Diósï úch'akuraspti iúmu tsimani jurhiatekuani ka pínpinhak'uspti, jimpoka imani jurhiatekua míntsikorhespka iámentu ampe jimpo enka xáni kueraapka. 4Ísï kueraakatesti auanta ka echeri. Ima jurhiatekua enka ACHA Diósï echerini ka auantani kueraapka.
K'uiripu enka kueranhaapka Edeni ikarakatarhu
5Nótki ma jásï anhatapu ni uitsakua antarasïrempti echerirhu, jimpoka ACHA Diósï nótki janiraxapka, nít'u nema japi enka echeri ampakerapirinka. 6Parhakpenirhu xúmu k'óru tarharhasïrempti enka iámu kuakantskarempka echerirhu. 7Jimak'ani ACHA Diósï t'upuriri kueraaspti k'uiripuni, ka p'unirhukuspti ka tsípekua íntskuspti. Ka k'uiripuni isï tsípekua íncharhespti.
8Ka ACHA Diósï anhatapuechani ikaraaspti Edenirhu enka kánekua sési jántepka enka jurhiata antarakuarhu ísï jaka, ka jima irestaspti tatakani enka kueraapka. 9ACHA Diósï tsíkiraspti iámentu járhati anhatapuechani enka amanhech'akua júk'aka: Ka teruakuni jarhaspti anhatapu ma enka tsípekueripka ka mimixekueripka, ka máteru anhatapu enka sési amperi ka ístu enka no sési amperika.
10Edénirhu itsï antarasïrempti enka iurheakurhempka ka anhatapuechani atantukuani, jima uératini iurhekua t'ápuru arhut'aspti. 11Ma arhut'ata Pisoni jakakurhisïrempti ka Jabila ísï uanontarhesïrempti, jima enka tiámu mereari jataka. 12Tiámu mereari enka jima jataka kánekua ampakitisti ka ístu japosti xunhanta p'untsukutiri ka tsakapu ónice. 13Tsimani arhut'ata iurhekua, Guijoni arhinhasïnti, ka k'éri iretani Kusini uanontarhesïnti. 14Tanimu arhut'ata iurhekua Jidekeli jakankurhisïnti, ka ima jurhiata antarakuarhu ísï iurhesïrempti, Asiria ísï. Ka t'ámu arhut'ata iurhekua Eufratesi jakankurhisïnti.
15ACHA Diósï, Edénirhu irestaspti tatakani eska ánchetapirinka ka eska kuápirinka. 16Ka ACHA Diósï juramukuspti tatakani ka arhispti: Úakari arhani amanhech'akua enka anhatapuecharhu jukaka imani enkani ikaraaka, 17k'óru ásï akurhuta imani anhatapuni enka mimixekuerika, enka sési ampe amperika ka ístu enka no sési amperika, jimpoka jiáni enkari akurhutaska, sési jimpori uarhiaka.
18Tátsekua ACHA Diósï uantaspti: No sési jarhasti eska tataka jantiok'u irekaaka, jarhuataka eska na uétarhenchani jaka. 19Ka ACHA Diósï echeri jimpo kueraspti iámentu jasï manakorherichani ka káratichani enkaksï auantarhu jámka ka tatakani pákuspti eska jakankurhitaapirinka, ka ísï eska tataka na arhinhatarapka manakorerherichani, ísïksï jakankurhispit tsípiticha.
20Tataka iámentu manakorherichani jakankurhitaaspti, ikimenharhichani ka no ikimenharhichani, ístu káratichani enkaksï auantarhu karak'a, k'óru tataka exespti eskaksï no xáni marhuakusïrempka. 21Jimak'ani ACHA Diósï uinhamentu k'uistaspti tatakani, enka tataka uarhichkamaspti k'uini, tsirinini ma p'itanhaspti, ka tátsekua mínhantaspti. 22Imani tsirini enka tatakani p'itanhapka, ACHA Diósï, nanakani ma kueraaspti ka tatakani jinkuni páspti.
23Jimak'ani tataka uantaspti: I k'óru jucheti k'uiripetarhu ka jucheti únirhu uérakatesti, ka nanaka jakankurhiati, jimpoka tatakarhu p'itanhakateska.
24Jimposï tataka kéntikukuati táte ka nánte jémpani ka mák'uksï úkorhentaati nanakani jinkuni.
25Tataka ka nanaka xásku jámaxapti, jimpoka no k'uratsekuespka.
Цяпер абрана:
Génesis 2: BI-PURHE
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Biblia en P´urhépecha, Michoacán, México © Sociedad Bíblica de México, A.C.