यूहन्ना 15
15
कुहन्डुम तोहङबो दाङ याहल्गाया़
1 “ताहङमा कुहन्डुम तोहङबो ङाहराङ यिहन, ओहले ङाहती याहपदी स्यिहङला ल़ेह पेहकेन्गी मिह यिहम्बा। 2सेदो मे़हयाहएँगी याहल्गा थाम्ज्यी मिहरोगी तुप्ती क्युर नाङगे, यिहॱनाङ सेदो याहगेन्की याहल्गाया़लाती जेन माहङबु याहज्यु म़ेदी मिहरोगी सील नाङगे। 3ङाहगी माक्यो तामगी पेहती ख्या चाङमा काहल सिहन्दी येह। 4ङाह ङ्याम्बु तेह, ओहले ङाह ख्या ङ्याम्बु तेहच्ये येह। पे यिहॱना़: कुहन्डुम तोहङबो ङ्याम्बु याहल्गा ज्यार्ती तेहना मिहम्बा खो राहङगीराङ कुहन्डुम या़ह मी़हखुएँ, ओ़हठीॱराङ ख्या ङाह ङ्याम्बु मेहतेहसीमाना ख्याया़गीॱआङ सेदो या़ह मी़हखुएँ।
5 कुहन्डुमगी तोहङबो ङाह यिहम्बा, ओहले ख्यादी याहल्गाया़ यिहम्बा। सु ङाह ङ्याम्बु तेहकें ओहले ङाहॱआङ खो ङ्याम्बु तेहच्ये येह ओहले खोगी माहङबुराङ सेदोया़ या़हज्ये येह, च्यिबेमाना ङाह ङ्याम्बु खा फ़ेदी ख्याया़गी च्यिॱआङ पेह मी़हखुएँ। 6ङाह ङ्याम्बु मेहतेहकेनया़ला ओ़ह याहल्गाया़ला ल़ेहमु पेहती फिला क्युर चाहङज्ये येह, ओहले ओ़ह काम्ज्ये येह। दि ल़ेहमु याहल्गाया़ला मिहया़गी ग्या़ च्यी़ला रुहप पेहती मेहला लू़ज्ये येह ओहले ओ़ह थाला फुङे डोज्ये येह। 7का़हलेॱआङ ख्या ङाह ङ्याम्बु तेहसीन माना ओहले ङाहती सुङ ख्या ङ्याम्बु येहसीमाना, ख्यागी च्यि लाहङज्ये सेम क्येएँ ओ़ह लाङदोङ, ओहले ओ़हदी ख्यागी ज्योर्च्ये येह। 8ख्यागी माहङबुराङ सेदोया़ या़ह च्य़ूदी ख्या ङाहती स्याहप्च्यी यिहन माएँ दास्यी तेर्च्ये येह। ओहले दि ल़ेहलाॱराङ ङाहती याहपती ज़िज्यिद ओहङज्ये येह।
9 याहपगी ङाहला चेवा जे नाङग्यो ल़ेहमुराङ ङाहगीॱआङ ख्याला चेवा पेहती येह। ता़ह ख्या ङाहती चेवाला तेहतोङ। 10ङाहगी ङाहती याहपती काया़ ङ्यिहन्दी ङाह याहपगी चेवाला तेहक्यो ल़ेहमु ख्यागीॱआङ ङाहती काया़ ङ्यिहन्सीन माना ख्या ङाहती चेवाला तेहच्ये येह। 11ङाहगी काहसो ख्या ङ्याम्बु तेहच्यु, ओहले ख्या क़ेहनाङगी काहङ ख़ूज्यु म़ेदी ङाहगी ख्याला दि तामया़ माक्यो यिहम्बा।
12 ङाहगी का दिराङ यिहन– ङाहगी ख्याला चेवा पेहक्यो ल़ेहमु ख्यागीॱआङ च्यी़गी च्यी़ला चेवा पेहतोङ। #
यूह १३:३४; १५:१७; १ यूह ३:२३; २ यूह १:५ 13राहङ रो़हया़गी तेहन्दाला राहङगी मिहजीराङ तेरक्यो ल़ेहमु छ्यिम्बु चेवानी लेहमेन च्यिॱआङ मिहन। 14ङाहगी माक्यो काया़ ख्यागी ङ्यिहन्सीन माना, ख्या ङाहती रो़ह यिहम्बा। 15ता़ह यिहन्ज्यु ङाह ख्याया़ला योक्पु मेहमाएँ, च्यिबेमाना ताहक्पुगी च्यि पेहकें ओ़हदी योक्पुगी क्यी़ह मेहन्ज्योर्कें। यिहॱनाङ ङाहगी ख्याया़ला रो़ह मा सिहन्दी येह, च्यिबेमाना ङाहगी ङाहती याहप लाहमले थे़क्योगी थाम्ज्यीराङ तामया़ ख्याया़ला स्य़े सिहन्दी येह। 16ख्याया़गी ङाहला मा़हदाम यिहॱनाङ ङाहगी ख्याया़ला दाम्सीन, ओहले ख्या काहल्दी सेदो या़ह च्य़ूदोङ ओहले ख्याया़गी सेदो नाहम-माना या़हदे तेहच्यु म़ेदी ङाहगी ख्याला कुल्सीन। ओ़ह सोङबे ख्यागी ङाहगी मिहनला याहप ङ्याम्बु च्यि लाङगे ओ़हदी याहपगी ख्याला नाङज्ये येह। 17ख्या च्यी़गी च्यी़ला चेवा पेहतोङ म़ेदी ङाह ख्याला का तेर्के।
जाम्बुलीङकी ङ्येन्ज्येन
18 मिहया़गी ख्याया़ला ङेन्ज्येन पेहसीमाना, ख्याया़ला म़ेदी तोहङले ङाहला ङ्येन्ज्येन पेहक्यो यिहन म़ेदी ने़दोङ। 19ख्या दि जाम्बुलीङदी यिहन्गे यिहनानी खुङगी ख्याला राहङदीराङ ने़दी चेवा पेहच्ये येहकें। यिहॱनाङ ख्या दि जाम्बुलीङदी मिहन। ख्याला ङाहगी जाम्बुलीङ यिहन्ज्यु दाम्सीन ओ़ह सोङबे जाम्बुलीङगी ख्याला ङ्येन्ज्येन पेहकें। 20ङाहगी ख्याला माक्यो ताम टेहम्बा साल्दी ज़्यो़, ‘योक्पु खाङबा ताहक्पु म़ेदी छ्यिम्बु ओहङ मी़हखुएँ।’ खुङगी ङाहला तुहक्पु तेर्सीमाना ख्याॱलाङ तुहक्पु तेर्च्ये येह। खुङगी ङाहती ताम ङ्यिहन्सीन माना ख्याती तामॱआङ ङ्यिहन्ज्ये येह। #मत्ती १०:२४; लूक ६:४०; यूह १३:१६ 21यिहॱनाङ खुङगी दि थाम्ज्यी ङाहती मिहनगी तेहन्दाला ख्याया़ला पेहच्ये येह, च्यिबेमाना खुङगी ङाहला ताङ नाङगेन्दीला ङोह मे़हस्येएँ।
22 का़हलेॱआङ ङाह ओहङदी खुङला दि तामया़ माहस्येपा यिहनानी खुङला तिहक्पाकी ङ्य़ेहबा फो़ज्ये म़ेहबा येहकें। यिहॱनाङ ता़हनी खुङला राहङगी तिहक्पाकी तेहन्दाला च्यिॱआङ तेलेन पेहकें ग्या़ॱराङ म़ेह। 23सुगी ङाहला ङ्येन्ज्येन पेहकें, खोगी ङाहती याहपॱलाङ ङ्येन्ज्येन पेहकें। 24लेहमेन सुज्यीगीॱआङ माहबेबाकी याहम्जेन छ्येवागी ल़ेहया़ ङाहगी खुङया़की पाहरक्यीला माहबेबा यिहनानी खुङला तिहक्पाकी ङ्य़ेहबा फो़ज्ये म़ेहबा येहकें। यिहॱनाङ, ता़ह ङाहगी पेहक्यो दि ल़ेह थाम्ज्यी खुङया़गी थोङ सिहन्दी येह यिहॱनाङ खुङगी ङाह दाङ ङाहती याहपला ङ्येन्ज्येन पेहकें। 25यिहॱनाङ, छ्य़े-ठिमला प्रुहक्योकी दि स्याहल तेहन्दा डुप्च्येला दि काहल्ग्यो यिहम्बा, ‘खुङया़गी ङाहला च्यिॱआङ तेहन्दा मे़हबाला ङ्येन्ज्येन पेहसीन।’#भज ३५:१९; ६९:४
26 ङाह याहप लाहमले ख्यासाला रो़हराम जे नाङगेन्दीला ताङज्ये येह। पे यिहॱना़: तेहन्दामकी थु, मिहरो याहप लाहमले फेप फान्ज्यो, मिहरोगीॱराङ ङाहगी तेहन्दाला पाङबु नाङज्ये येह। 27ख्या तोहङ यिहन्ज्युराङ ङाह ङ्याम्बु तेहक्यो सोङबे, ख्याया़ॱआङ ङाहती पाङबु ओहङज्ये येह।”
Цяпер абрана:
यूहन्ना 15: HYLM
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023 (Active), Wycliffe Bible Translators, Inc. All rights reserved.